اردو ترجمہ · UrduUnverified translation

حضرت عبداللہ بن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’باجماعت نماز اکیلے شخص کی نمازسے ستائیس درجے زیادہ فضیلت رکھتی ہے۔‘‘ (بخاری و مسلم) اور بخاری و مسلم میں حضرت ابوہریرہ رضی اللہ عنہ سے مروی ہے: ’’پچیس درجے زیادہ ثواب ملتا ہے۔‘‘ اور اسی طرح بخاری میں حضرت ابوسعید خدری رضی اللہ عنہ سے روایت ہے لیکن اس میں جُـزْئً اکی جگہ ’’دَرَجَۃً‘‘ کا لفظ ہے۔

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’اس ذات گرامی کی قسم جس کے ہاتھ میں میری جان ہے! میں نے ارادہ کیا کہ میں لکڑیوں کا حکم دوں‘ چنانچہ انھیں جمع کیا جائے‘ پھر نماز کا حکم دوں تو اس کے لیے اذان کہی جائے‘ پھر کسی آدمی کو حکم دوں کہ وہ لوگوں کی امامت کرائے‘ پھر میں خود ان لوگوں کے پیچھے جاؤں جو نماز میں شریک نہیں ہوتے ‘ پھر (ان کے گھروں میں موجود ہونے کی صورت میں) ان کے گھروں کو ان پر آگ لگا کر جلا دوں۔ اس ذات گرامی کی قسم جس کے ہاتھ میں میری جان ہے ! اگر ان میں سے کسی کو یہ علم ہو جائے کہ اس کو گوشت سے بھرپورموٹی ہڈی مل جائے گی یا دو خوبصورت پائے مل جائیں گے تو وہ نماز عشاء میں ضرور حاضر ہو۔‘‘ (بخاری و مسلم- الفاظ بخاری کے ہیں۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’منافقین پر سب سے ثقیل و بوجھل‘ نماز عشاء اور نماز فجر ہیں اور اگر ان کو اس (عظیم اجرو ثواب) کاعلم ہو جائے جو ان دونوں میں (حاضر ہونے سے ملتا) ہے تو یہ لازماً ان میں شامل ہوں‘ خواہ ان کو گھٹنوں کے بل گھسٹ کر آنا پڑے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے کہ ایک نابینا شخص نبی صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول! میرے پاس ایسا کوئی آدمی نہیں جو مجھے پکڑ کر مسجد میں لے آئے۔ آپ نے اسے رخصت عنایت فرما دی (کہ وہ گھر پر ہی نماز پڑھ لیا کرے۔) چنانچہ جب وہ واپس جانے لگا تو آپ نے اسے بلا کر پوچھا: ’’کیا تم نماز کی پکار (اذان) سنتے ہو؟‘‘ اس نے عرض کیا: جی ہاں‘ تو آپ نے فرمایا: ’’تو پھر اذان کا جواب دو (مسجد میں جماعت سے نماز پڑھو)۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’جو شخص اذان سنے‘ پھر نماز باجماعت میں شامل نہ ہو‘ اس کی کوئی نماز نہیں‘ الاّ یہ کہ کوئی عذر ہو۔‘‘ (اسے ابن ماجہ‘ دارقطنی‘ ابن حبان اور حاکم نے روایت کیا ہے اور اس کی سند مسلم کی شرط کے مطابق ہے لیکن بعض نے اس کے موقوف ہونے کو ترجیح دی ہے۔)

