اردو ترجمہ · UrduUnverified translation

حضرت ربیعہ بن کعب اسلمی رضی اللہ عنہ روایت کرتے ہیں کہ ایک روز نبی صلی اللہ علیہ وسلم نے مجھے (مخاطب کر کے) فرمایا: ’’مانگ لے (جو کچھ مانگنا ہے)۔‘‘ میں نے عرض کیا: میں جنت میں آپ کی رفاقت کا طلبگار ہوں۔ آپ نے فرمایا: ’’کیا اس کے علاوہ بھی کچھ ہے؟‘‘ میں نے عرض کیا: بس یہی مطلوب ہے۔ آپ نے فرمایا: ’’تو پھر اپنے مطلب کے حصول کے لیے کثرت سجود سے میری مدد کر۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے مروی ہے کہ مجھے نبی صلی اللہ علیہ وسلم کی دس رکعتیں یاد ہیں: دو رکعتیں ظہر کی نماز سے پہلے اور دو بعد میں۔ اور مغرب کے بعد دو رکعتیں گھر پر۔ دو رکعتیں عشاء کی فرض نماز کے بعد گھر پر۔ اور دو رکعتیں صبح سے پہلے۔ (بخاری و مسلم) اور (بخاری و مسلم) دونوں کی ایک روایت میں یہ بھی ہے کہ دو رکعتیں نماز جمعہ کے بعد گھر پر (پڑھتے تھے۔)اور مسلم کی روایت میں یہ بھی ہے کہ صبح صادق کے بعد صرف ہلکی سی دو رکعتیں ادا فرمایا کرتے تھے۔

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم نماز ظہر سے پہلے چار رکعتیں اور نماز فجر سے پہلے دو رکعتیں نہیں چھوڑتے تھے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ نبی صلی اللہ علیہ وسلم نوافل میں سے‘ فجر کی دو سنتوں کا سب سے زیادہ اہتمام کرتے تھے۔ (بخاری و مسلم) اور مسلم میں ہے کہ نماز فجر کی دو رکعتیں (سنتیں) دنیا و مافیہا سے بہتر ہیں۔

اردو ترجمہ · UrduUnverified translation

ام المومنین حضرت ام حبیبہ رضی اللہ عنہا نے بیان کیا کہ میں نے رسول اللہ صلی اللہ علیہ وسلم کو یہ فرماتے سنا ہے: ’’جو شخص شب و روز میں بارہ رکعت نوافل پڑھے اس کے لیے ان کے بدلے میں جنت میں ایک گھر تعمیر کر دیا جاتا ہے۔‘‘ (اسے مسلم نے روایت کیا ہے۔) اور ایک روایت میں تَطَوُّعًا کے الفاظ بھی ہیں‘ یعنی نفل کے طور پر پڑھے۔ اور ترمذی کی روایت میں بھی اسی طرح ہے اوراس میں یہ (صراحت) زیادہ ہے: ’’چار رکعت ظہر سے پہلے اور دو رکعت بعد میں اور دو رکعت نماز مغرب کے بعد اور دو رکعت عشاء کے بعد اور دو رکعت صبح کی نماز سے پہلے۔اور پانچوں نے حضرت ام حبیبہ رضی اللہ عنہا ہی سے روایت کیا ہے: ’’جس شخص نے ظہر کی پہلی چار رکعتوں اور اس کے بعد کی چار رکعتوں کی حفاظت کی تو اللہ تعالیٰ اس کو جہنم کی آگ پر حرام کر دیتا ہے۔‘‘

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ اس شخص پر رحم فرمائے جس نے نماز عصر سے پہلے چار رکعات پڑھیں۔‘‘ (اسے احمد‘ ابوداود اور ترمذی نے روایت کیا ہے اور ترمذی نے حسن قرار دیا ہے‘ نیز اسے ابن خزیمہ نے روایت کیا ہے اور صحیح کہا ہے۔)

اردو ترجمہ · UrduUnverified translation

حضرت عبداللہ بن مغفل مزنی رضی اللہ عنہ نبی صلی اللہ علیہ وسلم سے روایت کرتے ہیں کہ آپ نے فرمایا: ’’مغرب سے پہلے نماز پڑھو۔مغرب سے پہلے نماز پڑھو۔‘‘ پھر تیسری مرتبہ کہتے ہوئے فرمایا: ’’یہ حکم اس شخص کے لیے ہے جو پڑھنا چاہے۔‘‘ آپ نے یہ اس اندیشے کے پیش نظر فرمایا کہ لوگ اسے سنت نہ بنا لیں۔ (اسے بخاری نے روایت کیا ہے۔) ابن حبان کی ایک روایت میں ہے کہ نبی صلی اللہ علیہ وسلم نے مغرب سے پہلے دو رکعت ادا فرمائیں۔ اور مسلم میں حضرت انس رضی اللہ عنہ سے روایت ہے کہ ہم غروب آفتاب کے بعد (فرض نماز سے پہلے) دو رکعتیں پڑھا کرتے تھے اور نبی صلی اللہ علیہ وسلم ہمیں دیکھ رہے ہوتے تھے‘ نہ تو آپ نے ہمیں ان کا حکم دیا اور نہ منع فرمایا۔

