اردو ترجمہ · UrduUnverified translation

حضرت عائشہ رضی اللہ عنہا نے بیان کیا کہ ابتدا میں (سفر و حضر کی) نماز دو دو رکعت فرض کی گئی تھی‘ پھر سفر کی نماز کو اسی حالت پر رکھا گیا اور حضر کی نماز (چار رکعتیں) مکمل کر دی گئی۔ (بخاری و مسلم) اور بخاری کی ایک روایت میں ہے کہ پھر آپ نے ہجرت کی تونماز چار رکعت فرض کر دی گئی اور سفر کی نماز پہلی حالت پر برقرار رکھی گئی۔ احمد نے اتنا اضافہ کیا ہے کہ سوائے نماز مغرب کے کیونکہ وہ دن کے وتر ہیں اور بجز صبح کی نماز کے کیونکہ اس نماز میں قراء ت لمبی کی جاتی ہے۔

اردو ترجمہ · UrduUnverified translation

حضرت عائشہ رضی اللہ عنہا بیان کرتی ہیں کہ نبی صلی اللہ علیہ وسلم سفر میں (کبھی نماز) قصر پڑھتے اور ( کبھی) پوری پڑھتے تھے اور (اسی طرح کبھی) روزہ رکھتے تھے اور (کبھی) چھوڑ بھی دیتے تھے۔ (اسے دارقطنی نے روایت کیا ہے اور اس کے راوی ثقہ ہیں‘ مگر حدیث معلول ہے۔ اور محفوظ یہ ہے کہ حضرت عائشہ رضی اللہ عنہا خود ایسا کرتی تھیں۔) اور انھوں نے فرمایا کہ ایسا کرنا مجھ پر گراں نہیں ہے۔ (اسے بیہقی نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما بیان کرتے ہیں‘ رسول اللہ صلی اللہ علیہ وسلم نے فرمایا: ’’اللہ تعالیٰ کو یہ پسند ہے کہ جن کاموں میں اس نے رخصت عنایت فرمائی ہے‘ ان میں رخصت پر عمل کیا جائے‘ جس طرح اسے یہ ناپسند ہے کہ معصیت والے کاموں کو کیا جائے۔‘‘ (اسے احمد نے روایت کیا ہے اور ابن خزیمہ اور ابن حبان نے صحیح قرار دیا ہے۔) اور ایک روایت میں ہے : ’’جیسے اللہ تعالیٰ کو پسند ہے کہ اس کے تاکیدی احکام (فرائض) کو ادا کیا جائے۔‘‘

اردو ترجمہ · UrduUnverified translation

حضرت انس رضی اللہ عنہ سے مروی ہے کہ رسول اللہ صلی اللہ علیہ وسلم جب تین میل یا تین فرسخ کی مسافت کے لیے سفر پر تشریف لے جاتے تو دو رکعتیں (نماز قصر) ادا فرماتے تھے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ ہی سے مروی ہے‘ انھوں نے فرمایا کہ ہم نے رسول اللہ صلی اللہ علیہ وسلم کے ساتھ مدینہ منورہ سے مکہ مکرمہ تک کا سفر کیا‘ آپ مدینہ واپس آنے تک دو دو رکعتیں ہی ادا فرماتے رہے۔ (بخاری و مسلم- الفاظ بخاری کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما روایت کرتے ہیں کہ نبی صلی اللہ علیہ وسلم نے ۱۹ روز قیام فرمایا (ان ایام میں) آپ قصر ہی ادا کرتے رہے۔ اور ایک روایت میں ہے کہ آپ نے مکہ میں ۱۹ روز قیام فرمایا۔ (اسے بخاری نے روایت کیا ہے۔)اور ابوداود کی روایت میں ۱۷ روز کا ذکر ہے‘ اور ایک دوسری روایت میں ۱۵ روز کا۔ اور ابو داود ہی میں حضرت عمران بن حصین رضی اللہ عنہما سے مروی ہے کہ آپ کی مدت قیام ۱۸ دن تھی۔ اور اسی میں حضرت جابر رضی اللہ عنہ کا قول ہے کہ آپ نے تبوک میں بیس (۲۰) دن قیام فرمایا اور نماز قصر ادا کرتے رہے۔ اس روایت کے راوی ثقہ ہیں‘ مگر اس کے موصول ہونے میں اختلاف ہے۔

