Hadith 41–80

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ رسول اللہ صلی اللہ علیہ وسلم جوتا پہننے‘ بالوں میں کنگھی کرنے اور طہارت (وضو‘ غسل وغیرہ) بلکہ ہر کام میں دائیں جانب کو پسند فرماتے تھے۔ (بخاری و مسلم)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم وضو کرنے لگو تو اپنی دائیں جانب سے ابتدا کرو۔‘‘ (اسے چاروں نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے روایت ہے کہ نبی صلی اللہ علیہ وسلم نے وضو کیا تو اپنی پیشانی کے بالوں‘ پگڑی اور موزوں پر مسح کیا۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما نے نبی صلی اللہ علیہ وسلم کے حج کی تفصیل بیان کرتے ہوئے کہا کہ آپ صلی اللہ علیہ وسلم نے فرمایا: ’’آغاز اسی چیز سے کرو جس سے اللہ تعالیٰ نے آغاز کیا ہے۔‘‘ (اسے نسائی نے اسی طرح امر کے صیغے کے ساتھ روایت کیا ہے جبکہ اسے امام مسلم نے جملہ خبریہ کے ساتھ بیان کیا ہے۔)

اردو ترجمہ · UrduUnverified translation

حضرت جابر بن عبداللہ رضی اللہ عنہما ہی سے روایت ہے کہ نبی صلی اللہ علیہ وسلم جب وضو کرتے تو اپنی کہنیوں پر اچھی طرح پانی بہاتے۔ (اسے دارقطنی نے ضعیف سند کے ساتھ روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم کا ارشاد ہے: ’’ وضو کا آغاز کرتے وقت جس نے بسم اللہ نہ پڑھی اس کا وضو نہیں۔‘‘ (اس حدیث کو احمد‘ ابوداود اور ابن ماجہ نے ضعیف سند کے ساتھ روایت کیا ہے۔ اور ترمذی نے اس حدیث کو سعید بن زید اور ابوسعید رضی اللہ عنہما سے بھی اسی طرح روایت کیا ہے۔ امام احمد بن حنبل رحمہ اللہ کا قول ہے کہ اس بارے میں کوئی چیز ثابت نہیں۔)

اردو ترجمہ · UrduUnverified translation

حضرت طلحہ بن مُصَرِّف رحمہ اللہ اپنے باپ سے وہ اپنے دادا سے روایت کرتے ہیں کہ میں نے رسول اللہ صلی اللہ علیہ وسلم کو بچشم خود دیکھاکہ آپ کلی اور ناک صاف کرنے کے لیے الگ الگ پانی لیتے تھے۔ (اس روایت کو ابوداود نے ضعیف سند کے ساتھ روایت کیا ہے۔)

اردو ترجمہ · UrduUnverified translation

حضرت علی رضی اللہ عنہ سے وضو کے بیان میں روایت ہے کہ رسول اللہ صلی اللہ علیہ وسلم نے تین بار کلی کی اور تین بار ناک میں پانی ڈالا۔ آپ کلی اور ناک میں پانی اسی ہاتھ سے داخل کرتے جس سے پانی لیتے تھے۔ (اسے ابوداود اور نسائی نے روایت کیا ہے۔)

اردو ترجمہ · UrduUnverified translation

حضرت عبداللہ بن زید رضی اللہ عنہ سے وضو کے بیان میں مروی ہے کہ نبی صلی اللہ علیہ وسلم نے اپنا ہاتھ پانی میں ڈالا‘ پھر کلی کی اور ناک میں پانی چڑھایا۔ آپ نے ایک ہی چلو سے تین بار ایسا کیا۔ (بخاری و مسلم)

اردو ترجمہ · UrduUnverified translation

حضرت انس رضی اللہ عنہ سے روایت ہے کہ نبی صلی اللہ علیہ وسلم کی نظر ایک آدمی پر پڑی جس کے پاؤں میں ناخن برابر جگہ پر پانی نہیں پہنچا تھا‘ یعنی خشک رہ گئی تھی۔ آپ نے اسے حکم دیا کہ ’’واپس جاؤ اور اچھی طرح عمدہ طریقے سے وضو کرو۔‘‘ (اسے ابوداود اور نسائی نے روایت کیا ہے۔)

