Hadith 81–120

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’لعنت کا سبب بننے والے دو امور سے اجتناب کرو۔ ایک لوگوں کے راستے میں‘ دوسرا (ان کے آرام کرنے کی) سایہ دار جگہ میں قضائے حاجت کرنے سے۔‘‘ (اسے مسلم نے روایت کیا ہے۔)اور ابوداود نے حضرت معاذ رضی اللہ عنہ کے واسطے سے ’’گھاٹوں‘‘ کا لفظ زائد بیان کیا ہے۔ اور اس روایت کے الفاظ اس طرح ہیں: ’’لعنت کے تین اسباب سے اجتناب کرو۔ گھاٹوں پر‘ شاہراہ عام پر اور سائے کے نیچے رفع حاجت کرنے سے۔‘‘ اور امام احمد نے حضرت ابن عباس رضی اللہ عنہما کے حوالے سے روایت بیان کی ہے (اس میں ہے:) ’’یا جہاں پانی جمع ہوتا ہو وہاں بھی رفع حاجت سے بچنا چاہیے۔‘‘ (ان دونوں روایتوں میں کچھ ضعف ہے۔) اور طبرانی نے ابن عمر رضی اللہ عنہما سے پھل دار درختوں کے نیچے اور جاری و ساری نہر کے کنارے پر قضائے حاجت کرنے سے ممانعت والی روایت بیان کی ہے۔ (اس کی سند ضعیف ہے۔)

اردو ترجمہ · UrduUnverified translation

حضرت جابر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب دو آدمی قضائے حاجت کریں تو ان کو ایک دوسرے سے پردے اور اوٹ میں ہونا چاہیے۔ اور وہ ایک دوسرے سے باہم گفتگو بھی نہ کریں‘ اس لیے کہ ایسے فعل پر اللہ تعالیٰ ناراض ہوتا ہے۔ (اس روایت کو احمد نے روایت کیا ہے اور ابن سکن اور ابن قطان نے صحیح قرار دیا ہے مگر یہ حدیث معلول ہے۔)

اردو ترجمہ · UrduUnverified translation

حضرت ابوقتادہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’تم میں سے کوئی بھی شخص پیشاب کرتے وقت دائیں ہاتھ سے اپنے عضو مخصوص کو نہ چھوئے‘ اور نہ قضائے حاجت کے بعد دائیں ہاتھ سے استنجا کرے‘ اور نہ پانی پیتے وقت برتن میں سانس لے۔ (بخاری و مسلم۔ یہ الفاظ مسلم کے ہیں۔)

اردو ترجمہ · UrduUnverified translation

حضرت سلمان رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں منع فرمایا کہ ہم قضائے حاجت اور پیشاب کے وقت قبلہ رخ ہوں یا دائیں ہاتھ سے استنجا کریں یا تین ڈھیلوں سے کم سے استنجا کریں یا گوبر اور ہڈی سے استنجا کریں۔ (اسے مسلم نے روایت کیا ہے۔)

اردو ترجمہ · UrduUnverified translation

اور ساتوں نے حضرت ابوایوب انصاری رضی اللہ عنہ سے روایت کیا ہے: ’’قضائے حاجت اور پیشاب کرتے وقت قبلہ رخ نہ بیٹھو اور نہ اس کی طرف پشت کرو بلکہ مشرق یا مغرب کی جانب رخ کرو۔‘‘

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ نبی صلی اللہ علیہ وسلم نے فرمایا: ’’جو قضائے حاجت کے لیے جائے اسے پردہ کرنا چاہیے۔‘‘ (اسے ابوداود نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا ہی سے مروی ہے کہ نبی صلی اللہ علیہ وسلم (جب قضائے حاجت سے فارغ ہو کر) بیت الخلا سے باہر آتے تو [غُفْرَانَکَ] کہتے ’’اے اللہ! میں تیری بخشش طلب کرتا ہوں۔‘‘ (اسے پانچوں نے روایت کیا ہے‘ نیز ابوحاتم اور حاکم دونوں نے صحیح قرار دیا ہے۔)

