Hadith 633–666

اردو ترجمہ · UrduUnverified translation

سیدنا واثلہ بن اسقع رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ فرماتا ہے: میں اپنے بارے میں اپنے بندے کے گمان کے مطابق ہوتا ہوں۔ اب اس کی مرضی ہے وہ میرے بارے میں جو چاہے گمان کرے۔“ [صحیح ابن حبان/كتاب الرقائق/حدیث: 633]

اردو ترجمہ · UrduUnverified translation

سیدنا واثلہ بن اسقع رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو اللہ تعالیٰ کا یہ فرمان نقل کرتے ہوئے سنا ہے: ”میں اپنے بارے میں اپنے بندے کے گمان کے مطابق ہوتا ہوں۔ اب وہ جو چاہے میرے بارے میں گمان کر لے۔“ [صحیح ابن حبان/كتاب الرقائق/حدیث: 634]

اردو ترجمہ · UrduUnverified translation

سیدنا واثلہ بن اسقع رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو اللہ تعالیٰ کا یہ فرمان نقل کرتے ہوئے سنا ہے، اللہ تعالیٰ فرماتے ہیں: ”میں اپنے بارے میں اپنے بندے کے گمان کے مطابق ہوتا ہوں۔ اب وہ جو چاہے میرے بارے میں گمان کر لے۔“ [صحیح ابن حبان/كتاب الرقائق/حدیث: 635]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو آپ کے وصال سے تین دن پہلے یہ ارشاد فرماتے ہوئے سنا: ”تم میں سے کوئی بھی شخص ہرگز فوت نہ ہو، مگر یہ کہ وہ اللہ تعالیٰ کے بارے میں اچھا گمان رکھتا ہو۔“ (یعنی تم میں سے ہر ایک شخص کو مرتے وقت اللہ تعالیٰ کے بارے میں اچھا گمان رکھنا چاہیے)۔ [صحیح ابن حبان/كتاب الرقائق/حدیث: 636]

اردو ترجمہ · UrduUnverified translation

سیدنا جابر رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو آپ کے وصال سے تین دن پہلے یہ ارشاد فرماتے ہوئے سنا: ”تم میں سے جو شخص یہ کر سکے کہ وہ مرتے وقت اللہ تعالیٰ کے بارے میں اچھا گمان رکھ سکے، تو اسے ایسا کرنا چاہیے۔“ [صحیح ابن حبان/كتاب الرقائق/حدیث: 637]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ میں نے نبی اکرم صلی اللہ علیہ وسلم کو آپ کے وصال سے تین دن پہلے یہ ارشاد فرماتے ہوئے سنا: ”تم میں سے کوئی بھی شخص ہرگز فوت نہ ہو، مگر یہ کہ وہ اللہ تعالیٰ کے بارے میں اچھا گمان رکھتا ہو۔ (یعنی تم میں سے ہر شخص کو مرتے وقت اللہ تعالیٰ کے بارے میں اچھا گمان رکھنا چاہیے)“ [صحیح ابن حبان/كتاب الرقائق/حدیث: 638]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”بیشک اللہ تعالیٰ یہ فرماتا ہے: میں اپنے بارے میں اپنے بندے کے گمان کے مطابق ہوتا ہوں، اگر وہ بھلائی کا گمان رکھتا ہے، تو وہ اسے مل جائے گی اور اگر وہ برائی کا گمان رکھتا ہے، تو وہ اسے مل جائے گی۔“ (امام ابن حبان رحمہ اللہ فرماتے ہیں:) ابویونس نامی راوی کا نام سلیم بن جبیر ہے، اور یہ تابعی ہے۔ [صحیح ابن حبان/كتاب الرقائق/حدیث: 639]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کے حوالے سے اللہ تعالیٰ کا یہ فرمان نقل کرتے ہیں: ”مجھے اپنی عزت کی قسم ہے، میں اپنے کسی بندے پر دو طرح کا خوف اور دو طرح کا امن اکٹھا نہیں کروں گا۔ اگر وہ دنیا میں مجھ سے خوف رکھے گا، تو میں قیامت میں اسے امن عطا کروں گا اور اگر وہ دنیا میں مجھ سے مامون رہے گا، تو میں قیامت میں اسے خوف میں مبتلا کروں گا۔“ [صحیح ابن حبان/كتاب الرقائق/حدیث: 640]

اردو ترجمہ · UrduUnverified translation

حیان ابو نضر بیان کرتے ہیں: میں یزید بن اسود کی عیادت کرنے کے لیے روانہ ہوا، تو میری ملاقات سیدنا واثلہ بن اسقع رضی اللہ عنہ سے ہوئی، وہ بھی ان کی عیادت کے لیے جا رہے تھے۔ ہم یزید کے پاس پہنچے، جب انہوں نے سیدنا واثلہ رضی اللہ عنہ کو دیکھا، تو اپنا ہاتھ پھیلا دیا اور ان کی طرف اشارہ کرنے لگے۔ سیدنا واثلہ رضی اللہ عنہ آگے ہوئے اور تشریف فرما ہوئے، تو یزید نے سیدنا واثلہ رضی اللہ عنہ کے دونوں ہاتھ پکڑ لیے اور ان دونوں کو اپنے چہرے پر رکھا۔ سیدنا واثلہ رضی اللہ عنہ نے ان سے دریافت کیا: اللہ تعالیٰ کے بارے میں تمہارا گمان کیا ہے؟ یزید نے کہا: اللہ کی قسم! اللہ تعالیٰ کے بارے میں میرا گمان اچھا ہے، تو سیدنا واثلہ رضی اللہ عنہ نے فرمایا: تم خوشخبری قبول کرو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اللہ تعالیٰ فرماتا ہے: میں اپنے بارے میں اپنے بندے کے گمان کے مطابق ہوتا ہوں، خواہ وہ بھلائی کا گمان رکھے خواہ وہ برائی کا گمان رکھے“۔ [صحیح ابن حبان/كتاب الرقائق/حدیث: 641]

