اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’جب تم نماز ادا کرنے کے لیے کھڑا ہونے کا ارادہ کرو تو پہلے اچھی طرح وضو کر لو‘ پھر قبلہ رو ہو کر تکبیر (اللہ اکبر) کہو‘ پھر قرآن کا جو حصہ تم آسانی سے پڑھ سکتے ہو‘ پڑھو۔ پھر رکوع کرو اور پوری طرح اطمینان سے رکوع کرو‘ پھر (رکوع سے) سر اٹھاؤ اور پورے اطمینان سے کھڑے ہو۔ پھر سجدہ کرو اور پورے اطمینان کے ساتھ سجدہ کرو‘ پھر سجدے سے اپنا سر اٹھا کر پورے اطمینان سے بیٹھ جاؤ۔ پھر دوسرا سجدہ کرو اور پورے اطمینان سے سجدہ کرو۔ پھر اپنی ساری (باقی) نماز میں اسی طرح (اطمینان سے ارکان نماز ادا) کرو۔‘‘ (اسے ساتوں نے روایت کیا ہے اور یہ الفاظ بخاری کے ہیں۔) اور ابن ماجہ نے مسلم کی سند سے (رکوع سے کھڑے ہونے کے وقت) یہ الفاظ نقل کیے ہیں: ’’پورے اطمینان سے کھڑے ہو جاؤ۔‘‘ احمد اور ابن حبان میں رفاعہ بن رافع بن مالک رضی اللہ عنہما کی روایت بھی اسی طرح ہے۔ اور مسند احمد کی ایک روایت میں ہے: ’’اپنی کمر (پشت) کو سیدھا کرو یہاں تک کہ ہڈیاں (اپنے مقام پر) واپس آجائیں۔‘‘ نسائی اور ابوداود میں رفاعہ بن رافع رضی اللہ عنہما سے مروی ہے: ’’تم میں سے کسی کی نماز مکمل نہیں ہو سکتی حتی کہ وہ (اسی طرح) وضو کامل کر لے جس طرح اللہ تعالیٰ نے اسے حکم دیا ہے‘ پھر تکبیر کہے اور اللہ کی حمد و ثنا بیان کرے۔‘‘ اور اس روایت میں یہ بھی مذکور ہے: ’’اگر تجھے قرآن کا کچھ حصہ یاد ہو تو اسے پڑھ‘ بصورت دیگر الحمدللّٰہ‘ اللّٰہ أکبر اور لا إلٰہ إلا اللّٰہ پڑھا کر۔‘‘ابوداود میں ہے: ’’پھر سورئہ فاتحہ پڑھ اور مزید جو اللہ چاہے۔‘‘اور ابن حبان میں ہے: ’’پھر جو تم چاہو (پڑھو۔‘‘)

اردو ترجمہ · UrduUnverified translation

حضرت ابوحمید ساعدی رضی اللہ عنہ سے روایت ہے‘ وہ بیان کرتے ہیں کہ میں نے دیکھا کہ رسول اللہ صلی اللہ علیہ وسلم جب تکبیر (اولیٰ) کہتے تو اپنے دونوں ہاتھ اپنے کندھوں کے برابر تک اٹھاتے اور جب رکوع کرتے تو اپنے دونوں ہاتھوں سے اپنے گھٹنوں کو مضبوطی سے پکڑ لیتے تھے‘ پھر اپنی پشت مبارک جھکا لیتے‘ پھر جب اپنا سر رکوع سے اٹھاتے تو اس طرح سیدھے کھڑے ہوتے کہ ہر جوڑ اپنی اپنی جگہ پر لوٹ آتا۔ پھر (اس کے بعد) جب سجدہ فرماتے تو اپنے دونوں ہاتھ (زمین پر) اس طرح رکھتے کہ (بازو) زمین پر بچھے ہوتے نہ (پہلوؤں کی طرف) سمٹے ہوتے۔ اور آپ (حالت سجدہ میں) اپنے دونوں پاؤں کی انگلیاں قبلہ رخ کرتے۔ اور جب آپ دو رکعت پڑھ کر بیٹھتے تو بائیں پاؤں کے اوپر بیٹھتے اور دایاں پاؤں کھڑا رکھتے۔ اور جب آخری رکعت میں بیٹھتے تو اپنا بایاں پاؤں (دائیں ران کے نیچے سے) آگے بڑھا دیتے اور دایاں کھڑا رکھتے اور سرین پر بیٹھ جاتے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے مروی ہے کہ نبی صلی اللہ علیہ وسلم جب نماز کے لیے کھڑے ہوتے تو (پہلے) یہ دعا پڑھتے : [وَجَّھْتُ وَجْھِيَ لِلَّذِي فَطَرَ السَّمَاوَاتِ وَالْأَرْضَ] سے لے کر [مِنَ الْمُسْلِمِینَ] تک۔ (پھر یہ پڑھتے:) [اَللّٰھُمَّ أَنْتَ الْمَلِکُ‘ لَا إِلٰـہَ إِلَّا أَنْتَ‘ أَنْتَ رَبِّي وَ أَنَا عَبْدُکَ] سے لے کر آخر تک۔ (اسے مسلم نے روایت کیا ہے۔) اور مسلم ہی کی ایک روایت میں ہے کہ آپ یہ رات کی نماز (تہجد) میں پڑھا کرتے تھے۔

