اردو ترجمہ · UrduUnverified translation

حضرت جابر رضی اللہ عنہ سے روایت ہے کہ ایک انصاری نے اپنا ایک غلام مدبّر کر دیا اور اس کے پاس اس کے سوا کوئی اور مال نہ تھا۔ یہ بات نبی صلی اللہ علیہ وسلم تک پہنچی تو آپ نے فرمایا: ’’اس غلام کو مجھ سے کون خریدتا ہے؟‘‘ چنانچہ حضرت نُعَیم بن عبداللہ رضی اللہ عنہ نے اسے آٹھ سو درہم میں خرید لیا۔ (بخاری و مسلم)اور بخاری کی ایک روایت میں ہے: چنانچہ وہ (انصاری) محتاج ہوگیا۔ اور نسائی کی ایک روایت میں ہے کہ اس (انصاری) پر قرض تھا تو آپ نے اسے آٹھ سو درہم کے عوض فروخت کیا اور اسے یہ قیمت دے کر فرمایا: ’’اپنا قرض ادا کر۔‘‘

اردو ترجمہ · UrduUnverified translation

حضرت عمرو بن شعیب اپنے باپ سے اور وہ اپنے دادا سے روایت کرتے ہیں‘ نبی صلی اللہ علیہ وسلم نے فرمایا: ’’مکاتب اس وقت تک غلام ہی ہے جب تک اس کی مکاتبت سے اس کے ذمے ایک درہم بھی باقی ہے۔‘‘ (اسے ابوداود نے حسن سند سے روایت کیا ہے اور اس کی اصل احمد اور تینوں کے ہاں ہے۔ اور حاکم نے اسے صحیح کہا ہے۔)

اردو ترجمہ · UrduUnverified translation

حضرت ام سلمہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کسی عورت کے پاس مکاتب ہو اور اس کے پاس اتنا مال ہو کہ وہ ادا کر سکے تو پھر اس (عورت) کو اس سے پردہ کرنا چاہیے۔‘‘ (اسے احمد اور چاروں نے روایت کیا ہے اور ترمذی نے اسے صحیح قرار دیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’مکاتب جس قدر آزاد ہو چکا ہو اس قدر اس کی آزاد شخص والی دیت ادا کی جائے گی اور جس قدر غلام ہو اس قدر غلام والی دیت دی جائے گی۔‘‘ (اسے احمد‘ ابوداداور نسائی نے روایت کیا ہے۔)

اردو ترجمہ · UrduUnverified translation

ام المومنین حضرت جویریہ رضی اللہ عنہا کے بھائی حضرت عمرو بن حارث رضی اللہ عنہ سے روایت ہے کہ رسول اللہ صلی اللہ علیہ وسلم نے اپنی وفات کے وقت میراث میں کوئی درہم چھوڑا نہ دینار اور نہ کوئی غلام اور لونڈی اور نہ کوئی اور چیز سوائے ایک سفید خچر‘ اسلحۂ جنگ اور تھوڑی سی زمین کے جسے آپ نے صدقہ کر دیا تھا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جس لونڈی نے اپنے مالک کا بچہ جنا تو وہ مالک کی وفات کے بعد آزاد ہے۔‘‘ (اسے ابن ماجہ اور حاکم نے ضعیف سند سے روایت کیا ہے اور ایک جماعت نے اس کے حضرت عمر رضی اللہ عنہ پر موقوف ہونے کو ترجیح دی ہے۔)

اردو ترجمہ · UrduUnverified translation

حضرت سہل بن حُنَیْـف رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس شخص نے مجاہد فی سبیل اللہ کی اعانت کی یا تنگ دستی میں کسی مقروض سے تعاون کیا یا کسی مکاتب کے زرِ کتابت کی ادائیگی میں اس کی مدد کی تو اللہ تعالیٰ ایسے شخص کو اس روز سایہ عطا فرمائے گا جس روز اس کے سائے کے سوا کوئی سایہ نہیں ہوگا۔‘‘(اسے احمد نے روایت کیا ہے اور حاکم نے اسے صحیح کہا ہے۔)