اردو ترجمہ · UrduUnverified translation

حضرت نعمان بن بشیر رضی اللہ عنہما سے مروی ہے کہ میں نے رسول اللہ صلی اللہ علیہ وسلم سے سنا‘ اور حضرت نعمان نے اپنی دونوں انگلیوں کو اپنے کانوں کی طرف بلند کیا‘ آپ فرما رہے تھے : ’’یقینا حلال بھی واضح ہے‘ اور بلاشبہ حرام بھی واضح ہے۔ اور ان دونوں کے درمیان میں شبہے والی چیزیں ہیں جنھیں لوگوں کی اکثریت نہیں جانتی۔ چنانچہ جو کوئی شبہات سے بچ گیا تو اس نے اپنے دین اور اپنی عزت و آبرو کو بچا لیا۔ اور جو شبہات میں پڑ گیا وہ حرام میں پھنس گیا‘ جیسے کوئی چرواہا کسی چراگاہ کے گرد (مویشی) چراتا ہو تو ممکن ہے کہ جانور اس میں داخل ہو جائے۔ خبردار! یقینا ہر بادشاہ کی ایک چراگاہ ہوتی ہے۔ خبردار! بے شک اللہ کی چراگاہ اس کی حرام کردہ چیزیں ہیں۔ خبردار! یقینا جسم میں گوشت کا ایک ٹکڑا ہے‘ جب وہ درست ہو تو سارا جسم درست ہوتا ہے‘ اور جب وہ بگڑ جائے تو سارا جسم بگڑ جاتا ہے۔ خبردار! وہ ٹکڑا دل ہے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا ’’برباد ہوگیا دینار و درہم اور چادر کا بندہ‘ اگر اسے دیا جائے تو راضی رہتا ہے اور اگر نہ دیا جائے تو ناراض ہو جاتا ہے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے کہ رسول اللہ صلی اللہ علیہ وسلم نے میرے کندھے پکڑ کر فرمایا: ’’(اے ابن عمر!) دنیا میں ایک اجنبی یا راہ چلتے مسافر کی طرح رہ۔‘‘ اور ابن عمر رضی اللہ عنہما کہا کرتے تھے: جب تو شام کرے تو صبح کا انتظار نہ کر اور جب صبح کرے تو شام کا منتظر نہ رہ اور اپنی تندرستی کے وقت اپنی بیماری کے لیے اور زندگی میں موت کے لیے تیاری کر۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جس کسی نے دوسری قوم سے مشابہت اختیار کی تو وہ انھی میں سے ہے۔‘‘ (اسے ابوداود نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ میں ایک دن نبی صلی اللہ علیہ وسلم کے پیچھے (کھڑا) تھا۔ آپ نے فرمایا: ’’اے لڑکے! تو اللہ (کے احکام) کی حفاظت کر‘ اللہ تعالیٰ تیری نگہبانی کرے گا۔ تو اللہ (کے احکام) کی حفاظت کر تو اسے اپنے سامنے پائے گا۔ اور جب تو کچھ مانگے تو (صرف) اللہ سے مانگ‘ اور جب تو مدد طلب کرے تو (بس) اللہ سے مدد مانگ۔‘‘ (اسے ترمذی نے روایت کیا ہے اور حسن صحیح کہا ہے۔)

اردو ترجمہ · UrduUnverified translation

حضرت سہل بن سعد رضی اللہ عنہ سے روایت ہے‘ وہ کہتے ہیں کہ ایک آدمی نبی صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول! مجھے ایسا عمل بتائیے کہ جب میں اسے کروں تو اللہ مجھے اپنا محبوب بنا لے اور لوگ بھی مجھ سے محبت کریں۔ آپ نے فرمایا: ’’دنیا سے بے نیاز ہو جا اللہ تجھے محبوب بنا لے گا۔ اور جو کچھ لوگوں کے پاس ہے اس سے بے نیاز ہو جا لوگ تجھے محبوب رکھیں گے ۔‘‘ (اسے ابن ماجہ وغیرہ نے روایت کیا ہے اور اس کی سند حسن ہے۔)

اردو ترجمہ · UrduUnverified translation

حضرت سعد بن ابی وقاص رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے سنا: ’’اللہ تعالیٰ ایسے بندے کو دوست و محبوب رکھتا ہے جو پرہیز گار‘ بے نیاز اور گمنام (مخفی) ہو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’آدمی کا بے فائدہ چیزوں کو چھوڑ دینا اس کے حسن اسلام کی دلیل ہے۔‘‘ (اسے ترمذی نے روایت کیا ہے اور اسے حسن قرار دیا ہے۔)

اردو ترجمہ · UrduUnverified translation

حضرت مقدام بن معدیکرب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’آدم کے بیٹے نے پیٹ سے برا کوئی برتن نہیں بھرا۔‘‘ (اسے ترمذی نے روایت کیا ہے اور اسے حسن قرار دیا ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’آدم کا ہر بیٹا خطا کار ہے اور بہترین خطا کار وہ ہیں جو بہت زیادہ توبہ کرنے والے ہیں۔‘‘ (اسے ترمذی اور ابن ماجہ نے روایت کیا ہے اور اس کی سند قوی ہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’خاموشی حکمت و دانائی ہے لیکن اس پر عمل پیرا ہونے والے تھوڑے ہی ہوتے ہیں۔‘‘ (اسے بیہقی نے شعب الایمان میں ضعیف سند کے ساتھ روایت کیا ہے۔ اور انھوں نے کہا: صحیح بات یہ ہے کہ یہ لقمان حکیم کا قول ہے۔)