اردو ترجمہ · UrduUnverified translation

حضرت عبدالرحمن بن عوف رضی اللہ عنہ سے مروی ہے کہ نبی صلی اللہ علیہ وسلم نے ہجر کے مجوسیوں سے جزیہ لیا تھا۔ (اسے بخاری نے روایت کیا ہے۔ اور موطا میں اس حدیث کی ایک اور سند ہے جس میں انقطاع ہے۔)

اردو ترجمہ · UrduUnverified translation

جناب عاصم بن عمر رحمہ اللہ ‘ حضرت انس رضی اللہ عنہ اور حضرت عثمان بن ابی سلیمان رحمہ اللہ سے روایت کرتے ہیں کہ نبی صلی اللہ علیہ وسلم نے حضرت خالد بن ولید رضی اللہ عنہ کو دومۃ الجندل کے حکمران أُکَیدِر کے پاس بھیجا۔ حضرت خالد رضی اللہ عنہ اور ان کے ساتھیوں نے اسے گرفتار کر لیا اور اسے لے کر رسول اللہ صلی اللہ علیہ وسلم کی خدمت میں حاضر ہوئے۔ آپ نے اس کا خون نہ بہایا اور اس سے جزیہ پر مصالحت کر لی۔ (اسے ابوداود نے روایت کیا ہے۔)

اردو ترجمہ · UrduUnverified translation

حضرت معاذ بن جبل رضی اللہ عنہ روایت کرتے ہیں کہ نبی صلی اللہ علیہ وسلم نے مجھے یمن کی طرف بھیجا تو مجھے حکم دیا کہ میں ہر بالغ سے ایک دینار یا اس کے برابر (قیمت کا)معافری کپڑا لوں۔ (اسے تینوں نے روایت کیا ہے اور ابن حبان اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت عائذ بن عمرو مزنی رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے فرمایا: ’’اسلام غالب رہتا ہے مغلوب نہیں ہوتا۔‘‘ (اسے دارقطنی نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’یہود و نصاریٰ کو سلام کرنے میں پہل نہ کرو اور جب تم راستے میں ان میں سے کسی سے ملو تو اسے راستے کی تنگ جانب جانے پر مجبور کر دو۔‘‘ ( اسے مسلم نے روایت کیا ہے۔)

اردو ترجمہ · UrduUnverified translation

حضرت مِسْوَر بن مَخْرمہ رضی اللہ عنہ اور مروان سے روایت ہے کہ نبی صلی اللہ علیہ وسلم حدیبیہ کے سال نکلے۔ راوی نے لمبی حدیث بیان کی ہے اور اس میں یہ مذکور ہے: ’’یہ وہ (دستاویز) ہے جس پر محمد بن عبداللہ ( صلی اللہ علیہ وسلم ) نے سہیل بن عمرو سے مصالحت کی ہے کہ دس سال جنگ بند رہے گی۔ اس عرصے میں لوگ امن سے رہیں گے اور ان میں سے ہر ایک دوسرے سے (جنگ کرنے سے) اپنا ہاتھ روکے رکھے گا۔‘‘ (اسے ابوداود نے روایت کیا ہے اور اس کی اصل بخاری میں ہے۔) اور امام مسلم نے اس حدیث کا کچھ حصہ حضرت انس رضی اللہ عنہ سے روایت کیا ہے اور اس میں ہے: تم میں سے جو کوئی ہمارے پاس آئے گا ہم اسے تمھاری جانب واپس نہیں کریں گے اور جو ہمارا کوئی آدمی تمھارے پاس آجائے ‘ تم اسے ہمارے پاس واپس لوٹا دو گے۔ صحابہ نے عرض کیا: اے اللہ کے رسول ! کیا ہم یہ بھی لکھیں؟ آپ نے فرمایا: ’’ہاں! ہم میں سے جو شخص ان کے پاس چلا گیا، اللہ تعالیٰ نے اسے دھتکار دیا اور ان میں سے جو ہمارے پاس آئے گا تو اللہ تعالیٰ اس کے لیے ضرور کشائش اور نکلنے کا کوئی راستہ بنا دے گا۔‘‘

اردو ترجمہ · UrduUnverified translation

حضرت عبداللہ بن عمرو رضی اللہ عنہما نے نبی صلی اللہ علیہ وسلم سے روایت کی ہے کہ آپ نے فرمایا: ’’جس کسی نے معاہد کو قتل کیا وہ جنت کی خوشبو نہیں پائے گا‘ حالانکہ اس کی خوشبو تو چالیس برس کی مسافت سے پائی جائے گی۔‘‘ (بخاری)