اردو ترجمہ · UrduUnverified translation

سیدنا عبداللہ بن قیس رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”کوئی بھی شخص کسی بھی تکلیف دہ بات کو سن کر اللہ تعالیٰ سے زیادہ صبر نہیں کرتا، لوگ اس کا شریک ٹھہراتے ہیں، اس کی اولاد قرار دیتے ہیں اور وہ اس کے باوجود ان لوگوں کو رزق دیتا ہے، ان کو عافیت دیتا ہے اور ان کو (مختلف طرح کی نعمتیں) عطا کرتا ہے۔“ [صحیح ابن حبان/كتاب الرقائق/حدیث: 642]

اردو ترجمہ · UrduUnverified translation

ابونضر بیان کرتے ہیں کہ سیدنا عثمان بن مظعون رضی اللہ عنہ کو جب دفن کر دیا گیا، تو ام العلاء رضی اللہ عنہا نے کہا: اے ابوسائب! آپ نے جنت میں ٹھکانہ بنا لیا ہے۔ نبی اکرم صلی اللہ علیہ وسلم نے جب ان کی یہ بات سنی، تو ارشاد فرمایا: ”یہ کون عورت ہے؟“ انہوں نے عرض کی: اے اللہ کے نبی! میں ہوں۔ نبی اکرم صلی اللہ علیہ وسلم نے دریافت کیا: ”تمہاری مراد کیا ہے؟“ انہوں نے عرض کی: یا رسول اللہ! (میری مراد) سیدنا عثمان بن مظعون رضی اللہ عنہ (ہیں)۔ نبی اکرم صلی اللہ علیہ وسلم نے فرمایا: ”ہاں عثمان بن مظعون، ہمیں اس کے بارے میں صرف بھلائی کا علم ہے، لیکن میں اللہ کا رسول ہوں، لیکن اللہ کی قسم! مجھے نہیں معلوم کہ میرے ساتھ کیا سلوک کیا جائے گا؟“ عمرو کہتے ہیں ابونصر نامی راوی نے یہ روایت خارجہ بن زید کے حوالے سے ان کے والد (زید بن ثابت رضی اللہ عنہ) کے حوالے سے سنی ہے۔ [صحیح ابن حبان/كتاب الرقائق/حدیث: 643]""

اردو ترجمہ · UrduUnverified translation

سیدنا نعمان بن بشیر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میں تمہیں جہنم سے ڈرا رہا ہوں، میں تمہیں جہنم سے ڈرا رہا ہوں، میں تمہیں جہنم سے ڈرا رہا ہوں۔“ (سیدنا نعمان رضی اللہ عنہ بیان کرتے ہیں) اگر نبی اکرم صلی اللہ علیہ وسلم میری اس جگہ پر ہوتے، سیدنا نعمان رضی اللہ عنہ اس وقت کوفہ میں تھے، تو بازار کے لوگ بھی آپ صلی اللہ علیہ وسلم کی یہ بات سن لیتے، یہاں تک کہ آپ صلی اللہ علیہ وسلم کے کندھے پر موجود چادر گر کر آپ کے پاؤں میں آ گئی تھی۔ [صحیح ابن حبان/كتاب الرقائق/حدیث: 644]

اردو ترجمہ · UrduUnverified translation

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”قیامت کے دن ایک شخص اپنے باپ کا ہاتھ پکڑے گا، وہ اسے جنت میں لے جانا چاہے گا، تو پکار کر کہا جائے گا: خبردار! جنت میں کوئی مشرک داخل نہیں ہو گا، تو وہ بندہ عرض کرے گا: اے میرے پروردگار! یہ میرا باپ ہے“، نبی اکرم صلی اللہ علیہ وسلم فرماتے ہیں: ”تو اس کے باپ کو انتہائی بدصورت اور بدبودار کر دیا جائے گا، تو وہ شخص اسے چھوڑ دے گا“۔ سیدنا ابوسعید رضی اللہ عنہ کہتے ہیں: لوگ یہ کہا کرتے تھے کہ اس سے مراد سیدنا ابراہیم علیہ السلام (اور ان کے والد) کا معاملہ ہے، تاہم نبی اکرم صلی اللہ علیہ وسلم نے اس کے علاوہ مزید کچھ ارشاد نہیں فرمایا۔ [صحیح ابن حبان/كتاب الرقائق/حدیث: 645]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ جب یہ آیت ﴿وَأَنْذِرْ عَشِيرَتَكَ الْأَقْرَبِينَ﴾ [سورة الشعراء: 214] نازل ہوئی تو نبی اکرم صلی اللہ علیہ وسلم نے قریش کو اکٹھا کیا اور فرمایا: ”اے قریش کے گروہ! اپنے آپ کو جہنم سے بچا لو، کیونکہ میں تمہارے حوالے سے کسی نقصان یا نفع کا مالک نہیں ہوں۔“ نبی اکرم صلی اللہ علیہ وسلم نے عبد مناف کی اولاد سے بھی یہی بات کہی، عبد المطلب کی اولاد سے بھی یہی بات کہی، پھر آپ صلی اللہ علیہ وسلم نے ارشاد فرمایا: ”اے محمد کی صاحبزادی فاطمہ! تم اپنے آپ کو جہنم سے بچا لو، کیونکہ میں تمہیں کوئی نقصان یا نفع پہنچانے کا مالک نہیں ہوں، البتہ میری تمہارے ساتھ رشتے داری ہے، اس کا فائدہ میں تمہیں پہنچاؤں گا۔“ امام ابن حبان رحمہ اللہ فرماتے ہیں: یہ روایت منسوخ ہے، کیونکہ اس میں تو یہ مذکور ہے کہ کوئی شخص کسی کے لیے شفاعت نہیں کرے گا، لیکن (نبی اکرم صلی اللہ علیہ وسلم کو) بعد میں مدینہ منورہ میں شفاعت کا اختیار مل گیا تھا۔ [صحیح ابن حبان/كتاب الرقائق/حدیث: 646]

