Hadith 6331–6370

اردو ترجمہ · UrduUnverified translation

ابراہیم بیان کرتے ہیں کہ علقمہ رحمہ اللہ شام گئے، وہ وہاں مسجد میں آئے، وہاں انہوں نے دو رکعات ادا کیں، پھر دعا کی: «اللَّهُمَّ يَسِّرْ لِي جَلِيسًا صَالِحًا» ”اے اللہ! مجھے نیک ہم نشین عطا کر۔“ پھر وہ سیدنا ابودرداء رضی اللہ عنہ کی خدمت میں حاضر ہوئے تو انہوں نے دریافت کیا: ”تم کہاں سے تعلق رکھتے ہو؟“ انہوں نے جواب دیا: ”کوفہ سے۔“ انہوں نے دریافت کیا: ”کیا تمہارے درمیان نبی اکرم صلی اللہ علیہ وسلم کے خاص راز دان موجود نہیں ہیں کہ اس راز کا ان کے علاوہ کسی کو پتا نہیں ہوتا تھا اور وہ سیدنا حذیفہ رضی اللہ عنہ ہیں؟ کیا تمہارے درمیان وہ صاحب موجود نہیں ہیں جنہیں اللہ تعالیٰ نے اپنے نبی صلی اللہ علیہ وسلم کی زبانی شیطان سے محفوظ قرار دیا اور وہ سیدنا عمار بن یاسر رضی اللہ عنہ ہیں؟ کیا تمہارے درمیان سیاہی والے شخص سیدنا عبداللہ بن مسعود رضی اللہ عنہ نہیں ہیں؟“ سیدنا ابودرداء رضی اللہ عنہ نے دریافت کیا: ”تم یہ آیت ﴿وَاللَّيْلِ إِذَا يَغْشَى * وَالنَّهَارِ إِذَا تَجَلَّى﴾ [سورة الليل: 1-2] کیسے پڑھتے ہو؟“ میں نے کہا: ﴿وَالذَّكَرِ وَالْأُنْثَى﴾ [سورة الليل: 3] ۔ سیدنا ابودرداء رضی اللہ عنہ نے فرمایا: ”یہ لوگ مسلسل مجھے اس بارے میں شبہ کا شکار کرتے رہے ہیں حالانکہ میں نے نبی اکرم صلی اللہ علیہ وسلم کی زبانی خود یہ آیت ” ﴿وَالذَّكَرِ وَالْأُنْثَى﴾ “ [سورة الليل: 3] سنی ہے۔“ [صحیح ابن حبان/كتاب التاريخ/حدیث: 6331]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے یہ آیت تلاوت فرمائی: ﴿يَحْسَبُ أَنَّ مَالَهُ أَخْلَدَهُ﴾ [سورة الهمزة: 3] ”وہ یہ گمان کرتا ہے کہ اس کا مال اسے ہمیشہ رکھے گا۔“ [صحیح ابن حبان/كتاب التاريخ/حدیث: 6332]