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم کا معمول تھا کہ تکبیر تحریمہ کے بعد تھوڑی دیر خاموش رہتے‘ پھر قرا ء ت شروع کرتے۔ (ایک روز) میں نے اس کے متعلق آپ سے پوچھ لیا (کہ اے اللہ کے رسول! وقفے کے دوران میں آپ کیا پڑھتے ہیں؟) آپ نے فرمایا: ’’میں [اَللّْٰھُمَّ! بَاعِدْ بَیْنِي وَبَیْنَ خَطَایَايَ… الخ] پڑھتا ہوں۔ ’’اے اللہ! میرے اور میرے گناہوں کے مابین اتنا فاصلہ اور دوری فرما دے جتنا مشرق و مغرب کے درمیان فاصلہ ہے۔ اے اللہ! مجھے گناہوں اور خطاؤں سے اس طرح صاف فرما دے جس طرح سفید کپڑا میل کچیل سے صاف کیا جاتا ہے۔ اے اللہ! مجھے میرے گناہوں سے پانی‘ برف اور اولوں کے ساتھ دھو ڈال۔‘‘ (بخاری و مسلم)

اردو ترجمہ · UrduUnverified translation

حضرت عمر رضی اللہ عنہ (وقفے کے دوران میں) پڑھتے تھے:[سُبْحَانَکَ اللّٰھُمَّ وَبِحَمْدِکَ …الخ] ’’اے اللہ! تو پاک ہے (ہر عیب اور ہر نقص سے۔) سب تعریفیں تیرے ہی لیے ہیں۔ بابرکت ہے تیرا نام اور بلند ہے تیری شان۔ اور تیرے سوا کوئی معبود نہیں۔‘‘ (اسے مسلم نے منقطع اور دارقطنی نے موصول روایت کیا ہے اور یہ موقوف ہے۔) اورپانچوں نے حضرت ابوسعید خدری رضی اللہ عنہ کے حوالے سے اسی طرح روایت کیا ہے اور اس میں یہ بھی ذکر ہے کہ تکبیر تحریمہ کے بعد تَعَوُّذ (أَعُوذُ بِاللّٰہِ السَّمِیعِ الْعَلِیمِ مِنَ الشَّیْطَانِ الرَّجِیمِ مِنْ ھَمْزِہٖ وَ نَفْخِہٖ وَنَفْثِہٖ) پڑھتے تھے۔ ’’میں اللہ سمیع و علیم کی پناہ لیتا ہوں شیطان مردود سے‘ اس کے وسوسوں سے‘ اس کے پھونکنے سے‘ یعنی کبر و نخوت سے اور اس کے اشعار اور جادو سے۔‘‘

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نماز کا آغاز اللہ اکبر سے کرتے اور قراء ت اَلْحَمْدُ لِلّٰہِ رَبِّ الْعَالَمِینَ(سورئہ فاتحہ) سے شروع کرتے تھے۔ اور جب رکوع کرتے تو اپنا سر مبارک نہ اونچا رکھتے اور نہ زیادہ نیچے جھکاتے بلکہ اس کے درمیان میں رکھتے۔ اور جب رکوع سے سر اٹھاتے تو اس وقت تک سجدہ نہ کرتے جب تک کہ بالکل سیدھے کھڑے نہ ہو جاتے۔ اور جب سجدے سے سر اٹھاتے تو دوسرا سجدہ اس وقت تک نہ کرتے جب تک کہ درست انداز میں بیٹھ نہ جاتے۔ اور ہر دو رکعت کے بعد تشہد پڑھتے اور اپنے بائیں پاؤں کو زمین پر بچھا لیتے اور دائیں کو کھڑا رکھتے۔ اور آپ شیطان کی چوکڑی اور درندوں کی طرح بازو بچھا کر بیٹھنے سے منع فرماتے۔ اور نماز کو سلام کے ساتھ ختم کرتے تھے۔ (اسے مسلم نے روایت کیا ہے اور اس کی سند معلول ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ نبی صلی اللہ علیہ وسلم جب نماز کا آغاز فرماتے تو اپنے دونوں ہاتھ اپنے کندھوں کے برابر تک اٹھاتے اور جب رکوع کے لیے اللہ اکبر کہتے اور جب رکوع سے سر اٹھاتے (تب بھی اسی طرح رفع الیدین کرتے تھے)۔ (بخاری و مسلم) اور ابوداود میں حضرت ابوحمید رضی اللہ عنہ سے مروی حدیث میں ہے کہ اپنے دونوں ہاتھوں کو اٹھاتے حتی کہ وہ آپ کے کندھوں کے برابر آ جاتے‘ پھر اللہ اکبر کہتے۔ اور مسلم میں حضرت مالک بن حویرث رضی اللہ عنہ سے حضرت ابن عمر رضی اللہ عنہما کی روایت کی طرح مروی ہے لیکن اس میں ہے کہ اپنے کانوں کے اوپر والے حصے تک اٹھاتے۔