اردو ترجمہ · UrduUnverified translation

سیدنا معاذ بن جبل رضی اللہ عنہ بیان کرتے ہیں کہ جب نبی اکرم صلی اللہ علیہ وسلم نے انہیں یمن بھیجا، تو نبی اکرم صلی اللہ علیہ وسلم انہیں تلقین کرنے کے لیے ان کے ساتھ نکلے۔ سیدنا معاذ رضی اللہ عنہ اس وقت سوار تھے جب کہ نبی اکرم صلی اللہ علیہ وسلم ان کی سواری کے نیچے (پیدل) چل رہے تھے۔ جب آپ صلی اللہ علیہ وسلم فارغ ہوئے، تو آپ صلی اللہ علیہ وسلم نے ارشاد فرمایا: ”اے معاذ! ہو سکتا ہے اس سال کے بعد تمہاری مجھ سے ملاقات نہ ہو۔ ہو سکتا ہے، اب کی بار تمہارا گزر میری قبر اور میری مسجد کے پاس سے ہو۔“ تو سیدنا معاذ رضی اللہ عنہ نبی اکرم صلی اللہ علیہ وسلم کی جدائی کے خوف سے رونے لگے، پھر نبی اکرم صلی اللہ علیہ وسلم نے مدینہ منورہ کی طرف توجہ کی اور ارشاد فرمایا: ”میرے اہل بیت یہ سمجھتے ہیں کہ وہ لوگ باقی سب لوگوں کے مقابلے میں میرے زیادہ قریب ہیں، حالانکہ میرے سب سے زیادہ قریب پرہیزگار لوگ ہیں، خواہ وہ جو کوئی بھی ہوں اور خواہ وہ جہاں کہیں بھی رہتے ہوں۔ اے اللہ! میں ان کے لیے ایسی کسی چیز کے فساد کو حلال قرار نہیں دیتا جسے تو نے صالح قرار دیا ہے۔ اللہ کی قسم! یہ لوگ میری امت کے دین کے حوالے سے اسی طرح اوندھے ہوں گے، جس طرح میدان میں برتن کو الٹا دیا جاتا ہے۔“ [صحیح ابن حبان/كتاب الرقائق/حدیث: 647]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ عرض کی گئی: یا رسول اللہ! سب سے زیادہ معزز کون ہے؟ نبی اکرم صلی اللہ علیہ وسلم نے ارشاد فرمایا: ”جو سب سے زیادہ پرہیزگار ہو“ لوگوں نے عرض کی: ہم اس کے بارے میں آپ سے دریافت نہیں کر رہے۔ نبی اکرم صلی اللہ علیہ وسلم نے فرمایا: ”پھر تم عربوں کے بڑوں کے بارے میں دریافت کر رہے ہو؟ تم میں سے جو لوگ زیادہ بہتر (شمار ہوتے ہیں) وہ اسلام میں بھی بہتر شمار ہوں گے جبکہ وہ (دینی تعلیمات کی) سمجھ بوجھ حاصل کر لیں۔“ [صحیح ابن حبان/كتاب الرقائق/حدیث: 648]

اردو ترجمہ · UrduUnverified translation

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”پہلے زمانے کے لوگوں میں سے ایک شخص تھا، جسے اللہ تعالیٰ نے مال اور اولاد میں وسعت عطا کی تھی، جب اس کی موت کا وقت قریب آیا، تو اس نے اپنے بچوں کو جمع کیا اور دریافت کیا: میں تمہارے لیے کیسا باپ تھا؟ انہوں نے جواب دیا: بہترین باپ تھے، تو اس نے کہا: اللہ کی قسم! میں نے اللہ تعالیٰ کی بارگاہ کے لیے کوئی بھلائی ذخیرہ نہیں کی ہے، تو اب اس کا پروردگار اسے عذاب دے گا، تو جب میں مر جاؤں، تو تم مجھے جلا دینا اور پھر مجھے پیس کر تیز چلتی ہوئی ہوا میں اڑا دینا، تو اللہ تعالیٰ نے فرمایا: تم کھڑے ہو جاؤ، تو وہ شخص کھڑا ہو گیا۔ اللہ تعالیٰ نے دریافت کیا: تم نے ایسا کیوں کیا؟ اس نے عرض کی: تیرے خوف کی وجہ سے۔“ نبی اکرم صلی اللہ علیہ وسلم فرماتے ہیں: ”اس ذات کی قسم! جس کے دستِ قدرت میں میری جان ہے، اللہ تعالیٰ نے اس کی مغفرت کر دی تھی۔“ [صحیح ابن حبان/كتاب الرقائق/حدیث: 649]

اردو ترجمہ · UrduUnverified translation

سیدنا ابوسعید خدری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم سے پہلے زمانے میں ایک شخص تھا جس نے اللہ تعالیٰ کی بارگاہ کے لیے کوئی بھلائی ذخیرہ نہیں کی تھی۔ اس نے مرتے وقت اپنے بیٹوں سے کہا: اے میرے بیٹو! میں تمہارے لیے کیسا باپ تھا؟ انہوں نے جواب دیا: بہترین باپ تھے۔ اس شخص نے کہا: جب میں مر جاؤں، تو تم مجھے جلا کر مجھے پیس دینا اور جب تیز ہوا چل رہی ہو، تو مجھے اڑا دینا۔“ نبی اکرم صلی اللہ علیہ وسلم فرماتے ہیں: ”وہ شخص فوت ہو گیا۔ اس کے ساتھ ایسا ہی کیا گیا۔ اللہ تعالیٰ نے اس سے فرمایا: ہو جاؤ، تو وہ پلک جھپکنے سے بھی پہلے (انسان بن کر کھڑا ہو گیا)۔ اللہ تعالیٰ نے فرمایا: اے میرے بندے! تم نے ایسا کیوں کیا؟ اس نے عرض کیا: اے میرے پروردگار! تیرے خوف کی وجہ سے۔“ نبی اکرم صلی اللہ علیہ وسلم فرماتے ہیں: ”اللہ تعالیٰ نے اسے یہ بدلہ دیا کہ اس کی مغفرت کر دی گئی۔“ معتمر نامی راوی بیان کرتے ہیں: میرے والد نے یہ بات بیان کی ہے کہ میں نے یہ روایت ابوعثمان نہدی کو سنائی، تو انہوں نے کہا: سلیمان نے یہ حدیث مجھے اسی طرح سنائی تھی، تاہم انہوں نے یہ الفاظ زائد نقل کیے تھے: ”تم لوگ مجھے دریا میں ڈال دینا۔“ [صحیح ابن حبان/كتاب الرقائق/حدیث: 650]