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم نماز فجر سے پہلے دو رکعتیں اتنی ہلکی پڑھتے تھے کہ میں خیال کرتی کہ کیا آپ نے ام الکتاب (فاتحہ) بھی پڑھی ہے (یا نہیں)؟ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ نبی صلی اللہ علیہ وسلم نے فجر کی دو رکعتوں میں (سے پہلی میں) ﴿ قُلْ یَآاَیُّھَا الْکٰفِرُوْنَ ﴾اور (دوسری میں) ﴿ قُلْ ھُوَ اللّٰہُ اَحَدٌ ﴾ پڑھی۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ نبی صلی اللہ علیہ وسلم جب نماز فجر کی دو سنتیں پڑھ کر فارغ ہوتے تو اپنے دائیں پہلو کے بل لیٹ جاتے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی شخص نماز فجر سے پہلے دو رکعتیں پڑھ چکے تو اسے اپنے دائیں پہلو کے بل لیٹ جانا چاہیے۔‘‘ (اس حدیث کو احمد‘ ابوداود اور ترمذی نے روایت کیا ہے اور ترمذی نے صحیح قرار دیا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’رات کی نماز دو دو رکعتیں ہے اور جب تم میں سے کسی کو صبح کے طلوع ہونے کا خدشہ لاحق ہونے لگے تو (آخر میں) ایک رکعت پڑھ لے۔ یہ پہلے پڑھی ہوئی ایک رکعت اس کی ساری نماز کو وتر (طاق) بنا دے گی۔‘‘ (بخاری و مسلم) اور پانچوں کی روایت کے الفاظ اس طرح ہیں: ’’دن اور رات کی نماز دو دو رکعت ہے۔‘‘ اسے ابن حبان نے صحیح قرار دیا ہے‘ البتہ امام نسائی نے کہا ہے کہ یہ خطا ہے۔

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’فرض نماز کے بعد افضل نماز رات کی نماز ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوایوب انصاری رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’وتر ہر مسلمان پر حق ہے (اس کا ادا کرنا ضروری ہے۔) جسے پانچ وتر پڑھنا پسند ہوں تو وہ ایسا کر لے اور جسے تین وتر پسند ہوں تو وہ اس طرح کر لے اور جسے ایک وتر پڑھنا پسند ہو تو وہ ایسا کر لے۔‘‘ (اسے ترمذی کے علاوہ چاروں نے روایت کیا ہے اور ابن حبان نے صحیح قرار دیا ہے‘ البتہ نسائی نے اس کے موقوف ہونے کو ترجیح دی ہے۔)

اردو ترجمہ · UrduUnverified translation

حضرت علی بن ابی طالب رضی اللہ عنہ روایت کرتے ہیں کہ وتر فرضوں کی طرح حتمی اور لازمی نہیں ہے بلکہ سنت ہے جسے رسول اللہ صلی اللہ علیہ وسلم نے مقرر فرمایا ہے۔ (اسے نسائی اور ترمذی نے بیان کیا ہے اور ترمذی نے حسن قرار دیا ہے‘ نیزاسے حاکم نے روایت کیا ہے اور صحیح کہا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ رسول اللہ صلی اللہ علیہ وسلم نے ماہ رمضان میں قیام فرمایا‘ پھر اگلی رات صحابہ آپ کا انتظار کرتے رہے اور آپ (حجرے سے) باہر تشریف نہ لائے۔ آپ نے فرمایا: ’’مجھے یہ ا??دیشہ لاحق ہوگیا تھا کہ کہیں یہ وتر کی نماز تم پر فرض نہ کر دی جائے۔‘‘ (اسے ابن حبان نے روایت کیا ہے۔)