اردو ترجمہ · UrduUnverified translation

حضرت وائل بن حجر رضی اللہ عنہ روایت کرتے ہیں کہ میں نے نبی صلی اللہ علیہ وسلم کے ساتھ نماز ادا کی‘ آپ نے اپنا دایاں ہاتھ اپنے بائیں ہاتھ پر رکھ کر دونوں ہاتھ سینے پر باندھ لیے۔‘‘ (اسے ابن خزیمہ نے روایت کیا ہے۔)

اردو ترجمہ · UrduUnverified translation

حضرت عبادہ بن صامت رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا:’’ اس شخص کی کوئی نماز نہیں جس نے (نماز میں) ام القرآن نہ پڑھی۔‘‘ (بخاری و مسلم) ابن حبان اور دارقطنی میں روایت ہے: ’’جس نماز میں سورئہ فاتحہ نہ پڑھی گئی ہو وہ نماز کافی نہیں ہوتی۔‘‘ احمد‘ ابوداود‘ ترمذی اور ابن حبان کی ایک دوسری روایت میں ہے کہ ’’شاید تم لوگ امام کے پیچھے (کچھ) پڑھتے ہو؟‘‘ ہم نے عرض کیا: جی ہاں‘ (پڑھتے ہیں۔) آپ نے فرمایا: ’’ایسا نہ کیا کرو سوائے سورئہ فاتحہ کے‘ اس لیے کہ جس نے اسے نہ پڑھا اس کی (تو) نماز ہی نہیں۔‘‘

اردو ترجمہ · UrduUnverified translation

حضرت انس رضی اللہ عنہ سے مروی ہے کہ نبی صلی اللہ علیہ وسلم ‘ ابوبکر اور عمر رضی اللہ عنہما سب نماز کا آغاز [اَلْحَمْدُ لِلّٰہِ رَبِّ الْعَالَمِیْنَ] سے کرتے تھے۔ (بخاری و مسلم) مسلم نے یہ اضافہ بھی نقل کیا ہے: قراء ت کے شروع اور آخر دونوں موقعوں پر [بِسْمِ اللّٰہِ الرَّحْمٰنِ الرَّحِیْمِ] نہیں پڑھتے تھے۔ مسند احمد‘ نسائی اور ابن خزیمہ کی ایک روایت میں ہے: [بِسْمِ اللّٰہِ الرَّحْمٰنِ الرَّحِیْمِ] کو جہری طور پر (اونچی آواز سے) نہیں پڑھتے تھے۔ ابن خزیمہ کی ایک دوسری روایت میں ہے: وہ بسم اللہ‘ آہستہ پڑھتے تھے۔ اور اسی پر صحیح مسلم کی روایت کی نفی کو محمول کیا جائے گا بخلاف ان لوگوں کے جنھوں نے اسے معلول کہاہے۔

