اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی شخص تشہد پڑھ چکے تو چار چیزوں سے اللہ کی پناہ طلب کرے اور کہے: اے اللہ! میں عذاب جہنم سے‘ عذاب قبر سے‘ موت و حیات کے فتنے سے اور مسیح دجال کے فتنے کے شر سے تیری پناہ مانگتا ہوں۔‘‘ (بخاری و مسلم) اور مسلم میں ایک روایت کے یہ الفاظ بھی ہیں: ’’جب تم میں سے کوئی آخری تشہد سے فارغ ہو (تو اس وقت ان چار چیزوں سے اللہ کی پناہ طلب کرے)۔‘‘

اردو ترجمہ · UrduUnverified translation

حضرت ابوبکر صدیق رضی اللہ عنہ سے مروی ہے کہ میں نے رسول اللہ صلی اللہ علیہ وسلم کی خدمت میں عرض کیا کہ مجھے ایسی دعا سکھائیں جسے میں اپنی نماز میں پڑھا کروں۔ آپ نے فرمایا: ’’یہ پڑھا کرو: [اَللّٰھُمَّ! إِنِّي ظَلَمْتُ نَفْسِي…الخ] ’’اے اللہ! میں نے اپنی جان پر بہت ہی ظلم کیا ہے اور تیرے سوا کوئی گناہوں کو بخشنے والا نہیں‘ لہٰذا تو مجھے اپنی جناب سے معاف فرما دے اور مجھ پر رحم فرما۔ بے شک تو ہی بہت بخشنے والا اور بہت رحم فرمانے والا ہے۔‘‘ (بخاری و مسلم)

اردو ترجمہ · UrduUnverified translation

حضرت وائل بن حجر رضی اللہ عنہ روایت کرتے ہیں کہ میں نے نبی صلی اللہ علیہ وسلم کے ساتھ نماز پڑھی‘ آپ اپنی دائیں جانب سلام پھیرتے تو: [اَلسَّلَامُ عَلَیْکُمْ وَرَحْمَۃُ اللّٰہِ وَبَرَکَاتُہُ]کہتے اور اپنی بائیں طرف [اَلسَّلَامُ عَلَیْکُمْ وَرَحْمَۃُ اللّٰہِ وَبَرَکَاتُہُ]کہتے۔ (اسے ابوداود نے صحیح سند سے روایت کیا ہے۔)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے مروی ہے کہ نبی صلی اللہ علیہ وسلم ہر فرض نماز کے اختتام پر یہ دعا پڑھا کرتے تھے: [لَا إِلٰـہَ إِلَّا اللّٰہُ وَحْدَہُ لَا شَرِیْکَ لَہُ… الخ] ’’اللہ کے سوا کوئی معبود نہیں‘ وہ یکتا ہے‘ اس کا کوئی شریک و ساجھی نہیں‘ فرمانروائی اسی کی ہے اور حمد و ثنا اسی کے لیے ہے‘ اور وہ ہر چیز پر قدرت رکھنے والا ہے۔ اے اللہ! جو کچھ تو عطا فرمائے اسے کوئی روکنے والا نہیں اور جو کچھ تو روک لے اسے عطا کرنے والا کوئی نہیں۔ اور کسی عزت وشرف والے کو تیرے ہاں کوئی بزرگی فائدہ نہیں دے سکتی۔‘‘ (بخاری و مسلم)