اردو ترجمہ · UrduUnverified translation

حضرت ابن مسعود رضی اللہ عنہ سے روایت ہے کہ نبی صلی اللہ علیہ وسلم قضائے حاجت کو جانے لگے تو مجھے حکم دیا کہ میں ان کے لیے تین پتھر لے آؤں۔ مجھے دو پتھر تو مل گئے‘ تیسرا نہ مل سکا۔ میں (مجبوراً) گوبر کا ایک خشک ٹکڑا لے آیا۔ آپ نے دونوں پتھر تو لے لیے لیکن گوبر کو دور پھینک دیا اور فرمایا: ’’یہ تو (بذات خود) پلید ہے۔‘‘ (اسے بخاری نے روایت کیا ہے۔) احمد اور دارقطنی نے یہ اضافہ کیا ہے: ’’اس کی بجائے اور لے آؤ۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں ہڈی اور گوبر سے استنجا کرنے سے منع فرمایا‘ اور (ساتھ ہی) فرمایا: ’’یہ دونوں پاک نہیں کر سکتے۔‘‘ (اسے دارقطنی نے روایت کیا ہے اور صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ پیشاب (کے چھینٹوں) سے بچو کیونکہ عمومی عذاب قبر اسی کی و جہ سے ہوتا ہے۔‘‘ (اسے دارقطنی نے روایت کیا ہے۔)اور حاکم کی روایت میں ہے: ’’اکثر عذاب قبر پیشاب (کے چھینٹوں) کی وجہ سے ہوتا ہے۔‘‘ (اس کی سند صحیح ہے۔)

اردو ترجمہ · UrduUnverified translation

حضرت سراقہ بن مالک رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ہمیں قضائے حاجت کی تعلیم دیتے ہوئے فرمایا: ’’ہم بائیں پاؤں پر وزن دے کر بیٹھیں اور دائیں کو کھڑا رکھیں (اس پر بوجھ کم ڈالیں)۔‘‘ (اسے بیہقی نے ضعیف سند کے ساتھ روایت کیا ہے۔)

اردو ترجمہ · UrduUnverified translation

عیسیٰ بن یزداد اپنے والد سے روایت بیان کرتے ہیں‘ رسول اللہ صلی اللہ علیہ وسلم نے فرمایا:’’ جب تم میں سے کوئی پیشاب کرے تو اپنے عضو مخصوص کو تین مرتبہ سوت لے۔‘‘ (اسے ابن ماجہ نے ضعیف سند کے ساتھ روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما روایت کرتے ہیں کہ نبی صلی اللہ علیہ وسلم نے اہل قباء سے سوال کیا کہ اللہ تعالیٰ نے تمھاری (پاکیزگی کے بارے میں) بڑی تعریف فرمائی ہے (اس کی وجہ کیا ہے؟) انھوں نے عرض کیا کہ ہم ڈھیلوں کے (استعمال کے) بعد مزید طہارت کے لیے پانی بھی استعمال کرتے ہیں۔ (اسے بزار نے ضعیف سند کے ساتھ روایت کیا ہے۔ اور اس کی اصل ابوداود اور ترمذی میں ہے۔ (اسی سلسلے میں) ابن خزیمہ نے حضرت ابوہریرہ رضی اللہ عنہ کی روایت کو صحیح قرار دیا ہے‘ البتہ اس میں ڈھیلوں کا ذکر نہیں ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ پانی کا استعمال خروج پانی سے ہے۔‘‘ (جب تک منی کا خروج نہ ہو اس وقت تک غسل واجب نہیں ہوتا۔) (اسے مسلم نے روایت کیا ہے اور اصل روایت بخاری میں ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ جب تم میں سے کوئی شخص عورت کی چار شاخوں کے درمیان بیٹھ جائے‘ پھر اس میں کوشش کرے تو اس پر غسل واجب ہوگیا۔‘‘ (بخاری و مسلم) اور مسلم نے یہ اضافہ نقل کیا ہے: ’’خواہ انزال نہ ہو۔‘‘

