Hadith 7032–7072

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا، جبکہ سیدنا سعد رضی اللہ عنہ کا جنازہ رکھا ہوا تھا (آپ صلی اللہ علیہ وسلم نے فرمایا): ”اس کے لیے رحمن کا عرش جھوم اٹھا ہے۔“ منافقین نے ان کے جنازے کے بارے میں یہ کہنا شروع کیا کہ یہ کتنا ہلکا ہے، اس بات کی اطلاع نبی اکرم صلی اللہ علیہ وسلم کو ملی تو آپ صلی اللہ علیہ وسلم نے فرمایا: ”لوگوں کے ساتھ اسے فرشتوں نے اٹھایا ہوا ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7032]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا سعد رضی اللہ عنہ کے بارے میں فرمایا: ”یہ وہ نیک شخص ہے جس کے لیے آسمان کے دروازے کھول دیے گئے، اس پر (قبر میں) تنگی کی گئی، لیکن پھر اس کو کشادگی عطا کر دی گئی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7033]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم ان کی قبر میں یعنی سیدنا سعد بن معاذ رضی اللہ عنہ کی قبر میں داخل ہوئے، آپ صلی اللہ علیہ وسلم تھوڑی دیر وہاں ٹھہرے رہے، جب آپ صلی اللہ علیہ وسلم باہر آئے تو عرض کی گئی: یا رسول اللہ صلی اللہ علیہ وسلم ! آپ کیوں ٹھہرے رہے تھے؟ نبی اکرم صلی اللہ علیہ وسلم نے ارشاد فرمایا: ”سعد کو قبر میں بھینچا گیا، میں نے اللہ تعالیٰ سے دعا کی تو اس نے انہیں کشادگی عطا کی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7034]

اردو ترجمہ · UrduUnverified translation

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ریشم کا بنا ہوا کپڑا پہنا، لوگوں نے اسے چھو کر اسے پسند کرنا شروع کیا، تو نبی اکرم صلی اللہ علیہ وسلم نے فرمایا: ”تم اسے پسند کر رہے ہو؟ جنت میں سعد بن معاذ رضی اللہ عنہ کے رومال اس سے زیادہ بہتر ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7035]

اردو ترجمہ · UrduUnverified translation

سیدنا براء رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں ریشمی کپڑا لایا گیا، لوگ اسے چھونے لگے اور اس کی نرمی پر حیران ہونے لگے، تو نبی اکرم صلی اللہ علیہ وسلم نے ارشاد فرمایا: ”جنت میں سعد بن معاذ کے رومال اس سے زیادہ نرم (راوی کو شک ہے شاید یہ الفاظ ہیں:) اس سے زیادہ بہتر ہیں۔“ شعبہ نامی راوی نے یہ بات بیان کی ہے، یہی روایت قتادہ نے سیدنا انس بن مالک رضی اللہ عنہ کے حوالے سے نبی اکرم صلی اللہ علیہ وسلم سے اسی کی مانند نقل کی ہے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7036]