اردو ترجمہ · UrduUnverified translation

حضرت انس رضی اللہ عنہ ہی سے روایت ہے کہ رسول اللہ صلی اللہ علیہ وسلم ایک ’’مد‘‘ پانی سے وضو اور ایک ’’صاع‘‘ (چار مد) سے پانچ مد تک پانی سے غسل کر لیا کرتے تھے۔ (بخاری و مسلم)

اردو ترجمہ · UrduUnverified translation

حضرت عمر رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’ تم میں سے کوئی بھی ایسا نہیں کہ وہ وضو کرے اور خوب اچھی طرح کرے‘ پھر یوں کہے: [أَشْہَدُ أَنْ لَّا إِلٰہَ إِلَّا اللّٰہُ‘ وَحْدَہُ لَا شَرِیکَ لَہُ‘ وَأَشْہَدُ أَنَّ مُحَمَّدًا عَبْدُہُ وَرَسُولُہُ] ’’میں اس بات کی شہادت دیتا ہوں کہ اللہ کے سوا کوئی الٰہ نہیں‘ وہ یکتا ہے‘اس کا کوئی ساجھی و شریک نہیں اور میں اس بات کی بھی شہادت دیتا ہوں کہ محمد صلی اللہ علیہ وسلم اس کے بندے اور رسول ہیں۔‘‘ تو اس کے لیے جنت کے آٹھوں دروازے کھول دیے جاتے ہیں‘ جس سے چاہے داخل ہو جائے۔‘‘ (اسے مسلم اور ترمذی نے روایت کیا ہے۔) اور ترمذی نے یہ اضافہ کیا ہے: ’’اے اللہ! مجھے توبہ کرنے والوں اور پاک رہنے والوں میں سے کر دے۔‘‘

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے روایت ہے کہ میں نبی صلی اللہ علیہ وسلم کے ساتھ تھا‘ آپ نے وضو کرنا شروع کیا تو میں آپ کے موزے اتارنے کے لیے جھکا۔ آپ نے فرمایا: ’’انھیں چھوڑ دو‘ میں نے جب یہ موزے پہنے تھے تو یہ دونوں پاؤں (وضو سے) پاک تھے۔‘‘ پھر آپ نے ان دونوں پر مسح فرمایا۔ (بخاری و مسلم)

اردو ترجمہ · UrduUnverified translation

نسائی کے علاوہ باقی (سنن کی) تینوں (کتابوں) میں حضرت مغیرہ بن شعبہ رضی اللہ عنہ ہی سے یہ الفاظ منقول ہیں کہ نبی صلی اللہ علیہ وسلم نے موزوں کے اوپر اور نیچے دونوں جانب مسح کیا۔ (اس روایت کی سند میں ضعف ہے۔)

اردو ترجمہ · UrduUnverified translation

حضرت علی رضی اللہ عنہ سے روایت ہے‘ وہ فرماتے ہیں: اگر دین کا دارومدار رائے اور عقل پر ہوتا تو پھر موزوں کی نچلی سطح پر مسح کرنا اوپر کی بہ نسبت زیادہ قرین قیاس تھا۔ میں نے رسول اللہ صلی اللہ علیہ وسلم کو موزے کے صرف بالائی حصے پر مسح کرتے دیکھا ہے۔ (اسے ابوداود نے حسن سند کے ساتھ روایت کیا ہے۔)

اردو ترجمہ · UrduUnverified translation

حضرت صفوان بن عسال رضی اللہ عنہ سے روایت ہے کہ جب ہم مسافر ہوتے تو نبی صلی اللہ علیہ وسلم ہمیں حکم دیتے کہ ہم تین دن اور تین راتیں موزے نہ اتاریں‘ الاّ یہ کہ حالت جنابت لاحق ہو جائے‘ البتہ بیت الخلا جانے کی صورت میں‘ نیز پیشاب اور نیند کی وجہ سے بھی اتارنے کی ضرورت نہیں۔‘‘ (اسے نسائی اور ترمذی نے روایت کیا ہے اور الفاظ ترمذی کے ہیں، نیز اسے ابن خزیمہ نے بھی روایت کیا ہے اور ترمذی اور ابن خزیمہ دونوں نے اسے صحیح قرار دیا ہے۔)