اردو ترجمہ · UrduUnverified translation

حضرت ام سلمہ رضی اللہ عنہا سے مروی ہے کہ ام سلیم رضی اللہ عنہا ابوطلحہ رضی اللہ عنہ کی اہلیہ نے رسول اللہ صلی اللہ علیہ وسلم سے پوچھا: اے اللہ کے رسول! اللہ تعالیٰ حق بیان کرنے سے حیا نہیں کرتا تو بتائیں کیا عورت کو جب احتلام ہو جائے تو اس پر بھی غسل فرض ہے؟ آپ نے فرمایا: ’’ہاں! جب وہ پانی دیکھے۔‘‘ (بخاری ومسلم)

اردو ترجمہ · UrduUnverified translation

حضرت انس رضی اللہ عنہ روایت کرتے ہیں کہ رسول اللہ صلی اللہ علیہ وسلم نے اس عورت کے متعلق جو خواب میں وہی کچھ دیکھے جو مرد دیکھتا ہے (یعنی احتلام)، آپ نے فرمایا: ’’ وہ غسل کرے۔ ‘‘ (بخاری و مسلم) اور مسلم نے یہ اضافہ بھی نقل کیا ہے کہ ام سلمہ رضی اللہ عنہا نے (آپ کے جواب دینے پر) مزید دریافت کیا: کیا ایسا (عورت کے ساتھ) بھی ہوتا ہے؟ آپ نے فرمایا: ’’ہاں‘ (اگر ایسا نہ ہوتا) تو مشابہت کہاں سے ہوتی؟‘‘

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم چار چیزوں کی وجہ سے غسل کیا کرتے تھے: جنابت سے‘ جمعے کے روز‘ سینگی لگوانے کے بعد اور میت کو غسل دینے کی وجہ سے۔ (اسے ابوداود نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے ثمامہ بن اثال رضی اللہ عنہ کے اسلام لانے کے واقعے کے متعلق مروی ہے کہ نبی صلی اللہ علیہ وسلم نے اسے غسل کرنے کا حکم فرمایا۔ (اسے عبدالرزاق نے روایت کیا ہے۔ اور اس کی اصل بخاری و مسلم میں ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے مروی ہے‘ رسول اللہ صلی اللہ علیہ وسلم نے فرمایا: ’’جمعے کے روز غسل کرنا ہر بالغ پر واجب ہے۔‘‘ (اسے ساتوں نے روایت کیا ہے۔)

اردو ترجمہ · UrduUnverified translation

حضرت سمرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جس نے جمعے کے روز وضو کیا اس نے اچھا اور بہتر کیا۔ اور جس نے غسل کیا تو غسل افضل اور بہترین ہے۔‘‘ (اسے پانچوں نے روایت کیا ہے‘ اور ترمذی نے حسن قرار دیا ہے۔)

اردو ترجمہ · UrduUnverified translation

حضرت علی رضی اللہ عنہ سے روایت ہے کہ نبی صلی اللہ علیہ وسلم حالت جنابت کے علاوہ ہر حالت میں ہمیں قرآن مجید پڑھا دیا کرتے تھے۔ (اسے احمد او ر چاروں نے روایت کیا ہے۔ یہ الفاظ ترمذی کے ہیں اور انھوں نے اسے حسن کہا ہے جبکہ ابن حبان نے اسے صحیح قرار دیا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ سے روایت ہے‘ رسول اللہ صلی اللہ علیہ وسلم کا ارشاد گرامی ہے: ’’ جب تم میں سے کوئی اپنی اہلیہ کے پاس جائے‘ (تعلق زن و شو قائم کرے) پھر دوبارہ (لطف اندوز ہونے کا) ارادہ ہو تو دونوں باریوں کے درمیان میں وضو کر لے۔‘‘ (اسے مسلم نے روایت کیا ہے۔) اور حاکم میں یہ اضافہ بھی ہے: ’’یہ (وضو) دوبارہ مباشرت کے لیے زیادہ باعث نشاط ہے۔‘‘اور سنن اربعہ میں حضرت عائشہ رضی اللہ عنہا سے مروی ہے کہ رسول اللہ صلی اللہ علیہ وسلم حالت جنابت میں پانی کو ہاتھ لگائے بغیر سو جاتے تھے۔ (یہ روایت معلول ہے۔)