اردو ترجمہ · UrduUnverified translation

واقد بن عمرو بیان کرتے ہیں کہ میں سیدنا انس بن مالک رضی اللہ عنہ کی خدمت میں حاضر ہوا، انہوں نے مجھ سے دریافت کیا: تم کون ہو؟ میں نے کہا: میں واقد بن عمرو بن سعد بن معاذ ہوں، تو انہوں نے فرمایا: تمہاری سیدنا سعد رضی اللہ عنہ کے ساتھ مشابہت ہے، پھر وہ رونے لگے اور بہت زیادہ روئے، انہوں نے فرمایا: اللہ تعالیٰ سیدنا سعد رضی اللہ عنہ پر رحمت کرے، وہ بڑے بھاری بھرکم اور طویل قامت تھے، پھر سیدنا انس رضی اللہ عنہ نے بتایا کہ نبی اکرم صلی اللہ علیہ وسلم نے دومہ (کے حکمران) اکیدر کی طرف لشکر روانہ کیا، تو اس نے نبی اکرم صلی اللہ علیہ وسلم کی طرف ریشم سے بنا ہوا ایک جبہ بھیجا جس میں سونا بھرا ہوا تھا، نبی اکرم صلی اللہ علیہ وسلم نے اسے پہنا، آپ صلی اللہ علیہ وسلم منبر پر کھڑے ہوئے (راوی کو شک ہے، شاید یہ الفاظ ہیں:) منبر پر بیٹھے، آپ صلی اللہ علیہ وسلم نے کوئی بات چیت نہیں کی، پھر آپ صلی اللہ علیہ وسلم منبر سے نیچے اترے، لوگ اس جبے کو چھونے لگے اور اس کی طرف دیکھنے لگے، تو نبی اکرم صلی اللہ علیہ وسلم نے فرمایا: ”کیا تمہیں یہ اچھا لگ رہا ہے؟“ لوگوں نے کہا: ہم نے اس سے زیادہ عمدہ کپڑا کبھی نہیں دیکھا، تو نبی اکرم صلی اللہ علیہ وسلم نے ارشاد فرمایا: ”جنت میں سعد بن معاذ کے رومال اس سے زیادہ خوبصورت ہیں، جو تم دیکھ رہے ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7037]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ دومہ (کے حکمران) اکیدر نے نبی اکرم صلی اللہ علیہ وسلم کی خدمت میں ریشم سے بنا ہوا جبہ بھیجا۔ نبی اکرم صلی اللہ علیہ وسلم نے اسے پہنا، یہ ریشم کے حرام قرار دیے جانے سے پہلے کی بات ہے۔ لوگ اس کی خوبصورتی سے حیران ہوئے۔ نبی اکرم صلی اللہ علیہ وسلم نے فرمایا: ”جنت میں سعد بن معاذ کے رومال اس سے زیادہ خوبصورت ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7038]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ایک مہم جاسوسی کے لیے روانہ فرمائی، آپ نے ان کا امیر عاصم بن ثابت رضی اللہ عنہ کو مقرر کیا، وہ لوگ روانہ ہوئے یہاں تک کہ عسفان اور مکہ کے درمیان انہوں نے پڑاؤ کیا، ہذیل قبیلے کی ایک شاخ بنو لحیان کو ان کا پتہ چل گیا، وہ لوگ ایک سو تیر اندازوں کے ساتھ ان کے پیچھے آئے اور ان کے قدموں کے نشانات پر آتے رہے یہاں تک کہ انہوں نے بھی اسی جگہ پڑاؤ کیا جہاں انہوں نے پڑاؤ کیا تھا، وہاں انہیں مدینہ منورہ کی کھجوروں کی گٹھلیاں ملیں تو انہوں نے کہا: یہ تو اہل یثرب کی کھجوریں ہیں، پھر وہ لوگ ان کے قدموں کے نشانات پر پیچھے آتے گئے یہاں تک کہ ان تک پہنچ گئے، جب سیدنا عاصم بن ثابت رضی اللہ عنہ اور ان کے ساتھیوں کو ان کا احساس ہوا تو انہوں نے ایک پہاڑ کی آڑ لی، وہ لوگ آئے اور انہوں نے ان حضرات کو گھیر لیا اور کہا: تم لوگوں کے ساتھ یہ پختہ عہد اور وعدہ ہے کہ اگر تم اتر کر ہماری طرف آ جاتے ہو تو ہم تم میں سے کسی بھی شخص کو قتل نہیں کریں گے، تو سیدنا عاصم رضی اللہ عنہ نے کہا: میں کافر قوم کی دی ہوئی پناہ کی وجہ سے نیچے نہیں اتروں گا، «اللَّهُمَّ أَخْبِرْ عَنَّا نَبِيَّكَ» ”اے اللہ! تو ہمارے بارے میں اپنے نبی کو اطلاع دے دے“، ان لوگوں نے اپنی جگہ پر رہتے ہوئے ان کے ساتھ لڑائی کی یہاں تک کہ ان لوگوں نے سیدنا عاصم رضی اللہ عنہ سمیت سات افراد کو شہید کر دیا، صرف سیدنا خبیب بن عدی اور سیدنا زید بن دثنہ رضی اللہ عنہما اور ایک اور شخص باقی رہ گیا، ان لوگوں نے ان حضرات کو یہ عہد دیا کہ وہ اگر اتر کر ان کی طرف آ گئے تو (انہیں کچھ نہیں کہا جائے گا)، لیکن جب ان لوگوں نے ان حضرات پر قابو پا لیا تو انہوں نے ان کی کمانوں کے تار کھول دیے اور اس کے ذریعے ان حضرات کو باندھ دیا، تو ان دو کے ساتھ موجود تیسرے شخص نے کہا: یہ سب سے پہلی وعدہ خلافی ہے، اس نے ان کا ساتھ دینے سے انکار کر دیا، ان لوگوں نے اسے کھینچا تو اس شخص نے ان کے پیچھے جانے سے انکار کر دیا اور بولا: میرے لیے ان (مقتولین) کے طریقہ کار میں بہترین نمونہ ہے، تو ان لوگوں نے اس شخص کی بھی گردن اڑا دی، وہ لوگ سیدنا خبیب بن عدی اور سیدنا زید بن دثنہ رضی اللہ عنہما کو لے کر آئے اور مکہ میں ان دونوں کو فروخت کر دیا، سیدنا خبیب رضی اللہ عنہ کو حارث بن عامر کے بیٹوں نے خرید لیا کیونکہ حارث غزوہ بدر کے دن مارا گیا تھا، وہ ان لوگوں کے ہاں قیدی کے طور پر رہے یہاں تک کہ جب ان لوگوں نے انہیں شہید کرنے کا فیصلہ کر لیا تو سیدنا خبیب رضی اللہ عنہ نے حارث کی ایک بیٹی سے ایک استرا عارضی استعمال کے لیے مانگا تاکہ اس کے ذریعے اضافی بال صاف کر لیں، اس عورت نے انہیں وہ استرا دے دیا، وہ عورت بیان کرتی ہے کہ میں اپنے بچے سے غافل ہوئی یہاں تک کہ وہ بچہ ان کے پاس چلا گیا، انہوں نے اس بچے کو پکڑا اور اپنی ران پر بٹھا لیا جبکہ استرا ان کے ہاتھ میں تھا، جب میں نے اس بچے کو دیکھا تو میں بہت گھبرا گئی، انہوں نے دریافت کیا: کیا تمہیں اندیشہ ہے کہ میں اسے قتل کر دوں گا؟ اگر اللہ نے چاہا تو میں ایسا نہیں کروں گا، وہ عورت بیان کرتی ہے کہ میں نے ایسا کوئی قیدی کبھی نہیں دیکھا جو سیدنا خبیب رضی اللہ عنہ سے بہتر ہو، میں نے انہیں انگور کھاتے ہوئے دیکھا ہے حالانکہ ان دنوں مکہ میں یہ پھل نہیں تھا اور وہ اس وقت لوہے میں جکڑے ہوئے تھے، یہ وہ رزق تھا جو اللہ تعالیٰ انہیں عطا فرماتا تھا، پھر وہ لوگ (یعنی بنو حارث) انہیں حرم کی حدود سے باہر لے گئے تاکہ انہیں شہید کر دیں تو سیدنا خبیب رضی اللہ عنہ نے کہا: مجھے موقع دو تاکہ میں دو رکعات ادا کر لوں، پھر انہوں نے دو رکعات ادا کیں اور بولے: اگر مجھے یہ اندیشہ نہ ہوتا کہ تم یہ سمجھو گے کہ میں موت کے خوف کی وجہ سے (ایسا کر رہا ہوں) تو میں مزید رکعات ادا کرتا، پس وہ پہلے فرد تھے جنہوں نے شہید ہونے کے وقت دو رکعات ادا کرنے کا طریقہ ایجاد کیا، پھر انہوں نے فرمایا: ”اگر میں مسلمان ہونے کے عالم میں قتل کیا جاتا ہوں، تو پھر میں اس بات کی پرواہ نہیں کروں گا کہ اللہ تعالیٰ کی بارگاہ میں مجھے کون سے پہلو کے بل گرایا جاتا ہے“، پھر عقبہ بن حارث اٹھ کر ان کی طرف گیا اور اس نے انہیں شہید کر دیا، قریش نے عاصم رضی اللہ عنہ کے جسم کی طرف کسی کو بھیجا تاکہ ان کے جسم کا کوئی حصہ حاصل کر لیں اور اس کے ذریعے انہیں پہچان لیں کیونکہ عاصم رضی اللہ عنہ نے غزوہ بدر کے موقع پر ان کے بڑے فرد کو قتل کیا تھا، تو اللہ تعالیٰ نے ان پر بھڑوں کا ایک جھنڈ (سایہ) بھیج دیا جس نے ان کی حفاظت کی اور وہ لوگ ان کے جسم سے کچھ حاصل نہ کر سکے، وہ یہ روایت ابن قتیبہ نے اپنی تحریر میں سے ہمیں بیان کی تھی جس میں یہ الفاظ ہیں: ”تو انہوں نے اپنے گھروں میں رہتے ہوئے ان کے ساتھ لڑائی کی“ حالانکہ الفاظ یہ ہیں: ”انہوں نے اپنی جگہ پر رہتے ہوئے ان کے ساتھ لڑائی کی“۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7039]

