اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’چور کا ہاتھ چوتھائی دینار یا اس سے زائد چوری کرنے پر ہی کاٹا جائے۔‘‘ (بخاری و مسلم- یہ الفاظ مسلم کے ہیں۔) اور بخاری کے الفاظ ہیں: ’’چور کا ہاتھ چوتھائی دینار یا اس سے زائد پر کاٹا جائے گا۔‘‘ اور احمد کی روایت میں ہے: ’’چوتھائی دینار میں ہاتھ کاٹ دو اور اس سے کم قیمت کی چوری پر نہ کاٹو۔‘‘

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ نبی صلی اللہ علیہ وسلم نے ڈھال کی چوری میں ‘ جس کی قیمت تین درہم تھی‘ ہاتھ کاٹا۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اللہ تعالیٰ کی لعنت ہو اس چور پر جو انڈا چوری کر کے اپنا ہاتھ کٹوا لیتا ہے۔ اور رسی چوری کرتا ہے اور اپنا ہاتھ کٹوا لیتا ہے۔‘‘ (بخاری و مسلم)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’کیا تم اللہ کی مقرر کردہ حدود میں سے ایک حدکے بارے میں سفارش کرتے ہو؟‘‘ پھر آپ نے کھڑے ہوکر خطبہ دیا اور فرمایا: ’’لوگو! بے شک تم سے پہلے لوگوں کو اسی چیز نے ہلاک کیا کہ جب ان میں سے کوئی معزز آدمی چوری کرلیتا تو اسے چھوڑ دیتے اور جب کوئی کمزور (کم حیثیت والا) آدمی چوری کرتا تو اس پر حد نافذ کر دیتے۔‘‘ (بخاری و مسلم۔ اور یہ الفاظ مسلم کے ہیں۔) اور مسلم میں ایک اور سندسے حضرت عائشہ رضی اللہ عنہا ہی سے منقول ہے کہ ایک عورت ادھار سامان لیا کرتی تھی‘ پھر انکار کر دیتی تھی تونبی صلی اللہ علیہ وسلم نے اس کاہاتھ کاٹنے کا حکم صادر فرمایا۔

اردو ترجمہ · UrduUnverified translation

حضرت جابر رضی اللہ عنہ نبی صلی اللہ علیہ وسلم سے روایت کرتے ہیں کہ آپ نے فرمایا: ’’خیانت کرنے والے‘ اچک کر لے جانے والے اور ڈاکا ڈالنے والے کے لیے قطع ید کی سزا نہیں ہے۔‘‘ (اسے احمد اور چاروں نے روایت کیا ہے۔ ترمذی اور ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت رافع بن خدیج رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو فرماتے سنا: ’’پھل اور درخت خرما کی گری (چرانے) میں ہاتھ کاٹنے کی سزا نہیں ہے۔‘‘ (اسے احمد اور چاروں نے روایت کیا ہے۔ ترمذی اور ابن حبان نے اسے بھی صحیح قرار دیا ہے۔)

اردو ترجمہ · UrduUnverified translation

حضرت ابو امیہ مخزومی رضی اللہ عنہ سے روایت ہے کہ رسول اللہ صلی اللہ علیہ وسلم کے پاس ایک چور لایا گیا۔ اس نے چوری کا اعتراف کیا مگر سامان اس کے پاس نہ پایا گیا تو رسول اللہ صلی اللہ علیہ وسلم نے اس سے فرمایا: ’’میں خیال نہیں کرتا کہ تم نے چوری کی ہوگی۔‘‘ اس نے کہا: کیوں نہیں! (میں نے چوری کی ہے۔) آپ نے دو یا تین مرتبہ اسی طرح دہرایا۔ پھر آپ نے حکم صادر فرمایا اور اس کا ہاتھ کاٹ دیا گیا۔ اس کے بعد اسے آپ کی خدمت میں لایا گیا تو آپ نے فرمایا: ’’اللہ سے اپنے گناہ کی بخشش مانگ اور اس سے توبہ کر۔‘‘ اس نے کہا: میں اللہ سے بخشش طلب کرتا ہوں اور اس کے حضور توبہ کرتا ہوں، پھر آپ نے تین مرتبہ فرمایا: ’’الٰہی! اس کی توبہ قبول فرما۔‘‘ (اسے ابوداود نے روایت کیا ہے۔ الفاظ بھی اسی کے ہیں‘ نیز احمد اور نسائی نے بھی اسے روایت کیا ہے۔ اور اس کے راوی ثقہ ہیں۔) اور حاکم نے حضرت ابوہریرہ رضی اللہ عنہ کے حوالے سے اسی مفہوم کے مطابق اس حدیث کو روایت کیا ہے۔ اس میں رسول اللہ صلی اللہ علیہ وسلم کا یہ فرمان ہے: ’’اسے لے جاؤ اور اس کا ہاتھ کاٹ دو‘ پھر اسے داغ دینا۔‘‘ (اسے بزار نے بھی روایت کیا ہے اور کہا ہے کہ اس کی سند میں کوئی نقص نہیں ہے۔)

