اردو ترجمہ · UrduUnverified translation

حضرت عبداللہ بن مسعود رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’سچائی کو لازم پکڑو کیونکہ سچ نیکی کی طرف راہ نمائی کرتا ہے اور نیکی جنت کی جانب لے جاتی ہے۔ اور آدمی ہمیشہ سچ بولتا رہتا ہے اور سچ کی تلاش میں رہتا ہے حتی کہ اسے اللہ کے ہاں صِدِّیـق لکھ دیا جاتا ہے۔ اور جھوٹ سے بچو کیونکہ جھوٹ گناہ کی جانب لے جاتا ہے اور گناہ‘ آتش جہنم کی جانب لے جاتا ہے۔ اور آدمی ہمیشہ جھوٹ بولتا رہتا ہے اور جھوٹ کی تلاش میں رہتا ہے حتی کہ اسے اللہ کے ہاں جھوٹا لکھ دیا جاتا ہے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’بدگمانی سے بچو۔ بدگمانی سب سے بڑا جھوٹ ہے۔‘‘ (بخاری و مسلم)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’راستوں میں بیٹھنے سے بچو۔‘‘ صحابہ نے عرض کیا: اے اللہ کے رسول! راستوں میں بیٹھے بغیر ہمارا گزارہ نہیں کیونکہ ہم وہاں بیٹھ کر باتیں کرتے ہیں۔ آپ نے فرمایا: ’’اگر تممُصِرّ ہی ہو تو راستے کا حق ادا کرو۔‘‘ انھوں نے عرض کیا: اس کا حق کیا ہے؟ فرمایا: ’’آنکھوں کو نیچے رکھنا‘تکلیف دینے سے باز رہنا‘ سلام کا جواب دینا‘نیکی کا حکم کرنا اور برائی سے منع کرنا۔‘‘ (بخاری و مسلم)

اردو ترجمہ · UrduUnverified translation

حضرت معاویہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ جس شخص سے بھلائی کا ارادہ فرماتا ہے اسے دین کی سمجھ سے نوازتاہے۔‘‘ (بخاری و مسلم)

اردو ترجمہ · UrduUnverified translation

حضرت ابودرداء رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ترازو میں اچھے اخلاق سے زیادہ وزنی کوئی چیز نہیں ہوگی۔‘‘ (اسے ابوداود اور ترمذی نے روایت کیا ہے اور ترمذی نے اسے صحیح قرار دیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’حیا ایمان کا جز ہے۔‘‘ (بخاری و مسلم)

اردو ترجمہ · UrduUnverified translation

حضرت ابومسعود رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ پہلی (گزشتہ) نبوت کے کلام میں سے لوگوں نے جو کچھ پایا ہے‘ اس میں سے یہ بھی ہے کہ جب تو بے حیا ہو جائے تو جو چاہے کر۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’قوی مومن اللہ کے ہاں ضعیف و کمزور مومن سے زیادہ محبوب ہے۔ اور ہر مومن میں بھلائی و اچھائی ہے۔ جو چیز تیرے لیے نفع بخش ہے اس کی حرص و لالچ کر۔ مدد صرف اللہ سے طلب کر اور عاجز و درماندہ بن کر نہ بیٹھ۔ اور اگر تجھے کوئی مصیبت پہنچے تو اس طرح مت کہہ کہ اگریہ کام میں نے اس طرح سر انجام دیا ہوتا تو اس سے مجھے یہ اور یہ فوائد حاصل ہوتے۔ بلکہ اس طرح کہا کر کہ اللہ تعالیٰ نے مقدر کیا اور جو چاہا کر دکھایا۔ کیونکہ لفظ لَوْ (اگر) شیطان کے عمل کا دروازہ کھولتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عیاض بن حمار رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’یقینا اللہ تعالیٰ نے مجھ پر وحی نازل فرمائی ہے کہ تواضع اور انکسار اختیار کرو۔ یہاں تک کہ کوئی شخص کسی دوسرے پر زیادتی نہ کرے‘ اور نہ کوئی دوسرے پر فخر ہی کرے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابودرداء رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس شخص نے اپنے بھائی کی عدم موجودگی میں اس کی آبرو کی حفاظت کی اللہ تعالیٰ قیامت کے روز اس کے چہرے سے آتش جہنم دوررکھے گا۔‘‘ (اسے ترمذی نے روایت کیا ہے اور حسن قرار دیا ہے۔ اور مسند احمد میں حضرت اسماء بنت یزید رضی اللہ عنہا کی حدیث بھی اسی طرح ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’صدقہ و خیرات کسی مال میں کمی واقع نہیں کرتا۔ اور اللہ تعالیٰ درگزر کرنے والے کی عزت میں اضافہ ہی کرتا ہے۔ اور جو شخص اللہ تعالیٰ کے لیے تواضع اختیار کرتا ہے تو اللہ تعالیٰ اسے بلند کرتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عبداللہ بن سلام رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’لوگو! سلام کو عام کرو‘ صلہ رحمی کرو‘ کھانا کھلاؤ اور رات کو نماز (تہجد) پڑھو جب دوسرے لوگ سورہے ہوں‘ جنت میں سلامتی کے ساتھ داخل ہو جاؤ گے۔‘‘ (اسے ترمذی نے نقل کیا ہے اور صحیح کہا ہے۔)

اردو ترجمہ · UrduUnverified translation

حضرت تمیم داری رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’دین خیر خواہی کا نام ہے۔‘‘ آپ نے تین مرتبہ یہ فرمایا۔ ہم نے عرض کیا: اے اللہ کے رسول! خیرخواہی کس کے لیے؟ فرمایا: ’’اللہ کے لیے‘ اس کی کتاب کے لیے‘ اس کے رسول کے لیے‘ مسلمانوں کے ائمہ کے لیے اور ان کے عام لوگوں کے لیے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو چیز جنت میں جانے کا سب سے زیادہ باعث بنے گی وہ اللہ کا ڈر اور حسن خلق ہے۔‘‘ (اسے ترمذی نے نقل کیا ہے اور حاکم نے اسے صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’تم اپنے مالوں کے ذریعے سے لوگوں تک رسائی حاصل نہیں کر سکتے (نہیں سمو سکتے) لیکن کشادہ روئی اور حسن خلق سے لوگوں تک رسائی حاصل کر سکتے ہو۔‘‘ (اسے ابو یعلیٰ نے روایت کیا ہے اور حاکم نے اسے صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ نے فرمایا: ’’مومن اپنے مومن بھائی کا آئینہ ہے۔‘‘ (اسے ابوداود نے حسن سند کے ساتھ روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جو مومن لوگوں سے میل جول رکھتا ہے اور ان کی ایذا رسانی پر صبر کرتا ہے وہ اس مومن سے بہتر ہے جو لوگوں سے مل جل کر نہیں رہتا اور ان کی ایذا رسانی پر صبر بھی نہیں کرتا۔‘‘ (اس حدیث کو ابن ماجہ نے حسن سند کے ساتھ روایت کیا ہے‘ نیز یہ حدیث ترمذی میں بھی ہے مگر اس نے صحابی کا نام نہیں لیا۔)

اردو ترجمہ · UrduUnverified translation

حضرت ابن مسعود رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’الٰہی جس طرح تو نے میری تخلیق (شکل و صورت) کو خوب اچھا بنایا ہے‘ اسی طرح میرے اخلاق کو بھی اچھا بنا دے۔‘‘ (اسے احمد نے روایت کیا ہے اور ابن حبان نے اسے صحیح کہا ہے۔)