اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص مال مویشی کے تحفظ‘ شکار یا کھیتی کی دیکھ بھال کے سوا (شوق کے طور پر یا کسی اور وجہ سے) کوئی کتا رکھتا ہے تو اس کے ثواب میں سے ہر روز ایک قیراط ثواب کم ہو جاتا ہے۔‘‘ (بخاری و مسلم)

اردو ترجمہ · UrduUnverified translation

حضرت عدی بن حاتم رضی اللہ عنہ سے روایت ہے کہ رسول اللہ صلی اللہ علیہ وسلم نے مجھ سے فرمایا: ’’جب تو اپنا کتا (شکار کے لیے) چھوڑے تو اس پر بسم اللہ پڑھ لیا کر‘ پھر اگر وہ شکار کو تیرے لیے بچا رکھے اور تو اسے زندہ پا لے تو اسے ذبح کر لے۔ اور اگر تو شکار کو مردہ حالت میں پائے اور کتے نے ابھی تک اس میں سے کچھ نہ کھایا ہو تو تو اسے کھا سکتا ہے۔ اور اگر تو اپنے کتے کے ساتھ دوسرا کوئی کتا بھی پائے اور جانور مردہ حالت میں ملے تو پھر اسے نہ کھا کیونکہ تجھے معلوم نہیں کہ ان دونوں میں سے کس نے اسے مارا ہے۔ اور اگر تو اپنا تیر چھوڑے تو اس پر بسم اللہ پڑھ۔ پھر اگر شکار تیری نظروں سے ایک روز تک اوجھل رہے اور اس میں تیرے تیر کے سوا دوسرا کوئی زخم کا نشان نہ ہو تو پھر اگر تو چاہے تو اسے کھا لے۔ اور اگر شکار کو پانی میں ڈوب کر مرا ہوا پائے تو اسے نہ کھا۔‘‘ (بخاری و مسلم۔ اور یہ الفاظ مسلم کے ہیں۔)

اردو ترجمہ · UrduUnverified translation

حضرت عدی رضی اللہ عنہ سے روایت ہے کہ میں نے رسول اللہ صلی اللہ علیہ وسلم سے معراض کے شکار کے متعلق سوال کیا تو آپ نے فرمایا: ’’اگر تو نوک کی جانب سے مارے تو پھر کھا لے اور اگر چوڑائی کی طرف سے مارے اور جانور مر جائے تو یہ چوٹ سے مرنے والا جانور ہے‘ لہٰذا اسے نہ کھا۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابو ثعلبہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جب تو اپنے تیر سے شکار کرے اور وہ شکار تیری نظروں سے اوجھل ہو جائے‘ پھر بعد میں تو اسے پا لے تو جب تک وہ بدبودار نہ ہو اسے کھا لے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے کہ کچھ لوگوں نے نبی صلی اللہ علیہ وسلم سے پوچھا کہ لوگ ہمارے پاس گوشت لاتے ہیں جس کے متعلق ہمیں معلوم نہیں ہوتا کہ انھوں نے اس پر اللہ کا نام لیا ہے یا نہیں؟ آپ نے فرمایا: ’’تم اس پر اللہ کا نام لو اور کھا لو۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت عبداللہ بن مغفل مزنی رضی اللہ عنہ سے روایت ہے کہ رسول اللہ صلی اللہ علیہ وسلم نے کنکری مارنے سے منع کیا اور فرمایا: ’’یہ (کنکری) شکار کر سکتی ہے نہ دشمن کو زخمی کر سکتی ہے بلکہ یہ کسی کا دانت توڑے گی یا آنکھ پھوڑے گی۔‘‘ (بخاری و مسلم اور یہ الفاظ مسلم کے ہیں۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے‘ نبی صلی اللہ علیہ وسلم نے فرمایا: ’’کسی ذی روح چیز کو نشانہ بنا کر نہ مارو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت کعب بن مالک رضی اللہ عنہ سے روایت ہے کہ ایک عورت نے پتھر (کی تیز دھار) سے ایک بکری کو ذبح کیا‘ چنانچہ نبی صلی اللہ علیہ وسلم سے اس کے متعلق پوچھا گیا تو آپ نے اسے کھانے کا حکم فرمایا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت رافع بن خدیج رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’جو بھی چیز (جانور کا) خون بہا دے اور اس پر اللہ کا نام لیا گیا ہو تو اس جانور کو کھا لو۔ سوائے دانت اور ناخن کے کیونکہ دانت تو ہڈی ہے اور ناخن حبشیوں کی چھری ہے۔‘‘ (بخاری و مسلم)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے مروی ہے کہ رسول اللہ صلی اللہ علیہ وسلم نے کسی جانور کو باندھ کر قتل کرنے سے منع فرمایا ہے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت شداد بن اوس رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اللہ عزوجل نے ہر چیز پر احسان کرنا فرض قرار دیا ہے‘ لہٰذا جب تم قتل کرو تو عمدہ اور اچھے طریقے سے قتل کرو اور جب تم کسی جانور کو ذبح کرو تو احسن طریقے سے ذبح کرو۔ اور تم میں سے ہر کسی کو چاہیے کہ اپنی چھری کو تیز کر لے اور اپنے ذبیحے کو آرام پہنچائے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ماں کے ذبح کرنے سے جنین ازخود ذبح ہو جاتا ہے۔‘‘ (اسے احمد نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’مسلمان کے لیے اس کا نام ہی کافی ہے‘ لہٰذا اگر ذبح کے وقت اللہ کا نام لینا بھول گیا ہو تو پھر بسم اللہ پڑھ کر کھا لے۔‘‘ (اسے دارقطنی نے روایت کیا ہے‘ اس کی سند میں ایک ایسا راوی ہے جس کے حافظے میں ضعف ہے۔ اور اس کی سند میں محمد بن یزید بن سنان ہے اور وہ صدوق ضعیف الحفظ ہے۔ اور امام عبدالرزاق نے ابن عباس رضی اللہ عنہما سے صحیح سند کے ساتھ اس روایت کو نقل کیا ہے جو موقوف ہے اور امام ابوداود کی مراسیل میں اس کا ایک شاہد بھی موجود ہے۔ اس روایت کے الفاظ یہ ہیں: ’’مسلم کا ذبیحہ حلال ہے، اس پر اللہ کا نام لیا گیا ہو یا نہ لیا گیا ہو۔‘‘ (اس روایت کے راوی ثقہ ہیں۔)