اردو ترجمہ · UrduUnverified translation

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم جب غسل جنابت کرتے تو اس طرح آغاز کرتے کہ پہلے ہاتھ دھوتے‘ پھر دائیں ہاتھ سے بائیں ہاتھ پر پانی ڈالتے اور اپنی شرم گاہ دھوتے۔ پھر وضو کرتے‘ پھر پانی لے کر اپنی انگلیوں کے ذریعے سے سر کے بالوں کی جڑوں میں (پانی) داخل کرتے۔ پھر تین چلو پانی کے بھر کر یکے بعد دیگرے سر پر ڈالتے۔ پھر باقی سارے جسم پر پانی بہاتے اور (آخر میں) دونوں پاؤں دھوتے۔ (بخاری ومسلم۔ اور یہ الفاظ مسلم کے ہیں۔)اور بخاری ومسلم میں حضرت میمونہ رضی اللہ عنہا کی روایت میں اس طرح ہے: پھر اپنے عضو مخصوص پر پانی ڈالتے اور اپنے بائیں ہاتھ سے اسے دھوتے اور ہاتھوں کو زمین پر مار کر مٹی سے ملتے (اور صاف کرتے۔) اور ایک دوسری روایت میں اس طرح ہے: پھر دونوں ہاتھ مٹی سے مل کر اچھی طرح صاف کرتے۔ اس روایت کے آخر میں ہے: پھر میں نے آپ کی خدمت میں رومال (تولیہ) پیش کیا مگر آپ نے اسے واپس لوٹا دیا۔ اوراس میں یہ بھی ہے کہ آپ نے (بدن پر جو پانی رہ گیا تھا اسے) اپنے ہاتھ سے جھاڑنا شروع کر دیا۔

اردو ترجمہ · UrduUnverified translation

حضرت ام سلمہ رضی اللہ عنہا فرماتی ہیں کہ میں نے عرض کیا: اے اللہ کے رسول! میں اپنے سر کے بال (مینڈھیوں کی شکل میں) مضبوطی سے باندھ لیتی ہوں۔ کیا غسل جنابت کے موقع پر ان کو کھولوں؟ اور ایک روایت میں حیض سے فارغ ہو کر غسل کے وقت کے الفاظ ہیں۔ آپ نے فرمایا: ’’نہیں! (کھولنے کی ضرورت نہیں) بس تیرے لیے یہی کافی ہے کہ تو اپنے سر پر تین لپ پانی بہا دیا کرے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے‘ رسول اللہ صلی اللہ علیہ وسلم نے فرمایا: ’’میں حیض والی عورت اور جنبی کے لیے مسجد (میں داخلہ) حلال نہیں کرتا۔‘‘ (اسے ابوداود نے روایت کیاہے اور ابن خزیمہ نے صحیح قرار دیاہے۔)

اردو ترجمہ · UrduUnverified translation

حضرت عائشہ رضی اللہ عنہا ہی سے روایت ہے کہ میں اور رسول اللہ صلی اللہ علیہ وسلم دونوں ایک ہی برتن سے غسل جنابت کر لیا کرتے تھے۔ اس برتن میں ہمارے ہاتھ یکے بعد دیگرے داخل ہوتے تھے۔ (بخاری و مسلم) اور ابن حبان نے یہ اضافہ مزید نقل کیا ہے: ’’بسا اوقات دونوں کے ہاتھ ایک دوسرے سے چھو جاتے تھے۔‘‘

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم کا ارشاد گرامی ہے :’’ ہر بال کے نیچے جنابت کا اثر ہوتا ہے‘ اس لیے بالوں کو (اچھی طرح) دھویا کرو اور جسم کو اچھی طرح (مل کر) صاف کیا کرو۔‘‘(اسے ابوداود اور ترمذی نے روایت کیا ہے‘ اور اسے ان دونوں نے ضعیف بھی قرار دیا ہے۔ مسند احمد میں بھی حضرت عائشہ رضی اللہ عنہا سے اسی طرح روایت ہے اور اس میں ایک راوی مجہول الحال ہے۔)