اردو ترجمہ · UrduUnverified translation

حضرت نعیم مجمر رحمہ اللہ سے مروی ہے کہ میں نے حضرت ابوہریرہ رضی اللہ عنہ کی امامت میں نماز پڑھی تو انھوں نے پہلے بسم اللہ تلاوت فرمائی‘ پھر بعد ازاں ام القرآن (سورئہ فاتحہ) پڑھی حتی کہ جب آپ ﴿وَلَاالضَّآلِّیْن﴾ پر پہنچ گئے تو آمین کہی۔ اور جب بھی سجدہ کرتے اور جب بھی بیٹھنے کے بعد کھڑے ہوتے تو اللہ اکبر کہتے‘ پھر سلام پھیر کر فرمایا: مجھے قسم ہے اس ذات کی جس کے ہاتھ میں میری جان ہے! یقینا میں نماز کی ادائیگی میں رسول اللہ صلی اللہ علیہ وسلم کے ساتھ تم سب سے زیادہ مشابہ ہوں۔ (میری نماز رسول اللہ صلی اللہ علیہ وسلم کی نماز کے بہت مشابہ ہے۔) (اسے نسائی اور ابن خزیمہ نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم سورئہ فاتحہ پڑھو تو بسم اللہ الرحمن الرحیم بھی (ساتھ ہی) پڑھا کرو‘ اس لیے کہ وہ بھی سورئہ فاتحہ کی ایک آیت ہے۔‘‘ (اسے دارقطنی نے روایت کیا ہے اور اس کے موقوف ہونے کو درست قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے کہ رسول اللہ صلی اللہ علیہ وسلم جب ام القرآن (سورئہ فاتحہ) کی قراء ت سے فارغ ہوتے تو آمین بلند آواز سے کہتے۔ (اسے دارقطنی نے روایت کیا ہے اور حسن کہا ہے۔ اور اسے حاکم نے بھی روایت کیا ہے اور صحیح قرار دیا ہے‘ نیز ابوداود اور ترمذی میں حضرت وائل بن حجر رضی اللہ عنہ کی روایت بھی اسی طرح ہے۔)

اردو ترجمہ · UrduUnverified translation

حضرت عبداللہ بن ابی اوفیٰ رضی اللہ عنہ سے روایت ہے کہ ایک آدمی نبی صلی اللہ علیہ وسلم کی خدمت میں حاضر ہوا اور عرض کیا کہ میں قرآن میں سے کچھ بھی یاد نہیں رکھ سکتا‘ لہٰذا مجھے کوئی ایسی چیز سکھا دیں جو (میری نماز کے لیے) اس کی جگہ کافی ہو جائے۔ آپ نے فرمایا: ’’تم [سُبْحَانَ اللّٰہِ‘ وَالْحَمْدُ لِلّٰہِ‘ وَ لَا إِلٰہَ إِلَّا اللّٰہُ‘ وَاللّٰہُ أَکْبَرُ‘ وَلَا حَوْلَ وَلَا قُوَّۃَ إِلَّا بِاللّٰہِ الْعَلِيِّ الْعَظِیمِ] ’’اللہ پاک ہے‘ اسی کی تعریف ہے‘ اس کے سوا کوئی معبود نہیں‘ اور اللہ سب سے بڑا ہے‘ برائیوں سے بچنا اور نیکی کی توفیق‘ اللہ کے سوا کسی سے ممکن نہیں۔‘‘ پڑھا کرو۔‘‘ لمبی حدیث ہے۔ (اسے احمد‘ ابوداود اور نسائی نے روایت کیا ہے اور ابن حبان‘ دارقطنی اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابوقتادہ رضی اللہ عنہ سے مروی ہے کہ رسول اللہ صلی اللہ علیہ وسلم ہمیں نماز پڑھاتے تو ظہر اور عصر کی پہلی دو رکعتوں میں سورئہ فاتحہ اور دو سورتیں پڑھتے تھے اور کبھی کبھی ہمیں کوئی آیت سنا بھی دیتے تھے۔ آپ پہلی رکعت لمبی کرتے تھے اور آخری دونوں رکعتوں میں صرف فاتحۃ الکتاب پڑھتے تھے۔ (بخاری و مسلم)

اردو ترجمہ · UrduUnverified translation

حضرت ابوسعید خدری رضی اللہ عنہ روایت کرتے ہیں کہ ہم نماز ظہر اور عصر میں رسول اللہ صلی اللہ علیہ وسلم کے قیام کا اندازہ لگایا کرتے تھے‘ چنانچہ ہم نے اندازہ لگایا کہ آپ ظہر کی پہلی دونوں رکعتوں میں اتنا قیام فرماتے جتنی دیر میں سورئہ الٓمّٓ السجدۃ کی تلاوت کی جا سکے‘ اور آخری دونوں رکعتوں میں پہلی دونوں کے نصف کے برابر۔ اور عصر کی پہلی دونوں رکعتوں میں ظہر کی آخری دونوں رکعتوں کے برابر‘ اور عصر کی آخری دونوں میں عصر کی پہلی دو رکعتوں سے نصف۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت سلیمان بن یسار رحمہ اللہ نے بیان کیا کہ فلاں صاحب ظہر کی پہلی دو رکعتیں لمبی کرتے ہیں‘ نماز عصر میں تخفیف کرتے ہیں‘ نماز مغرب میں قصار مفصل (چھوٹی سورتیں)‘ عشاء میں اوساط مفصل اور صبح کی نماز میں طوال مفصل پڑھتے ہیں۔ تو حضرت ابوہریرہ رضی اللہ عنہ نے کہا: میں نے کسی کی امامت میں اس سے زیادہ نبی صلی اللہ علیہ وسلم کی نماز کے مشابہ نماز نہیں پڑھی۔ (اسے نسائی نے صحیح سند سے روایت کیا ہے۔)