اردو ترجمہ · UrduUnverified translation

حضرت انس رضی اللہ عنہ سے مروی ہے کہ رسول اللہ صلی اللہ علیہ وسلم جب زوال آفتاب سے پہلے سفر کا آغاز فرماتے تو ظہر کی نماز کو عصر کے وقت تک موخر کر لیتے تھے‘ پھر سواری سے نیچے اترتے اور ظہر و عصر دونوں نمازوں کو اکٹھا ادا فرماتے۔ اور جب آفتاب‘ آغاز سفر سے پہلے زوال پذیر ہو جاتا تو پھر نماز ظہر ادا فرما کر سوار ہو کر سفر پر روانہ ہوتے۔ (بخاری و مسلم) اور حاکم کی اربعین میں صحیح سند سے ہے کہ آپ نے ظہر و عصر کی نمازیں پڑھیں‘ پھر سواری پر سوار ہوئے۔ اور ابونعیم کی ’’مستخرج مسلم‘‘ میں ہے کہ جب آپ سفر میں ہوتے اور آفتاب زوال پذیر ہو جاتا تو آپ ظہر اور عصر دونوں اکٹھی ادا فرما کر وہاں سے کوچ کرتے۔

اردو ترجمہ · UrduUnverified translation

حضرت معاذ بن جبل رضی اللہ عنہ سے مروی ہے کہ ہم غزوۂ تبوک میں رسول اللہ صلی اللہ علیہ وسلم کے ہمراہ نکلے تو آپ ظہر اور عصر کی نمازیں اکٹھی پڑھتے تھے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’چار بُرُد سے کم فاصلے پر نماز قصر نہ کرو‘ چار بُرُد مکے سے عسفان تک فاصلہ ہے۔‘‘ (اسے دارقطنی نے ضعیف سند سے روایت کیا ہے۔ اور صحیح یہ ہے کہ یہ روایت موقوف ہے۔اسے ابن خزیمہ نے بھی اسی طرح روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’میری امت کے بہترین لوگ وہ ہیں کہ جب ان سے برائی سرزد ہو جاتی ہے تو بخشش طلب کرتے ہیں اور جب سفر پر ہوتے ہیں تو نماز قصر کا اہتمام کرتے ہیں اور روزہ نہیں رکھتے۔‘‘ (اسے طبرانی نے ضعیف سند کے ساتھ اپنی اوسط میں روایت کیا ہے۔ اور یہ بیہقی کے ہاں سعید بن مسیب کی مراسیل میں سے ہے جسے بیہقی نے مختصر بیان کیا ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما سے مروی ہے کہ مجھے بواسیر کا مرض تھا۔ میں نے نبی صلی اللہ علیہ وسلم سے نماز پڑھنے کے بارے میں دریافت کیا تو آپ نے فرمایا: ’’کھڑے ہو کر نماز پڑھو‘ اگر کھڑے ہو کر نہ پڑھ سکو تو پھر بیٹھ کر پڑھو‘ اور اس کی بھی طاقت نہ ہو تو پھر پہلو کے بل لیٹ کر پڑھ لو۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ نبی صلی اللہ علیہ وسلم نے ایک مریض کی عیادت فرمائی تو دیکھا کہ وہ تکیے پر نماز پڑھ رہا ہے۔ آپ نے وہ تکیہ دور پھینک دیا اور فرمایا: ’’زمین پر نماز پڑھ‘ اگر تیرے بس میں ہے ورنہ اشارے سے پڑھ لے۔ ہاں‘ اپنے سجدوں کے لیے رکوع کی بہ نسبت ذرا زیادہ جھک۔‘‘ (اسے بیہقی نے روایت کیا ہے اور ابوحاتم نے اس کے موقوف ہونے کو صحیح قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا کا بیان ہے کہ میں نے نبی صلی اللہ علیہ وسلم کو (چار زانو ہو کر) نماز پڑھتے دیکھا ہے۔ (اسے نسائی نے روایت کیا ہے اور حاکم نے صحیح قرار دیا ہے۔)