اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’ایک مسلمان کے دوسرے مسلمان پر چھ حقوق ہیں: جب تو اس سے ملے تو اسے سلام کر‘ جب وہ تجھے بلائے تو اس کی فرمائش کو پورا کر ‘ جب وہ تجھ سے خیرخواہی طلب کرے تو اس کی خیر خواہی کر ‘ جب وہ چھینک مار کر اَلْحَمْدُ لِلّٰہِ کہے تو اس کے جواب میں تو یَـرْحَمُکَ اللّٰہُ کہہ‘ جب وہ بیمار ہو جائے تو اس کی عیادت کر اور جب وہ وفات پاجائے تو اس کے جنازے کے پیچھے جا۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ اپنے سے کم تر کو دیکھو اور اپنے سے برتر کی طرف نہ دیکھو کیونکہ اس طرح زیادہ مناسب ہے کہ تم اللہ کی کسی نعمت کو حقیر نہیں سمجھو گے۔‘‘(بخاری و مسلم)

اردو ترجمہ · UrduUnverified translation

حضرت نواس بن سمعان رضی اللہ عنہ سے مروی ہے کہ میں نے رسول اللہ صلی اللہ علیہ وسلم سے نیکی اور گناہ کے متعلق سوال کیا تو آپ نے فرمایا: ’’نیکی اچھے اخلاق کا نام ہے اور گناہ وہ کام ہے جو تیرے سینے میں کھٹکے اور تو ناپسند سمجھے کہ لوگ اس پر مطلع ہو جائیں۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم تین ہو تو دو آدمی تیسرے کے بغیر سرگوشی نہ کریں یہاں تک کہ تم لوگوں کے ساتھ مل جل جاؤ‘ اس لیے کہ یہ چیز اسے غمگین اور رنجیدہ خاطر کرتی ہے۔‘‘ (بخاری و مسلم۔ اور یہ الفاظ مسلم کے ہیں۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’کوئی آدمی کسی کو اس کی جگہ سے اٹھا کر خود اس جگہ نہ بیٹھے بلکہ (اگر جگہ کی کمی ہو تو اہل مجلس سے یہ کہہ دے کہ ) وسیع اور کشادہ ہو جاؤ۔‘‘ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی کھانا کھائے تو اپنا ہاتھ چاٹنے یا چٹوانے سے پہلے (رومال وغیرہ سے) صاف نہ کرے۔‘‘ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’چھوٹا بڑے کو‘ راہ چلتا بیٹھے کو اور تھوڑے زیادہ تعداد والوں کو سلام کیا کریں۔‘‘ (بخاری و مسلم) اور مسلم کی ایک روایت میں ہے: ’’سوار‘ پیدل کو سلام کرے۔‘‘

اردو ترجمہ · UrduUnverified translation

حضرت علی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب ایک جماعت کسی کے پاس سے گزرے تو ان میں سے ایک آدمی کا سلام کرنا کافی ہے اور جماعت میں سے ایک آدمی کا جواب دینا کافی ہے۔‘‘ (اسے احمد اور بیہقی نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’یہود و نصاریٰ کو سلام کرنے میں پہل مت کرو اور جب ان سے راستے میں ملاقات ہو جائے تو انھیں تنگ راستے کی طرف مجبور کر دو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’جب تم میں سے کسی کو چھینک آئے تو اسے اَلْحَمْدُ لِلّٰہ (سب تعریف اللہ کے لیے ہے) کہنا چاہیے اور اس کا بھائی اسے یَرْحَمُکَ اللّٰہُ (اللہ تجھ پر رحم کرے) کہے۔ جب وہ یَرْحَمُکَ اللّٰہُ کہہ دے تو پھر چھینک لینے والا جواباً کہے: یَھْدِیکُمُ اللّٰہُ وَ یُصْلِحُ بَالَکُمْ (اللہ تمھیں ہدایت دے اور تمھارا حال درست فرمائے۔‘‘) (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تم میں سے کوئی کھڑے کھڑے پانی نہ پیے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی جوتا پہنے تو پہلے دائیں پاؤں میں پہنے اور جب اتارے تو پہلے بائیں پاؤں سے اتارے‘ یعنی دایاں پاؤں جوتا پہننے میں پہلے ہونا چاہیے اور اتارنے میں آخر میں ہونا چاہیے۔‘‘ (بخاری و مسلم)مسلم نے اس حدیث کو لفظ بِالشِّمَال تک روایت کیا ہے اور حدیث کا باقی حصہ مالک‘ ترمذی اور ابوداود نے روایت کیا ہے۔

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’تم میں سے کوئی شخص ایک جوتا پہن کر نہ چلے پھرے یا تو دونوں اکٹھے پہنے یا پھر دونوں اتار دے۔‘‘ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ اس شخص کی طرف نظر رحمت سے نہیں دیکھے گا جس نے تکبر سے اپنا کپڑا (ٹخنوں وغیرہ سے) نیچے لٹکایا۔‘‘ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’جب بھی تم میں سے کوئی کھانا کھائے تو اسے اپنے دائیں ہاتھ سے کھانا چاہیے اور جب مشروب نوش کرے تو اسے دائیں ہاتھ سے نوش کرنا چاہیے کیونکہ شیطان اپنے بائیں ہاتھ سے کھاتا ہے اور بائیں ہی سے پیتا ہے۔‘‘ (اسے مسلم نے روایت کیاہے۔)

اردو ترجمہ · UrduUnverified translation

حضرت عمرو بن شعیب نے اپنے باپ سے اور انھوں نے اپنے دادا سے روایت کیا ہے‘ رسول اللہ صلی اللہ علیہ وسلم نے فرمایا: ’’کھا‘ پی‘ لباس پہن اور صدقہ کر لیکن اسراف اور تکبر کے بغیر۔‘‘ (اسے ابوداود اور احمد نے روایت کیا ہے اور بخاری نے اسے معلق بیان کیا ہے۔)