اردو ترجمہ · UrduUnverified translation

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ایک کفن چور کا انتقال ہو گیا، اس نے اپنے بیٹے سے کہا: تم مجھے جلا دینا پھر مجھے پیس کر مجھے ہوا میں اڑا دینا۔ اس سے دریافت کیا گیا تم نے ایسا کیوں کیا تو اس نے عرض کی: اے میرے پروردگار! تیرے خوف کی وجہ سے۔“ تو نبی اکرم صلی اللہ علیہ وسلم فرماتے ہیں: ”تو اللہ تعالیٰ نے اس کی مغفرت کر دی۔“ [صحیح ابن حبان/كتاب الرقائق/حدیث: 651]

اردو ترجمہ · UrduUnverified translation

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اس آیت ﴿وَأَنْذِرْهُمْ يَوْمَ الْحَسْرَةِ إِذْ قُضِيَ الْأَمْرُ وَهُمْ فِي غَفْلَةٍ﴾ [سورة مريم: 39] کے بارے میں یہ بات ارشاد فرمائی ہے: (ارشاد باری تعالیٰ ہے) ”جب معاملے کا فیصلہ ہو جائے گا اور وہ لوگ غفلت میں ہوں گے۔“ نبی اکرم صلی اللہ علیہ وسلم فرماتے ہیں: ”یہ دنیا کے بارے میں ہے۔“ [صحیح ابن حبان/كتاب الرقائق/حدیث: 652]

اردو ترجمہ · UrduUnverified translation

سیدنا عیاض بن حمار رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو خطبے کے دوران یہ بات ارشاد فرماتے ہوئے سنا: ”بیشک اللہ تعالیٰ نے مجھے یہ حکم دیا ہے کہ اس نے مجھے جن چیزوں کا علم دیا ہے اور تم ان سے ناواقف ہو، آج میں اس جگہ تمہیں ان چیزوں کی تعلیم دے دوں۔ (اللہ تعالیٰ فرماتا ہے:) ہر وہ چیز جو میں نے اپنے بندے کو عطیے کے طور پر دی ہے وہ حلال ہے اور میں نے اپنے تمام بندوں کو حنیف (مسلمان) پیدا کیا ہے، پھر شیاطین ان کے پاس آتے ہیں اور ان کے دین کے حوالے سے انہیں گمراہ کر دیتے ہیں اور ان کے لیے ان چیزوں کو حرام قرار دیتے ہیں جو میں نے ان کے لیے حلال قرار دی ہیں اور انہیں اس بات کا حکم دیتے ہیں کہ وہ کسی کو میرا شریک بنا دیں حالانکہ میں نے اس بارے میں کوئی مضبوط دلیل نازل نہیں کی ہے۔“ (نبی اکرم صلی اللہ علیہ وسلم فرماتے ہیں:) ”اللہ تعالیٰ اہل زمین کی طرف دیکھ کر تمام اہل عرب اور عجمیوں پر ناراض ہوا، سوائے اہل کتاب میں سے باقی رہ جانے والے چند لوگوں کے، پھر اللہ تعالیٰ فرماتا ہے: اے محمد! میں نے تمہیں اس لیے مبعوث کیا ہے، تاکہ میں تمہیں آزمائش میں مبتلا کروں اور تمہاری وجہ سے لوگوں کو آزماؤں اور میں نے تم پر ایک کتاب نازل کی ہے، جسے پانی دھو نہیں سکے گا (یعنی وہ بالکل ختم نہیں ہو گی)، بیدار شخص اور سویا ہوا شخص اس کی تلاوت کرے گا۔“ (نبی اکرم صلی اللہ علیہ وسلم فرماتے ہیں:) ”مجھے اللہ تعالیٰ نے یہ حکم دیا ہے کہ میں قریش کو جلا دوں (یعنی ان سے قتال کروں)، میں نے عرض کی: اے میرے رب! اس صورت میں تو وہ لوگ میرا سر کچل دیں گے اور وہ اسے (پیس کر) روٹی بنا دیں گے، تو اللہ تعالیٰ نے فرمایا: تم بھی انہیں نکالنے پر مجبور کرو جس طرح انہوں نے تم کو نکلنے پر مجبور کیا تھا، اور تم ان کے ساتھ جنگ کرو ہم تمہاری مدد کریں گے، اور تم خرچ کرو تم پر خرچ کیا جائے گا، اور تم ایک لشکر کو بھیجو ہم اس کے پانچ گنا مزید بھیج دیں گے، اور جو شخص تمہاری فرمانبرداری کرتا ہے اس کے ساتھ مل کر اس شخص کے ساتھ جنگ کرو جو تمہاری نافرمانی کرتا ہے۔“ نبی اکرم صلی اللہ علیہ وسلم نے فرمایا: ”اہل جنت تین قسم کے ہیں۔ ایسا امام جو عادل ہو، تصدیق کرنے والا ہو اور اسے خیر کی توفیق دی گئی ہو، ایک وہ شخص جو مہربان ہو، رقیق القلب ہو، ہر قریبی رشتہ دار اور ہر مسلمان کے لیے (نرم دل ہو)، اور ایک وہ شخص جو پاک دامن ہو، عیال دار (غریب) ہو اور سوال نہ کرنے والا ہو۔“ نبی اکرم صلی اللہ علیہ وسلم نے فرمایا: ”اہل جہنم پانچ قسم کے ہیں۔ وہ کمزور جس میں سمجھ بوجھ نہ ہو، جو تمہارے تابع ہیں، وہ نہ اہل طلب کرتے ہیں اور نہ مال (یعنی تمہارے ہی ٹکڑوں پر پلنے والے ہیں)، ایسا خیانت کار جس کا لالچ پوشیدہ نہ ہو خواہ وہ بہت ہی معمولی سی چیز ہو اس میں خیانت کرے، اور ایسا شخص جو صبح و شام تمہارے اہل اور تمہارے مال کے بارے میں تمہیں دھوکا دیتا ہو۔“ اور آپ صلی اللہ علیہ وسلم نے بخل اور جھوٹ کا ذکر کیا، اور ” «الشَّنْظِيرُ» ”بدزبان اور فحش گو“ کا تذکرہ کیا۔“ [صحیح ابن حبان/كتاب الرقائق/حدیث: 653]

