اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اپنے آپ کو حسد سے بچاؤ‘ اس لیے کہ حسد نیکیوں کو اس طرح کھا جاتا ہے جس طرح آگ (خشک) لکڑیوں کو کھا جاتی ہے۔‘‘ (اسے ابوداود نے روایت کیا ہے۔ اور ابن ماجہ میں حضرت انس رضی اللہ عنہ سے اسی طرح مروی ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے روایت ہے‘ رسول اللہ صلی اللہ علیہ وسلم نے فرمایا: ’’کسی کو پچھاڑ دینے والا بہادر نہیں۔ بہادر تو وہ ہے جو غصے میں اپنے آپ کو قابو میں رکھے۔‘‘(بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’ظلم‘ قیامت کے روز بہت سے اندھیروں کا باعث ہوگا۔‘‘ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’ظلم سے بچو کیونکہ ظلم قیامت کے روز اندھیروں کی شکل میں ہو گا‘ نیز بخیلی سے بھی بچو کیونکہ اس نے تم سے پہلے لوگوں کو ہلاک کر دیا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت محمود بن لبید رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا:’’ مجھے تمھارے بارے میں سب سے زیادہ خوف تمھارے شرک اصغر‘ یعنی ریاکاری کا ہے۔‘‘ (اسے امام احمد نے حسن سند کے ساتھ روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ وہ فرماتے کہ رسول اللہ صلی اللہ علیہ وسلم نے فرمایا: ’’منافق کی تین نشانیاں ہیں: جب بات کرے تو جھوٹ بولے۔ اور جب وعدہ کرے تو وعدہ خلافی کرے۔ اور جب اس کے پاس امانت رکھی جائے تو اس میں خیانت کرے۔‘‘ (بخاری و مسلم) اور دونوں کے ہاں حضرت عبداللہ بن عمر رضی اللہ عنہما کی روایت میں ہے: ’’جب لڑے تو گالی دے۔‘‘

اردو ترجمہ · UrduUnverified translation

حضرت ابن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ’’مسلمان کو گالی دینا فسق ہے اور اس سے لڑنا کفر ہے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’بدگمانی سے بچو کیونکہ بدگمانی سب سے بڑا جھوٹ ہے۔‘‘ (بخاری و مسلم)

اردو ترجمہ · UrduUnverified translation

حضرت معقل بن یسار رضی اللہ عنہ سے روایت ہے‘ میں نے رسول اللہ صلی اللہ علیہ وسلم کو فرماتے سنا: ’’اللہ تعالیٰ جس بندے کو لوگوں کا حاکم بنا دے اور اسے ایسی حالت میں موت آئے کہ اس نے اپنی رعیت کے حقوق ادا نہ کیے ہوں تو اللہ تعالیٰ اس پر جنت حرام کر دیتا ہے۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’یا الٰہی! جو شخص میری امت کے کسی کام کا والی و سربراہ بنااور اس نے انھیں مشقت میں مبتلا کیا تو تو اس پر سختی فرما۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’جب تم میں سے کوئی لڑائی کرے تو منہ پر مارنے سے اجتناب کرے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے مروی ہے کہ ایک آدمی نے رسول اللہ صلی اللہ علیہ وسلم سے عرض کیا: مجھے کوئی نصیحت فرمائیے۔ آپ نے فرمایا: ’’غصہ مت کیا کر۔‘‘ اس نے یہی سوال چند مرتبہ دہرایا اور آپ نے ہر مرتبہ یہی فرمایا: ’’غصہ نہ کیا کر۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت خولہ انصاریہ رضی اللہ عنہا سے روایت ہے‘ وہ فرماتی ہیں کہ رسول اللہ صلی اللہ علیہ وسلم نے فرمایا: ’’کچھ لوگ اللہ کے مال میں ناحق دخل انداز ہوتے ہیں۔ ایسے لوگوں کے لیے قیامت کے روز جہنم کی آگ ہے۔‘‘(اسے بخاری نے روایت کیاہے۔)