اردو ترجمہ · UrduUnverified translation

حضرت جبیر بن مطعم رضی اللہ عنہ روایت کرتے ہیں کہ میں نے رسول اللہ صلی اللہ علیہ وسلم کو نماز مغرب میں سورۂ طور پڑھتے سنا ہے۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ وسلم جمعہ کے روز نماز فجر کی پہلی رکعت میں الٓمّٓ تَنْزِیْل (سورۂ سجدہ) اور دوسری میں ھَلْ اَتٰی عَلَی الْاِنْسَانِ (سورۂ دہر) پڑھا کرتے تھے۔ (بخاری و مسلم) اور طبرانی میں حضرت ابن مسعود رضی اللہ عنہ سے مروی روایت میں ہے کہ آپ ہمیشہ ایسا کرتے تھے۔

اردو ترجمہ · UrduUnverified translation

حضرت حذیفہ رضی اللہ عنہ روایت کرتے ہیں کہ میں نے نبی صلی اللہ علیہ وسلم کے ساتھ نماز پڑھی‘ جب ایسی آیت گزرتی جس میں رحمت الٰہی کا ذکر ہوتا تو آپ وہاں رک کر رحمت طلب فرماتے اور جب آیت عذاب گزرتی تو وہاں رک کر اس سے ضرور پناہ مانگتے۔ (اسے پانچوں نے روایت کیا ہے اور ترمذی نے حسن قرار دیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما روایت کرتے ہیں‘ رسول اللہ صلی اللہ علیہ وسلم نے فرمایا: ’’(لوگو!) سن لو کہ مجھے رکوع اور سجدے میں قرآن پڑھنے سے منع کیا گیا ہے‘ لہٰذا رکوع میں اپنے مالک و پروردگار کی عظمت بیان کرو اور سجدے میں کثرت سے دعا کیا کرو‘ یہ اس لائق ہے کہ تمھاری دعا قبول کر لی جائے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا نے بیان کیا کہ رسول اللہ صلی اللہ علیہ وسلم رکوع اور سجود میں [سُبْحَانَکَ اللّٰھُمَّ رَبَّنَا وَ بِحَمْدِکَ‘ اَللّٰھُمَّ ! اغْفِرْلِي] ’’تو پاک ہے اے اللہ! اے ہمارے پروردگار! اپنی حمد و ثنا کے ساتھ۔ اے اللہ! مجھے بخش دے۔‘‘ پڑھا کرتے تھے۔ (بخاری ومسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم جب نماز پڑھنے کا ارادہ فرماتے تو کھڑے ہوتے وقت اللہ اکبر کہتے۔ پھر جب رکوع کے لیے جاتے تو اس وقت اللہ اکبر کہتے۔ پھر رکوع سے اپنی پشت کو اٹھاتے وقت [سَمِعَ اللّٰہُ لِمَنْ حَمِدَہُ] کہتے اور پھر جب رکوع سے سیدھے کھڑے ہوتے تو [رَبَّنَا وَ لَکَ الْحَمْدُ] کہتے۔ پھر تکبیر کہتے ہوئے سجدے کے لیے جھکتے۔ پھر سجدے سے اپنا سر اٹھاتے وقت اللہ اکبر کہتے۔ پھر سجدے میں جاتے ہوئے اللہ اکبر کہتے‘ پھر سجدے سے اٹھتے ہوئے اللہ اکبر کہتے۔ پھر ساری نماز میں اسی طرح کرتے۔ پھر جب دوسری رکعت کے بعد (تشہد پڑھ کر) اٹھتے تو بھی اللہ اکبر کہتے۔(بخاری و مسلم)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے کہ رسول اللہ صلی اللہ علیہ وسلم جب رکوع سے اپنا سر اٹھاتے تو اَللّٰھُمَّ! رَبَّنَا لَکَ… الخ کہتے تھے۔ ’’اے اللہ! اے ہمارے رب! تعریف صرف تیرے لیے ہے‘ اتنی تعریف جس سے آسمان و زمین بھر جائیں اور اس کے بعد ہر وہ چیز بھر جائے جسے تو چاہے۔ اے تعریف اور بزرگی کے مالک! بہترین بات جو کسی بندے نے کہی … (بندے کے اقوال و کلمات میں سے رَبَّنَا لَکَ الْحَمْدُ والا قول سب سے زیادہ استحقاق رکھتا ہے کہ اسے کہا جائے۔) اور ہم سبھی تیرے بندے ہیں … اے اللہ! جو کچھ تو عطا فرمائے اسے کوئی روکنے والا نہیں اور جسے تو ہی نہ دے اسے کوئی عطا کرنے والا نہیں اور کسی بخت اور نصیب والے کو اس کی بزرگی اور بخت تیرے عذاب کے مقابلے میں کوئی فائدہ نہیں دے سکتے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’مجھے سات ہڈیوں (اعضاء) پر سجدہ کرنے کا حکم دیا گیا ہے:پیشانی پر‘… اور اپنے دست مبارک سے اپنے ناک کی طرف اشارہ کیا… اور دونوں ہاتھوں‘ دونوں گھٹنوں اور دونوں قدموں کے کناروں پر۔‘‘ (بخاری و مسلم)