اردو ترجمہ · UrduUnverified translation

حضرت یزید بن اسود رضی اللہ عنہ سے مروی ہے کہ انھوں نے رسول اللہ صلی اللہ علیہ وسلم کے ساتھ صبح کی نماز پڑھی۔ جب رسول اللہ صلی اللہ علیہ وسلم نماز پڑھ چکے تو دو ایسے آدمیوں پر نظر پڑی جنھوں نے نماز (آپ کے ساتھ) نہیں پڑھی تھی۔ آپ نے دونوں کو اپنے پاس بلایا۔ وہ آپ کی خدمت میں حاضر کیے گئے تو (خوف کے مارے) ان کے شانے کانپ رہے تھے۔ آپ نے دریافت فرمایا: ’’تمھیں ہمارے ساتھ نماز پڑھنے سے کس چیز نے روکا؟‘‘ انھوں نے عرض کیا : ہم اپنے گھروں میں نماز پڑھ چکے تھے۔ آپ نے فرمایا: ’’ایسا مت کیا کرو۔ اگر تم اپنے گھروں میں نماز پڑھ لو، پھر تم امام کو پاؤ کہ اس نے ابھی نماز نہیں پڑھی ہے تو تم اس کے ساتھ نماز پڑھو‘ یہ تمھارے لیے نفل ہو جائے گی۔‘‘ (اسے احمد نے روایت کیا ہے۔ اور حدیث کے الفاظ بھی اسی کے ہیں۔ اس کے علاوہ اسے تینوں نے بھی روایت کیا ہے۔ اور ترمذی اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’امام کو اسی لیے مقرر کیا جاتا ہے کہ اس کی پیروی کی جائے‘ لہٰذا جب وہ اَللّٰہُ أَکْبَرُ کہے تو تم بھی اَللّٰہُ أَکْبَرُکہو اور تم اَللّٰہُ أَکْبَرُ نہ کہا کرو حتی کہ امام اَللّٰہُ أَکْبَرُ کہے۔ اور جب وہ رکوع کرے تو تم بھی رکوع کرو۔ اور تم رکوع اس وقت تک نہ کرو جب تک کہ امام رکوع نہ کرے۔ اور جب امام سَمِعَ اللّٰہُ لِمَنْ حَمِدَہُ کہے تو تم اَللّٰھُمَّ! رَبَّنَا لَکَ الْحَمْدُکہو۔ اور جب وہ سجدہ کرے تو تم بھی سجدہ کرو۔ تم سجدہ نہ کرو حتی کہ امام سجدہ کرے۔ اور جب امام کھڑا ہو کر نماز پڑھے تو تم بھی کھڑے ہو کر نماز پڑھو اور جب وہ بیٹھ کر نماز پڑھے تو تم سب بھی بیٹھ کر پڑھو۔‘‘ (اسے ابوداود نے روایت کیا ہے۔ یہ الفاظ بھی اسی کے ہیں۔ اور اس کی اصل صحیحین میں ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے کہ رسول اللہ صلی اللہ علیہ وسلم نے اپنے صحابہ کو پیچھے ہٹے ہوئے دیکھا تو فرمایا: ’’آگے آجاؤ اور میری پیروی کرو اور تمھارے پیچھے والے تمھاری پیروی کریں۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت زید بن ثابت رضی اللہ عنہ روایت کرتے ہیں کہ رسول اللہ صلی اللہ علیہ وسلم نے چٹائی سے ایک چھوٹا (خیمہ نما) حجرہ بنایا اور اس میں نماز پڑھنے لگے۔ لوگوں نے بھی جستجو کر کے معلوم کر لیا اور وہ آئے اور آپ کے ساتھ نماز میں شامل ہوگئے۔ یہ ایک طویل حدیث ہے۔ اور اس میں یہ بھی ہے کہ (آپ نے فرمایا:) ’’فرض نماز کے علاوہ مرد کی افضل نماز وہ ہے جو وہ گھر میں ادا کرے۔‘‘ (بخاری ومسلم)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ حضرت معاذ رضی اللہ عنہ نے اپنے مقتدیوں کو عشاء کی نماز پڑھائی۔ انھوں نے قراء ت لمبی کر دی تو نبی صلی اللہ علیہ وسلم نے فرمایا: ’’اے معاذ! کیا تو نمازیوں کو فتنے میں مبتلا کرنا چاہتا ہے؟ جب تو لوگوں کی امامت کرائے تو ﴿ وَالشَّمْسِ وَضُحَاھَا﴾ ‘ ﴿ سَبِّحِ اسْمَ رَبِّکَ الْاَعْلٰی ﴾‘ ﴿ اِقْرَأْ بِاسْمِ رَبِّکَ ﴾ اور ﴿ وَاللَّیْلِ اِذَا یَغْشٰی ﴾ پڑھا کر۔‘‘ (بخاری و مسلم- الفاظ مسلم کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا رسول اللہ صلی اللہ علیہ وسلم کی اس نماز کے ضمن میں ‘جو آپ نے حالت بیماری میں لوگوں کو پڑھائی‘ فرماتی ہیں: آپ تشریف لائے اور حضرت ابوبکر رضی اللہ عنہ کی بائیں جانب بیٹھ گئے۔ پس آپ لوگوں کو بیٹھے بیٹھے نماز پڑھا رہے تھے اور حضرت ابوبکر رضی اللہ عنہ کھڑے ہو کر۔ حضرت ابوبکر رضی اللہ عنہ نبی صلی اللہ علیہ وسلم کی اقتدا کر رہے تھے اور لوگ حضرت ابوبکر رضی اللہ عنہ کی پیروی میں نماز پڑھ رہے تھے۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’جب تم میں سے کوئی لوگوں کی امامت کرائے تو اسے قراء ت میں تخفیف کرنی چاہیے‘ اس لیے کہ مقتدیوں میں بچے‘ بوڑھے‘ کمزور اور حاجت مند لوگ ہوتے ہیں۔ ہاں‘ جب تنہا نماز پڑھے تو پھر جس طرح چاہے پڑھے۔‘‘ (بخاری ومسلم)