اردو ترجمہ · UrduUnverified translation

حضرت ابوذر رضی اللہ عنہ نے نبی صلی اللہ علیہ وسلم سے ان خبروں کے متعلق روایت کیا ہے جو آپ اللہ تعالیٰ سے بیان فرماتے ہیں کہ اللہ تعالیٰ نے فرمایا: ’’اے میرے بندو! بے شک میں نے ظلم کو اپنے اوپر حرام کر لیا ہے اور اسے تمھارے درمیان بھی حرام قرار دے دیا ہے‘ لہٰذا تم ایک دوسرے پر ظلم نہ کرو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تمھیں معلوم ہے کہ غیبت کسے کہتے ہیں؟‘‘ صحابہ نے عرض کیا: اللہ اور اس کا رسول ہی بہتر جانتے ہیں۔ آپ نے فرمایا: ’’غیبت یہ ہے کہ تو اپنے بھائی کا تذکرہ اس طور پر کرے جو اسے ناپسند ہو۔‘‘ کسی نے عرض کیا: جو بات میں کہتا ہوں اگر وہ میرے بھائی میں پائی جائے تو؟ آپ نے فرمایا: ’’جو بات تم کہتے ہو اگر وہ اس میں پائی جاتی ہے تو اس کی تم نے غیبت کی ہے اور اگر وہ اس میں نہ ہو تو پھر تم نے اس پر بہتان لگایا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ ہی سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’ایک دوسرے سے حسد نہ کرو ‘(دھوکا دینے کے لیے بولی میں) قیمتیں نہ بڑھاؤ‘ ایک دوسرے سے بغض نہ رکھو‘ ایک دوسرے سے بے رخی اختیار نہ کرو اور ایک دوسرے کے سودے پر سودا نہ کرو‘ اللہ کے بندو! آپس میں بھائی بھائی بن جاؤ۔ مسلمان‘ مسلمان کا بھائی ہے۔ اس پر ظلم کرتا ہے نہ اسے بے یار و مددگار چھوڑتا ہے اور نہ اسے حقیر ہی سمجھتا ہے۔‘‘ اور آپ نے اپنے سینے کی طرف تین مرتبہ اشارہ کرتے ہوئے فرمایا: ’’تقویٰ یہاں ہے۔ کسی آدمی کے لیے بس اتنی برائی ہی کافی ہے کہ وہ اپنے مسلمان بھائی کو حقیر سمجھے۔ ہر مسلمان کا دوسرے مسلمان پر خون‘ مال اور آبرو حرام ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت قطبہ بن مالک رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم یہ دعائیہ کلمات فرمایا کرتے تھے: [اَللّٰھُمَّ! جَنِّبْنِي مُنْکَرَاتِ الْأَخْلاَقِ‘ وَالْأَعْمَالِ‘ وَالْأَھْوَائِ‘ وَالْأَدْوَائِ] ’’الٰہی! مجھے برے اخلاق‘ برے اعمال‘ بری خواہشات اور بری بیماریوں سے بچا۔‘‘ (اسے ترمذی نے روایت کیا ہے۔ حاکم نے اسے صحیح کہا ہے اور یہ الفاظ اسی کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’اپنے مسلمان بھائی سے جھگڑا مت کر اور نہ اس سے مذاق کر اور اس سے ایسا وعدہ بھی نہ کر جس کی بعد میں تو خلاف ورزی کرے۔‘‘ (اسے ترمذی نے ضعیف سند سے روایت کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’دو خصلتیں ایسی ہیں جو کسی مومن میں جمع نہیں ہو سکتیں: بخل اور برا اخلاق۔‘‘ (اسے ترمذی نے بیان کیا ہے اور اس کی سند میں ضعف ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’گالی گلوچ کرنے والے دو آدمی جو کچھ بھی کہتے رہیں‘ بار گناہ (صرف) ابتدا کرنے والے پر ہے تاوقتیکہ مظلوم زیادتی کرے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوصرمہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس نے کسی مسلمان کو ضرر پہنچایا اللہ تعالیٰ اسے نقصان پہنچائے گا اور جس نے کسی مسلمان کو مشقت میں مبتلا کیا اللہ تعالیٰ اسے مشقت اور مصیبت میں مبتلا فرمائے گا۔‘‘ (اس حدیث کو ابوداود اور ترمذی نے روایت کیا ہے اور ترمذی نے اسے حسن قرار دیا ہے۔)

اردو ترجمہ · UrduUnverified translation

حضرت ابودرداء رضی اللہ عنہ سے روایت ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’بے شک اللہ تعالیٰ فحش گو‘بدزبان سے بغض رکھتا ہے۔‘‘ (اسے ترمذی نے روایت کیا ہے اور اسے صحیح کہا ہے۔)