اردو ترجمہ · UrduUnverified translation

سیدہ ام سلمہ رضی اللہ عنہا بیان کرتی ہیں کہ نبی اکرم صلی اللہ علیہ وسلم سیدنا ابوسلمہ رضی اللہ عنہ کے پاس تشریف لائے، اس وقت ان کی آنکھیں کھلی رہ گئی تھیں (یعنی انتقال ہو چکا تھا)، نبی اکرم صلی اللہ علیہ وسلم نے ان کی آنکھوں کو بند کیا اور فرمایا: ”جب روح قبض ہوتی ہے تو نگاہ اس کے پیچھے جاتی ہے۔“ ان کے اہل خانہ میں سے کچھ لوگ چیخ کر رونے لگے، تو نبی اکرم صلی اللہ علیہ وسلم نے فرمایا: ”تم لوگ اپنے بارے میں صرف بھلائی کی دعا کرو کیونکہ تم لوگ جو کہتے ہو فرشتے اس پر آمین کہتے ہیں۔“ نبی اکرم صلی اللہ علیہ وسلم نے فرمایا: «اللَّهُمَّ اغْفِرْ لِأَبِي سَلَمَةَ وَارْفَعْ دَرَجَتَهُ فِي الْمَهْدِيِّينَ، وَاخْلُفْهُ فِي عَقِبِهِ فِي الْغَابِرِينَ، وَاغْفِرْ لَنَا وَلَهُ يَا رَبَّ الْعَالَمِينَ، وَافْسَحْ لَهُ فِي قَبْرِهِ، وَنَوِّرْ لَهُ فِيهِ» ”اے اللہ ابوسلمہ کی مغفرت کر دے اور مقرب لوگوں میں اس کے درجے بلند کر دے اور پیچھے رہنے والوں میں اس کا اچھا جانشین بنا دے، اس کی اور ہماری مغفرت کر دے اے تمام جہانوں کے پروردگار! اے اللہ! اس کی قبر کو اس کے لیے کشادہ کر دے اور اس کی قبر کو اس کے لیے روشن کر دے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7041]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں: ہم لوگ انہیں سیدنا زید بن محمد کہا کرتے تھے، یہاں تک کہ قرآن کا یہ حکم نازل ہوا: ﴿ادْعُوهُمْ لِآبَائِهِمْ هُوَ أَقْسَطُ عِنْدَ اللَّهِ﴾ [سورة الأحزاب: 5] ”ان لوگوں کو ان کے (حقیقی) باپوں کی نسبت سے بلاؤ، یہ اللہ تعالیٰ کی بارگاہ میں انصاف کے زیادہ قریب ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7042]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ سیدنا عمر رضی اللہ عنہ نے سیدنا اسامہ بن زید رضی اللہ عنہما کے لیے مجھ سے زیادہ ادائیگی مقرر کی، تو میں نے کہا: میری ہجرت اور اسامہ کی ہجرت ایک ساتھ ہوئی ہے، تو سیدنا عمر رضی اللہ عنہ نے فرمایا: اس کا والد نبی اکرم صلی اللہ علیہ وسلم کے نزدیک تمہارے باپ سے زیادہ محبوب تھا اور وہ نبی اکرم صلی اللہ علیہ وسلم کے نزدیک تم سے زیادہ محبوب تھا، تمہیں تمہارے ماں باپ نے ہجرت کروائی تھی۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7043]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے ایک مہم روانہ کی اور سیدنا اسامہ بن زید رضی اللہ عنہما کو ان کا امیر مقرر کیا، بعض لوگوں نے ان کی امارت کے بارے میں الجھن کا اظہار کیا، تو نبی اکرم صلی اللہ علیہ وسلم کھڑے ہوئے اور آپ نے ارشاد فرمایا: ”اگر تم اس کے امیر ہونے کے بارے میں الجھن کا اظہار کر رہے ہو تو اس سے پہلے تم نے اس کے باپ کے حوالے سے بھی الجھن کا اظہار کیا تھا، اللہ کی قسم! وہ امیر ہونے کے قابل تھا اور میرے نزدیک سب سے زیادہ محبوب تھا اور اس کے بعد یہ میرے نزدیک سب سے زیادہ محبوب ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7044]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ سیدنا زید بن حارثہ رضی اللہ عنہ آئے اور انہوں نے (اپنی اہلیہ) سیدہ زینب رضی اللہ عنہا کی شکایت نبی اکرم صلی اللہ علیہ وسلم سے کی، تو نبی اکرم صلی اللہ علیہ وسلم نے ارشاد فرمایا: «أَمْسِكْ عَلَيْكَ زَوْجَكَ» ”اپنی بیوی کو اپنے پاس رکھو (یعنی اسے طلاق نہ دو)“ تو اس بارے میں یہ آیت نازل ہوئی: ﴿وَتُخْفِي فِي نَفْسِكَ مَا اللَّهُ مُبْدِيهِ﴾ [سورة الأحزاب: 37] ”تم اپنے من میں وہ بات چھپا رہے تھے جسے اللہ تعالیٰ ظاہر کرنے والا تھا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7045]

