اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس کسی کو یہ پسند ہے کہ اس کے رزق میں کشادگی اور عمر میں اضافہ ہو تو اسے صلہ رحمی کرنی چاہیے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت جبیر بن مطعم رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’قطع رحمی کرنے والا جنت میں داخل نہیں ہوگا۔‘‘ (بخاری و مسلم)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ نے تم پر ماؤں کی نافرمانی اور ان سے بدسلوکی کرنا‘ لڑکیوں کو زندہ درگور کرنا ‘ حقوق ادا نہ کرنا اور دوسروں کے سامنے ہاتھ پھیلانا حرام قرار دیا ہے اور قیل وقال‘ کثرت سوال اور مال کو ضائع کرنا ناپسند کیا ہے۔‘‘ (بخاری و مسلم)

اردو ترجمہ · UrduUnverified translation

حضرت عبداللہ بن عمرو رضی اللہ عنہما نبی صلی اللہ علیہ وسلم سے بیان کرتے ہیں‘ آپ نے فرمایا: ’’اللہ تعالیٰ کی رضامندی والدین کی رضامندی میں ہے اور اللہ تعالیٰ کی ناراضی والدین کی ناراضی میں ہے۔‘‘ (اسے ترمذی نے روایت کیا ہے۔ ابن حبان اور حاکم نے اسے صحیح قرار دیاہے۔)

اردو ترجمہ · UrduUnverified translation

حضرت انس رضی اللہ عنہ سے مروی ہے‘ نبی صلی اللہ علیہ وسلم نے فرمایا: ’’مجھے اس ذات اقدس کی قسم جس کے ہاتھ میں میری جان ہے !کوئی بندہ اس وقت تک مومن نہیں ہو سکتا جب تک وہ اپنے ہمسائے یا اپنے بھائی کے لیے بھی وہی پسند نہ کرے جو اپنے لیے پسند کرتا ہے۔‘‘ (بخاری و مسلم)

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے کہ میں نے رسول اللہ صلی اللہ علیہ وسلم سے سوال کیا: کون سا گناہ سب سے بڑا ہے؟ آپ نے فرمایا: ’’یہ کہ تو اللہ تعالیٰ کے ساتھ کسی کو شریک ٹھہرائے‘ حالانکہ وہ تیرا خالق ہے۔‘‘ میں نے عرض کیا: پھر کون سا؟ آپ نے فرمایا: ’’یہ کہ تو اپنی اولاد کو اس ڈر سے قتل کرے کہ وہ تیرے ساتھ مل کر کھائیں گے۔‘‘ میں نے پھر عرض کیا کہ پھر کون سا؟ آپ نے فرمایا: ’’پھر یہ کہ تو اپنے ہمسائے کی اہلیہ سے زنا کرے۔‘‘ (بخاری و مسلم)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’اپنے والدین کو گالی دینا کبیرہ گناہوں میں سے ہے۔‘‘ کہا گیا: کیا کوئی شخص اپنے ماں باپ کو بھی گالی دیتا ہے؟ فرمایا: ’’ہاں! وہ کسی کے باپ کو گالی دیتا ہے تو وہ اس کے باپ کو گالی دیتا ہے اور وہ اس کی والدہ کو گالی دیتا ہے تو وہ اس کی والدہ کو گالی دیتا ہے۔‘‘ (بخاری و مسلم)

اردو ترجمہ · UrduUnverified translation

حضرت ابوایوب رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کسی مسلمان کے لیے یہ حلال نہیں ہے کہ وہ اپنے بھائی سے تین راتوں سے زیادہ قطع تعلق رکھے۔ جب دونوں کا آمنا سامنا ہوتا ہے یہ اپنا منہ ادھر کر لیتا ہے اور وہ ادھر کر لیتا ہے۔ دونوں میں بہتر انسان وہ ہے جو سلام میں پہل کرتا ہے۔‘‘ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’ہر بھلائی صدقہ ہے۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوذر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کسی بھی بھلے کام کو حقیر اور معمولی نہ سمجھو‘ خواہ اپنے بھائی سے خندہ پیشانی سے ملاقات کرنا ہی کیوں نہ ہو۔‘‘

اردو ترجمہ · UrduUnverified translation

حضرت ابو ذر رضی اللہ عنہ ہی سے مروی ہے‘ رسول اللہ صلی اللہ علیہ وسلم نے فرمایا: ’’جب تم شوربا پکاؤ تو اس میں ذرا پانی زیادہ ڈال لیا کرو اور اپنے ہمسائے کا بھی خیال رکھا کرو۔‘‘ (ان دونوں احادیث کو مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو کوئی دنیا کی مصیبتوں اور سختیوں میں سے کسی مسلمان کی مصیبت کو دور کرے گا اللہ تعالیٰ قیامت کی سختیوں میں سے اس کی کوئی سختی دور فرما دے گا۔ اور جو کوئی کسی تنگ دست کے لیے آسانی پیدا کرے گا تو اللہ تعالیٰ دنیا و آخرت میں اس کے لیے آسانی پیدا فرمائے گا۔ اور جو کوئی کسی مسلمان کے عیب پر پردہ ڈالے گا، اللہ تعالیٰ دنیا و آخرت میں اس کی پردہ پوشی فرمائے گا۔ اور اللہ تعالیٰ اس وقت تک بندے کی مدد میں رہتا ہے جب تک وہ بندہ اپنے بھائی کی مدد میں لگا رہتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن مسعود رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جو کوئی بھلائی کا راستہ بتاتا ہے اسے بھی نیکی پر عمل پیرا ہونے والے کے برابر ثواب ملتا ہے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’جو کوئی تم سے اللہ کے نام کے ساتھ پناہ طلب کرے تو اسے پناہ دو اور جو کوئی اللہ تعالیٰ کے نام پر تم سے سوال کرے تو اسے دے دو اور جو کوئی تم سے حسن سلوک اور احسان کرے تو اسے احسان کا بدلہ دو۔ اگر بدلہ دینے کی طاقت نہ ہو تو پھر اس کے حق میں دعا کرو۔‘‘ (اسے بیہقی نے روایت کیا ہے۔)