اردو ترجمہ · UrduUnverified translation

سیدنا عیاض بن حمار رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا: ”بیشک اللہ تعالیٰ نے مجھے اس بات کا حکم دیا ہے کہ میں آج تمہیں ان چیزوں کی تعلیم دوں جو علم مجھے اللہ تعالیٰ نے عطا کیا ہے۔ اللہ تعالیٰ نے مجھ سے یہ فرمایا ہے: میں نے اپنے تمام بندوں کو مسلمان پیدا کیا ہے اور میں نے اپنے بندوں کو جو چیز بھی عطا کی ہے، وہ ان کے لیے حلال ہے۔ شیاطین لوگوں کے پاس آتے ہیں اور انہیں دین کے حوالے سے گمراہ کر دیتے ہیں، وہ ان کے لیے ان چیزوں کو حرام قرار دیتے ہیں جو میں نے ان کے لیے حلال قرار دی ہیں اور وہ ان لوگوں کو یہ حکم دیتے ہیں کہ وہ میرے ساتھ شریک ٹھہرائیں جس کے بارے میں میں نے کوئی حکم نازل نہیں کیا ہے۔ (نبی اکرم صلی اللہ علیہ وسلم فرماتے ہیں) اللہ تعالیٰ نے مجھے مبعوث کرنے سے پہلے زمین کی طرف توجہ کی اور تمام اہل عرب اور تمام عجمیوں پر ناراضی کا اظہار کیا، البتہ اہل کتاب میں سے باقی رہ جانے والوں کا معاملہ مختلف ہے۔ اللہ نے مجھ سے فرمایا: میں نے ایک کتاب نازل کی ہے، جسے پانی دھو نہیں سکے گا، تم سونے اور بیداری کی حالت میں اس کی تلاوت کرو۔ اللہ نے مجھے یہ حکم دیا کہ میں قریش کو یہ بات بتا دوں، میں نے عرض کی: اے میرے پروردگار! اس صورت میں وہ میرے سر کو کچل کر اسے پیس کے رکھ دیں گے۔ اللہ تعالیٰ نے فرمایا: تم انہیں نکلنے پر مجبور کرو جس طرح انہوں نے تم کو نکالا تھا، اور تم ان سے جنگ کرو جس طرح انہوں نے تمہارے ساتھ جنگ کی تھی، اور تم خرچ کرو ہم تم پر خرچ کریں گے، اور تم لشکر کو بھیجو ہم اس جیسے پانچ بھیجیں گے، اور جو شخص تمہاری اطاعت کرتا ہے اس شخص کے ساتھ مل کر اس شخص کے ساتھ جنگ کرو جو تمہاری نافرمانی کرتا ہے۔“ [صحیح ابن حبان/كتاب الرقائق/حدیث: 654]