اردو ترجمہ · UrduUnverified translation

سیدنا علی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے سیدنا جعفر رضی اللہ عنہ سے فرمایا: ”تم شکل و صورت اور اخلاق میں میرے ساتھ مشابہت رکھتے ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7046]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”مجھے جعفر فرشتے کی شکل میں دکھایا گیا، وہ جنت میں اپنے دو پروں کے ذریعے اڑ رہا تھا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7047]

اردو ترجمہ · UrduUnverified translation

خالد بن سمیر بیان کرتے ہیں: عبداللہ بن رواحہ انصاری رضی اللہ عنہ ہمارے پاس آئے، انصار انہیں فقیہ قرار دیتے تھے، میں ان کے پاس آیا، لوگ ان کے اردگرد اکٹھے ہو چکے تھے، انہوں نے بتایا: نبی اکرم صلی اللہ علیہ وسلم کے شہسوار سیدنا ابوقتادہ رضی اللہ عنہ نے ہمیں یہ حدیث بیان کی ہے، انہوں نے بتایا: نبی اکرم صلی اللہ علیہ وسلم نے امراء کا لشکر روانہ کیا اور فرمایا: ”زید بن حارثہ تمہارا امیر ہوگا، اگر زید شہید ہو جائے، تو جعفر ہوگا، اگر جعفر شہید ہو جائے تو عبداللہ بن رواحہ ہوگا۔“ سیدنا جعفر رضی اللہ عنہ نے گزارش کی: میرے ماں باپ آپ پر قربان ہوں یا رسول اللہ صلی اللہ علیہ وسلم ! مجھے یہ بات پسند نہیں ہے کہ آپ مجھ پر زید کو امیر بنائیں، تو نبی اکرم صلی اللہ علیہ وسلم نے فرمایا: ”اسے رہنے دو، کیونکہ تم یہ بات نہیں جانتے کہ کس چیز میں زیادہ بہتری ہے۔“ پھر وہ لوگ روانہ ہوئے، جتنا اللہ کو منظور تھا اتنا وقت گزر گیا، پھر نبی اکرم صلی اللہ علیہ وسلم ایک دن منبر پر چڑھے، آپ صلی اللہ علیہ وسلم نے یہ اعلان کرنے کا حکم دیا کہ لوگ اکٹھے ہو جائیں، پھر آپ صلی اللہ علیہ وسلم نے فرمایا: ”کیا میں تمہیں جنگ میں حصہ لینے والے تمہارے لشکر کے بارے میں بتاؤں؟ یہ لوگ گئے، ان کا دشمن سے سامنا ہوا تو زید شہید ہو گیا، تم لوگ اس کے لیے دعائے مغفرت کرو۔“ لوگوں نے ان کے لیے دعائے مغفرت کی، پھر آپ صلی اللہ علیہ وسلم نے فرمایا: ”پھر جھنڈا جعفر بن ابی طالب نے پکڑ لیا اور دشمن پر شدید حملہ کیا، یہاں تک کہ وہ بھی شہید ہو گیا، تم لوگ اس کے لیے دعائے مغفرت کرو۔“ پھر آپ صلی اللہ علیہ وسلم نے فرمایا: ”پھر جھنڈا عبداللہ بن رواحہ نے پکڑ لیا، اس کے دونوں پاؤں ثابت قدم رہے، یہاں تک کہ وہ بھی شہید ہو گیا، تم لوگ اس کے لیے دعائے مغفرت کرو۔“ پھر آپ صلی اللہ علیہ وسلم نے فرمایا: ”پھر جھنڈا خالد بن ولید نے پکڑ لیا، اسے امیر مقرر نہیں کیا گیا تھا وہ خود امیر بن گیا۔“ پھر نبی اکرم صلی اللہ علیہ وسلم نے اپنے دونوں ہاتھ بلند کیے اور دعا کی: «اللَّهُمَّ إِنَّهُ سَيْفٌ مِنْ سُيُوفِكَ، فَانْصُرْهُ» ”اے اللہ! وہ تیری تلواروں میں سے ایک تلوار ہے، تو اس کی مدد کر۔“ (راوی کہتے ہیں) اسی دن سے سیدنا خالد رضی اللہ عنہ کا لقب سیف اللہ ہوا۔ (امام ابن حبان رحمہ اللہ فرماتے ہیں:) سیدنا ابوعبیدہ بن جراح رضی اللہ عنہ کے تذکرے سے لے کر یہاں تک یہ وہ لوگ ہیں، جو نبی اکرم صلی اللہ علیہ وسلم کی زندگی میں شہید ہوئے یا فوت ہوئے اس سے پہلے کہ نبی اکرم صلی اللہ علیہ وسلم کی روح کو اللہ تعالیٰ نے اپنی جنت کی طرف منتقل کیا، اب ہم اس کے بعد قریش سے تعلق رکھنے والے ان مہاجرین کا ذکر کریں گے جن کی فضیلت کے بارے میں مستند روایات منقول ہیں اور اس کے بعد انصار کا ذکر کریں گے، اگر اللہ تعالیٰ نے یہ آسان کیا اور اس میں سہولت فرمائی۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7048]""