اردو ترجمہ · UrduUnverified translation

سیدنا واثلہ بن اسقع رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے سیدنا اسماعیل علیہ السلام کی اولاد میں سے کنانہ کو منتخب کیا، کنانہ میں سے قریش کو منتخب کیا۔ قریش میں سے بنو ہاشم کو منتخب کیا اور بنو ہاشم میں سے مجھے منتخب کیا۔“ [صحیح ابن حبان/كتاب التاريخ/حدیث: 6333]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کے پاس سیدنا جبرائیل علیہ السلام آئے۔ نبی اکرم صلی اللہ علیہ وسلم اس وقت بچوں کے ساتھ کھیل رہے تھے۔ (یعنی یہ نبی اکرم صلی اللہ علیہ وسلم کے بچپن کا واقعہ ہے) انہوں نے نبی اکرم صلی اللہ علیہ وسلم کو پکڑا، آپ صلی اللہ علیہ وسلم کو لٹایا، آپ صلی اللہ علیہ وسلم کے دل کو چیرا اور اس میں سے جما ہوا خون نکالا اور بولے: یہ آپ کے اندر شیطان کا حصہ تھا، پھر انہوں نے نبی اکرم صلی اللہ علیہ وسلم کا قلب مبارک سونے سے بنے ہوئے طشت میں رکھ کر آبِ زم زم کے ذریعے دھویا پھر اسے واپس اس کی جگہ پر رکھ دیا۔ بچے دوڑتے ہوئے آپ کی والدہ یعنی آپ کی دائی اماں کے پاس آئے اور انہوں نے کہا: سیدنا محمد صلی اللہ علیہ وسلم کو قتل کر دیا گیا، وہ لوگ آپ صلی اللہ علیہ وسلم کے پاس آئے تو آپ کی رنگت تبدیل ہو چکی تھی، سیدنا انس رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے سینہ مبارک میں سیے جانے کا نشان دیکھا ہے۔ (امام ابن حبان رحمہ اللہ بیان کرتے ہیں:) نبی اکرم صلی اللہ علیہ وسلم کے سینہ مبارک کو شق کرنے کا واقعہ (پہلی مرتبہ) اس وقت ہوا جب آپ بچے تھے اور بچوں کے ساتھ کھیل رہے تھے۔ تو آپ کے اندر سے جما ہوا خون نکالا گیا۔ پھر جب اللہ تعالیٰ نے آپ صلی اللہ علیہ وسلم کو معراج پر لے جانے کا ارادہ کیا تو اس نے سیدنا جبرائیل علیہ السلام کو حکم دیا، انہوں نے دوسری مرتبہ آپ صلی اللہ علیہ وسلم کا شق صدر کیا۔ آپ صلی اللہ علیہ وسلم کے دل کو نکال کر دوبارہ اسے دھویا اور پھر اسے اس کی جگہ پر رکھ دیا، تو ایسا دو مرتبہ ہوا اور دو مختلف موقعوں پر ہوا۔ ان دونوں روایات میں کوئی تضاد نہیں ہے۔ [صحیح ابن حبان/كتاب التاريخ/حدیث: 6334]