اردو ترجمہ · UrduUnverified translation

حضرت علی رضی اللہ عنہ سے منقول ہے کہ نبی صلی اللہ علیہ وسلم نے مسافر کے لیے موزوں پر مسح کے لیے تین دن اورتین راتیں اور مقیم کے لیے ایک دن رات مدت مقرر فرمائی ہے۔ (اسے مسلم نے روایت کیا ہے۔)

اردو ترجمہ · UrduUnverified translation

حضرت ثوبان رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ایک سریہ (چھوٹا لشکر) روانہ فرمایا اور انھیں پگڑیوں اور موزوں پر مسح کرنے کا حکم دیا۔ (اسے احمد اور ابوداود نے روایت کیا ہے اور حاکم نے صحیح قرار دیاہے۔)

اردو ترجمہ · UrduUnverified translation

حضرت عمر رضی اللہ عنہ سے موقوف اور حضرت انس رضی اللہ عنہ سے مرفوع روایت ہے: ’’جب تم میں سے کوئی وضو کرکے موزے پہنے تو ان پر مسح کر لے اور ان کو پہنے ہوئے نماز پڑھ لے۔ اگر چاہے تو ان کو نہ اتارے‘ الا یہ کہ غسل جنابت کی ضرورت پیش آجائے۔‘‘ (اسے دارقطنی اور حاکم نے روایت کیا ہے اور حاکم نے صحیح قرار دیا ہے۔)

اردو ترجمہ · UrduUnverified translation

حضرت ابوبکرہ رضی اللہ عنہ نے نبی صلی اللہ علیہ وسلم سے روایت بیان کی ہے کہ آپ نے مسافر کے لیے تین دن اور تین راتوں تک مسح کرنے کی رخصت فرمائی ہے اور مقیم کے لیے ایک دن اور ایک رات تک‘ جبکہ اس نے باوضو ہو کر موزے پہنے ہوں۔ (اسے دارقطنی نے روایت کیا ہے اور ابن خزیمہ نے صحیح قرار دیا ہے۔)

اردو ترجمہ · UrduUnverified translation

حضرت ابی بن عمارہ رضی اللہ عنہ روایت کرتے ہیں کہ میں نے عرض کیا: اے اللہ کے رسول! کیا میں موزوں پر مسح کر سکتا ہوں؟ فرمایا:’’ ہاں‘ (کر سکتے ہو)۔‘‘ عرض کیا: ایک دن؟ آپ نے فرمایا: ’’ہاں۔‘‘ عرض کیا :دو دن؟ آپ نے فرمایا: ’’ہاں۔‘‘ میں نے عرض کیا: تین دن؟ آپ نے فرمایا: ’’ہاں‘ اور جب تک تیری مرضی ہو۔‘‘ (اسے ابوداود نے روایت کیا ہے اور کہا ہے کہ یہ حدیث قوی نہیں ہے۔)

اردو ترجمہ · UrduUnverified translation

حضرت انس رضی اللہ عنہ فرماتے ہیں کہ عہد رسالت مآب میں صحابۂ کرام رضی اللہ عنہم نماز عشاء کا اتنا انتظار کرتے کہ غلبۂ نیند کی و جہ سے ان کے سر جھک جاتے۔ (مگر) پھر وہ ازسر نو وضو کیے بغیر نماز پڑھ لیتے۔ (اسے ابوداود نے روایت کیا ہے۔ اور دارقطنی نے صحیح قرار دیا ہے۔ اور اس کی اصل مسلم میں ہے۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ فاطمہ بنت ابی حبیش رضی اللہ عنہا نبی ٔاکرم صلی اللہ علیہ وسلم کی خدمت میں حاضر ہوئی اور عرض کیا: اے اللہ کے رسول! میں ایسی عورت ہوں جو ہمیشہ استحاضے کے خون میں مبتلا رہتی ہوں‘ پاک ہوتی ہی نہیں۔ کیا ایسی حالت میں نماز چھوڑ دوں؟ آپ نے فرمایا: ’’نہیں‘ یہ تو ایک رگ ہے‘ (جو پھٹ جاتی ہے اور خون بہتا رہتا ہے۔) حیض کا خون نہیں ہے۔ ہاں‘ جب ایام حیض شروع ہوں تو نماز کو چھوڑ دو۔ اور جب یہ ایام پورے ہو جائیں تو خون دھو کر نماز پڑھو۔‘‘ (بخاری و مسلم) اور بخاری میں مزید یہ الفاظ ہیں:’’ پھر ہر نماز کے لیے وضو کرو۔‘‘ اور امام مسلم نے اشارہ کیا ہے کہ انھوں نے یہ عبارت عمداً چھوڑی ہے۔