اردو ترجمہ · UrduUnverified translation

سیدنا عباس بن عبدالمطلب رضی اللہ عنہ بیان کرتے ہیں: میں غزوہ حنین میں نبی اکرم صلی اللہ علیہ وسلم کے ساتھ شریک ہوا، مجھے نبی اکرم صلی اللہ علیہ وسلم کے بارے میں یہ یاد ہے کہ آپ کے ساتھ میں تھا اور ابوسفیان بن حارث بن عبدالمطلب رضی اللہ عنہ تھے، ہم نبی اکرم صلی اللہ علیہ وسلم کے ساتھ رہے، ہم آپ سے جدا نہیں ہوئے، آپ اپنے سفید خچر پر سوار تھے (یہاں راوی نے بعض اوقات ایک لفظ مختلف نقل کیا ہے)، وہ خچر فروہ بن نفاثہ جذامی نے نبی اکرم صلی اللہ علیہ وسلم کو تحفے کے طور پر پیش کیا تھا، جب مسلمانوں اور کفار کا آمنا سامنا ہوا، تو مسلمان پیٹھ پھیر کر پھر گئے، تو نبی اکرم صلی اللہ علیہ وسلم نے اپنے خچر کو کفار کی طرف ایڑ لگانی شروع کی، سیدنا عباس رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے خچر کی لگام پکڑی ہوئی تھی، میں اسے روکنے کی کوشش کر رہا تھا جو مشرکین کی طرف بڑھنا چاہ رہا تھا، جب کہ ابوسفیان بن حارث رضی اللہ عنہ نے نبی اکرم صلی اللہ علیہ وسلم کی رکاب پکڑی ہوئی تھی۔ نبی اکرم صلی اللہ علیہ وسلم نے فرمایا: ”اے عباس! بیعتِ رضوان کرنے والے لوگوں کو پکارو۔“ سیدنا عباس رضی اللہ عنہ کہتے ہیں: میری آواز بلند تھی، میں نے اپنی بلند ترین آواز میں کہا: اے بیعتِ رضوان کرنے والو! اللہ کی قسم! جب انہوں نے میری آواز سنی، تو وہ یوں آئے جس طرح گائے اپنے بچوں کی طرف آتی ہے اور وہ یہ کہہ رہے تھے: «لَبَّيْكَ لَبَّيْكَ» ”ہم حاضر ہیں، ہم حاضر ہیں“، پھر مسلمان آئے اور انہوں نے اور کفار نے میرے ساتھ جنگ کی، پھر انصار نے پکار کر کہا: «يَا مَعْشَرَ الْأَنْصَارِ» ”اے انصار کے گروہ!“ پھر یہ پکار بنو حارث بن خزرج تک مختصر ہو گئی، تو انہوں نے کہا: «يَا بَنِي الْحَارِثِ بْنِ الْخَزْرَجِ» ”اے بنو حارث بن خزرج!“ راوی بیان کرتے ہیں: نبی اکرم صلی اللہ علیہ وسلم اپنے خچر پر سوار رہتے ہوئے لڑائی کا بھرپور جائزہ لے رہے تھے۔ نبی اکرم صلی اللہ علیہ وسلم نے فرمایا: «الْآنَ حَمِيَ الْوَطِيسُ» ”اب جنگ کی بھٹی بھڑک اٹھی ہے“، پھر نبی اکرم صلی اللہ علیہ وسلم نے چند کنکریاں لیں اور انہیں کفار کی طرف پھینکا اور فرمایا: ”ربِ کعبہ کی قسم! یہ پسپا ہو جائیں گے، ربِ کعبہ کی قسم! یہ پسپا ہو جائیں گے۔“ سیدنا عباس رضی اللہ عنہ کہتے ہیں: میں جائزہ لینے لگا، تو جنگ اسی طرح چل رہی تھی جس طرح میں دیکھ رہا تھا، اللہ کی قسم! ابھی نبی اکرم صلی اللہ علیہ وسلم نے ان کی طرف چند کنکریاں پھینکی ہی تھیں کہ میں نے دیکھا کہ وہ لوگ بھاگے اور پیٹھ پھیر کر چلے گئے، یہاں تک کہ اللہ تعالیٰ نے انہیں شکست سے دوچار کیا۔ سیدنا عباس رضی اللہ عنہ بیان کرتے ہیں: گویا کہ میں اس وقت بھی نبی اکرم صلی اللہ علیہ وسلم کی طرف دیکھ رہا ہوں کہ آپ اپنے خچر پر سوار ان کے پیچھے جا رہے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7049]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”آدمی کا چچا اس کے باپ کی جگہ ہوتا ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7050]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں کہ جب خانہ کعبہ کی تعمیر شروع ہوئی تو نبی اکرم صلی اللہ علیہ وسلم اور سیدنا عباس رضی اللہ عنہ پتھر منتقل کرنے لگے، سیدنا عباس رضی اللہ عنہ نے نبی اکرم صلی اللہ علیہ وسلم سے کہا: ”آپ اپنا تہبند اپنی گردن پر رکھ لیں۔“ نبی اکرم صلی اللہ علیہ وسلم نے ایسا ہی کیا تو آپ زمین پر گر گئے اور آپ کی آنکھیں آسمان کی طرف بلند ہو گئیں، پھر آپ کھڑے ہوئے اور فرمایا: «إِزَارِي، إِزَارِي» ”میرا تہبند، میرا تہبند!“ پھر آپ صلی اللہ علیہ وسلم نے اپنا تہبند باندھ لیا۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7051]