اردو ترجمہ · UrduUnverified translation

عبداللہ بن جعفر رضی اللہ عنہما سیدہ حلیمہ سعدیہ رضی اللہ عنہا کا یہ بیان نقل کرتے ہیں جو نبی اکرم صلی اللہ علیہ وسلم کی رضاعی ماں تھیں۔ وہ بیان کرتی ہیں: میں بنو سعد بن بکر کی کچھ خواتین کے ہمراہ مکہ آئی تاکہ دودھ پلانے کے لیے کوئی بچہ حاصل کروں، میں اپنی گدھی پر سوار ہو کر آئی تھی جو کہ قحط سالی کی وجہ سے انتہائی کمزور ہو چکی تھی۔ میرے ساتھ میرا شوہر بھی تھا۔ ہمارے ساتھ ہماری ایک اونٹنی بھی تھی، اللہ کی قسم! اس کا دودھ بہت کم نکلتا تھا۔ میرے ساتھ میرا چھوٹا سا بچہ بھی تھا۔ اس کے رونے کی وجہ سے ہم رات کو سو نہیں پاتے تھے کیونکہ میرے سینے میں اتنا دودھ نہیں تھا جو اس کی کفایت کر سکے، جب ہم لوگ مکہ آئے تو ہم میں سے ہر عورت کو پیش کش کی گئی کہ وہ نبی اکرم صلی اللہ علیہ وسلم کو دودھ پلانے کے لیے لے جائے، لیکن کسی بھی عورت نے اسے قبول نہیں کیا کیونکہ خواتین کو یہ لالچ ہوتا تھا کہ دودھ پلانے کا معاوضہ بچے کے باپ سے وصول کریں گی اور نبی اکرم صلی اللہ علیہ وسلم یتیم تھے، ہم لوگ یہ کہا کرتے تھے: کسی یتیم کے بارے میں اس کی ماں کیا کر سکتی ہے۔ میرے ساتھ آنے والی خواتین میں سے ہر ایک نے کوئی نہ کوئی بچہ گود میں لے لیا۔ مجھے یہ بات پسند نہیں تھی کہ میں ایسی حالت میں واپس جاؤں کہ مجھے کوئی بچہ نہ ملا ہو جبکہ میری ساتھی خواتین بچہ لے چکی ہوں۔ میں نے اپنے شوہر سے کہا: اللہ کی قسم! میں اس یتیم بچے کو لے کر چلی جاؤں گی، ہم اسے ضرور حاصل کریں گے۔ میں نبی اکرم صلی اللہ علیہ وسلم کے گھر آئی، میں نے آپ کو حاصل کر لیا۔ میں اپنی رہائشی جگہ پر واپس آئی تو میرے شوہر نے کہا: تم نے اسے حاصل کر لیا ہے؟ میں نے جواب دیا: جی ہاں! اللہ کی قسم! اس کی وجہ یہ ہے کہ مجھے ان کے علاوہ اور کوئی بچہ نہیں ملا۔ شوہر نے کہا: تم نے ٹھیک کیا ہے، ہو سکتا ہے اللہ تعالیٰ اس میں ہمارے لیے کوئی بھلائی رکھ دے۔ سیدہ حلیمہ رضی اللہ عنہا بیان کرتی ہیں: اللہ کی قسم! نبی اکرم صلی اللہ علیہ وسلم میری گود میں تھے کہ اسی دوران میری چھاتی میں اللہ تعالیٰ نے اتنا دودھ پیدا کر دیا کہ نبی اکرم صلی اللہ علیہ وسلم نے اسے پیا اور سیر ہو کر پیا۔ آپ کے رضاعی بھائی نے بھی اسے پی لیا یعنی سیدہ حلیمہ رضی اللہ عنہا کے بیٹے نے بھی اسے پی لیا، یہاں تک کہ وہ بھی سیر ہو گیا۔ رات کے وقت میرا شوہر ہماری اونٹنی کے پاس گیا تو اس کا بھی دودھ اترا ہوا تھا۔ میرے شوہر نے اس کا اتنا دودھ دوہ لیا جتنا ہم چاہتے تھے۔ اس نے پیا اور سیر ہو کر پیا، میں نے بھی پیا اور سیر ہو گئی۔ اس رات ہم نے پیٹ بھر کر اور سیر ہو کر رات گزاری۔ ہمارے بچے بھی سوتے رہے۔ بچے کے باپ یعنی سیدہ حلیمہ رضی اللہ عنہا کے شوہر نے کہا: اللہ کی قسم! اے حلیمہ میرا یہ خیال ہے کہ تمہیں ایک مبارک وجود ملا ہے۔ ہمارے بچے آرام سے سو رہے ہیں اور وہ سیر ہیں۔ سیدہ حلیمہ رضی اللہ عنہا بیان کرتی ہیں: پھر ہم لوگ وہاں سے روانہ ہوئے، اللہ کی قسم! میری گدھی سب سے زیادہ آگے چل رہی تھی، یہاں تک کہ میرے ساتھی یہ کہتے تھے کہ تمہارا ستیاناس ہو تم اس کو آرام سے لے کر چلو، کیا یہ تمہاری وہی گدھی نہیں ہے جس پر سوار ہو کر تم آئی تھی؟ تو میں جواب دیتی: جی ہاں! اللہ کی قسم وہی ہے، لیکن وہ بدستور آگے چلتی رہی، یہاں تک کہ ہم بنو سعد بن بکر کے علاقے میں اپنے گھر آ گئے۔ ہم ایک ایسی جگہ پر آئے تھے جو سب سے زیادہ خشک تھی۔ اس ذات کی قسم جس کے دستِ قدرت میں حلیمہ کی جان ہے! دوسرے لوگ صبح کے وقت اپنی بکریوں کو چرنے کے لیے بھیج دیتے تھے اور میری بکریوں کا چرواہا بھی میری بکریاں لے جاتا تھا، تو میری بکریاں جب شام کو واپس آتی تھیں تو دودھ سے بھری ہوئی ہوتی تھیں جبکہ ان کی بکریاں جب واپس آتی تھیں تو بھوکی ہوتی تھیں، ہلاکت کے قریب ہوتی تھیں اور ان میں دودھ بھی نہیں ہوتا تھا۔ سیدہ حلیمہ رضی اللہ عنہا بیان کرتی ہیں: ہم جتنا چاہتے تھے دودھ پی لیتے تھے جبکہ باقی قبیلے میں کسی کو ایک قطرہ بھی دودھ دوہنے کے لیے اور پینے کے لیے نہیں ملتا تھا، تو وہ لوگ اپنے چرواہوں سے یہ کہتے تھے کہ تمہارا ستیاناس ہو، کیا تم اپنی بکریاں اس جگہ نہیں چراتے جہاں حلیمہ کا چرواہا چراتا ہے؟ پھر وہ لوگ بھی اپنی بکریاں اسی گھاٹی میں چراتے تھے جس میں میری بکریاں چرتی تھیں، لیکن اس کے باوجود ان کی بکریاں بھوکی آتی تھیں، ان میں دودھ نہیں ہوتا تھا جبکہ میری بکریاں دودھ سے بھری ہوئی آتی تھیں۔ نبی اکرم صلی اللہ علیہ وسلم کی نشوونما ایک دن میں اتنی ہو رہی تھی جتنی کسی عام بچے کی ایک مہینے میں ہوتی ہے اور آپ کی نشوونما ایک ماہ میں اتنی ہو گئی جتنی کسی بچے کی ایک سال میں ہوتی ہے، جب آپ کی عمر ایک سال ہوئی تو آپ بھرپور صحت مند لگتے تھے۔ سیدہ حلیمہ رضی اللہ عنہا بیان کرتی ہیں: پھر ہم لوگ نبی اکرم صلی اللہ علیہ وسلم کی والدہ کی خدمت میں آئے۔ میں نے ان سے یہ درخواست کی اور میرے شوہر نے بھی ان سے یہ درخواست کی کہ آپ اس بچے کو ہمیں دے دیں تاکہ ہم اسے واپس لے جائیں کیونکہ ہمیں اس کے بارے میں یہ اندیشہ ہے کہ یہ مکہ میں وبا کا شکار نہ ہو جائے۔ سیدہ حلیمہ رضی اللہ عنہا بیان کرتی ہیں: ہم نے نبی اکرم صلی اللہ علیہ وسلم کی جو برکت دیکھی تھی، ہمیں اس کا لالچ تھا، تو ہم مسلسل ان کے ساتھ بات چیت کرتے رہے، یہاں تک کہ انہوں نے یہ فرمایا: تم اسے ساتھ لے جاؤ۔ ہم نبی اکرم صلی اللہ علیہ وسلم کو ساتھ لے کر واپس آ گئے، نبی اکرم صلی اللہ علیہ وسلم دو ماہ ہمارے پاس ٹھہرے رہے۔ ایک مرتبہ آپ صلی اللہ علیہ وسلم اپنے بھائی کے ساتھ گھروں کے پیچھے کھیل رہے تھے، وہ دونوں ہماری بکری کے بچے کے ساتھ کھیل رہے تھے۔ اس دوران نبی اکرم صلی اللہ علیہ وسلم کا رضاعی بھائی تیزی سے دوڑتا ہوا ہمارے پاس آیا اور مجھ سے اور اپنے والد سے بولا: میرے قریشی بھائی کے پاس جائیں، اس کے پاس دو آدمی آئے ہیں انہوں نے اسے لٹا دیا ہے اور اس کا پیٹ چیر دیا ہے۔ سیدہ حلیمہ رضی اللہ عنہا بیان کرتی ہیں: ہم لوگ دوڑتے ہوئے نبی اکرم صلی اللہ علیہ وسلم کے پاس آئے تو آپ صلی اللہ علیہ وسلم کھڑے ہوئے تھے، آپ کے چہرے کی رنگت تبدیل تھی۔ آپ کے والد نے آپ کو گلے سے لگا لیا، میں نے بھی آپ کو گلے سے لگا لیا، پھر ہم نے دریافت کیا: اے میرے بیٹے! تمہیں کیا ہوا ہے؟ آپ صلی اللہ علیہ وسلم نے بتایا: ”میرے پاس دو آدمی آئے، انہوں نے سفید کپڑے پہنے ہوئے تھے، انہوں نے مجھے لٹا لیا پھر انہوں نے میرے پیٹ کو چیر دیا، اللہ کی قسم! مجھے اندازہ نہیں ہوا کہ انہوں نے کیا کیا۔“ سیدہ حلیمہ رضی اللہ عنہا بیان کرتی ہیں: ہم نے آپ کو گود میں اٹھا لیا اور آپ کو لے کر واپس آ گئے۔ سیدہ حلیمہ رضی اللہ عنہا بیان کرتی ہیں: آپ کے رضاعی والد نے کہا: اے حلیمہ! مجھے لگتا ہے اس لڑکے کے ساتھ کوئی نہ کوئی خاص معاملہ ہے، تم چلو ہم اسے اس کے گھر والوں کے سپرد کر آتے ہیں، اس سے پہلے کہ اس کی طرف سے کوئی ایسی صورت حال سامنے آئے جس کا ہمیں اندیشہ ہے۔ سیدہ حلیمہ رضی اللہ عنہا بیان کرتی ہیں: ہم آپ کو لے کر واپس آئے تو سیدہ آمنہ رضی اللہ عنہا نے دریافت کیا: تم لوگ اسے واپس لے کر کیوں آ گئے ہو؟ تم تو اسے اپنے پاس رکھنا چاہ رہے تھے۔ سیدہ حلیمہ رضی اللہ عنہا بیان کرتی ہیں: میں نے عرض کی: جی نہیں، اللہ کی قسم! ہم نے اس کی کفالت کر لی ہے اور ہمارے ذمے جو حق لازم تھا وہ ہم نے ادا کر دیا ہے، پھر ہمیں اس کے بعد کسی مشکل پیش آنے کا اندیشہ ہوا (تو ہم نے یہ سوچا کہ یہ اپنے گھر میں ہی ٹھیک رہے گا)۔ سیدہ آمنہ رضی اللہ عنہا نے کہا: اس کے ساتھ کیا معاملہ پیش آیا ہے؟ اللہ کی قسم! تم دونوں مجھے بتاؤ۔ سیدہ آمنہ رضی اللہ عنہا مسلسل ہمارے ساتھ اصرار کرتی رہیں، یہاں تک کہ ہم نے انہیں اصل واقعہ بتا دیا۔ سیدہ آمنہ رضی اللہ عنہا نے دریافت کیا: کیا تمہیں اس کے بارے میں خوف ہے؟ ہرگز نہیں! میرے اس بیٹے کی بڑی شان ہو گی، میں تمہیں اس بارے میں بتاتی ہوں؛ جب مجھے اس کا حمل ہوا تو مجھے حمل کی کوئی پریشانی محسوس نہیں ہوئی، یہ میرے لیے انتہائی آسان اور زیادہ برکت والی صورت حال تھی، پھر مجھے ایک نور دکھائی دیا جو انتہائی چمکدار تھا، جب میں نے اسے جنم دیا تو وہ نور میرے اندر سے نکلا اور اس نور کی وجہ سے بصریٰ میں موجود اونٹوں کی گردنیں میرے سامنے روشن ہو گئیں (یعنی مجھے نظر آنے لگیں) پھر میں نے اسے جنم دیا تو یہ اس طرح باہر نہیں آیا جس طرح عام طور پر بچے باہر آتے ہیں، بلکہ جب یہ باہر آیا تو اس نے اپنے ہاتھ زمین پر رکھے اور اپنا سر آسمان کی طرف اٹھایا اور دعا مانگی، تو تم (اس واقعہ کو) اپنے والے واقعے کے ساتھ ملا کر دیکھ لو۔ امام ابن حبان رحمہ اللہ فرماتے ہیں: وہب بن جریر نے اپنی سند کے ساتھ یہ روایت نقل کی ہے اور عبداللہ بن محمد نے بھی یہ روایت اپنی سند کے ساتھ نقل کی ہے۔ [صحیح ابن حبان/كتاب التاريخ/حدیث: 6335]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ سیدنا جبرائیل علیہ السلام نبی اکرم صلی اللہ علیہ وسلم کے پاس آئے (یہ نبی اکرم صلی اللہ علیہ وسلم کے بچپن کی بات ہے)، نبی اکرم صلی اللہ علیہ وسلم اس وقت بچوں کے ساتھ کھیل رہے تھے۔ سیدنا جبرائیل علیہ السلام نے نبی اکرم صلی اللہ علیہ وسلم کو پکڑا، آپ کو لٹایا اور آپ کے قلب مبارک کو چیر دیا، اس میں سے خون کا ایک لوتھڑا نکالا اور بولے: «هَذَا حَظُّ الشَّيْطَانِ مِنْكَ» ”یہ آپ کے اندر شیطان کا حصہ تھا“، پھر انہوں نے سونے کے بنے ہوئے طشت میں آبِ زم زم کے ذریعے آپ کے قلب مبارک کو دھویا اور پھر اسے دوبارہ اس کی جگہ رکھ دیا۔ بچے دوڑتے ہوئے نبی اکرم صلی اللہ علیہ وسلم کی والدہ یعنی دائی ماں کے پاس آئے اور بولے: ”سیدنا محمد صلی اللہ علیہ وسلم کو قتل کر دیا گیا ہے“۔ وہ لوگ نبی اکرم صلی اللہ علیہ وسلم کے پاس آئے تو آپ کے چہرے کی رنگت بدلی ہوئی تھی۔ سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کے سینہ مبارک میں اس سیون (ٹانکوں کے نشان) کو میں نے دیکھا ہے۔ [صحیح ابن حبان/كتاب التاريخ/حدیث: 6336]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کیا تم سمجھتے ہو کہ میری توجہ صرف قبلہ کی طرف ہوتی ہے؟ اللہ کی قسم! تمہارا خشوع اور تمہارا رکوع کرنا مجھ سے مخفی نہیں رہتا، میں اپنی پشت کے پیچھے سے بھی تمہیں دیکھ لیتا ہوں۔“ [صحیح ابن حبان/كتاب التاريخ/حدیث: 6337]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میں اپنے پیچھے بھی اسی طرح دیکھ لیتا ہوں، جس طرح میں اپنے سامنے دیکھتا ہوں، تم لوگ اپنی صفیں درست رکھو اور رکوع و سجود اچھے طریقے سے کرو۔“ [صحیح ابن حبان/كتاب التاريخ/حدیث: 6338]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اپنی صفیں ملا کر رکھو، ایک دوسرے کے قریب رہو اور گردنیں سیدھی رکھو، اس ذات کی قسم جس کے دستِ قدرت میں میری جان ہے! میں شیطان کو دیکھتا ہوں کہ وہ صفوں کے درمیان خالی جگہ میں یوں داخل ہوتا ہے جیسے وہ «الْحَذَفُ» (بھیڑ کا بچہ) ہو۔“ مسلم نامی راوی کہتے ہیں: «الْحَذَفُ» سے مراد بھیڑ کے بچے ہیں۔ [صحیح ابن حبان/كتاب التاريخ/حدیث: 6339]