اردو ترجمہ · UrduUnverified translation

اورترمذی ہی میں حضرت عبداللہ بن مسعود رضی اللہ عنہ کی ایک مرفوع روایت میں ہے: ’’مومن بہت طعن کرنے والا‘ بہت لعنت کرنے والا‘ فحش گواور بدزبان نہیں ہوتا۔‘‘ (ترمذی نے اس حدیث کو حسن کہا ہے‘ حاکم نے اسے صحیح قرار دیا ہے اور دارقطنی نے اس کاموقوف ہونا راجح قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ رسول اللہ صلی اللہ علیہ وسلم نے فرمایا: ’’فوت شدگان کو گالی نہ دو کیونکہ انھوں نے جو کچھ آگے بھیجا تھا اس تک وہ پہنچ چکے ہیں۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت حذیفہ رضی اللہ عنہ سے مروی ہے‘ وہ فرماتے ہیں کہ رسول اللہ صلی اللہ علیہ وسلم نے فرمایا: ’’چغل خور جنت میں داخل نہیں ہوگا۔‘‘ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس کسی نے اپنے غصے کو روک لیا اللہ تعالیٰ اس سے اپنا عذاب روک لے گا۔‘‘ (اسے طبرانی نے الاوسط میں نقل کیا ہے۔ حضرت ابن عمر رضی اللہ عنہما کی حدیث اس کی شاہد ہے جسے ابن ابی الدنیا نے نقل کیا ہے۔)

اردو ترجمہ · UrduUnverified translation

حضرت ابوبکر صدیق رضی اللہ عنہ سے مروی ہے کہ رسول اللہ صلی اللہ علیہ وسلم نے فرمایا: ’’دھوکے باز‘ بخیل اور بدخلق آدمی جنت میں داخل نہیں ہوگا۔‘‘ (اسے ترمذی نے روایت کیا ہے اور انھوں نے اسے دو احادیث کی صورت میں الگ الگ بیان کیا ہے۔ اور اس کی سند میں ضعف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جس نے چھپ کر کسی قوم کی بات سننے کی سعی کی جبکہ وہ اسے ناپسند کرتے ہوں تو قیامت کے روز اس کے کانوں میں سیسہ ڈالا جائے گا۔‘‘ [آنُکُ] کے معنی: سیسہ ہیں۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’اس شخص کے لیے طوبیٰ (خوشخبری) ہے جسے اپنے عیب نے دوسرے لوگوں کے عیوب (تلاش کرنے) سے باز رکھا۔‘‘ (اس حدیث کو بزار نے حسن سند سے روایت ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جو کوئی اپنے آپ کو بڑا سمجھے اور اپنی چال میں تکبر اختیار کرے وہ اللہ سے ایسی حالت میں ملاقات کرے گا کہ وہ اس پر غضب ناک ہوگا۔‘‘ (اسے حاکم نے نقل کیا ہے اور اس کے راوی ثقہ ہیں۔)

اردو ترجمہ · UrduUnverified translation

حضرت سہل بن سعد رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جلد بازی و عجلت پسندی شیطانی کام ہے۔‘‘ (اسے ترمذی نے روایت کیا ہے اور اسے حسن قرار دیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’بدخلقی نحوست ہے۔‘‘ (اسے احمد نے روایت کیا ہے اور اس کی سند میں ضعف ہے۔)

اردو ترجمہ · UrduUnverified translation

حضرت ابودرداء رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’یقینا لعنت کرنے والے قیامت کے روز سفارش کرنے والے ہوں گے نہ گواہی دینے والے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت معاذ بن جبل رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو شخص اپنے بھائی کو کسی گناہ کی عار دلائے گا تو وہ خود بھی وہی کام کر کے مرے گا۔‘‘ (اسے ترمذی نے نقل کیا ہے اور اسے حسن قرار دیا ہے۔ اور اس کی سند منقطع ہے۔)

اردو ترجمہ · UrduUnverified translation

حضرت بہز بن حکیم اپنے باپ سے اور انھوں نے اپنے دادا سے روایت کی ہے کہ رسول اللہ صلی اللہ علیہ وسلم نے فرمایا: ’’ہلاکت ہے اس شخص پر جو جھوٹی باتیں سنا کر لوگوں کو ہنساتا ہے۔ اس پر ہلاکت ہے‘ پھر اس پر ہلاکت ہے۔‘‘ (اسے تینوں نے روایت کیا ہے اور اس کی سندقوی ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس کی تو نے غیبت کی ہو اس کا کفارہ یہ ہے کہ تو اس کے لیے (اللہ سے) مغفرت طلب کرے۔‘‘ (اسے حارث بن ابی اسامہ نے ضعیف سند سے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’ اللہ کے نزدیک بندوں میں سے سب سے زیادہ مبغوض وہ ہے جو سب سے زیادہ جھگڑالو ہو۔‘‘ (اسے مسلم نے روایت کیا ہے۔)