اردو ترجمہ · UrduUnverified translation

سیدنا سعد بن ابی وقاص رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم اس جگہ کی طرف، جہاں آج کل نخاسین کا بازار ہے، ایک مہم بھیجنے کے لیے تیاری کر رہے تھے، تو اس دوران سیدنا عباس بن عبدالمطلب رضی اللہ عنہ تشریف لے آئے تو نبی اکرم صلی اللہ علیہ وسلم نے ارشاد فرمایا: ”عباس! جو تمہارے نبی کے چچا ہیں، قریش میں سب سے زیادہ سخی ہیں اور سب سے زیادہ صلہ رحمی کرنے والے ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7052]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم قضائے حاجت کے لیے تشریف لے گئے، میں نے آپ کے لیے وضو کا پانی رکھا، جب آپ تشریف لائے تو آپ نے دریافت کیا: ”یہ کس نے رکھا ہے؟“ لوگوں نے بتایا: ابن عباس رضی اللہ عنہما نے۔ نبی اکرم صلی اللہ علیہ وسلم نے دعا کی: «اللَّهُمَّ فَقِّهْهُ فِي الدِّينِ» ”اے اللہ! اسے (دین کی) سمجھ بوجھ عطا کر۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7053]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے مجھے اپنے ساتھ لگایا اور دعا فرمائی: «اللَّهُمَّ عَلِّمْهُ الْحِكْمَةَ» ”اے اللہ! اسے دانائی عطا کر۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7054]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: میں سیدہ میمونہ بنت حارث رضی اللہ عنہا کے گھر موجود تھا، میں نے نبی اکرم صلی اللہ علیہ وسلم کے لیے وضو کا پانی رکھا، آپ صلی اللہ علیہ وسلم نے دریافت کیا: ”یہ کس نے رکھا ہے؟“ سیدہ میمونہ رضی اللہ عنہا نے عرض کی: عبداللہ نے۔ نبی اکرم صلی اللہ علیہ وسلم نے دعا کی: «اللَّهُمَّ فَقِّهْهُ فِي الدِّينِ وَعَلِّمْهُ التَّأْوِيلَ» ”اے اللہ! اسے دین کی سمجھ بوجھ عطا کر اور قرآن کی تفسیر کا علم عطا کر۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7055]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ اسامہ بن زید رضی اللہ عنہما کی دروازے کی چوکھٹ سے ٹکر ہو گئی جس کی وجہ سے ان کا چہرہ زخمی ہو گیا، نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا: ”اس سے خون کو صاف کر دو“، تو مجھے اس سے الجھن ہوئی۔ سیدہ عائشہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے انہیں لپٹایا اور فرمایا: ”اگر اسامہ لڑکی ہوتی تو میں اسے زیور پہناتا، اسے کپڑے پہناتا، اس پر پیسے خرچ کرتا“۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7056]

اردو ترجمہ · UrduUnverified translation

سیدہ عائشہ رضی اللہ عنہا بیان کرتی ہیں کہ ایک مرتبہ نبی اکرم صلی اللہ علیہ وسلم میرے ہاں خوشی کے عالم میں داخل ہوئے، آپ صلی اللہ علیہ وسلم نے فرمایا: ”اے عائشہ! کیا تمہیں پتہ چلا ہے کہ مجزز مد لجی میرے پاس آیا، اس نے اسامہ اور زید رضی اللہ عنہما کو دیکھا کہ ان کے جسم پر چادر موجود تھی جس نے سر ڈھانپا ہوا تھا اور ان کے پاؤں نمایاں ہو رہے تھے، تو اس نے کہا: یہ پاؤں باپ بیٹے کے ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7057]

اردو ترجمہ · UrduUnverified translation

سیدہ عائشہ رضی اللہ عنہا بیان کرتی ہیں نبی اکرم صلی اللہ علیہ وسلم نے سیدنا اسامہ بن زید رضی اللہ عنہما کی ناک صاف کرنے کا ارادہ کیا، سیدہ عائشہ رضی اللہ عنہا نے کہا: آپ مجھے موقع دیجیے تاکہ میں ایسا کر لوں، تو نبی اکرم صلی اللہ علیہ وسلم نے فرمایا: ”اے عائشہ! اس سے محبت رکھنا کیونکہ میں اس سے محبت کرتا ہوں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7058]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا اسامہ بن زید رضی اللہ عنہما کو کچھ لوگوں کا امیر مقرر کیا، ان لوگوں نے ان کے امیر ہونے کے بارے میں الجھن کا اظہار کیا، تو نبی اکرم صلی اللہ علیہ وسلم نے فرمایا: ”اگر تم اس کے امیر ہونے کے بارے میں الجھن کا اظہار کر رہے ہو، تو اس سے پہلے تم نے اس کے باپ کے امیر ہونے کے بارے میں بھی الجھن کا اظہار کیا تھا، اللہ کی قسم! وہ امیر ہونے کے لائق تھا اور میرے نزدیک سب سے زیادہ محبوب تھا اور اس کے بعد یہ میرے نزدیک سب سے زیادہ محبوب ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7059]

اردو ترجمہ · UrduUnverified translation

امام زین العابدین رحمہ اللہ، سیدنا مسور بن مخرمہ رضی اللہ عنہ کا یہ بیان نقل کرتے ہیں: سیدنا علی رضی اللہ عنہ نے ابوجہل کی بیٹی کے لیے شادی کا پیغام بھیجا اور نکاح کا وعدہ کر لیا۔ سیدہ فاطمہ رضی اللہ عنہا نبی اکرم صلی اللہ علیہ وسلم کی خدمت میں آئیں اور انہوں نے عرض کی: آپ کی قوم کے لوگ یہ بات کر رہے ہیں کہ آپ اپنی صاحب زادیوں کی وجہ سے غصہ نہیں کرتے، سیدنا علی رضی اللہ عنہ نے ابوجہل کی بیٹی کے لیے شادی کا پیغام بھیجا ہے۔ نبی اکرم صلی اللہ علیہ وسلم نے فرمایا: ”فاطمہ میرے جگر کا ٹکڑا ہے، مجھے وہ بات ناپسند ہو گی جو اسے بری لگے۔“ نبی اکرم صلی اللہ علیہ وسلم نے سیدنا ابوالعاص بن ربیع رضی اللہ عنہ کا ذکر کیا اور ان کی اچھے لفظوں میں تعریف کی اور فرمایا: ”اللہ کے نبی کی بیٹی اور اللہ کے دشمن کی بیٹی (کسی شخص کے نکاح میں) جمع نہیں ہو سکتی ہیں۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7060]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں: میں عقبہ بن ابومعیط کی بکریاں چرایا کرتا تھا، ایک مرتبہ نبی اکرم صلی اللہ علیہ وسلم میرے پاس سے گزرے جبکہ میں ایک لڑکا تھا۔ نبی اکرم صلی اللہ علیہ وسلم نے مجھ سے دریافت کیا: ”اے لڑکے! کیا دودھ ہے؟“ میں نے جواب دیا: ”جی ہاں، لیکن مجھے امین بنایا گیا ہے۔“ نبی اکرم صلی اللہ علیہ وسلم نے دریافت کیا: ”کیا کوئی ایسی بکری ہے جس کے ساتھ کسی بکرے نے صحبت نہ کی ہو (یعنی جس کا ابھی دودھ نہ اترا ہو)؟“ راوی کہتے ہیں: میں نبی اکرم صلی اللہ علیہ وسلم کے پاس ایسی بکری لایا۔ نبی اکرم صلی اللہ علیہ وسلم نے اس کے تھن پر ہاتھ پھیرا، تو اس میں دودھ اتر آیا۔ نبی اکرم صلی اللہ علیہ وسلم نے وہ ایک برتن میں دوہ لیا۔ نبی اکرم صلی اللہ علیہ وسلم نے اسے پیا اور سیدنا ابوبکر رضی اللہ عنہ کو بھی پلایا، پھر آپ صلی اللہ علیہ وسلم نے تھن سے فرمایا: «انْقَبِضْ» ”تم دوبارہ سمٹ جاؤ“، تو وہ سمٹ گیا۔ میں نے عرض کی: ”یا رسول اللہ صلی اللہ علیہ وسلم ! آپ یہ عمل مجھے بھی سکھا دیجیے۔“ نبی اکرم صلی اللہ علیہ وسلم نے میرے سر پر ہاتھ پھیرا اور فرمایا: «يَرْحَمُكَ اللَّهُ، إِنَّكَ غُلَامٌ مُعَلَّمٌ» ”اللہ تعالیٰ تم پر رحم کرے، تم ایک تعلیم یافتہ لڑکے ہو۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7061]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ فرماتے ہیں کہ مجھے اپنے بارے میں یہ بات یاد ہے کہ میں چھٹا مسلمان تھا، روئے زمین پر ہمارے علاوہ اور کوئی مسلمان نہیں تھا۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7062]