اردو ترجمہ · UrduUnverified translation

حضرت عمرو بن سلمہ رضی اللہ عنہما سے مروی ہے کہ میرے والد نے اپنی قوم سے کہا : میں تمھارے پاس نبی ٔ برحق کے پاس سے آرہا ہوں‘ ان کا ارشاد گرامی ہے: ’’جب نماز کا وقت ہو جائے تو تم میں سے کوئی ایک اذان کہے‘ اور امامت ایسا شخص کرائے جو قرآن حمید کا زیادہ پڑھنے والا (حافظ) ہو۔‘‘ عمرو نے کہا: میری قوم نے دیکھا مجھ سے زیادہ کوئی دوسرا قرآن پڑھنے والا (حافظ) نہیں ہے تو انھوں نے مجھے آگے کر دیا۔ اس وقت میری عمر چھ یا سات برس تھی۔ (اسے بخاری‘ ابوداود اور نسائی نے روایت کیا ہے۔)

اردو ترجمہ · UrduUnverified translation

حضرت ابن مسعود رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’لوگوں کا امام ایسا آدمی ہو جو قرآن حمید زیادہ پڑھنے والا‘ یعنی حافظ ہو۔ اگر اس وصف میں لوگ مساوی ہوں تو پھر وہ امام بنے جسے سنت نبوی کا علم زیادہ ہو۔ اور اگر سنت کے علم میں بھی لوگ مساوی ہوں تو پھر وہ امام بنے جس نے ہجرت پہلے کی ہو۔ اگر اس وصف میں سب برابر ہوں تو پھر وہ امام بنے جس نے پہلے اسلام قبول کیا ہو۔ اور ایک روایت میں سِلْماً (اسلام) کی بجائے سِنًّا (عمر) کا لفظ بھی ہے (یعنی اگر مذکورہ بالا اوصاف میں سبھی برابر ہوں تو پھر ان میں جس کی عمر زیادہ ہو اسے امام بنایاجائے۔) اور کوئی آدمی کسی آدمی کے دائرۂ اقتدار میں امامت نہ کرائے اور نہ گھر میں اس کی مخصوص نشست پر اس کی اجازت کے بغیر بیٹھے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

سنن ابن ماجہ میں حضرت جابر رضی اللہ عنہ سے مروی ہے کہ ’’کوئی عورت کسی مرد کی امام نہ بنے اور نہ کوئی بدوی کسی مہاجر کی امامت کرائے اور نہ کوئی فاجر کسی مومن کا امام بنے۔‘‘ (اس روایت کی سند کمزور ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’اپنی صفوں کو مضبوطی سے ملاؤ اور ان کے درمیان فاصلہ نہ رکھو اور اپنی گردنوں کو آپس میں برابر رکھو۔‘‘ (اسے ابوداود اور نسائی نے روایت کیا ہے اور ابن حبان نے صحیح قرار دیا ہے۔ )

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’مردوں کی بہترین (زیادہ خیروبھلائی والی) صف‘ ان میں سے پہلی صف ہے اور بری (کم درجے والی) صف ان میں سے آخری ہے۔ اور خواتین کی بہترین صف ان میں سے آخری ہے اور بری صف ان میں سے پہلی ہے۔ (اسے مسلم نے روایت کیا ہے۔ )

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ میں نے ایک رات رسول اللہ صلی اللہ علیہ وسلم کے ساتھ نماز ادا کی۔ میں آپ کی بائیں جانب کھڑا ہوگیا تو رسول اللہ صلی اللہ علیہ وسلم نے پیچھے سے میرا سر پکڑا اور مجھے اپنی دائیں جانب کھڑا کر لیا۔ (بخاری ومسلم)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ رسول اللہ صلی اللہ علیہ وسلم نے نماز پڑھائی تو میں اور ایک یتیم (لڑکا) دونوں آپ کے پیچھے کھڑے ہوئے اور ام سلیم رضی اللہ عنہا ہمارے پیچھے تنہا کھڑی ہوئیں۔ (بخاری و مسلم- الفاظ بخاری کے ہیں۔)