اردو ترجمہ · UrduUnverified translation

حضرت ابن بحینہ رضی اللہ عنہ سے روایت ہے کہ نبی صلی اللہ علیہ وسلم جب نماز ادا فرماتے اور سجدہ کرتے تو (اس حالت میں) اپنے دونوں بازو اپنے پہلوؤں سے الگ رکھتے تھے‘ یہاں تک کہ آپ کی بغلوں کی سفیدی نظر آنے لگتی۔(بخاری و مسلم)

اردو ترجمہ · UrduUnverified translation

حضرت براء بن عازب رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جب تو سجدہ کرے تو (اس وقت) اپنی ہتھیلیوں کو (زمین پر) ٹکا دے اور اپنی کہنیوں کو اوپر اٹھا لے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت وائل بن حجر رضی اللہ عنہ سے مروی ہے کہ نبی صلی اللہ علیہ وسلم جب رکوع میں ہوتے تو اپنی (ہاتھوں کی) انگلیاں کھلی رکھتے اور سجدے میں ہوتے تو اپنی (ہاتھوں کی) انگلیاں باہم ملا لیا کرتے تھے۔ (اسے حاکم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا روایت کرتی ہیں کہ میں نے رسول اللہ صلی اللہ علیہ وسلم کو دیکھا کہ آپ چار زانو بیٹھ کر نماز ادا فرمارہے تھے۔ (اسے نسائی نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ نبی صلی اللہ علیہ وسلم دو سجدوں کے درمیان یہ دعا پڑھتے تھے : [اَللّٰھُمَّ اغْفِرْلِي‘ وَارْحَمْنِي‘ وَاھْدِنِي‘ وَعَافِنِي‘ وَارْزُقْنِي] ’’یا اللہ! مجھے بخش دے‘ مجھ پر رحم فرما‘ مجھے راہ ہدایت پر چلا‘ مجھے عافیت عطا فرما اور مجھے رزق (حلال) عطا فرما۔ ‘‘(اسے نسائی کے علاوہ چاروں نے روایت کیا ہے۔ یہ الفاظ ابوداود کے ہیں۔ اور اسے حاکم نے صحیح قرار دیا ہے۔)

اردو ترجمہ · UrduUnverified translation

حضرت مالک بن حویرث رضی اللہ عنہ سے مروی ہے کہ انھوں نے نبی صلی اللہ علیہ وسلم کو نماز ادا فرماتے دیکھا‘ جب آپ نماز کی طاق رکعت (پہلی اور تیسری) میں ہوتے تو سیدھے بیٹھنے سے پہلے کھڑے نہ ہوتے۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت انس بن مالک رضی اللہ عنہ سے مروی ہے کہ نبی صلی اللہ علیہ وسلم نے پورا مہینہ رکوع کے بعد دعائے قنوت پڑھی۔ اس میں آپ عرب کے قبیلوں میں سے بعض قبیلوں کے لیے بددعا فرماتے‘ پھر اسے چھوڑ دیا۔ (بخاری و مسلم) احمد اور دارقطنی نے ایک اور طریق سے اسے اسی طرح روایت کیا ہے۔ اس میں اتنا اضافہ ہے کہ صبح کی نماز میں دعائے قنوت تادم زیست کرتے رہے۔