اردو ترجمہ · UrduUnverified translation

سیدنا سمرہ بن جندب فزاری رضی اللہ عنہ بیان کرتے ہیں کہ نبی اکرم صلی اللہ علیہ وسلم یہ دریافت کیا کرتے تھے: ”کیا کسی شخص نے کوئی خواب دیکھا ہے؟“ پھر جو اللہ کو منظور ہوتا تھا وہ شخص اپنا خواب آپ صلی اللہ علیہ وسلم کے سامنے بیان کر دیتا تھا۔ ایک دن نبی اکرم صلی اللہ علیہ وسلم نے ہم سے فرمایا: ”گزشتہ رات دو فرشتے میرے پاس آئے، وہ میرے پاس بھیجے گئے تھے۔ ان دونوں نے مجھ سے کہا: آپ چلئے! میں ان دونوں کے ساتھ چل پڑا، ہمارا گزر ایک شخص کے پاس سے ہوا جو لیٹا ہوا تھا اور دوسرا شخص اس کے سرہانے پتھر لیے کھڑا ہوا تھا۔ وہ اپنا پتھر اس شخص کے سر پر مار کر اس پتھر کے ذریعے اس کے سر کو کچل دیتا تھا، پھر پتھر لڑھکتا ہوا دور چلا جاتا تھا، وہ شخص اس پتھر کو لینے کے لیے جاتا تھا اور اسے پکڑ کر واپس اس شخص کے پاس آتا تھا (راوی کہتے ہیں: میرا خیال ہے روایت میں یہ الفاظ بھی ہیں) یہاں تک کہ وہ شخص پہلے کی طرح ٹھیک ہو جاتا تھا، پھر وہ دوبارہ اس کے ساتھ وہی عمل کرتا تھا جس طرح پہلی مرتبہ کیا تھا۔“ نبی اکرم صلی اللہ علیہ وسلم فرماتے ہیں: ”میں نے دریافت کیا: «سُبْحَانَ اللَّهِ» ”اللہ پاک ہے“ ان دونوں کا کیا معاملہ ہے؟ ان دونوں فرشتوں نے مجھ سے کہا: آپ چلتے رہیے، آپ چلتے رہیے۔“ نبی اکرم صلی اللہ علیہ وسلم فرماتے ہیں: ”میں ان دونوں کے ساتھ چلتا رہا، یہاں تک کہ ہم ایک شخص کے پاس آئے جو گدی کے بل چت لیٹا ہوا تھا اور دوسرے شخص کے پاس لوہے کا بنا ہوا آنکڑا تھا۔ وہ اس کے منہ کے ایک کنارے کی طرف آتا تھا اور اس کے جبڑے کو گدی تک چیر دیتا تھا اور پھر اس کے نتھنے کو پیچھے گدی تک چیر دیتا تھا اور اس کی آنکھ کو پیچھے گدی تک چیر دیتا تھا، پھر وہ دوسری طرف آتا تھا اور اس کے ساتھ اسی طرح کرتا تھا جس طرح پہلی طرف کیا تھا، پھر جب وہ دوسری طرف سے فارغ ہوتا تھا تو پہلی والی طرف پہلے کی طرح ٹھیک ہو چکی ہوتی تھی، پھر وہ دوبارہ اس کے ساتھ ویسا ہی سلوک کرتا تھا جس طرح پہلی مرتبہ کیا تھا۔“ نبی اکرم صلی اللہ علیہ وسلم فرماتے ہیں: ”میں نے کہا: «سُبْحَانَ اللَّهِ» ”اللہ پاک ہے“ ان دونوں کا کیا معاملہ ہے؟ ان دونوں فرشتوں نے کہا: آپ چلتے رہیے، آپ چلتے رہیے۔ میں ان دونوں فرشتوں کے ساتھ چلتا رہا، پھر ہم تندور جیسی عمارت کے پاس آئے۔ (عوف نامی راوی کہتے ہیں: میرا خیال ہے روایت میں یہ الفاظ ہیں) اس میں سے چیخ و پکار اور آوازیں بلند ہو رہی تھیں۔ ہم نے اس میں جھانک کر دیکھا تو اس میں کچھ برہنہ مرد اور خواتین تھیں اور اس تندور کے نیچے آگ کے شعلے بھڑک رہے تھے۔ جب کوئی شعلہ ان لوگوں کے پاس آتا تھا تو وہ چیخ و پکار کرتے تھے۔ میں نے دریافت کیا: یہ کون لوگ ہیں؟ تو ان دونوں فرشتوں نے مجھ سے کہا: آپ چلتے رہیے، آپ چلتے رہیے۔“ نبی اکرم صلی اللہ علیہ وسلم فرماتے ہیں: ”ہم ایک نہر کے پاس آئے۔ (راوی کہتے ہیں: میرا خیال ہے روایت میں یہ الفاظ بھی ہیں) جس کا پانی خون کی طرح سرخ تھا۔ اس نہر میں ایک شخص تیر رہا تھا اور اس نہر کے کنارے پر ایک اور شخص موجود تھا جس کے پاس بہت سے پتھر جمع تھے۔ وہ تیرنے والا شخص جب اس شخص کے پاس آتا جس نے پتھر جمع کر رکھے تھے تو وہ اپنا منہ اس شخص کے سامنے کھولتا تھا اور وہ دوسرا شخص اس کے منہ میں پتھر ڈال دیتا تھا۔“ نبی اکرم صلی اللہ علیہ وسلم فرماتے ہیں: ”میں نے دریافت کیا: یہ کون لوگ ہیں؟ ان دونوں فرشتوں نے مجھ سے کہا: آپ چلتے رہیے، آپ چلتے رہیے۔“ نبی اکرم صلی اللہ علیہ وسلم ارشاد فرماتے ہیں: ”ہم چلتے رہے، پھر ہم ایک ایسے شخص کے پاس آئے جس کی شکل انتہائی بدصورت تھی، تم نے زندگی میں جو بھی بدصورت ترین شخص دیکھا ہو گا وہ اس کی مانند تھا، وہ شخص ایک آگ کے پاس تھا، وہ اسے جلانے کی کوشش کرتا تھا اور اس کے گرد دوڑتا تھا۔“ نبی اکرم صلی اللہ علیہ وسلم فرماتے ہیں: ”میں نے ان دونوں سے دریافت کیا: اس کا کیا معاملہ ہے؟ ان دونوں نے مجھ سے کہا: آپ چلتے رہیے، آپ چلتے رہیے! پھر ہم روانہ ہوئے، یہاں تک کہ ہم ایک باغ میں آئے جس میں ہر طرف بہار آئی ہوئی تھی اور اس باغ کے درمیان میں ایک طویل شخص کھڑا ہوا تھا، وہ اتنا اونچا تھا کہ مجھے اس کا سر دکھائی نہیں دے رہا تھا۔ میں نے اس شخص کے ارد گرد اس کے ڈھیر سارے بچے دیکھے، لیکن میں نے ان میں سے کوئی بھی بچہ اس سے زیادہ خوبصورت نہیں دیکھا۔“ نبی اکرم صلی اللہ علیہ وسلم فرماتے ہیں: ”میں نے ان دونوں سے دریافت کیا: یہ کون لوگ ہیں؟ انہوں نے مجھ سے کہا: آپ چلتے رہیے، آپ چلتے رہیے۔ پھر ہم لوگ چلتے رہے، یہاں تک کہ ہم ایک بڑے پھیلے ہوئے درخت کے پاس آ گئے۔ میں نے اس سے بڑا اور اس سے خوبصورت درخت کبھی نہیں دیکھا۔ ان دونوں فرشتوں نے مجھ سے کہا: آپ اس پر چڑھ جائیں۔“ نبی اکرم صلی اللہ علیہ وسلم فرماتے ہیں: ”ہم اس پر چڑھ گئے تو ہم ایک شہر میں پہنچ گئے جس کی عمارتیں سونے اور چاندی کی اینٹوں سے بنی ہوئی تھیں۔ ہم اس شہر کے دروازے پر آئے۔ ہم نے دروازہ کھولنے کے لیے کہا، دروازہ کھول دیا گیا، تو ہم نے وہاں ایسے لوگ دیکھے جن میں سے نصف ایسے ہوں گے جو تم نے سب سے زیادہ خوبصورت لوگ دیکھے ہوں اور نصف ایسے ہیں جو تم نے سب سے زیادہ بدصورت دیکھے ہوں۔“ نبی اکرم صلی اللہ علیہ وسلم فرماتے ہیں: ”ان دونوں فرشتوں نے ان لوگوں سے کہا: تم لوگ جاؤ اور اس نہر میں داخل ہو جاؤ۔ وہ نہر چوڑی تھی اور بہہ رہی تھی، اس کا پانی سفیدی کے اعتبار سے خالص دودھ کی طرح تھا۔ وہ لوگ گئے اور اس میں داخل ہو گئے۔ پھر جب وہ لوگ واپس آئے تو ان کی خرابی ختم ہو چکی تھی اور ان کی شکلیں انتہائی خوبصورت ہو چکی تھیں۔“ نبی اکرم صلی اللہ علیہ وسلم فرماتے ہیں: ”ان دونوں فرشتوں نے مجھ سے کہا: یہ جنتِ عدن ہے اور یہ آپ کا ٹھکانہ ہے۔“ نبی اکرم صلی اللہ علیہ وسلم فرماتے ہیں: ”میں نے نگاہ اٹھا کر بلندی کی طرف دیکھا تو وہاں ایک محل تھا جو سفید بادل کی مانند تھا۔ ان دونوں فرشتوں نے مجھ سے کہا: یہ آپ کی رہائش گاہ ہے۔“ نبی اکرم صلی اللہ علیہ وسلم فرماتے ہیں: ”میں نے ان دونوں سے کہا: «بَارَكَ اللَّهُ فِيكُمَا» ”اللہ تعالیٰ تم دونوں میں برکت نصیب فرمائے“ مجھے موقع دو کہ میں اس کے اندر چلا جاؤں۔“ نبی اکرم صلی اللہ علیہ وسلم فرماتے ہیں: ”ان دونوں نے مجھ سے کہا: ابھی نہیں، لیکن آپ اس میں داخل ہو جائیں گے۔“ نبی اکرم صلی اللہ علیہ وسلم نے فرمایا: ”میں نے گزشتہ رات جو حیران کن چیزیں دیکھی ہیں، تو جو کچھ میں نے دیکھا ہے اس کی حقیقت کیا ہے؟ تو ان فرشتوں نے مجھ سے کہا: ہم آپ کو اس کی حقیقت بتاتے ہیں۔ جہاں تک اس پہلے شخص کا تعلق ہے جس کے پاس آپ تشریف لائے تھے جس کے سر کو پتھر کے ذریعے کچلا جا رہا تھا، تو یہ وہ شخص تھا جس نے قرآن کا علم حاصل کیا اور پھر اسے پرے کر دیا اور یہ فرض نماز کے وقت سویا رہ جاتا تھا۔ جہاں تک اس شخص کا تعلق ہے جس کے پاس آپ تشریف لائے تھے جس کی باچھوں کو گدی تک اور اس کی آنکھوں کو گدی تک اور اس کے نتھنوں کو گدی تک چیرا جا رہا تھا، تو یہ وہ شخص تھا جو اپنے گھر سے نکلتا تھا اور ایک جھوٹ بولتا تھا اور اس کا جھوٹ دنیا میں پھیل جاتا تھا۔ جہاں تک ان برہنہ مردوں اور خواتین کا تعلق ہے جو تندور نما عمارت کے اندر موجود تھے، تو یہ زنا کرنے والے مرد اور زنا کرنے والی عورتیں تھیں۔ جہاں تک اس شخص کا تعلق ہے جو نہر میں تھا اور پتھر منہ میں لے رہا تھا، تو یہ سود کھانے والا شخص تھا۔ جہاں تک اس شخص کا تعلق ہے جو انتہائی بدصورت تھا اور جو آگ کے پاس تھا اور اسے دہکاتا تھا، تو یہ «مَالِكٌ» ”مالک“ تھا جو جہنم کا داروغہ ہے۔ جہاں تک اس طویل شخص کا تعلق ہے جو باغ میں تھا، تو وہ سیدنا ابراہیم علیہ السلام تھے۔ جہاں تک ان کے ارد گرد موجود بچوں کا تعلق ہے، تو ہر بچہ فطرت پر پیدا ہوتا ہے۔“ راوی بیان کرتے ہیں: مسلمانوں میں سے ایک صاحب نے عرض کی: یا رسول اللہ! مشرکین کی اولاد کا کیا حکم ہے؟ نبی اکرم صلی اللہ علیہ وسلم نے فرمایا: ”مشرکین کی اولاد بھی (فطرت پر پیدا ہوتی ہے)۔ جہاں تک ان لوگوں کا تعلق ہے جن میں سے آدھے لوگ خوبصورت تھے اور آدھے لوگ بدصورت تھے، یہ وہ لوگ ہیں جنہوں نے نیکیوں کے ساتھ برے اعمال بھی کیے، ان سے اللہ تعالیٰ نے درگزر فرمایا۔“ [صحیح ابن حبان/كتاب الرقائق/حدیث: 655]

