اردو ترجمہ · UrduUnverified translation

حضرت ابوہریرہ اور حضرت زید بن خالد جہنی رضی اللہ عنہما سے روایت ہے کہ ایک دیہاتی آدمی رسول اللہ صلی اللہ علیہ وسلم کی خدمت میں حاضر ہوا اور عرض کیا: اے اللہ کے رسول! میں آپ کو اللہ کی قسم دے کر عرض کرتا ہوں کہ آپ کتاب اللہ کے مطابق ہی میرا فیصلہ فرمائیں۔ اور دوسرا جو اس کے مقابلے میں زیادہ سمجھدار اور دانا تھا اس نے بھی کہا کہ جی ہاں! آپ ہمارے درمیان کتاب اللہ کے مطابق فیصلہ فرمائیں اور مجھے کچھ عرض کرنے کی اجازت دیں۔ آپ نے فرمایا: ’’بیان کرو۔‘‘ وہ بولا: میرا بیٹا اس کے ہاں مزدوری پر کام کرتا تھا‘ اس نے اس کی بیوی سے زنا کا ارتکاب کرلیا اور مجھے خبر دی گئی کہ میرے بیٹے پر رجم کی سزا لازم آتی ہے‘ چنانچہ میں نے اس کے فدیے میں ایک سو بکریاں اور ایک لونڈی دے کر اس کی جان چھڑائی۔ اس کے بعد میں نے اہل علم سے دریافت کیا تو انھوں نے مجھے بتایا کہ میرے بیٹے کی سزا سو کوڑے اور ایک سال کی جلا وطنی ہے اور اس شخص کی بیوی کی سزا رجم ہے۔ رسول اللہ صلی اللہ علیہ وسلم نے فرمایا: ’’اس ذات کی قسم جس کے ہاتھ میں میری جان ہے! میں تمھارے درمیان کتاب اللہ کے عین مطابق فیصلہ کروں گا۔ لونڈی اور بکریاں تمھیں واپس لوٹائی جائیں گی اور تیرے بیٹے کی سزا سو کوڑے اور سال بھر کی جلا وطنی ہے۔ اوراے اُنَیْس! تم اس آدمی کی اہلیہ کے پاس جاؤ، اگر وہ (زنا کاری کا) اعتراف کر لے تو اسے سنگسار کر دو۔‘‘ (بخاری و مسلم اور یہ الفاظ مسلم کے ہیں۔)

اردو ترجمہ · UrduUnverified translation

حضرت عبادہ بن صامت رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’(احکام شریعت) مجھ سے حاصل کر لو۔ (احکام شریعت) مجھ سے حاصل کر لو۔ اللہ تعالیٰ نے عورتوں کی بابت راستہ واضح کر دیا ہے۔ کنوارا لڑکا کنواری لڑکی سے زنا کرے تو اس کی سزا سو کوڑے اور ایک سال کی جلا وطنی ہے۔ اور اگر شادی شدہ عورت کے ساتھ شادی شدہ زنا کرے تو اس کی سزا سو کوڑے اور رجم ہے۔‘‘ ( اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ ایک مسلمان آدمی رسول اللہ صلی اللہ علیہ وسلم کی خدمت میں حاضر ہوا جبکہ اس وقت آپ مسجد میں تشریف فرما تھے۔وہ بلند آواز سے آپ کو پکار کر کہنے لگا: اے اللہ کے رسول !میں نے زنا کیا ہے۔ آپ نے اس سے منہ پھیر لیا۔ وہ دوسری طرف سے گھوم کر آپ کے سامنے آگیا اور عرض کیا: اے اللہ کے رسول !میں نے زنا کیا ہے۔ آپ نے پھر اپنا رخ انور پھیر لیا حتی کہ اس شخص نے چار مرتبہ اپنی بات دہرائی‘ چنانچہ (اس طرح) جب اس نے اپنے خلاف چار مرتبہ گواہیاں دے دیں تو رسول اللہ صلی اللہ علیہ وسلم نے اسے اپنے پاس بلایا اور پوچھا: ’’کیا تو دیوانہ ہے؟‘‘ اس نے کہا: نہیں۔ آپ نے پھر فرمایا: ’’کیا تو شادی شدہ ہے؟‘‘ اس نے کہا: جی ہاں۔ تو پھر نبی صلی اللہ علیہ وسلم نے فرمایا: ’’اسے لے جاؤ اور سنگسار کر دو۔‘‘(بخاری و مسلم)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے کہ ماعز بن مالک رضی اللہ عنہ جب نبی صلی اللہ علیہ وسلم کی خدمت میں حاضر ہوئے تو آپ نے ان سے دریافت فرمایا: ’’شاید تو نے بوس و کنار کیا ہو یا چھیڑ چھاڑ کی ہو یا نظر بد ڈالی ہو۔‘‘ اس نے کہا: نہیں‘ اے اللہ کے رسول ! (اسے بخاری نے روایت کیا ہے۔)

