اردو ترجمہ · UrduUnverified translation

حضرت عبداللہ ابن بحینہ رضی اللہ عنہ سے مروی ہے کہ نبی صلی اللہ علیہ وسلم نے ان کو نماز ظہر پڑھائی تو دو رکعتیں ادا کر کے تشہد میں نہ بیٹھے اور سیدھے کھڑے ہوگئے اور لوگ (مقتدی) بھی آپ کے ساتھ ہی کھڑے ہوگئے حتی کہ جب آپ نے نماز پوری ادا کر لی اور لوگ سلام پھیرنے کے انتظار میں تھے‘ آپ نے بیٹھے بیٹھے ہی اللہ اکبر کہا اور سلام پھیرنے سے پہلے دو سجدے کیے پھر سلام پھیرا۔ (اسے ساتوں نے روایت کیا ہے۔ اوریہ الفاظ بخاری کے ہیں۔ ) اور مسلم کی روایت میں ہے کہ ہر سجدے کے لیے بیٹھے ہوئے اللہ اکبر کہتے تھے اور لوگوں نے بھی آپ کے ساتھ سجدہ کیا (تشہد میں) بیٹھنا بھول جانے کے بدلے میں۔ (دو رکعت کے بعد تشہد میں بیٹھنا بھول گئے تھے اس کی تلافی کے لیے دو سجدے کیے۔)

