اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس مسلمان نے کسی مسلمان شخص کو آزاد کیا، اللہ تعالیٰ اس کے ہر عضو کو اس کے ہر عضو کے بدلے میں جہنم کی آگ سے نجات دے دے گا۔‘‘ (بخاری و مسلم) اور ترمذی میں حضرت ابوامامہ رضی اللہ عنہ سے مروی ہے جسے ترمذی نے صحیح قرار دیا ہے: ’’جس مسلمان مرد نے دو مسلمان عورتوں کو آزاد کیا تو وہ دونوں اس کے دوزخ سے آزاد ہونے کا سبب بن جائیں گی۔‘‘ اور ابوداود میں حضرت کعب بن مرہ رضی اللہ عنہ سے مروی حدیث میں ہے: ’’جو مسلمان خاتون کسی مسلمان خاتون کو آزاد کرے گی تو وہ اس کے جہنم سے آزاد ہونے کا موجب ہوگی۔‘‘

اردو ترجمہ · UrduUnverified translation

حضرت ابوذر رضی اللہ عنہ سے روایت ہے کہ میں نے نبی صلی اللہ علیہ وسلم سے پوچھا کہ افضل عمل کون سا ہے؟ آپ نے فرمایا: ’’اللہ پر ایمان لانا اور اس کے راستے میں جہاد کرنا۔‘‘ میں نے عرض کیا : کون سا غلام آزاد کرنا افضل ہے؟ فرمایا: ’’جو قیمت میں زیادہ گراں اور مالکوں کی نظروں میں زیادہ نفیس و محبوب ہو۔‘‘ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’جو شخص مشترکہ غلام میں سے اپنا حصہ آزاد کر دے‘ پھر اس کے پاس مزید اتنا مال بھی ہو جس سے غلام کی قیمت پوری ہو سکے تو انصاف سے اس کی قیمت مقرر کی جائے گی پھر وہ اپنے حصہ داروں کو ان کے حصے (کی قیمت) ادا کر دے گا اور یہ غلام اس کی طرف سے آزاد ہوگا۔ اور اگر اس کے پاس زائد مال نہ ہو تو پھر جتنا حصہ وہ آزاد کرے گا آزاد ہو جائے گا۔‘‘(بخاری و مسلم) اور دونوں (بخاری و مسلم) نے حضرت ابوہریرہ رضی اللہ عنہ سے یہ الفاظ نقل کیے ہیں: ’’ورنہ اس کی قیمت لگائی جائے گی اور اسے آزاد کرنے کے لیے اس پر مشقت ڈالے بغیر اس سے کام کروایا جائے گا۔‘‘ اور یہ بھی کہا گیا ہے: وَاسْتُسْعِيَ… جملہ مدرج‘ یعنی راوی کا اپنا بیان ہے۔

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’کوئی بیٹا اپنے باپ کا بدلہ نہیں دے سکتا الّا یہ کہ باپ غلام ہو تو وہ اسے خرید کر آزاد کر دے۔‘‘(اسے مسلم نے روایت کیا ہے۔)

اردو ترجمہ · UrduUnverified translation

حضرت سمرہ بن جندب رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جو شخص کسی محرم قرابت دار کا مالک بن گیا تو (اس کا) وہ (رشتہ دار) آزاد ہے۔‘‘ (اسے احمد اور چاروں نے روایت کیا ہے اور محدثین کی ایک جماعت نے اس بات کو راجح قرار دیا ہے کہ یہ موقوف ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما سے روایت ہے کہ ایک آدمی نے اپنی موت کے وقت اپنے چھ غلام آزاد کر دیے۔ ان غلاموں کے سوا اس کی کوئی اور جائیداد نہیں تھی۔ رسول اللہ صلی اللہ علیہ وسلم نے ان (غلاموں)کو بلایا اور ان کے تین حصے کیے‘ پھر ان میں قرعہ اندازی کی۔ چنانچہ آپ نے دو کو آزاد کر دیا اور چار کو غلام رہنے دیا اور آزاد کرنے والے کے حق میں سخت کلمات بھی فرمائے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت سفینہ رضی اللہ عنہ سے روایت ہے کہ میں حضرت ام سلمہ رضی اللہ عنہا کا غلام تھا۔ انھوں نے کہا: میں تجھے آزاد کرتی ہوں اور یہ شرط لگاتی ہوں کہ تم جب تک زندہ رہو گے‘ رسول اللہ صلی اللہ علیہ وسلم کی خدمت کرو گے۔ (اسے احمد‘ ابوداود‘ نسائی اور حاکم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’ولا اسی کا حق ہے جو آزاد کرے۔‘‘ (بخاری و مسلم۔ یہ لمبی حدیث کا ٹکڑا ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے مروی ہے‘ رسول اللہ صلی اللہ علیہ وسلم نے فرمایا: ’’ولا بھی نسب کے تعلق کی طرح ایک تعلق ہے جسے فروخت کیا جا سکتا ہے نہ ہبہ کیا جا سکتا ہے۔‘‘ (اسے شافعی نے روایت کیا ہے اور ابن حبان اور حاکم نے اسے صحیح قرار دیا ہے۔ اوراس کی اصل صحیحین میں ہے جس کے الفاظ اس سے مختلف ہیں۔)