اردو ترجمہ · UrduUnverified translation

حضرت علی رضی اللہ عنہ فرماتے ہیں کہ میں بہت مذی والا مرد تھا۔ میں نے حضرت مقداد رضی اللہ عنہ سے کہا کہ وہ نبی صلی اللہ علیہ وسلم سے اس کے متعلق دریافت کریں۔ حضرت مقداد رضی اللہ عنہ نے نبی صلی اللہ علیہ وسلم سے اس کے بارے میں دریافت کیا (کہ اس کی وجہ سے وضو کرنا ہوگا یا غسل جنابت؟) آپ نے فرمایا : ’’ایسی حالت میں وضو ہی ہے۔‘‘ (بخاری و مسلم ۔یہ الفاظ بخاری کے ہیں۔)

اردو ترجمہ · UrduUnverified translation

حضرت عائشہ رضی اللہ عنہا سے روایت ہے کہ نبی صلی اللہ علیہ وسلم نے اپنی کسی اہلیہ کو بوسہ دیا اور نماز کے لیے نکل گئے اور وضو نہیں فرمایا۔ (اسے احمد نے روایت کیا ہے اور بخاری نے ضعیف قرار دیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ رسول اللہ صلی اللہ علیہ وسلم نے فرمایا: ’’جب تم میں سے کوئی اپنے پیٹ میں ہوا کی حرکت محسوس کرے اور فیصلہ کرنا مشکل ہو جائے کہ آیا پیٹ سے کوئی چیز خارج ہوئی ہے یا نہیں‘ تو ایسی صورت میں (وضو کرنے کے لیے) وہ مسجد سے باہر نہ جائے‘ تاوقتیکہ ہوا کے خارج ہونے کی آواز نہ سنے یا بدبو محسوس نہ کرے۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت طلق بن علی رضی اللہ عنہ نے بیان کیا کہ ایک شخص نے کہا: میں نے اپنی شرم گاہ کو ہاتھ لگایا ہے یا یوں کہا کہ ایک آدمی نماز میں اپنی شرم گاہ کو ہاتھ لگاتا ہے تو کیا اسے نئے سرے سے وضو کرنا چاہیے؟ تو نبی صلی اللہ علیہ وسلم نے فرمایا: ’’نہیں‘ وہ تو تیرے جسم کا ایک حصہ ہے۔‘‘ (اسے پانچوں نے روایت کیا ہے اور ابن حبان نے صحیح قرار دیا ہے۔ ابن مدینی کہتے ہیں: حضرت بسرہ رضی اللہ عنہا کی حدیث سے یہ حدیث بہت بہتر ہے۔)

اردو ترجمہ · UrduUnverified translation

حضرت بسرہ بنت صفوان رضی اللہ عنہا کہتی ہیں کہ رسول اللہ صلی اللہ علیہ وسلم نے فرمایا: ’’جس نے اپنی شرم گاہ کو ہاتھ لگایا اسے وضو کرنا چاہیے۔‘‘ (اسے پانچوں نے روایت کیا ہے اور ترمذی اور ابن حبان نے صحیح قرار دیا ہے۔ امام بخاری نے فرمایا: اس مسئلے میں یہ صحیح ترین حدیث ہے۔)