اردو ترجمہ · UrduUnverified translation

حضرت سعد بن ابی وقاص رضی اللہ عنہ سے مروی ہے کہ رسول اللہ صلی اللہ علیہ وسلم ہر نماز کے آخر میں (یا نماز کے بعد) یہ تعوذ پڑھا کرتے تھے: [اَللّٰھُمَّ! إِنِّي أَعُوذُبِکَ مِنَ الْبُخْلِ…الخ] ’’اے اللہ! میں تیری پناہ لیتا ہوں بخل سے‘ اور بزدلی سے بھی تیری پناہ لیتا ہوں‘ اور تیری پناہ لیتا ہوں اس سے کہ میں رذیل ترین عمر (بہت زیادہ بڑھاپے) کی طرف لوٹایا جاؤں‘ اور میں دنیا کے فتنے اور عذاب قبر سے تیری پناہ لیتا ہوں۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ثوبان رضی اللہ عنہ سے مروی ہے کہ رسول اللہ صلی اللہ علیہ وسلم جب سلام پھیرتے تو تین مرتبہ [أَسْتَغْفِرُ اللّٰہَ] کہتے اور پھر پڑھتے۔ [اَللّٰھُمَّ! أَنْتَ السَّلَامُ وَمِنْکَ السَّلَامُ تَبَارَکْتَ یَا ذَا الْجَلَالِ وَالإِْکْرَامِ] ’’اے اللہ! میں تجھ سے مغفرت کا طالب ہوں۔ اے اللہ! تو سلام ہے‘ یعنی تو ہی سلامتی والا ہے۔ اور سلامتی تجھ ہی سے ہے۔ اے بزرگی و عزت کے مالک! تو بڑی برکت والا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جس شخص نے ہر نماز کے سلام پھیرنے کے بعد ۳۳ مرتبہ [سُبْحَانَ اللّٰہ] ‘۳۳ مرتبہ [اَلْحَمْدُ لِلّٰہ] اور ۳۳ مرتبہ [اَللّٰہُ أَکْبَرُ] پڑھا‘ یہ مجموعی طور پر ۹۹‘ یعنی ایک کم سو ہوئے‘ اور سو مکمل کرنے کے لیے [لَا إِلٰـہَ إِلَّا اللّٰہُ وَحْدَہُ لَا شَرِیکَ لَہُ‘ لَہُ الْمُلْکُ وَلَہُ الْحَمْدُ وَھُوَ عَلٰی کُلِّ شَیْـیئٍ قَدِیرٌ]کہا تو اس کے تمام گناہ بخش دیے جاتے ہیں‘ خواہ وہ سمندر کے جھاگ کے برابر ہوں۔‘‘ (اسے مسلم نے روایت کیا ہے۔) اور ایک دوسری روایت میں ہے: اللہ اکبر ۳۴ مرتبہ کہے۔

اردو ترجمہ · UrduUnverified translation

حضرت معاذ بن جبل رضی اللہ عنہ سے مروی ہے‘ رسول اللہ صلی اللہ علیہ وسلم نے مجھ سے فرمایا: ’’اے معاذ! میں تجھے وصیت کرتا ہوں کہ ہر نماز کے اختتام کے بعد ان کلمات کو کبھی فراموش نہ کرنا [اَللّٰھُمَّ! أَعِنِّي عَلٰی ذِکْرِکَ… الخ] ’’اے اللہ! مجھے اپنا ذکر‘ اپنا شکر اور اپنی بہترین عبادت کرنے کی توفیق عطا فرما۔‘‘ (اسے احمد‘ ابوداود اور نسائی نے قوی سند کے ساتھ روایت کیا ہے۔)

اردو ترجمہ · UrduUnverified translation

حضرت ابوامامہ رضی اللہ عنہ روایت کرتے ہیں‘ رسول اللہ صلی اللہ علیہ وسلم نے فرمایا: ’’جس شخص نے ہر فرض نماز کے ادا کرنے کے بعد آیت الکرسی پڑھی اس کو جنت میں داخل ہونے سے موت کے سوا اور کوئی چیز روکنے والی نہیں۔‘‘ (مرتے ہی جنت میں داخل ہو جائے گا بشرطیکہ عقیدہ صحیح ہو۔) (اسے نسائی نے روایت کیا ہے اور ابن حبان نے صحیح قرار دیا ہے۔ اور طبرانی نے اس میں اتنا اضافہ کیا ہے: [قُلْ ھُوَ اللّٰہُ أَحَدٌ] بھی پڑھے۔)

اردو ترجمہ · UrduUnverified translation

حضرت مالک بن حویرث رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’نماز اسی طرح پڑھو جس طرح تم نے مجھے پڑھتے دیکھا ہے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما روایت کرتے ہیں‘ رسول اللہ صلی اللہ علیہ وسلم نے مجھ سے فرمایا: ’’نماز کھڑے ہو کر پڑھو‘ اگر کھڑے ہو کر نہیں پڑھ سکتے تو بیٹھ کر پڑھو۔ اور بیٹھ کر پڑھنے کی استطاعت بھی نہ ہو تو پہلو کے بل لیٹ کر پڑھو۔ ان میں سے کسی پر بھی عمل نہ ہو سکے تو پھر اشارے ہی سے پڑھ لو۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے مروی ہے کہ نبی صلی اللہ علیہ وسلم نے ایک مریض کا‘ جس نے تکیے پر نماز پڑھی تھی‘ تکیہ پھینک دیا اور فرمایا: ’’اگر طاقت ہو تو زمین پر نماز پڑھو ورنہ پھر اشارے سے پڑھو‘ اور اپنے سجدے کو رکوع سے ذرا نیچے کرو۔‘‘ (اسے بیہقی نے قوی سند کے ساتھ روایت کیا ہے لیکن ابوحاتم نے اس کا موقوف ہونا صحیح قرار دیا ہے۔)