اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’اگر لوگوں کو محض ان کے دعویٰ کرنے سے حق دے دیا جائے تو لوگ دوسرے لوگوں کے خون اور ان کے اموال کا دعویٰ کرنے لگیں گے لیکن (اصول یہ ہے کہ) مدعا علیہ کے ذمے قسم لازم ہے۔‘‘ (بخاری و مسلم) اور بیہقی نے صحیح سند سے روایت کیا ہے: ’’ثبوت مدعی کے ذمے ہے اور قسم اس کے ذمے جو اس کا انکار کرے۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ نبی صلی اللہ علیہ وسلم نے کچھ لوگوں کے سامنے قسم پیش کی تو وہ قسم کھانے پر فوراً تیار ہوگئے تو آپ نے حکم فرمایا کہ ان لوگوں میں قرعہ اندازی کی جائے کہ کون ان میں سے قسم کھائے گا۔ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوامامہ حارثی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس نے کسی مسلمان آدمی کا حق اپنی قسم کے ذریعے سے مارا تو اللہ تعالیٰ اس کے لیے دوزخ واجب کر دے گا اور اس پر جنت حرام قرار دے گا۔‘‘ ایک شخص نے عرض کیا:اے اللہ کے رسول ! اگرچہ کوئی حقیر اور معمولی چیز ہو؟ آپ نے فرمایا: ’’اگرچہ پیلو کی ایک شاخ ہو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت اشعث بن قیس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص قسم کھا کر کسی مسلمان شخص کا مال اڑا لے جبکہ وہ اپنی قسم میں جھوٹا ہو تو وہ اللہ تعالیٰ کے سامنے اس حال میں پیش ہوگا کہ اللہ تعالیٰ اس پر سخت ناراض ہوگا۔‘‘ (بخاری و مسلم)

اردو ترجمہ · UrduUnverified translation

حضرت ابوموسیٰ رضی اللہ عنہ سے روایت ہے کہ دو آدمیوں کا ایک جانور کے بارے میں جھگڑا ہوا۔ ان میں سے کسی کے پاس کوئی دلیل نہیں تھی، چنانچہ رسول اللہ صلی اللہ علیہ وسلم نے اس جانور کو ان دونوں کے درمیان آدھا آدھا دینے کا فیصلہ فرمایا۔ (اسے احمد‘ ابوداود اور نسائی نے روایت کیا ہے‘ یہ الفاظ نسائی کے ہیں۔ اور امام نسائی نے کہا ہے کہ اس کی سند جید ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس نے میرے اس منبر پر جھوٹی قسم کھائی ‘ اس نے اپنا ٹھکانا جہنم میں بنا لیا۔‘‘ (اسے احمد‘ ابوداود اور نسائی نے روایت کیا ہے اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تین آدمی ایسے ہیں کہ قیامت کے روز اللہ تعالیٰ ان سے کلام کرے گا نہ ان کی جانب نظر (رحمت) کرے گا اور نہ انھیں گناہوں سے پاک کرے گا بلکہ ان کے لیے درد ناک عذاب ہوگا: (پہلا) وہ آدمی جو بیابان میں بچے ہوئے پانی کے پاس رہ کر کسی مسافر کو اس سے روکتا ہے۔ اور (دوسرا) وہ آدمی جو عصر کے بعد کسی چیز کا دوسرے سے سودا کرتا ہے اور اللہ کی قسم کھاتا ہے کہ اس نے یہ چیز اتنے اتنے میں خریدی ہے اور خریدار اسے سچ مان لیتا ہے‘ حالانکہ حقیقت اس کے برعکس ہوتی ہے۔ اور(تیسرا) وہ شخص جس نے محض دنیاوی غرض کے لیے کسی بادشاہ کی بیعت کی اگر بادشاہ اسے کچھ دیتا ہے تو وہ وفا کرتا ہے اور اگر وہ اسے کچھ نہیں دیتا تو وہ وفا نہیں کرتا۔‘‘ (بخاری و مسلم)

اردو ترجمہ · UrduUnverified translation

حضرت جابر رضی اللہ عنہ سے روایت ہے کہ دو آدمیوں کا ایک اونٹنی کے بارے میں جھگڑا ہوگیا۔ ان میں سے ہر ایک کا دعویٰ تھا کہ یہ میرے ہاں جنم پائی ہے اور دونوں نے اپنی اپنی دلیل بھی پیش کی۔ چنانچہ رسول اللہ صلی اللہ علیہ وسلم نے اس کا فیصلہ اس شخص کے حق میں صادر فرمایا جس کے ہاتھ میں وہ تھی۔

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ نبی صلی اللہ علیہ وسلم نے حق کا مطالبہ کرنے والے ( مدعی) پر قسم ڈال دی۔ (ان دونوں احادیث کو دارقطنی نے روایت کیا ہے اور دونوں کی سند میں ضعف ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ وہ فرماتی ہیں کہ ایک روز نبی صلی اللہ علیہ وسلم خوش و خرم میرے ہاں تشریف لائے۔ آپ کے رخ انور کے خطوط چمک رہے تھے۔ آپ نے فرمایا: ’’کیا تجھے معلوم نہیں کہ مجزز مدلجی نے ابھی زید بن حارثہ اور اسامہ بن زید رضی اللہ عنہما کو دیکھ کر کہا ہے کہ یہ پاؤں ایک دوسرے کا جز ہیں۔‘‘ (بخاری و مسلم)