اردو ترجمہ · UrduUnverified translation

عبدالرحمن بن یزید بیان کرتے ہیں کہ ہم نے سیدنا حذیفہ بن یمان رضی اللہ عنہ سے کہا: آپ ہمیں کسی ایسے شخص کے بارے میں بتائیں جو نبی اکرم صلی اللہ علیہ وسلم کی ہدایت اور آپ کے طور طریقے سے سب سے زیادہ قریب ہو تاکہ ہم اس سے وہ چیز حاصل کر لیں، تو انہوں نے فرمایا: میں ایسے کسی شخص سے واقف نہیں ہوں جو ابن ام عبد رضی اللہ عنہ سے زیادہ نبی اکرم صلی اللہ علیہ وسلم کے طور طریقوں، آپ کی رہنمائی اور آپ کی دلالت سے زیادہ قریب ہو، یہاں تک کہ ان کے گھر کی دیوار انہیں چھپا لے (یعنی گھر کے باہر کے معاملات میں سب سے زیادہ مشابہت رکھتے ہیں)، نبی اکرم صلی اللہ علیہ وسلم کے اصحاب میں سے محفوظ لوگ یہ بات جانتے ہیں کہ ابن ام عبد رضی اللہ عنہ، اللہ تعالیٰ کی بارگاہ میں وسیلہ ہونے کے اعتبار سے سب سے زیادہ قریب ہیں۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7063]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کے سامنے اس وقت ستر سورتوں سے زیادہ تلاوت کر لی تھی (یعنی سیکھ لی تھیں) جبکہ سیدنا زید بن ثابت رضی اللہ عنہ کے لمبے بال تھے اور وہ بچوں کے ساتھ کھیلتے تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7064]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”تم میرے سامنے سورہ نساء کی تلاوت کرو۔“ میں نے تلاوت شروع کی، یہاں تک کہ جب میں اس مقام پر پہنچا: ﴿فَكَيْفَ إِذَا جِئْنَا مِن كُلِّ أُمَّةٍ بِشَهِيدٍ وَجِئْنَا بِكَ عَلَىٰ هَٰؤُلَاءِ شَهِيدًا﴾ [سورة النساء: 41] ”تو اس وقت کیا عالم ہو گا، جب ہم ہر امت میں سے ایک گواہ لے کر آئیں گے اور تمہیں ان سب پر گواہ بنا کر لے آئیں گے۔“ سیدنا عبداللہ رضی اللہ عنہ بیان کرتے ہیں کہ پھر نبی اکرم صلی اللہ علیہ وسلم نے مجھے ٹہوکا دیا، میں نے توجہ کی، تو نبی اکرم صلی اللہ علیہ وسلم کی آنکھوں سے آنسو جاری تھے۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7065]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں کہ سیدنا ابوبکر اور سیدنا عمر رضی اللہ عنہما نے انہیں خوش خبری دی کہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص یہ چاہتا ہو کہ وہ قرآن کو بالکل اسی طرح پڑھے، جس طرح وہ نازل ہوا ہے تو وہ ابن ام عبد کی قرأت کے مطابق اس کی تلاوت کرے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7066]