اردو ترجمہ · UrduUnverified translation

حضرت انس رضی اللہ عنہ ہی سے مروی ہے کہ نبی صلی اللہ علیہ وسلم جب کسی قوم کے حق میں دعا یا کسی کے لیے بددعا کرتے تو صرف اسی وقت قنوت پڑھتے تھے (ورنہ نہیں پڑھتے تھے)۔ (اسے ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت سعد بن طارق اشجعی رحمہ اللہ سے مروی ہے کہ میں نے اپنے والد سے استفسار کیا: ابا جان! آپ نے رسول اللہ صلی اللہ علیہ وسلم ‘ ابوبکر‘ عمر‘ عثمان اور علی رضی اللہ عنہم کے پیچھے نماز پڑھی ہے۔ کیا یہ سب نماز فجر میں قنوت پڑھا کرتے تھے؟ انھوں نے جواب دیا کہ بیٹا! یہ نئی بات ہے۔ (اسے ابوداود کے علاوہ پانچوں نے روایت کیا ہے۔)

اردو ترجمہ · UrduUnverified translation

حضرت حسن بن علی رضی اللہ عنہما نے بیان کیا کہ رسول اللہ صلی اللہ علیہ وسلم نے مجھے چند کلمات سکھائے کہ میں انھیں وتر کی قنوت میں پڑھا کروں۔ (اور وہ یہ ہیں:) [اَللّٰھُمَّ! اھْدِنِي فِیمَنْ ھَدَیْتَ…الخ ]’’اے اللہ! مجھے ہدایت دے کر ان لوگوں میں شامل فرما جنھیں تو نے رشد و ہدایت سے نوازا ہے۔ اور مجھے عافیت دے کر ان میں شامل فرما دے جنھیں تو نے عافیت بخشی ہے۔ اور جن کو تو نے اپنا دوست قرار دیا ہے ان میں مجھے بھی شامل کر کے اپنا دوست بنا لے۔ جو کچھ تو نے مجھے عطا فرمایا ہے اس میں میرے لیے برکت ڈال دے اور جس چیز کا تو نے فیصلہ فرما دیا ہے اس کے شرو برائی سے مجھے محفوظ رکھ اور بچا لے۔ یقینا فیصلہ تو ہی صادر فرماتا ہے اور تیرے خلاف فیصلہ صادر نہیں کیا جاسکتا۔ اور جس کا تو والی بنا وہ کبھی ذلیل و خوار اور رسوا نہیں ہو سکتا۔ اے ہمارے پروردگار! تو ہی برکت والا اور بلند و بالا ہے۔‘‘ (اسے پانچوں نے روایت کیا ہے۔) طبرانی اور بیہقی نے [وَلَا یَعِزُّ مَنْ عَادَیْتَ] کا اضافہ بھی نقل کیا ہے۔ یعنی اور جس سے تونے دشمنی کی وہ عزت نہیں پاسکتا‘ نیز نسائی نے ایک دوسرے طریق سے اس دعا کے آخر میں [وَصَلَّی اللّٰہُ عَلَی النَّبِيِّ]کا اضافہ بھی روایت کیا ہے‘ یعنی اور اللہ ‘ نبی صلی اللہ علیہ وسلم پر رحمت نازل فرمائے۔اور بیہقی میں حضرت ابن عباس رضی اللہ عنہما کی روایت میں ہے کہ رسول اللہ صلی اللہ علیہ وسلم ہمیں دعا سکھاتے تھے جسے ہم صبح کی نماز میں دعائے قنوت کی صورت میں مانگتے تھے۔(اس کی سند میں ضعف ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی سجدہ کرے تو اونٹ کی طرح نہ بیٹھے‘ اور چاہیے کہ گھٹنوں سے پہلے اپنے ہاتھ زمین پر رکھے۔‘‘ (اسے تینوں نے روایت کیا ہے۔) اور یہ مذکورہ حدیث حضرت وائل بن حجر رضی اللہ عنہ سے مروی حدیث سے قوی تر ہے جس میں یہ ہے کہ میں نے نبی صلی اللہ علیہ وسلم کو سجدے میں جاتے دیکھا ہے کہ آپ صلی اللہ علیہ وسلم اپنے گھٹنے‘ ہاتھوں سے پہلے زمین پر رکھتے تھے۔ (اسے چاروں نے روایت کیا ہے۔ پہلی حدیث کا شاہد حضرت ابن عمر رضی اللہ عنہما کی حدیث ہے جسے ابن خزیمہ نے صحیح قرار دیا ہے اور بخاری نے اسے تعلیقاً موقوف بیان کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ رسول اللہ صلی اللہ علیہ وسلم جب تشہد کے لیے بیٹھتے تو اپنا بایاں ہاتھ اپنے بائیں گھٹنے پر اور دایاں ہاتھ اپنے دائیں گھٹنے پر رکھتے اور تریپن(۵۳)کی گرہ دیتے اور اپنی انگشت شہادت سے اشارہ کرتے۔ (اسے مسلم نے روایت کیا ہے۔) اور مسلم ہی کی ایک روایت میں ہے کہ آپ اپنی تمام انگلیاں بند کر لیتے اور انگوٹھے کے ساتھ ملی ہوئی انگلی سے اشارہ کرتے۔