اردو ترجمہ · UrduUnverified translation

حضرت ابوبکرہ رضی اللہ عنہ نے بتایا کہ وہ نبی صلی اللہ علیہ وسلم کے پاس عین اس وقت پہنچے جبکہ آپ رکوع کی حالت میں تھے‘ چنانچہ انھوں نے صف تک پہنچنے سے پہلے ہی رکوع کر لیا‘ پھر (رکوع کی حالت میں چلتے ہوئے) صف میں پہنچے‘ پھر (بعد میں) انھوں نے اس کا ذکر نبی صلی اللہ علیہ وسلم سے کیا تو آپ نے فرمایا: ’’اللہ تیری حرص و طمع میں اضافہ فرمائے‘ آئندہ ایسا مت کرنا۔‘‘ (اسے بخاری نے روایت کیا ہے۔)اس میں ابوداود نے اتنا اضافہ نقل کیا ہے کہ انھوں نے صف میں شامل ہونے سے پہلے ہی رکوع کر لیا‘ پھر اسی حالت میں چل کر صف میں شامل ہوئے۔

اردو ترجمہ · UrduUnverified translation

حضرت وابصہ بن معبد رضی اللہ عنہ سے مروی ہے کہ رسول اللہ صلی اللہ علیہ وسلم کی نظرایک ایسے آدمی پر پڑی جو صف کے پیچھے تنہا کھڑا نماز پڑھ رہا تھا۔ آپ نے اسے نماز لوٹانے کا حکم دیا۔ (اسے احمد‘ ابوداود اور ترمذی نے روایت کیا ہے۔ ترمذی نے حسن اور ابن حبان نے صحیح کہا ہے۔) اورابن حبان میں طلق بن علی رضی اللہ عنہ سے روایت ہے: ’’صف کے پیچھے اکیلے آدمی کی نماز نہیں ہوتی۔‘‘ اور طبرانی نے وابصہ کی حدیث میں اتنا اضافہ بھی نقل کیا ہے: ’’تو ان کے ساتھ ہی داخل کیوں نہ ہوا‘ یا پھر تو کسی نمازی کو (پہلی صف میں سے) پیچھے کھینچ لیتا۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’جب تم نماز کی اقامت سنو تو نماز کی طرف اطمینان و سکون اور وقار کے ساتھ چل کر آؤ‘ رفتار میں تیزی مت اختیار کرو۔ پھرجتنی نماز جماعت کے ساتھ پا لو اتنی پڑھ لو اور جو باقی رہ جائے اسے (بعد میں) پورا کر لو۔‘‘ (بخاری و مسلم- الفاظ بخاری کے ہیں۔)

اردو ترجمہ · UrduUnverified translation

حضرت ابی بن کعب رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’ایک آدمی کا دوسرے آدمی کے ساتھ مل کر نماز پڑھنا تنہا نماز پڑھنے سے کہیں زیادہ پاکیزہ اور اجر و ثواب کا موجب ہے۔ اور دو آدمیوں کے ساتھ مل کر نماز پڑھنا ایک آدمی کے ساتھ مل کر نماز پڑھنے سے زیادہ اجر و ثواب کا باعث ہے۔ اسی طرح جتنے افراد زیادہ ہوں اتنا ہی اللہ تعالیٰ کے ہاں زیادہ محبوب ہے۔‘‘ (اسے ابوداود اور نسائی نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ام ورقہ رضی اللہ عنہا بیان کرتی ہیں کہ نبی صلی اللہ علیہ وسلم نے اسے اپنے گھر والوں کی امامت کرانے کا حکم فرمایا تھا۔(اسے ابوداود نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ نبی صلی اللہ علیہ وسلم نے ابن ام مکتوم رضی اللہ عنہ کو اپنا نائب بنایا‘ وہ لوگوں کی امامت کراتے تھے حالانکہ وہ نابینا تھے۔ (اس روایت کو احمد اور ابوداود نے روایت کیا ہے اور ابن حبان نے بھی اسی مفہوم کی حدیث حضرت عائشہ رضی اللہ عنہا سے نقل کی ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جس کسی نے [لَا إِلٰـہَ إِلَّا اللّٰہُ ] زبان سے کہا اس کی نماز جنازہ پڑھو اور جو [لَا إِلٰـہَ إِلَّا اللّٰہُ] کہے اس کے پیچھے نماز بھی پڑھ لیا کرو۔‘‘ (اسے دارقطنی نے ضعیف سند سے روایت کیا ہے۔)

اردو ترجمہ · UrduUnverified translation

حضرت علی بن ابی طالب رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی نماز پڑھنے کے لیے آئے تو امام کو جس حالت میں پائے اسی حالت میں شامل ہو کر وہی کچھ کرے جو امام کرتا ہے ۔‘‘ (اسے ترمذی نے ضعیف سند کے ساتھ روایت کیا ہے۔)