اردو ترجمہ · UrduUnverified translation

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”اگر بندۂ مومن کو اللہ تعالیٰ کی بارگاہ میں موجود سزا کا پتا چل جائے، تو کوئی بھی شخص جنت کی امید نہ رکھے اور اگر کافر شخص کو اللہ تعالیٰ کی رحمت کا پتا چل جائے، تو کوئی بھی شخص جنت سے ناامید نہ ہو۔“ [صحیح ابن حبان/كتاب الرقائق/حدیث: 656]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اگر اللہ تعالیٰ میرا اور ابن مریم کا ان دونوں (انگلیوں) کے قصور کی وجہ سے مواخذہ کرے (نبی اکرم صلی اللہ علیہ وسلم نے انگوٹھے اور اس کے ساتھ والی انگلی کی طرف اشارہ کر کے یہ فرمایا) اور وہ ہمیں عذاب دے، تو وہ ہمارے ساتھ کوئی زیادتی نہیں کرے گا۔“ [صحیح ابن حبان/كتاب الرقائق/حدیث: 657]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم تیز ہوا والے دن یا بارش والے دن پریشان ہو جایا کرتے تھے، آپ صلی اللہ علیہ وسلم ادھر ادھر آیا جایا کرتے تھے، جب بارش شروع ہو جاتی تھی تو آپ صلی اللہ علیہ وسلم خوش ہو جایا کرتے تھے اور آپ صلی اللہ علیہ وسلم کی پریشانی ختم ہو جاتی تھی، آپ صلی اللہ علیہ وسلم سے اس بارے میں دریافت کیا گیا تو آپ صلی اللہ علیہ وسلم نے ارشاد فرمایا: ”مجھے یہ اندیشہ ہوتا ہے کہ کہیں یہ عذاب نہ ہو، جو میری امت پر مسلط کر دیا گیا ہو۔“ [صحیح ابن حبان/كتاب الرقائق/حدیث: 658]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اگر اللہ تعالیٰ میرا اور عیسیٰ کا ہمارے ذنوب کی وجہ سے مواخذہ کرے اور ہمیں عذاب دے، تو وہ ہمارے ساتھ کوئی زیادتی کرنے والا نہیں ہو گا۔“ نبی اکرم صلی اللہ علیہ وسلم نے اپنی شہادت والی انگلی اور اس کے ساتھ والی انگلی کے ذریعے اشارہ کر کے یہ بات ارشاد فرمائی۔ [صحیح ابن حبان/كتاب الرقائق/حدیث: 659]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم میں سے کسی بھی شخص کو اس کا عمل نجات نہیں دے گا، تاہم تم لوگ میانہ روی اختیار کرو اور انتہا پسندی سے گریز کرو۔“ لوگوں نے عرض کی: یا رسول اللہ! آپ کو بھی نہیں؟ نبی اکرم صلی اللہ علیہ وسلم نے فرمایا: ”مجھے بھی نہیں، البتہ مجھے اللہ تعالیٰ نے مغفرت اور فضل کے ذریعے ڈھانپ لیا ہے۔“ [صحیح ابن حبان/كتاب الرقائق/حدیث: 660]

اردو ترجمہ · UrduUnverified translation

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جنت تم میں سے کسی ایک شخص کے جوتے کے تسمے سے بھی زیادہ قریب ہے اور جہنم بھی اسی کی مانند ہے۔“ [صحیح ابن حبان/كتاب الرقائق/حدیث: 661]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اگر تم لوگ وہ بات جان لو جو میں جانتا ہوں، تو تم تھوڑا ہنسا کرو اور زیادہ رویا کرو۔“ [صحیح ابن حبان/كتاب الرقائق/حدیث: 662]

اردو ترجمہ · UrduUnverified translation

سعید بن عبدالعزیز بیان کرتے ہیں کہ ہشام بن عبدالملک نے زہری کی طرف سے سات ہزار دینار ادا کر دیے جو ان کے ذمے قرض تھے۔ انہوں نے کہا: اب آپ دوبارہ قرض نہ لیجیے گا، تو زہری نے کہا: اے امیر المؤمنین! اب کیسے ہو سکتا ہے، جبکہ سعید بن مسیب نے مجھے یہ بات بتائی ہے۔ سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”مؤمن ایک سوراخ سے دو مرتبہ نہیں ڈسا جا سکتا۔“ روایت کے یہ الفاظ عمر بن سعید سنان کے ہیں۔ [صحیح ابن حبان/كتاب الرقائق/حدیث: 663]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ جب تیز ہوا چلتی تھی، تو اس کی وجہ سے پریشانی کا اثر نبی اکرم صلی اللہ علیہ وسلم کے چہرہ مبارک پر ظاہر ہو جاتا تھا، تاکہ آدمی اس حوالے سے خود پسندی کا شکار نہ ہو، اگرچہ وہ شخص اپنی ذات کے اعتبار سے فضیلت والا ہو اور اپنے دین کے اعتبار سے پرہیزگار ہو۔ [صحیح ابن حبان/كتاب الرقائق/حدیث: 664]

اردو ترجمہ · UrduUnverified translation

مطرف بن عبداللہ رحمہ اللہ اپنے والد رضی اللہ عنہ کا یہ بیان نقل کرتے ہیں: میں نبی اکرم صلی اللہ علیہ وسلم کی خدمت میں حاضر ہوا۔ آپ صلی اللہ علیہ وسلم اس وقت کھڑے ہوئے نماز ادا کر رہے تھے اور آپ صلی اللہ علیہ وسلم کے سینے سے یوں آواز آ رہی تھی جس طرح ہنڈیا ابلنے کی آواز ہوتی ہے۔ [صحیح ابن حبان/كتاب الرقائق/حدیث: 665]

اردو ترجمہ · UrduUnverified translation

سیدنا عدی بن حاتم رضی اللہ عنہ بیان کرتے ہیں کہ نبی اکرم صلی اللہ علیہ وسلم کھڑے ہوئے اور آپ نے ارشاد فرمایا: ”تم لوگ جہنم سے بچنے کی کوشش کرو۔“ پھر آپ نے منہ پھیر لیا اور چہرے کو بچانے کی کوشش کی، پھر آپ نے ارشاد فرمایا: ”تم لوگ جہنم سے بچنے کی کوشش کرو۔“ پھر آپ نے منہ پھیر لیا اور چہرے کو بچانے کی کوشش کی، یہاں تک کہ ہمیں یوں محسوس ہوا کہ آپ اسے دیکھ رہے ہیں، پھر آپ نے ارشاد فرمایا: ”جہنم سے بچنے کی کوشش کرو، خواہ نصف کھجور کے ذریعے ایسا کرو اور اگر تمہیں یہ بھی نہیں ملتی، تو پاکیزہ بات کے ذریعے (جہنم سے بچنے کی کوشش کرو)۔“ [صحیح ابن حبان/كتاب الرقائق/حدیث: 666]