اردو ترجمہ · UrduUnverified translation

حضرت جابربن عبداللہ رضی اللہ عنہما سے روایت ہے‘ نبی صلی اللہ علیہ وسلم نے فرمایا: ’’مجھے پانچ ایسی چیزیں عطا کی گئی ہیں جو مجھ سے پہلے کسی کو بھی نہیں دی گئیں: مجھے ایک مہینے کی مسافت سے (دشمن پر) رعب و دبدبے سے مدد دی گئی ہے۔ اور ساری زمین میرے لیے سجدہ گاہ اور طہارت و پاکیزگی کا ذریعہ بنائی گئی ہے۔ اب جس آدمی کو (جہاں بھی) نماز کا وقت آجائے اسے نماز پڑھ لینی چاہیے۔‘‘ اور راوی نے آگے پوری حدیث ذکر کی۔مسلم میں حضرت حذیفہ رضی اللہ عنہ سے مروی ہے: ’’جب ہمیں پانی دستیاب نہ ہو تو زمین کی مٹی ہمارے لیے پاک کرنے والی بنا دی گئی ہے۔‘‘ مسند احمد میں حضرت علی رضی اللہ عنہ سے منقول ہے: ’’مٹی میرے لیے حصول طہارت کا ذریعہ بنائی گئی ہے۔‘‘

اردو ترجمہ · UrduUnverified translation

حضرت عمار بن یاسر رضی اللہ عنہما روایت کرتے ہیں کہ نبی صلی اللہ علیہ وسلم نے مجھے کسی حاجت کے لیے بھیجا۔ میں جنبی ہوگیا اور مجھے پانی دستیاب نہ ہو سکا تو میں مٹی میں اس طرح لوٹ پوٹ ہوا جس طرح چوپایہ لوٹ پوٹ ہوتا ہے۔ پھر (ضرورت سے فارغ ہو کر) میں نبی صلی اللہ علیہ وسلم کی خدمت میں حاضر ہوا اور سارا واقعہ آپ کے گوش گزار کیا۔ آپ نے فرمایا: ’’تجھے اپنے ہاتھ سے اس طرح کر لینا ہی کافی تھا۔‘‘ پھر آپ نے اپنے دونوں ہاتھوں کو ایک مرتبہ زمین پر مارا‘ پھر بائیں کو دائیں پر‘ یعنی اپنے ہاتھوں کی پشت اور چہرے پر ملا۔ (بخاری و مسلم۔ یہ الفاظ مسلم کے ہیں۔) اور بخاری کی روایت میں ہے کہ آپ نے اپنی دونوں ہتھیلیاں زمین پر ماریں اور ان دونوں میں پھونک ماری، پھر ان کو اپنے چہرے اور ہاتھوں پر مل لیا۔

اردو ترجمہ · UrduUnverified translation

حضرت ابن عمر رضی اللہ عنہما سے روایت ہے‘ رسول اللہ صلی اللہ علیہ وسلم کا ارشاد گرامی ہے: ’’تیمم دو ضربوں سے ہوتا ہے‘ ایک ضرب چہرے کے لیے اور ایک ضرب دونوں ہاتھوں کے لیے۔‘‘ (اسے دارقطنی نے روایت کیا ہے اور دوسرے ائمہ نے اس کے موقوف ہونے کو صحیح کہا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ مٹی مومن مسلمان کا وضو ہے‘ خواہ دس برس تک اسے پانی نہ ملے۔ مگر جب پانی دستیاب ہو جائے تو پھر اسے اللہ سے ڈرنا چاہیے اور اپنے جسم پر پانی پہنچانا چاہیے۔‘‘ (اسے بزار نے روایت کیا ہے اور ابن قطان نے صحیح قرار دیا ہے‘ لیکن دارقطنی نے اس کے مرسل ہونے کو درست کہا ہے۔ اور ترمذی میں حضرت ابوذر رضی اللہ عنہ سے بھی اسی طرح مروی ہے۔ (ترمذی) اور حاکم نے بھی اسے صحیح کہا ہے۔)