اردو ترجمہ · UrduUnverified translation

حضرت عبدالرحمن بن عوف رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب چور پر حد قائم کر دی جائے تو پھر اس پر تاوان (جرمانہ) نہیں ڈالا جائے گا۔‘‘ (اسے نسائی نے روایت کیا ہے اور بیان کیا ہے کہ یہ منقطع ہے اور ابوحاتم نے اسے منکر کہا ہے۔)

اردو ترجمہ · UrduUnverified translation

حضرت عبداللہ بن عمرو بن عاص رضی اللہ عنہما نے رسول اللہ صلی اللہ علیہ وسلم سے روایت کیا ہے کہ آپ سے درختوں پر لٹکی ہوئی کھجوروں کے متعلق دریافت کیا گیا تو آپ نے فرمایا: ’’جو ضرورت مند شخص اسے وہیں کھالے اور دامن نہ بھرے تو اس پر کوئی سرزنش نہیں۔ اور جو شخص وہاں سے کچھ لے کر نکل جائے تو اس پر تاوان بھی ہے اور سزا بھی۔ اور جو شخص کھجور کے کھلیان میں پہنچنے کے بعد اس میں سے کچھ لے جائے اور وہ ڈھال کی قیمت کے مساوی ہو تو اس پر قطع ید کی سزا نافذ ہوگی۔‘‘ (اسے ابوداود اور نسائی نے بیان کیا ہے اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت صفوان بن امیہ رضی اللہ عنہ سے مروی ہے کہ نبی صلی اللہ علیہ وسلم نے ان سے فرمایا‘ جبکہ آپ نے اس آدمی کا ہاتھ کاٹنے کا حکم صادر فرمایا تھا جس نے ان (صفوان) کی چادر چرائی تھی اور انھوں نے اس کے حق میں سفارش کی تھی: ’’اسے میرے پاس لانے سے پہلے تم سے ایسا کیوں نہ ہوا (کہ اسے معاف کر دیتے؟‘‘) (اسے احمد اور چاروں نے روایت کیا ہے اور ابن جارود اور حاکم نے اسے صحیح قرار دیا ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے کہ نبی صلی اللہ علیہ وسلم کے پاس ایک چور لایا گیا تو آپ نے فرمایا: ’’اسے قتل کردو۔‘‘ لوگوں نے عرض کیا: اے اللہ کے رسول !اس نے تو چوری کی ہے۔ آپ نے فرمایا: ’’ اس کا ہاتھ کاٹ دو۔‘‘ چنانچہ اس کا ہاتھ کاٹ دیا گیا۔ پھر اسے دوبارہ پیش کیا گیا تو آپ نے فرمایا: ’’اسے مار ڈالو۔‘‘ حضرت جابر رضی اللہ عنہ نے پہلے کی طرح ذکر کیا۔ پھر اسے تیسری بار لایا گیا تو پھر اسی طرح ذکر کیا۔ پھر اسی طرح چوتھی مرتبہ گرفتار کر کے پیش کیا گیا ۔ پھر پانچویں مرتبہ گرفتار کر کے پیش کیا گیا تو آپ نے فرمایا: ’’اسے قتل کر دو۔‘‘ (اسے ابوداود اور نسائی نے روایت کیا ہے اور نسائی نے اسے منکر قرار دیا ہے اور حارث بن حاطب کے حوالے سے اسی طرح کی روایت نقل کی ہے۔ اور امام شافعی رحمہ اللہ نے ذکر کیا ہے کہ پانچویں مرتبہ مار ڈالنا منسوخ ہے۔)