اردو ترجمہ · UrduUnverified translation

حضرت ابوہریرہ رضی اللہ عنہ روایت کرتے ہیں کہ نبی صلی اللہ علیہ وسلم نے پچھلے پہر کی دو نمازوں (ظہر اور عصر) میں سے ایک میں دو رکعتیں پڑھ کر سلام پھیر دیا اور مسجد کے سامنے (کی طرف گاڑی ہوئی) ایک لکڑی کے پاس جا کر کھڑے ہوگئے اور اپنا ہاتھ اس پر رکھ لیا۔ لوگوں (نمازیوں) میں حضرت ابوبکر اور حضرت عمر رضی اللہ عنہما بھی موجود تھے‘یہ دونوں آپ سے (اس بارے میں) بات کرنے سے ڈر گئے۔ اورجلد باز لوگ مسجد سے نکل گئے تو لوگوں نے (آپس میں سرگوشی کے انداز میں ایک دوسرے سے) پوچھنا شروع کیا کہ کیا نماز میں کمی کر دی گئی ہے؟ ایک آدمی تھا جسے نبی صلی اللہ علیہ وسلم (اس کے لمبے ہاتھوں کی وجہ سے) ذوالیدین کہہ کر بلاتے تھے‘ اس نے عرض کیا: اے اللہ کے رسول! کیا آپ (آج) بھول گئے ہیں یا نماز کم کر دی گئی ہے؟ آپ نے فرمایا: ’’نہ میں بھولا ہوں اور نہ نماز میں کمی کی گئی ہے۔‘‘ اس شخص نے پھر عرض کیا: کیوں نہیں‘ بلکہ آپ یقینا بھول گئے ہیں۔ پھر آپ نے دو رکعتیں (جو چھوٹ گئی تھیں) پڑھیں اور سلام پھیرا ‘پھر اللہ اکبر کہہ کر اپنے (معمول کے) سجدوں کی طرح سجدہ کیا یا ان سے بھی لمبا۔ پھر اللہ اکبر کہہ کر سر اوپر اٹھایا‘ پھر اللہ اکبر کہہ کر سرمبارک زمین پر رکھا اور اپنے (معمول کے) سجدے کی طرح یا اس سے کچھ طویل سجدہ کیا اور پھر اللہ اکبر کہہ کر اپنا سر اٹھایا۔(بخاری و مسلم- یہ الفاظ بخاری کے ہیں۔) اور مسلم کی ایک روایت میں ہے کہ یہ عصر کی نماز تھی۔ اور ابوداود کی روایت میں ہے کہ رسول اللہ صلی اللہ علیہ وسلم نے دریافت فرمایا: ’’کیا ذوالیدین نے ٹھیک کہا ہے؟‘‘ تو لوگوں نے سر ہلا کر اشاروں سے کہا: ہاں۔ یہ اضافہ صحیحین میں بھی ہے لیکن ان میں [فَقَالُوا] کے لفظ کے ساتھ مروی ہے۔ (زبان سے انھوں نے کہا۔) اور ابوداود ہی کی ایک روایت میں ہے کہ نبی صلی اللہ علیہ وسلم کو جب تک اللہ کی جانب سے یقین نہ ہوا اس وقت تک سجدۂ سہو نہیں کیا۔ (جو کہ سنداً ضعیف ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما سے مروی ہے کہ نبی صلی اللہ علیہ وسلم نے انھیں نماز پڑھائی تو آپ بھول گئے‘ چنانچہ آپ نے دو سجدے کیے‘ پھر تشہد پڑھا اور پھر سلام پھیرا۔ (اسے ابوداود اور ترمذی نے روایت کیا ہے اور ترمذی نے حسن قرار دیا ہے اور اسے حاکم نے بھی روایت کیا ہے اور صحیح قرار دیاہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کسی کو نماز میں شک لاحق ہو جائے اور یہ معلوم نہ رہے کہ اس نے کتنی رکعتیں پڑھی ہیں‘ تین یا چار؟ تو ایسی صورت میں شک کو چھوڑ دے اور جس پر یقین ہو اس پر نماز کی بنا رکھے‘ پھر سلام پھیرنے سے پہلے سہو کے دو سجدے کر لے۔ پس اگر اس نے پانچ رکعتیں پڑھی ہوں گی تو یہ دو سجدے اس کی نماز کو جفت بنا دیں گے (ایک رکعت کے قائم مقام ہو کر اس کی نماز کو چھ رکعت بنا دیں گے) اور اگر وہ پہلے ہی پوری نماز پڑھ چکا ہے تو یہ دو سجدے شیطان کے لیے باعث ذلت و اہانت (اس کی ناک رگڑائی) ہوں گے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عبداللہ بن مسعود رضی اللہ عنہ سے مروی ہے کہ رسول اللہ نے نماز پڑھائی۔ جب آپ نے سلام پھیرا تو آپ کی خدمت میں عرض کیا گیا: اے اللہ کے رسول! کیا نماز میں کوئی نئی چیز رونما ہوئی ہے؟ آپ نے فرمایا: ’’وہ کیا ہے؟‘‘ انھوں نے عرض کیا: آپ نے تو اتنی اتنی نماز ادا فرمائی ہے۔ حضرت ابن مسعود رضی اللہ عنہ کا بیان ہے کہ آپ نے اپنے دونوں پاؤں موڑے اور قبلہ رو ہو کر دو سجدے کیے‘ پھر سلام پھیرا‘ پھر ہماری جانب متوجہ ہو کر فرمایا: ’’اگر نماز میں کوئی نئی چیز پیدا ہوئی ہوتی تو میں خود تمھیں اس سے باخبر کرتا لیکن میں بھی تمھاری طرح انسان ہوں‘ اسی طرح بھول جاتا ہوں جس طرح تم لوگ بھول جاتے ہو‘ لہٰذا جب میں بھول جاؤں تو تم مجھے یاد کرا دیا کرو۔ اور جب تم میں سے کسی کو نماز میں شک واقع ہو جائے تو صحیح صورت حال یاد کرنے کی کوشش کرے‘ پھر اپنی نماز اسی بنیاد پر مکمل کر لے اور پھر دو سجدے کر لے۔‘‘ ( بخاری و مسلم)اور بخاری ہی کی ایک دوسری روایت میں ہے: (آپ نے فرمایا: ’’پہلے) نماز مکمل کرے‘ پھر سلام پھیرے اور پھر سجدے کرے۔‘‘ اور مسلم کی روایت میں ہے کہ نبی صلی اللہ علیہ وسلم نے سجدۂ سہو سلام و کلام کے بعد کیا تھا۔مسند احمد‘ ابوداود اور نسائی میں حضرت عبداللہ بن جعفر رضی اللہ عنہما سے مرفوع روایت ہے: ’’جس شخص کو نماز میں شک واقع ہو جائے تو اسے سلام پھیرنے کے بعد دو سجدے کرنے چاہییں۔‘‘ (اسے ابن خزیمہ نے صحیح قرار دیاہے۔)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کسی کو شک لاحق ہوجائے اور وہ دو رکعتوں کے بعد کھڑا ہو جائے حتی کہ بالکل سیدھا کھڑا ہو جائے تو اگلی رکعت کو جاری رکھے اور واپس نہ لوٹے اور بعد میں سہو کے دو سجدے کر لے۔ اور اگر بالکل سیدھا کھڑا نہ ہوا ہو تو بیٹھ جائے۔ اور اس صورت میں اس پر سجدۂ سہو نہیں۔‘‘ (اسے ابوداود‘ ابن ماجہ اور دارقطنی نے روایت کیا ہے۔ یہ الفاظ دارقطنی کے ہیں۔ اس کی سند ضعیف ہے۔)

اردو ترجمہ · UrduUnverified translation

حضرت عمر رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’کسی مقتدی پر سجدۂ سہو نہیں ہے۔ ہاں‘ اگر امام بھول جائے تو پھر امام اور مقتدی دونوں پر سجدۂ سہو ہے۔‘‘ (اسے بزار اور بیہقی نے ضعیف سند کے ساتھ روایت کیا ہے۔)