اردو ترجمہ · UrduUnverified translation

سیدنا عبداللہ رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم سیدنا ابوبکر اور سیدنا عمر رضی اللہ عنہما کے ساتھ گزرے، سیدنا عبداللہ رضی اللہ عنہ اس وقت نماز ادا کر رہے تھے، انہوں نے سورہ نساء کی تلاوت شروع کی اور اسے مکمل تلاوت کیا، (نبی کریم صلی اللہ علیہ وسلم نے فرمایا:) ”جو شخص قرآن کو اسی طرح پڑھنا چاہتا ہو، جس طرح وہ نازل ہوا ہے تو وہ ابن ام عبد کی قرأت کے مطابق اس کی تلاوت کرے۔“ پھر سیدنا عبداللہ رضی اللہ عنہ بیٹھے، انہوں نے دعا مانگنا شروع کی۔ نبی اکرم صلی اللہ علیہ وسلم نے یہ کہنا شروع کیا: «سَلْ تُعْطَهْ، سَلْ تُعْطَهْ» ”تم مانگو تمہیں دیا جائے گا، تم مانگو تمہیں دیا جائے گا۔“ سیدنا عبداللہ رضی اللہ عنہ نے جو دعا مانگی اس میں یہ الفاظ بھی تھے: «اللَّهُمَّ إِنِّي أَسْأَلُكَ إِيمَانًا لَا يَرْتَدُّ، وَنَعِيمًا لَا يَنْفَدُ، وَمُرَافَقَةَ نَبِيِّكَ مُحَمَّدٍ صلی اللہ علیہ وسلم فِي أَعْلَى جَنَّةِ الْخُلْدِ» ”اے اللہ! میں تجھ سے ایسے ایمان کا سوال کرتا ہوں، جو پلٹ نہ جائے اور ایسی نعمت کا، جو ختم نہ ہو اور جنت خلد کے عالی حصے میں ہمارے نبی کے ساتھ رہنے کا (سوال کرتا ہوں)۔“ پھر سیدنا عمر رضی اللہ عنہ، سیدنا عبداللہ رضی اللہ عنہ کے پاس آئے تاکہ انہیں خوشخبری سنائیں، انہوں نے سیدنا ابوبکر رضی اللہ عنہ کو پایا کہ وہ ان سے سبقت لے جا چکے تھے، تو سیدنا عمر رضی اللہ عنہ نے کہا: اگر آپ نے ایسا کیا ہے (تو کوئی بات نہیں) آپ ویسے ہی بھلائی کی طرف سبقت لے جانے والے ہیں۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7067]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھ سے فرمایا: ”تمہارا مجھ سے (اندر آنے کی) اجازت مانگنے کے لیے یہی کافی ہے کہ جب پردہ اٹھا ہوا ہو (تو تم اندر آ سکتے ہو) اور میری گفتگو سن سکتے ہو، جب تک میں تمہیں منع نہیں کرتا۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7068]

اردو ترجمہ · UrduUnverified translation

سیدنا عبداللہ بن مسعود رضی اللہ عنہ کے بارے میں یہ بات منقول ہے کہ وہ نبی اکرم صلی اللہ علیہ وسلم کے لیے پیلو کے درخت کی مسواک توڑ رہے تھے، ان کی پنڈلیاں پتلی تھیں، تو لوگ ہنس پڑے۔ نبی اکرم صلی اللہ علیہ وسلم نے فرمایا: ”تم اس کی پتلی پنڈلیوں پر ہنس رہے ہو؟ اس ذات کی قسم جس کے دستِ قدرت میں میری جان ہے! یہ دونوں (قیامت کے دن) میزان میں احد پہاڑ سے زیادہ وزنی ہوں گی۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7069]

اردو ترجمہ · UrduUnverified translation

سالم (اپنے والد سیدنا عبداللہ بن عمر رضی اللہ عنہما) کا یہ بیان نقل کرتے ہیں کہ نبی اکرم صلی اللہ علیہ وسلم کے زمانہ اقدس میں جب کوئی شخص کوئی خواب دیکھتا تھا، تو وہ نبی اکرم صلی اللہ علیہ وسلم کے سامنے اسے بیان کرتا تھا۔ میں ان دنوں نوجوان کنوارہ شخص تھا اور مسجد میں سو جایا کرتا تھا۔ میں نے خواب میں دیکھا کہ دو فرشتوں نے مجھے پکڑا اور وہ مجھے ساتھ لے کر جہنم کی طرف گئے، تو وہ کنویں کی طرح گول تھی اور اس کے دو کنارے تھے، میں نے اس میں کچھ لوگوں کو دیکھا جن سے میں شناسا تھا، تو میں نے یہ کہنا شروع کیا: «أَعُوذُ بِاللَّهِ مِنَ النَّارِ» ”میں جہنم سے اللہ کی پناہ مانگتا ہوں“، یہ بات میں نے دو مرتبہ کہی، پھر ان دونوں فرشتوں سے ایک اور فرشتہ کی ملاقات ہوئی، تو اس نے مجھ سے کہا: ”تم گھبراؤ نہیں۔“ سیدنا عبداللہ بن عمر رضی اللہ عنہما بیان کرتے ہیں: میں نے سیدہ حفصہ رضی اللہ عنہا کو یہ خواب سنایا، تو سیدہ حفصہ رضی اللہ عنہا نے نبی اکرم صلی اللہ علیہ وسلم کو یہ خواب سنایا، تو نبی اکرم صلی اللہ علیہ وسلم نے فرمایا: ”عبداللہ اچھا آدمی ہے مگر یہ کہ وہ رات کے وقت بہت تھوڑے نوافل ادا کرتا ہے۔“ سالم بیان کرتے ہیں: اس کے بعد سیدنا عبداللہ بن عمر رضی اللہ عنہما نے اپنا معمول بنایا کہ وہ رات کے وقت بہت تھوڑی دیر کے لیے سوتے تھے (زیادہ تر نوافل ادا کرتے رہتے تھے)۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7070]

اردو ترجمہ · UrduUnverified translation

سیدنا عبداللہ بن عمر رضی اللہ عنہما اپنی بہن سیدہ حفصہ رضی اللہ عنہا سے روایت کرتے ہیں کہ نبی اکرم صلی اللہ علیہ وسلم نے ان سے فرمایا: ”عبداللہ بن عمر نیک آدمی ہے۔“ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7071]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں: میں نے خواب میں ریشم کا کپڑا دیکھا، میں جنت میں جس بھی جگہ جاتا وہ میرے ساتھ وہاں چلا جاتا، میں نے یہ واقعہ سیدہ حفصہ رضی اللہ عنہا کو سنایا، سیدہ حفصہ رضی اللہ عنہا نے یہ واقعہ نبی اکرم صلی اللہ علیہ وسلم کو سنایا، تو نبی اکرم صلی اللہ علیہ وسلم نے فرمایا: ”تمہارا بھائی نیک آدمی ہے“ (راوی کو شک ہے شاید یہ الفاظ ہیں:) نبی اکرم صلی اللہ علیہ وسلم نے فرمایا: ”بے شک عبداللہ نیک آدمی ہے“۔ [صحیح ابن حبان/كتاب إخباره ﷺ عن مناقب الصحابة رجالهم ونسائهم بذكر أسمائهم رضوان الله عليهم أجمعين/حدیث: 7072]