اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم کے پاس ایک آدمی لایا گیا جس نے شراب پی ہوئی تھی۔ آپ نے اسے دو چھڑیوں سے چالیس (۴۰) کے لگ بھگ کوڑے لگوائے ۔ حضرت انس رضی اللہ عنہ کا بیان ہے کہ حضرت ابوبکر رضی اللہ عنہ نے بھی یہ سزا دی۔ جب حضرت عمر رضی اللہ عنہ کا دور خلافت آیا تو انھوں نے صحابۂ کرام رضی اللہ عنہم سے مشورہ کیا۔ حضرت عبدالرحمن بن عوف رضی اللہ عنہ نے کہا کہ ہلکی ترین سزا اسی (۸۰) کوڑے ہیں‘ چنانچہ حضرت عمر رضی اللہ عنہ نے اسی کا حکم صادر فرمایا۔(بخاری و مسلم) اور مسلم میں ولید بن عقبہ کے واقعہ میں حضرت علی رضی اللہ عنہ سے روایت ہے کہ نبی صلی اللہ علیہ وسلم نے (شرابی کو) چالیس (۴۰) اور حضرت ابوبکر رضی اللہ عنہ نے چالیس (۴۰) اور حضرت عمر رضی اللہ عنہ نے اَسّی (۸۰) کوڑے سزا دی اور ان میں سے ہر ایک سنت ہے اور یہ مجھے زیادہ محبوب ہے۔ اور اس حدیث میں یہ بھی ہے کہ ایک آدمی نے ولید کے خلاف شہادت دی کہ اس نے ولید کو شراب کی قے کرتے دیکھا ہے۔ اس پر حضرت عثمان رضی اللہ عنہ نے فرمایا: اس نے شراب پی تھی تو قے کی ہے۔

اردو ترجمہ · UrduUnverified translation

حضرت معاویہ رضی اللہ عنہ نے نبی صلی اللہ علیہ وسلم سے روایت کیا ہے کہ آپ نے شرابی کے متعلق فرمایا: ’’جب وہ شراب پیے تو اسے کوڑے مارو۔ پھر جب دوبارہ شراب نوشی کرے تو پھر کوڑے لگاؤ۔ پھر جب تیسری مرتبہ شراب پیے تو پھر کوڑے لگاؤ۔ پھر جب چوتھی دفعہ شراب نوشی کرے تو اس کی گردن اڑا دو۔‘‘ (اسے احمد نے بیان کیا ہے اور یہ الفاظ اسی کے ہیں‘ نیز اسے چاروں نے بھی روایت کیا ہے۔ اور ترمذی کی عبارت اس پر دلالت کرتی ہے کہ اس کا قتل کرنا منسوخ ہے۔ اور ابوداود نے زہری کے حوالے سے صراحتاً اس کے نسخ کا ذکر کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی شخص مارے تو چہرے (پر مارنے) سے احتراز کرے۔‘‘ (بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’مسجدوں میں حدود نہ لگائی جائیں۔‘‘ (اسے ترمذی اور حاکم نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ سے روایت ہے کہ اللہ تعالیٰ نے شراب کی حرمت نازل فرمائی تو مدینہ میں اس وقت صرف کھجور سے تیار کردہ شراب پی جاتی تھی۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت عمر رضی اللہ عنہ سے روایت ہے کہ تحریم شراب کا حکم نازل ہوا تو اس وقت وہ پانچ چیزوں سے تیار کی جاتی تھی: انگور‘ کھجور‘ شہد‘ گندم اور جو سے۔ اور خمر(شراب) ہر وہ چیز ہے جو عقل کو ڈھانپ لے۔ (بخاری و مسلم)

اردو ترجمہ · UrduUnverified translation

حضرت ابن عمر رضی اللہ عنہما نبی صلی اللہ علیہ وسلم سے بیان کرتے ہیں‘ آپ نے فرمایا: ’’ہر نشہ آور چیز خمر ہے اور ہر نشہ آور چیز حرام ہے۔‘‘ (مسلم)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس چیز کی کثیر مقدار نشہ آور ہو، اس کی قلیل مقدار بھی حرام ہے۔‘‘ (اسے احمد اور چاروں نے روایت کیا ہے اور ابن حبان نے اسے صحیح کہا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم کے لیے مشکیزے میں‘ منقیٰ کی نبیذ تیار کی جاتی تھی۔ آپ اسے اس روز‘ دوسرے روز اور تیسرے روز بھی نوش فرماتے تھے۔ پھر جب تیسرے روز کی شام ہوتی تو اسے خود نوش فرماتے‘ دوسرے کو پلا دیتے اور اگر کچھ بچ جاتی تو اسے گرا دیتے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت ام سلمہ رضی اللہ عنہا نبی صلی اللہ علیہ وسلم سے بیان کرتی ہیں کہ آپ نے فرمایا: ’’اللہ عز وجل نے تمھارے لیے اس چیز میں شفا نہیں رکھی جسے اس نے تم پر حرام قرار دیاہے۔‘‘ (اسے بیہقی نے بیان کیا ہے اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت وائل حضرمی سے روایت ہے کہ طارق بن سوید رضی اللہ عنہ نے نبی صلی اللہ علیہ وسلم سے شراب کے بارے میں پوچھا کہ وہ اسے دوا کے لیے بناتے ہیں۔ آپ نے فرمایا: ’’یہ دوا نہیں بلکہ بیماری ہے۔‘‘ (اسے مسلم ‘ ابوداود اور دیگر ائمہ نے روایت کیا ہے۔)