اردو ترجمہ · UrduUnverified translation

حضرت عمر بن خطاب رضی اللہ عنہ سے مروی ہے‘ انھوں نے اپنے خطاب میں کہا: اللہ تعالیٰ نے حضرت محمد صلی اللہ علیہ وسلم کو حق دے کر مبعوث فرمایا اور ان پر کتاب نازل فرمائی۔ اللہ تعالیٰ نے آپ پر جو کچھ نازل فرمایا اس میں رجم کی آیت بھی تھی۔ ہم نے (خود) اسے پڑھا اور اسے یاد بھی کیا اور اسے (خوب) سمجھا ‘ چنانچہ رسول اللہ صلی اللہ علیہ وسلم نے رجم کیا اور آپ کے بعد ہم نے بھی رجم کیا۔ مجھے اندیشہ ہے کہ کچھ زمانہ گزرنے کے بعد کوئی کہنے والا کہہ دے گا کہ ہم کتاب اللہ میں رجم (کی سزا) کا ذکر نہیں پاتے۔ اس طرح وہ لوگ ایسے فرض کے تارک ہو کر جسے اللہ تعالیٰ نے نازل فرمایا تھا‘ گمراہ ہو جائیں گے‘ حالانکہ رجم (کی سزا) ہر شادی شدہ مرد و عورت پر کتاب اللہ میں ثابت ہے جب گواہی مل جائے یا حمل ہو یا (زانی اور زانیہ کا) اقرار ہو۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ میں نے رسول اللہ صلی اللہ علیہ وسلم سے سنا‘ آپ فرماتے تھے: ’’جب تم میں سے کسی کی لونڈی زنا کی مرتکب ہو اور اس کا زنا ظاہر ہو جائے تو اسے چاہیے کہ اس لونڈی پر حد لگائے اور اسے ملامت نہ کرے۔ اگر وہ پھر زنا کا ارتکاب کرے تو اسے چاہیے کہ اس پر حد لگائے اور اسے ملامت نہ کرے۔ اگر وہ تیسری مرتبہ پھر زنا کرے اور اس کا زنا ظاہر ہو جائے تو اسے فروخت کر دے‘ خواہ بالوں سے بٹی ہوئی ایک رسی کے عوض ہی کیوں نہ ہو۔‘‘ (بخاری و مسلم‘ اور یہ الفاظ مسلم کے ہیں۔)

اردو ترجمہ · UrduUnverified translation

حضرت علی رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’اپنے غلاموں اور لونڈیوں پر حدیں قائم کرو۔‘‘ (اسے ابوداود نے روایت کیا ہے اور مسلم میں یہ روایت موقوف ہے۔)

اردو ترجمہ · UrduUnverified translation

حضرت عمران بن حصین رضی اللہ عنہما سے روایت ہے کہ جہینہ قبیلے کی ایک عورت نبی صلی اللہ علیہ وسلم کے پاس آئی اور وہ اس وقت زنا سے حاملہ تھی۔ اس نے کہا: اے اللہ کے نبی !میں حد کی مستحق ہوں‘ لہٰذا آپ مجھ پر حد نافذ فرمائیں۔ رسول اللہ صلی اللہ علیہ وسلم نے اس کے سرپرست کو بلایا اور اسے تلقین فرمائی: ’’اس کے ساتھ حسن سلوک کرو اور جب یہ بچہ جنم دے تو اسے میرے پاس لے آؤ۔‘‘ چنانچہ اس نے ایسا ہی کیا۔ پھر آپ صلی اللہ علیہ وسلم نے اس (عورت) کے بارے میں حکم دیا تو اس کے کپڑے مضبوطی سے باندھ دیے گئے۔ پھر آپ نے اس کی بابت حکم فرمایا اور اسے سنگسار کر دیا گیا‘ پھر آپ نے اس کی نماز جنازہ پڑھی تو حضرت عمر رضی اللہ عنہ کہنے لگے: اے اللہ کے نبی !آپ اس کی نماز جنازہ پڑھتے ہیں حالانکہ یہ تو زنا کی مرتکب ہوئی ہے؟ آپ نے فرمایا: ’’اس نے ایسی توبہ کی ہے کہ اگر اسے اہل مدینہ کے ستر آدمیوں کے درمیان تقسیم کر دیا جائے تو ان سب کو گھیر لے۔ کیا تو نے اس سے بھی بہتر کسی کوپایا ہے جس نے اللہ کے لیے اپنی جان لٹا دی ہے؟‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما سے روایت ہے کہ نبی صلی اللہ علیہ وسلم نے اسلم قبیلے کے ایک مرد کو رجم کیا اور ایک یہودی مرد اور ایک عورت کو رجم کیا۔ (اسے مسلم نے روایت کیا ہے۔ اور یہودی مرد و عورت کے رجم کا واقعہ ابن عمر رضی اللہ عنہما کے حوالے سے صحیحین میں منقول ہے۔)