اردو ترجمہ · UrduUnverified translation

حضرت خارجہ بن حذافہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ نے ایک ایسی نماز کے ساتھ تمھاری مدد فرمائی ہے جو تمھارے لیے سرخ اونٹوں سے بہت بہتر ہے۔‘‘ ہم نے عرض کیا: اے اللہ کے رسول! وہ کون سی نماز ہے؟ آپ نے فرمایا: ’’وتر کی نماز جو نماز عشاء اور طلوع فجر کے درمیان ہے۔‘‘ (اسے نسائی کے سوا پانچوں نے روایت کیا ہے اور حاکم نے صحیح قرار دیا ہے۔) احمد نے عمرو بن شعیب سے‘ انھوں نے اپنے باپ سے اور انھوں نے اپنے دادے سے اس کے مانند روایت نقل کی ہے۔

اردو ترجمہ · UrduUnverified translation

حضرت عبداللہ رحمہ اللہ اپنے والد حضرت بریدہ رضی اللہ عنہ سے روایت کرتے ہیں‘ رسول اللہ صلی اللہ علیہ وسلم نے فرمایا: ’’وتر برحق ہے۔ جس نے وتر نہ پڑھے اس کا ہم سے کوئی تعلق نہیں۔‘‘ (اسے ابوداود نے کمزور سند کے ساتھ نقل کیا ہے اور حاکم نے صحیح کہا ہے۔ مسند احمد میں اس کا ایک شاہد بھی ہے جو حضرت ابوہریرہ رضی اللہ عنہ سے مروی ہے مگر وہ ضعیف ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم رمضان اور غیر رمضان میں گیارہ رکعات سے زائد نہیں پڑھتے تھے۔ (پہلے) چار رکعتیں اس طرح ادا فرماتے تھے کہ ان کے حسن اور ان کی لمبائی کے بارے میں مت پوچھ‘ پھر چار رکعات ادا فرماتے بس ان کے حسن اور ان کی طوالت کے بارے میں مت پوچھ۔ پھر تین رکعتیں پڑھتے تھے۔ حضرت عائشہ رضی اللہ عنہا کا بیان ہے کہ میں نے عرض کیا: اے اللہ کے رسول! کیا آپ وتر ادا کرنے سے پہلے سو جاتے ہیں؟ آپ نے فرمایا: ’’عائشہ! میری دو آنکھیں سوتی ہیں میرا دل نہیں سوتا۔‘‘ (بخاری و مسلم) اور بخاری و مسلم میں حضرت عائشہ رضی اللہ عنہا ہی سے ایک دوسری روایت میں ہے کہ آپ رات کو دس رکعتیں پڑھتے تھے اور ایک رکعت وتر پڑھتے تھے۔ اور اس کے بعد فجر کی دو رکعتیں پڑھتے۔ یہ (سب ملا کر کل) تیرہ رکعتیں ہوئیں۔

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ رسول اللہ صلی اللہ علیہ وسلم رات کو تیرہ رکعت ادا فرماتے تھے۔ ان میں پانچ وتر ہوتے تھے اور ان پانچ وتروں میں تشہد کے لیے صرف آخری رکعت میں بیٹھتے تھے۔

اردو ترجمہ · UrduUnverified translation

حضرت عائشہ رضی اللہ عنہا ہی سے مروی ہے کہ رسول اللہ صلی اللہ علیہ وسلم رات کے ہر حصے میں وتر پڑھا کرتے تھے اور آپ کا وتر پڑھنا سحر تک بھی پہنچا۔ (بخاری و مسلم)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما سے مروی ہے کہ رسول اللہ صلی اللہ علیہ وسلم نے مجھ سے فرمایا: ’’اے عبداللہ! تم فلاں آدمی کی طرح نہ ہو جانا‘ وہ قیام اللیل کرتا تھا‘ پھر بعد میں اس نے اسے ترک کر دیا۔‘‘ (بخاری و مسلم)

اردو ترجمہ · UrduUnverified translation

حضرت علی بن ابی طالب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اے قرآن والو! وتر پڑھا کرو۔ اللہ خود بھی وتر (یکتا) ہے اور وتر کو پسند کرتا ہے۔‘‘(اسے پانچوں نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’وتر کو اپنی رات کی آخری نماز بناؤ۔‘‘ (بخاری اور مسلم)

اردو ترجمہ · UrduUnverified translation

حضرت طلق بن علی رضی اللہ عنہ سے مروی ہے کہ میں نے رسول اللہ صلی اللہ علیہ وسلم کو یہ فرماتے سنا ہے: ’’ایک رات میں دو مرتبہ وتر نہیں۔‘‘ (اسے احمد نے اور تینوں نے روایت کیا ہے اور ابن حبان نے صحیح قرار دیا ہے۔)