اردو ترجمہ · UrduUnverified translation

حضرت عائشہ رضی اللہ عنہا سے مروی ہے‘ رسول اللہ صلی اللہ علیہ وسلم نے فرمایا: ’’جس کو نماز میں قے آجائے یا نکسیر پھوٹ پڑے یا صفراوی مادہ آجائے یا مذی کا خروج ہو جائے تو اسے نماز سے نکل کر وضو کرنا چاہیے اور جہاں سے نماز چھوڑی تھی اسی پر بنا کر لے بشرطیکہ اس دوران میں اس نے گفتگو نہ کی ہو۔‘‘ (اسے ابن ماجہ نے روایت کیا ہے اور احمد وغیرہ نے ضعیف قرار دیا ہے۔)

اردو ترجمہ · UrduUnverified translation

حضرت جابر بن سمرہ رضی اللہ عنہ سے روایت ہے کہ ایک شخص نے نبی صلی اللہ علیہ وسلم سے دریافت کیا: کیا میں بکری کا گوشت کھاؤں تو بعد میں وضو کروں؟ آپ نے فرمایا: ’’اگر تو چاہے تو کر لے۔‘‘ اس نے (پھر) عرض کیا: اور اونٹ کے گوشت سے؟ آپ نے فرمایا: ’’ہاں۔‘‘ (اسے مسلم نے روایت کیا ہے۔)

اردو ترجمہ · UrduUnverified translation

حضرت ابوہریرہ رضی اللہ عنہ سے روایت ہے‘ نبی صلی اللہ علیہ وسلم نے فرمایا: ’’جس نے میت کو غسل دیا‘ وہ خود بھی غسل کرے۔ اور جس نے میت کو اٹھایا وہ وضو کرے۔‘‘ (اس حدیث کو احمد‘ نسائی اور ترمذی نے روایت کیا ہے اور اسے ترمذی نے حسن کہا ہے۔ اور احمد کا قول ہے کہ اس مسئلے میں کوئی بھی حدیث صحیح ثابت نہیں ہے۔)

اردو ترجمہ · UrduUnverified translation

حضرت عبداللہ بن ابی بکر رحمہما اللہ کہتے ہیں کہ رسول اللہ صلی اللہ علیہ وسلم نے (احکام کی) جو تحریر عمرو بن حزم رضی اللہ عنہ کو لکھ کر دی تھی اس میں تحریر تھا کہ قرآن پاک کو پاکیزہ انسان ہی (جس نے وضو کیا ہو) ہاتھ لگائے۔ (اسے امام مالک نے مرسل روایت کیا ہے اور نسائی اور ابن حبان نے موصول بیان کیا ہے۔ (دراصل) یہ حدیث معلول ہے۔)

اردو ترجمہ · UrduUnverified translation

حضرت عائشہ رضی اللہ عنہا فرماتی ہیں کہ رسول اللہ صلی اللہ علیہ وسلم ہر حالت میں اللہ تعالیٰ کا ذکر کرتے تھے۔ (اسے مسلم نے روایت کیا ہے اور بخاری نے تعلیقاً نقل کیا ہے۔)

اردو ترجمہ · UrduUnverified translation

حضرت انس بن مالک رضی اللہ عنہ بیان کرتے ہیں کہ نبی صلی اللہ علیہ وسلم نے پچھنے لگوائے اور (نیا) وضو کیے بغیر نماز ادا کی۔ (اسے دارقطنی نے روایت کیا ہے اور کمزور کہاہے۔)

اردو ترجمہ · UrduUnverified translation

حضرت معاویہ رضی اللہ عنہ سے روایت ہے‘ رسول اللہ صلی اللہ علیہ وسلم کا ارشاد گرامی ہے: ’’آنکھیں دبر کا بندھن ہیں۔ جب آنکھیں سوتی ہیں تو بندھن ڈھیلا ہو جاتا ہے۔ ‘‘ (اسے احمد اور طبرانی نے روایت کیا ہے۔ ) اور طبرانی نے یہ اضافہ بھی نقل کیا ہے: ’’جس شخص کو نیند آجائے وہ ازسر نو وضو کرے۔‘‘اور یہی اضافہ ابوداود کی اسی روایت میں حضرت علی رضی اللہ عنہ کے واسطے سے ہے‘ البتہ اس روایت میں [اِسْتَطْلَــقَ الْـوِکَائُ] ’’بندھن کھل جاتا ہے۔‘‘ والی عبارت نہیں ہے۔ (باعتبار سند دونوں احادیث ضعیف ہیں۔) اور ابوداود میں حضرت ابن عباس رضی اللہ عنہما کے واسطے سے بھی مرفوعاً آیا ہے: ’’وضو تو اس شخص پر ہے جو لیٹ کر سو جائے۔‘‘ (سند کے اعتبار سے یہ حدیث بھی ضعیف ہے۔)