اردو ترجمہ · UrduUnverified translation

حضرت عبداللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم ہماری طرف متوجہ ہوئے اور فرمایا: ’’جب تم میں سے کوئی شخص نماز پڑھے تو تشہد میں یوں کہے : [اَلتَّحِیَّاتُ لِلّٰہِ … الخ]’’تمام قولی‘ فعلی اور مالی عبادتیں صرف اللہ کے لیے ہیں۔ اے نبی! سلام ہو آپ پر اور اللہ کی رحمت اور اس کی برکتیں ہوں۔ سلام ہو ہم پر اور اللہ کے صالح بندوں پر۔ میں گواہی دیتا ہوں کہ اللہ کے سوا کوئی لائق عبادت نہیں اور اس کی بھی گواہی دیتا ہوں کہ حضرت محمد ( صلی اللہ علیہ وسلم ) اللہ کے بندے اور اس کے رسول ہیں۔‘‘ پھر اسے اس دعا کا انتخاب کرنا چاہیے جو اسے سب سے اچھی لگے اوروہ مانگے۔‘‘ (بخاری و مسلم- الفاظ بخاری کے ہیں۔) اور سنن نسائی میں ہے کہ ہم تشہد فرض ہونے سے پہلے (کچھ کلمات) کہا کرتے تھے۔ اور مسند احمد میں ہے کہ نبی صلی اللہ علیہ وسلم نے اسے تشہد سکھایا اور حکم دیا کہ اسے لوگوں کو سکھاؤ۔ اور مسلم میں حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم ہمیں یوں تشہد سکھاتے تھے: [اَلتَّحِیَّاتُ الْمَبَارَکَاتُ الصَّلَوَاتُ الطَّیِّبَاتُ لِلّٰہِ …الخ]

اردو ترجمہ · UrduUnverified translation

حضرت فضالہ بن عبید رضی اللہ عنہ سے مروی ہے کہ رسول اللہ صلی اللہ علیہ وسلم نے ایک آدمی کو اپنی نماز میں دعا کرتے سنا۔ اس نے اللہ کی حمد بیان کی نہ نبی صلی اللہ علیہ وسلم پر درود بھیجا۔ آپ نے فرمایا: ’’اس نے جلدی کی ہے۔‘‘ پھر آپ نے اسے اپنے پاس بلایا اور کہا: ’’تم میں سے جب کوئی دعا مانگنے لگے تو پہلے اسے اپنے رب کی حمد و ثنا بیان کرنی چاہیے‘ پھر نبی صلی اللہ علیہ وسلم پر درود بھیجنا چاہیے‘ پھر اس کے بعد جو چاہے دعا مانگے۔‘‘ (اسے احمد اور تینوں نے روایت کیا ہے اور ترمذی‘ ابن حبان اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابومسعود انصاری رضی اللہ عنہ روایت کرتے ہیں کہ بشیر بن سعد رضی اللہ عنہ نے عرض کیا: اے اللہ کے رسول! اللہ تعالیٰ نے ہمیں آپ پر درود بھیجنے کا حکم فرمایا ہے‘ تو ہم کس طرح آپ پر درود بھیجیں؟ آپ (تھوڑی دیر) خاموش رہے‘ پھر فرمایا: ’’اس طرح کہا کرو: [اَللّٰھُمَّ! صَلِّ عَلٰی مُحَمَّدٍ …الخ ] ’’اے اللہ! محمد اور آل محمد پر رحمت نازل فرما جس طرح تو نے ابراہیم ( علیہ السلام ) پر رحمت نازل فرمائی۔ اور برکت نازل فرما محمد اور آل محمد پر جس طرح تو نے برکت نازل فرمائی ابراہیم ( علیہ السلام ) پر جہانوں میں۔ یقینا تو ستودہ صفات ہے اور بزرگ ہے۔‘‘ اور رہا سلام‘ تو وہ اس طرح ہے جس طرح کہ تم جانتے ہو۔‘‘ (اسے مسلم نے روایت کیا ہے۔) اور ابن خزیمہ نے اس میں اتنا اضافہ نقل کیا ہے (صحابہ نے عرض کیا) کہ جب ہم نماز پڑھ رہے ہوں تو اس وقت آپ پر درود کس طرح پڑھیں؟