اردو ترجمہ · UrduUnverified translation

حضرت سعید بن سعد بن عبادہ رضی اللہ عنہما سے روایت ہے کہ ہمارے محلے میں ایک چھوٹا سا کمزور (اپاہج) آدمی رہتا تھا۔ اس نے ہماری لونڈیوں میں سے ایک لونڈی کے ساتھ بدکاری کر لی ۔ حضرت سعد رضی اللہ عنہ نے اس کا ذکر رسول اللہ صلی اللہ علیہ وسلم سے کیا تو آپ نے فرمایا: ’’اسے حد لگاؤ۔‘‘تب وہ کہنے لگے: اے اللہ کے رسول! وہ تو اس (حد لگنے) سے کہیں زیادہ کمزور اور لاغر ہے۔ آپ نے فرمایا: ’’کھجور کے درخت کی ایک ایسی بڑی ٹہنی لو جس میں سو شاخیں ہوں‘ پھر اسے ایک ہی دفعہ اس مرد پر مار دو۔‘‘ چنانچہ ان لوگوں نے ایسا ہی کیا۔ (اسے احمد‘ نسائی اور ابن ماجہ نے روایت کیا ہے اور اس کی سند حسن ہے لیکن اس کے موصول اور مرسل ہونے میں اختلاف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’تم جس شخص کو قوم لوط کے فعل کا مرتکب پاؤ تو فاعل اور مفعول دونوں کو قتل کر دو۔ اور جس شخص کوکسی چوپائے کے ساتھ بدفعلی کرتے پاؤ تو اس مرد اور اس چوپائے دونوں کو مار ڈالو۔‘‘ (اسے احمد اور چاروں نے روایت کیا ہے۔ اس کے راویوں کی توثیق کی گئی ہے مگر اس حدیث کے بارے میں اختلاف ہے۔)

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے کہ نبی صلی ا??لہ علیہ وسلم نے (غیر شادی شدہ زانی کو) مارا اور جلا وطن بھی کیا۔ اور حضرت ابوبکر رضی اللہ عنہ نے بھی مارا اور جلا وطن بھی کیا۔ اور حضرت عمر رضی اللہ عنہ نے بھی مارا اور جلاوطن بھی کیا۔ (اسے ترمذی نے روایت کیا ہے اور اس کے راوی ثقہ ہیں مگر اس کے موقوف اور مرفوع ہونے کی بابت اختلاف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے ایسے مردوں پر لعنت کی ہے جو عورتوں کا روپ دھاریں اور ایسی عورتوں پر لعنت کی ہے جو مردوں کی مشابہت کریں‘ نیز فرمایا: ’’انھیں اپنے گھروں سے نکال (گھروں میں داخل نہ ہونے) دو۔‘‘ (اسے بخاری نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جہاں تک حد لگانے سے بچاؤ کی گنجائش ملے‘ حد رفع کرو۔‘‘ (اسے ابن ماجہ نے روایت کیا ہے اور اس کی سند ضعیف ہے۔) اور اسے ترمذی اور حاکم نے حضرت عائشہ رضی اللہ عنہا کے واسطے سے ان الفاظ سے بیان کیا ہے: ’’ جہاں تک تمھارے بس میں ہو‘مسلمانوں سے حدود کو ہٹاؤ۔‘‘ (یہ بھی ضعیف ہے۔) اور بیہقی نے اسے حضرت علی رضی اللہ عنہ کے واسطے سے روایت کیا ہے۔ اور وہ حضرت علی رضی اللہ عنہ کا اپنا قول ہے جس کے الفاظ یہ ہیں: شبہات کی وجہ سے حدود کو ہٹا دو۔

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’ان گندے کاموں سے بچو جن سے اللہ تعالیٰ نے منع فرمایا ہے۔ اور جو شخص ان میں مبتلا ہو جائے تو اسے اللہ کے ڈالے ہوئے پردے میں چھپے رہنا چاہیے اور اسے چاہیے کہ اللہ کی جناب میں (پوشیدہ طور پر) توبہ کر لے کیونکہ جو شخص اپنا معاملہ ہمارے سامنے ظاہر کرے گا ہم اس پر اللہ کا حکم نافذ کر کے چھوڑیں گے۔‘‘ (اسے حاکم نے روایت کیا ہے اور یہ روایت موطا امام مالک میں زید بن اسلم کی مرسل روایات میں مذکور ہے۔)