اردو ترجمہ · UrduUnverified translation

حضرت ثوبان رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’ہر سہو کے لیے دو سجدے ہیں جو سلام پھیرنے کے بعد ہیں۔‘‘ (اسے ابوداود اور ابن ماجہ دونوں نے ضعیف سند سے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ ہم نے سورۂ ﴿ اِذَا السَّمَآئُ انْشَقَّتْ ﴾ اور سورۂ ﴿ اِقْـرَأْ بِاسْمِ رَبِّکَ ﴾ میں رسول اللہ صلی اللہ علیہ وسلم کے ساتھ سجدۂ تلاوت کیا ہے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ سورۂ صٓ کا سجدہ ان میں سے نہیں ہے جن کا ذکر عزیمت اور تاکید کے ساتھ کیا گیا ہے‘ البتہ میں نے رسول اللہ صلی اللہ علیہ وسلم کو اس میں سجدہ کرتے دیکھا ہے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما ہی سے مروی ہے کہ نبی صلی اللہ علیہ وسلم نے سورۂ نجم میں سجدۂ تلاوت کیا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت زید بن ثابت رضی اللہ عنہ سے مروی ہے کہ میں نے نبی صلی اللہ علیہ وسلم کے روبرو سورۂ نجم کی قراء ت کی تو آپ نے اس میں سجدۂ تلاوت نہیں کیا۔ (بخاری و مسلم)

اردو ترجمہ · UrduUnverified translation

حضرت خالد بن معدان رحمہ اللہ سے مروی ہے کہ سورۂ حج کو دو سجدۂ تلاوت کی وجہ سے فضیلت دی گئی ہے۔ (اسے ابوداود نے مراسیل میں ذکر کیا ہے۔) اور اسے احمد اور ترمذی نے حضرت عقبہ بن عامر رضی اللہ عنہ سے بیان کیا ہے اور اس میں اتنا اضافہ ہے: ’’جو یہ دونوں سجدے نہ کرنا چاہے وہ اس (سورت) کی تلاوت ہی نہ کرے۔‘‘ (اس کی سند ضعیف ہے۔)

اردو ترجمہ · UrduUnverified translation

حضرت عمر رضی اللہ عنہ سے مروی ہے‘ انھوں نے فرمایا: لوگو! ہم (تلاوت کے) سجدوں کے پاس سے گزرتے (ان کی آیات تلاوت کرتے) ہیں‘ چنانچہ جس نے سجدہ کیا اس نے درست کیا اور جس نے نہ کیا اس پر کوئی گناہ نہیں۔ (اسے بخاری نے روایت کیا ہے۔) اور موطا میں یہ الفاظ ہیں: اللہ تعالیٰ نے سجدۂ تلاوت فرض نہیں کیا مگر ہم چاہیں تو سجدہ کریں۔

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ نبی صلی اللہ علیہ وسلم ہمارے سامنے قرآن مجید کی تلاوت فرماتے تھے‘ چنانچہ جب آپ سجدے کی آیت سے گزرتے تو اللہ اکبر کہہ کر سجدے میں چلے جاتے اور ہم بھی آپ کے ساتھ ہی سجدہ کرتے۔ (اسے ابوداود نے کمزور سند کے ساتھ روایت کیا ہے۔)

اردو ترجمہ · UrduUnverified translation

حضرت ابوبکرہ رضی اللہ عنہ سے مروی ہے کہ نبی صلی اللہ علیہ وسلم کو جب کوئی خوشخبری ملتی تو اللہ کے حضور سجدے میں گر جاتے۔ (اسے نسائی کے علاوہ پانچوں نے روایت کیا ہے۔)

اردو ترجمہ · UrduUnverified translation

حضرت عبدالرحمن بن عوف رضی اللہ عنہ سے مروی ہے کہ نبی صلی اللہ علیہ وسلم نے سجدہ کیا اور لمبا سجدہ کیا‘ پھر سجدے سے سر اٹھا کر فرمایا: ’’ابھی جبریل ایک خوشخبری لے کر میرے پاس آئے تو وہ مژدہ سن کر میں نے اللہ کے حضور سجدۂ شکر ادا کیا۔‘‘ (اسے احمد نے روایت کیا ہے اور حاکم نے صحیح قرار دیا ہے۔)

اردو ترجمہ · UrduUnverified translation

حضرت براء بن عازب رضی اللہ عنہما سے مروی ہے کہ نبی صلی اللہ علیہ وسلم نے حضرت علی رضی اللہ عنہ کو یمن کی طرف بھیجا۔ راوی نے حدیث بیان کی جس میں اس نے کہا ہے کہ حضرت علی رضی اللہ عنہ نے اہل یمن کے اسلام قبول کرنے کی روداد آپ صلی اللہ علیہ وسلم کی خدمت میں ارسال فرمائی۔ جب رسول اللہ صلی اللہ علیہ وسلم نے وہ مکتوب پڑھا تو آپ اس پر اللہ کا شکر ادا کرنے کے لیے سجدہ ریز ہوگئے۔ (اسے بیہقی نے روایت کیا ہے اور اس کی اصل بخاری میں موجود ہے۔)