اردو ترجمہ · UrduUnverified translation

حضرت ابی بن کعب رضی اللہ عنہ سے مروی ہے کہ رسول اللہ صلی اللہ علیہ وسلم (تین رکعات) وتر میں بالترتیب ﴿ سَبِّحِ اسْمَ رَبِّکَ الْاَعْلٰی ﴾‘ ﴿ قُلْ یٰٓاَیُّھَا الْکٰفِرُوْنَ ﴾ اور ﴿قُلْ ھُوَ اللّٰہُ اَحَدٌ ﴾ پڑھتے تھے۔ (اسے احمد‘ ابوداود اور نسائی نے روایت کیا ہے۔) اور نسائی نے اتنا اضافہ بھی نقل کیا ہے: سلام آخری رکعت ہی میں پھیرتے تھے۔ ابوداود اور ترمذی نے حضرت عائشہ رضی اللہ عنہا سے اسی طرح نقل کیا ہے اور اس روایت میں ہے کہ ہر رکعت میں ایک سورت تلاوت فرماتے تھے اور آخری رکعت میں ﴿ قُلْ ھُوَ اللّٰہُ اَحَدٌ ﴾ اور مُعَوَّذَتَیْن پڑھتے تھے۔

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’وتر صبح ہونے سے پہلے پڑھ لیا کرو۔‘‘ (اسے مسلم نے روایت کیا ہے۔) اور ابن حبان میں ہے: ’’جو کوئی صبح کو پا لے اور اس نے وتر نہ پڑھا تو اس کا کوئی وتر نہیں ہے۔‘‘

اردو ترجمہ · UrduUnverified translation

حضرت ابوسعید خدری رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’جو وتر پڑھنے سے سویا رہا (آنکھ نہ کھلی) یا اسے یاد نہ رہا تو اسے چاہیے کہ صبح کے وقت پڑھ لے یا پھر جب اسے یاد آئے۔‘‘ (اسے نسائی کے علاوہ پانچوں نے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جس کسی کو یہ اندیشہ اور خوف لاحق ہو کہ وہ رات کے آخری حصے میں بیدار نہیں ہو سکے گا تو اسے چاہیے کہ رات کے پہلے حصے ہی میں وتر پڑھ لے۔ اور جسے یہ توقع اور امید ہو کہ وہ بیدار ہو جائے گا تو اسے رات کے آخری حصے میں وتر پڑھنے چاہییں کیونکہ رات کے آخری حصے کی نماز میں فرشتے حاضر ہوتے ہیں اور یہ بہت بہتر ہے۔‘‘ (اسے مسلم روایت نے کیا ہے۔)

اردو ترجمہ · UrduUnverified translation

حضرت عبداللہ بن عمر رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’جب فجر طلوع ہو جائے تو پھر رات کو پڑھی جانے والی ہر نماز اور وتروں کا وقت چلا جاتا ہے (ختم ہو جاتا ہے‘) لہٰذا تم طلوع فجر سے پہلے پہلے وتر پڑھ لیا کرو۔‘‘ (اسے ترمذی نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم نماز ضحیٰ (چاشت کی نماز) چار رکعات پڑھا کرتے تھے اور جتنی اللہ چاہتا زیادہ بھی کرتے تھے۔ (اسے مسلم نے روایت کیا ہے۔) اور مسلم ہی میں حضرت عائشہ رضی اللہ عنہا ہی سے مروی ہے کہ ان سے دریافت کیا گیا: کیا رسول اللہ صلی اللہ علیہ وسلم نماز ضحیٰ پڑھا کرتے تھے؟ تو انھوں نے فرمایا کہ نہیں‘ الاّ یہ کہ جب سفر سے واپس تشریف لاتے۔ اور مسلم ہی میں حضرت عائشہ رضی اللہ عنہا ہی سے مروی ہے کہ میں نے رسول اللہ صلی اللہ علیہ وسلم کو نماز ضحیٰ پڑھتے کبھی نہیں دیکھا جبکہ میں یہ نوافل پڑھتی ہوں۔

اردو ترجمہ · UrduUnverified translation

حضرت زید بن ارقم رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’اوابین (اللہ کی طرف رجوع کرنے والوں) کی نماز کا وقت وہ ہے جب اونٹنیوں کے بچے تپش و حرارت کی وجہ سے جلن محسوس کرنے لگیں۔‘‘ (اسے ترمذی نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ’’جس کسی نے صلاۃ الضحیٰ کی بارہ رکعتیں پڑھیں‘ اللہ تعالیٰ اس کے لیے جنت میں محل تعمیر کرے گا۔‘‘ (اسے ترمذی نے روایت کیا ہے اور غریب قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم میرے گھر میں تشریف لائے اور نماز ضحی کی آٹھ رکعتیں ادا فرمائیں۔ (اسے ابن حبان نے اپنی صحیح میں روایت کیاہے۔)