اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم چتکبرے اور سینگوں والے دو مینڈھے قربانی کرتے تھے اور بسم اللہ پڑھتے اور تکبیر کہتے اور ان کے پہلوؤں پر اپنا پاؤں مبارک رکھتے تھے۔ اور ایک روایت میں ہے کہ آپ نے ان دونوں کو اپنے دست مبارک سے ذبح کیا۔ (بخاری و مسلم) اور ایک روایت میں ہے کہ وہ خوب موٹے تازے تھے۔ اور ابوعوانہ کی صحیح میں سَمِینَیْنِ کی بجائے ثَمِینَیْنِ ہے‘ یعنی وہ قیمتی تھے۔ اور مسلم کی ایک روایت میں ہے کہ آپ بِسْمِ اللّٰہِ‘ وَاللّٰہُ أَکْبَر کہتے ۔ اور مسلم میں حضرت عائشہ رضی اللہ عنہا کی روایت میں ہے کہ آپ نے سینگوں والے مینڈھے کا حکم دیا جو سیاہی میں چلتا ہو (اس کی ٹانگیں سیاہ ہوں)‘ سیاہی میں بیٹھتا ہو (اس کا پیٹ اور سینہ سیاہ ہو) اور سیاہی میں دیکھتا ہو (اس کی آنکھیں بھی سیاہ ہوں) تاکہ آپ اس کی قربانی کریں۔ چنانچہ آپ نے فرمایا: (’’عائشہ!) چھری تیز کرو۔‘‘ پھر آپ نے چھری کو پکڑا اور مینڈھے کو لٹایا۔ پھر اسے ذبح کرتے ہوئے فرمایا: [بِسْمِ اللّٰہِ‘ اَللّٰھُمَّ! تَقَبَّلْ مِنْ مُحَمَّدٍ وَ آلِ مُحَمَّدٍ‘ وَمِنْ اُمَّۃِ مُحَمَّدٍ] ’’اللہ کے نام سے (میں ذبح کرتا ہوں۔) اے اللہ! محمد ( صلی اللہ علیہ وسلم )‘ آل محمد اور امت محمد کی طرف سے قبول فرما۔‘‘ پھر اسے قربان کر دیا۔

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جو شخص قربانی کرنے کی طاقت رکھتا ہو اور وہ قربانی نہ کرے تو وہ ہماری عیدگاہ کے قریب نہ آئے۔‘‘ (اسے احمد اور ابن ماجہ نے روایت کیا ہے اور حاکم نے اسے صحیح قرار دیا ہے۔ لیکن دوسرے ائمہ نے اس حدیث کے موقوف ہونے کو ترجیح دی ہے۔)

اردو ترجمہ · UrduUnverified translation

حضرت جندب بن سفیان رضی اللہ عنہ نے بیان کیا کہ میں عید الاضحی میں رسول اللہ صلی اللہ علیہ وسلم کی مجلس میں حاضر تھا۔ چنانچہ جب آپ لوگوں کو نماز پڑھا چکے تو دیکھا کہ ایک بکری ذبح کی ہوئی ہے۔ آپ نے فرمایا: ’’جس نے نماز سے پہلے ذبح کیا وہ اس کی جگہ دوسری بکری ذبح کرے اور جس نے ذبح نہیں کیا وہ بسم اللہ پڑھ کر ذبح کرے۔‘‘ (بخاری و مسلم)

اردو ترجمہ · UrduUnverified translation

حضرت براء بن عازب رضی اللہ عنہما سے مروی ہے کہ رسول اللہ صلی اللہ علیہ وسلم ہم میں کھڑے ہوئے اور فرمایا: ’’چار قسم کے عیوب قربانی کے جانوروں میں نہیں ہونے چاہییں: کاناجس کا کانا پن بالکل واضح ہو‘ بیمار جانور جس کی بیماری عیاں ہو‘ لنگڑا جانور جس کا لنگڑا پن نمایاں اور ظاہر ہو اور نہایت بوڑھا جانور کہ اس کی ہڈیوں میں گودا نہ ہو۔‘‘ (اسے احمد اور چاروں نے روایت کیا ہے۔ ترمذی اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’(قربانی میں) دو دانتا ہی ذبح کرولیکن اگر تمھیں مشکل اور دشواری پیش آجائے تو پھر بھیڑ کی جنس میں سے جذعہ ذبح کرلو۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے حکم دیا کہ ہم قربانی والے جانور کی آنکھیں اور کان اچھی طرح دیکھ لیا کریں۔ اور ہم کانایا ایسا جانور ذبح نہ کریں جس کے کان کا سامنے والا یا پیچھے والا حصہ کٹا ہوا ہو‘ یا کان میں سوراخ ہو یا جس کا کان لمبائی میں کٹا ہو۔ ،، (اسے احمد اور چاروں نے روایت کیا ہے۔ ترمذی‘ ابن حبان اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے مجھے اپنے قربانی کے اونٹوں کی نگرانی پر مامور کیا اور مجھے حکم دیا کہ میں ان کے گوشت‘ کھالیں اور جھول مساکین میں تقسیم کر دوں اور قصاب کی اجرت میں اس میں سے کچھ بھی نہ دوں۔ (بخاری و مسلم)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے مروی ہے کہ ہم نے صلح حدیبیہ کے موقع پر رسول اللہ صلی اللہ علیہ وسلم کے ساتھ اونٹ اور گائے کو سات سات آدمیوں کی جانب سے قربان کیا۔ (مسلم)