اردو ترجمہ · UrduUnverified translation

حضرت ابوسعید خدری رضی اللہ عنہ روایت کرتے ہیں کہ دو آدمی سفر پر نکلے‘ نماز کا وقت آگیا مگر ان کے پاس پانی نہیں تھا۔ دونوں نے پاک مٹی سے تیمم کیا اور نماز پڑھ لی۔ پھر دونوں کو نماز کی ادائیگی کے وقت ہی میں پانی بھی دستیاب ہوگیا تو ان میں سے ایک صاحب نے وضو کیا اور نماز دوبارہ ادا کر لی مگر دوسرے نے وضو کیا نہ نماز دہرائی۔ سفر سے واپسی پر وہ دونوں رسول اللہ صلی اللہ علیہ وسلم کی خدمت میں حاضر ہوئے اور اپنا واقعہ سنایا۔ آپ نے اس شخص کو جس نے نماز دوبارہ نہیں پڑھی تھی‘ فرمایا: ’’تو نے سنت کے مطابق کیا اور تجھے تیری نماز کافی ہوگئی۔‘‘ اور دوسرے سے فرمایا: ’’تجھے دگنا اجر ملے گا۔‘‘ (اسے ابوداود اور نسائی نے روایت کیا ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے اللہ تعالیٰ کے ارشاد: ﴿وَاِنْ کُنْتُمْ مَّرْضٰی أَوْ عَلٰی سَفَرٍ﴾ کے متعلق مروی ہے کہ جب کسی شخص کو اللہ کی راہ میں زخم اور پھوڑوں کا سامنا کرنا پڑے اور اسی حالت میں اسے جنابت لاحق ہو جائے اور غسل کرنے کی صورت میں مر جانے کا اندیشہ ہو تو وہ تیمم کرلے۔ (اس روایت کو دارقطنی نے موقوف اور بزار نے مرفوع بیان کیا ہے اور ابن خزیمہ اور حاکم نے صحیح قرار دیا ہے۔)

اردو ترجمہ · UrduUnverified translation

حضرت علی رضی اللہ عنہ نے بیان کیا کہ میرا ایک کلائی کا جوڑ‘ یعنی گٹّا ٹوٹ گیا‘ چنانچہ میں نے رسول اللہ صلی اللہ علیہ وسلم سے (وضو کے بارے میں) پوچھا تو آپ نے مجھے پٹیوں پر مسح کرنے کا حکم دیا۔ (اسے ابن ما جہ نے نہایت ضعیف سند سے روایت کیا ہے۔)

اردو ترجمہ · UrduUnverified translation

حضرت جابر رضی اللہ عنہ سے اس شخص کے بارے میں مروی ہے جس کے سر پر زخم آیا تھا اور اسی حالت میں اس نے غسل کر لیا اور وفات پا گیاتھا‘ کہ اسے تو اتنا ہی کافی تھا کہ تیمم کر لیتا اور اپنے زخم پر پٹی باندھ کر مسح کرتا اور باقی بدن کو دھو لیتا۔ (اس روایت کو ابوداود نے ضعیف سند کے ساتھ روایت کیا ہے اور اس کے ایک راوی پر اختلاف ہے۔)

اردو ترجمہ · UrduUnverified translation

حضرت ابن عباس رضی اللہ عنہما فرماتے ہیں: سنت یہی ہے کہ تیمم کرنے والا شخص تیمم سے ایک ہی نماز پڑھے اور دوسری نماز کے لیے ازسر نو تیمم کرے۔ (اسے دارقطنی نے نہایت ضعیف سند سے روایت کیا ہے۔)