اردو ترجمہ · UrduUnverified translation

حضرت ابن عباس رضی اللہ عنہما سے روایت ہے‘ رسول اللہ صلی اللہ علیہ وسلم نے فرمایا: ’’ نماز میں تم میں سے کسی کے پاس شیطان آتا ہے اور اس کی مقعد میں پھونک مارتا ہے اور اس کے ذہن میں یہ خیال ڈالتا ہے کہ وہ بے وضو ہو گیا ہے‘ حالانکہ وہ بے وضو نہیں ہوا ہوتا‘ لہٰذا جب تم میں سے کوئی ایسا محسوس کرے تو ریح کے خارج ہونے کی آواز سننے یا اس کی بدبو پانے تک نماز سے نہ پھرے۔‘‘ (اسے بزار نے روایت کیا ہے۔) اور اس حدیث کی اصل بخاری و مسلم میں عبداللہ بن زید سے مروی ہے۔ اور صحیح مسلم میں حضرت ابوہریرہ رضی اللہ عنہ سے اس کی مثل الفاظ مروی ہیں۔) اور حاکم نے ابوسعید کے واسطے سے مرفوعاً بیان کیا ہے: ’’جب تم میں سے کسی کے پاس شیطان آئے اور (ذہن میں) وسوسہ اور خیال ڈالے کہ تو بے وضو ہوگیا ہے تو یہ شخص اسے جواب میں کہے کہ تو جھوٹ بولتا ہے۔‘‘ اسے ابن حبان نے ان الفاظ سے روایت کیا ہے: ’’وہ( شخص ) اپنے دل میں کہے (کہ تو جھوٹا ہے)۔‘‘

اردو ترجمہ · UrduUnverified translation

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب قضائے حاجت کے لیے تشریف لے جاتے تو اپنی انگوٹھی (اپنے دست مبارک سے) اتار کر الگ رکھ دیتے تھے۔ (اسے چاروں نے روایت کیا ہے اور یہ روایت معلول ہے۔)

اردو ترجمہ · UrduUnverified translation

حضرت انس بن مالک رضی اللہ عنہ ہی سے روایت ہے کہ نبی صلی اللہ علیہ وسلم قضائے حاجت کے لیے بیت الخلا میں داخل ہوتے وقت یہ دعا پڑھتے تھے: [اَللّٰھُمَّ إِنِّي أَعُوذُبِکَ مِنَ الْخُبُثِ وَالْخَبَائِثِ] ’’اے اللہ! میں تیری پناہ پکڑتا ہوں‘ خبیث جنوں اور خبیث جننیوں سے۔‘‘ (اسے ساتوں نے روایت کیا ہے۔)

اردو ترجمہ · UrduUnverified translation

حضرت انس بن مالک رضی اللہ عنہ ہی سے یہ روایت بھی ہے کہ رسول اللہ صلی اللہ علیہ وسلم قضائے حاجت کے لیے بیت الخلا میں داخل ہوتے تو میں اور ایک میرے جیسا لڑکا پانی کا ایک برتن اور ایک چھوٹا سا نیزہ لے کر ہمراہ جاتے۔ اس پانی سے آپ استنجا فرمایا کرتے۔(بخاری و مسلم)

اردو ترجمہ · UrduUnverified translation

حضرت مغیرہ بن شعبہ رضی اللہ عنہ سے روایت ہے‘ وہ فرماتے ہیں کہ نبی صلی اللہ علیہ وسلم نے مجھ سے فرمایا: ’’پانی کا برتن (ساتھ) لے چلو۔‘‘ پھر آپ رفع حاجت کے لیے (اتنی دور) تشریف لے گئے کہ میری نظر سے اوجھل ہوگئے۔ بالآخر آپ قضائے حاجت سے فارغ ہوئے۔ (بخاری و مسلم)