اردو ترجمہ · UrduUnverified translation

حضرت عائشہ رضی اللہ عنہا روایت کرتی ہیں کہ فاطمہ بنت ابی حبیش رضی اللہ عنہا استحاضے کی (دائمی) مریضہ تھیں۔ رسول اللہ صلی اللہ علیہ وسلم نے انھیں فرمایا: ’’حیض کے خون کی رنگت سیاہ ہوتی ہے‘ اسے آسانی سے پہچانا جا سکتا ہے۔ جن ایام میں یہ خون آرہا ہو تو ان ایام میں نماز چھوڑ دو اور جب دوسرے ایام ہوں تو وضو کر کے نماز پڑھ لیا کرو۔‘‘ (اسے ابوداود اور نسائی نے روایت کیا ہے‘ ابن حبان اور حاکم نے صحیح قرار دیا ہے اور ابوحاتم نے منکر کہا ہے۔)ابوداود میں حضرت اسماء بنت عمیس رضی اللہ عنہا سے مروی حدیث میں ہے: ’’ایک ٹب میں بیٹھ جائے اور جب وہ پانی کے اوپر زردی دیکھے تو ظہر اور عصر دونوں نمازوں کے لیے ایک غسل کر لے اور اسی طرح مغرب اور عشاء کی نمازوں کے لیے ایک غسل کر لے اور نماز فجر کے لیے بھی ایک غسل کر لے اور ان کے درمیان میں وضو کر لے۔‘‘

اردو ترجمہ · UrduUnverified translation

حضرت حمنہ بنت جحش رضی اللہ عنہا فرماتی ہیں کہ میں سخت قسم کے استحاضے میں مبتلا رہتی تھی جو کثرت سے آتا رہتا تھا۔ میں نبی صلی اللہ علیہ وسلم کی خدمت میں استفسار کے لیے حاضر ہوئی تو آپ نے فرمایا: ’’ یہ تو شیطان کی چوک (لات مارنا) ہے‘ لہٰذا تو چھ یا سات ایام کو ایام حیض شمار کر کے پھر نہا لے۔ جب تو اچھی طرح پاک صاف ہو جائے تو پھر چوبیس یا تئیس دن روزے رکھ اور نماز پڑھ۔ یقینا یہ تیرے لیے کافی ہے۔ اور ہر ماہ اسی طرح کر لیا کر جیسا کہ حیض والی خواتین کرتی ہیں۔ پھر اگر تم میں ظہر کو ذرا مؤخر کرنے اور عصر کو ذرا مقدم کرنے کی ہمت و طاقت ہے تو پھر غسل کر لے جب کہ پاک صاف ہو جائے اور ظہر و عصر دونوں کو اکٹھا کرکے پڑھ لے۔ پھر مغرب کو مؤخر اور عشاء کو ذرا مقدم کر کے غسل کر لے اور دونوں نمازوں کو جمع کر لے‘ یعنی اگر تو یہ طاقت رکھتی ہے تو ایسا کرلے۔ اور صبح کی نماز کے لیے الگ غسل کر لے اور نماز پڑھ لے۔‘‘ پھر فرمایا: ’’دونوں باتوں میں سے مجھے یہ زیادہ پسند اور محبوب ہے۔‘‘ (اسے نسائی کے علاوہ باقی پانچوں نے روایت کیا ہے۔ ترمذی نے صحیح قرار دیا ہے اور بخاری نے حسن کہا ہے۔)

اردو ترجمہ · UrduUnverified translation

حضرت عائشہ رضی اللہ عنہا بیان کرتی ہیں کہ حضرت ام حبیبہ بنت جحش رضی اللہ عنہا نے رسول اللہ صلی اللہ علیہ وسلم سے استحاضے کے خون کی شکایت کی تو آپ نے فرمایا: ’’تمھارے ماہواری کے ایام جس قدر پہلے (سے متعین تھے اور نماز روزے سے) روکتے تھے‘ اب بھی اتنے دن ٹھہری رہ۔ پھراس کے بعد غسل کر لے۔‘‘ ام حبیبہ رضی اللہ عنہا اس کے بعد ہر نماز کے لیے غسل کیا کرتی تھیں۔ (اسے مسلم نے روایت کیا ہے۔) اور بخاری کی روایت میں ہے: ’’پھر ہر نماز کے لیے (ازسر نو) وضو کر لیا کر۔‘‘ ابوداود اور دیگر محدثین نے اس حدیث کو دوسرے طریق (سند) سے روایت کیاہے۔