اردو ترجمہ · UrduUnverified translation

سیدنا نعمان بن بشیر رضی اللہ عنہ فرماتے ہیں: کیا تم لوگ آج طرح طرح کے کھانے اور مشروبات نہیں پیتے؟ جیسے تم چاہتے ہو، حالانکہ میں نے نبی صلی اللہ علیہ وسلم کو دیکھا ہے کہ آپ کو ہلکی قسم کی کھجوریں اتنی بھی نہیں ملتی تھیں کہ آپ ان کے ذریعے اپنا پیٹ بھر لیں۔ [صحیح ابن حبان/كتاب التاريخ/حدیث: 6340]

اردو ترجمہ · UrduUnverified translation

سیدنا نعمان بن بشیر رضی اللہ عنہ بیان کرتے ہیں کہ نبی اکرم صلی اللہ علیہ وسلم جب بھوکے ہوتے تھے تو آپ کو ہلکی قسم کی کھجوریں اتنی بھی نہیں ملتی تھیں کہ آپ اپنا پیٹ بھر لیں۔ [صحیح ابن حبان/كتاب التاريخ/حدیث: 6341]

اردو ترجمہ · UrduUnverified translation

سیدنا نعمان بن بشیر رضی اللہ عنہ نے خطبہ دیتے ہوئے یہ بات ذکر کی کہ لوگوں کو اب طرح طرح کی دنیاوی نعمتیں حاصل ہو گئی ہیں، حالانکہ میں نے نبی اکرم صلی اللہ علیہ وسلم کو دیکھا ہے کہ جب آپ صلی اللہ علیہ وسلم بھوکے ہوتے تھے تو آپ صلی اللہ علیہ وسلم کو ہلکی قسم کی کھجوریں اتنی بھی نہیں ملتی تھیں کہ آپ صلی اللہ علیہ وسلم ان کے ذریعے اپنا پیٹ بھر لیں۔ [صحیح ابن حبان/كتاب التاريخ/حدیث: 6342]

اردو ترجمہ · UrduUnverified translation

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: «اللَّهُمَّ اجْعَلْ رِزْقَ آلِ مُحَمَّدٍ قُوتًا» ”اے اللہ! محمد کے گھر والوں کو گزارہ کرنے جتنا رزق عطا کر۔“ [صحیح ابن حبان/كتاب التاريخ/حدیث: 6343]

اردو ترجمہ · UrduUnverified translation

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: «اللَّهُمَّ اجْعَلْ رِزْقَ آلِ مُحَمَّدٍ قُوتًا» ”اے اللہ! محمد کے گھر والوں کو (ضروری) خوراک جتنا رزق عطا کر۔“ [صحیح ابن حبان/كتاب التاريخ/حدیث: 6344]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کے گھر والوں نے کبھی بھی تین دن تک پیٹ بھر کر کھانا نہیں کھایا، یہاں تک کہ نبی اکرم صلی اللہ علیہ وسلم کا وصال ہو گیا، آپ کی خوراک صرف دو سیاہ چیزیں یعنی کھجور اور پانی تھیں۔ [صحیح ابن حبان/كتاب التاريخ/حدیث: 6345]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں، نبی اکرم صلی اللہ علیہ وسلم نے کبھی بھی مسلسل تین دن تک اپنے گھر والوں کو گندم کی روٹی پیٹ بھر کر نہیں کھلائی، یہاں تک کہ آپ صلی اللہ علیہ وسلم دنیا سے رخصت ہو گئے۔ [صحیح ابن حبان/كتاب التاريخ/حدیث: 6346]

اردو ترجمہ · UrduUnverified translation

ابوحازم بیان کرتے ہیں: میں نے سیدنا سہل بن سعد ساعدی رضی اللہ عنہ سے دریافت کیا: کیا نبی اکرم صلی اللہ علیہ وسلم چھنے ہوئے آٹے کی روٹی کھاتے تھے؟ سیدنا سہل رضی اللہ عنہ نے بتایا: جب سے نبی اکرم صلی اللہ علیہ وسلم کو اللہ تعالیٰ نے مبعوث کیا ہے، اس وقت سے لے کر آپ کے وصال تک نبی اکرم صلی اللہ علیہ وسلم نے کبھی بھی چھنے ہوئے آٹے کی روٹی نہیں کھائی۔ میں نے دریافت کیا: کیا نبی اکرم صلی اللہ علیہ وسلم کے زمانۂ اقدس میں آپ لوگوں کے پاس چھلنیاں نہیں ہوتی تھیں؟ انہوں نے فرمایا: جب سے نبی اکرم صلی اللہ علیہ وسلم مبعوث ہوئے، اس وقت سے لے کر اپنے وصال تک نبی اکرم صلی اللہ علیہ وسلم نے کبھی بھی چھلنی نہیں دیکھی۔ میں نے دریافت کیا: تو آپ چھانے بغیر جَو کیسے کھا لیتے تھے؟ انہوں نے فرمایا: ہم لوگ اسے پیس کر اس میں پھونک مارتے تھے، جو چیز اڑنی ہوتی تھی وہ اڑ جاتی تھی اور جو باقی بچ جاتی تھی ہم اسے پکا کر کھا لیتے تھے۔ [صحیح ابن حبان/كتاب التاريخ/حدیث: 6347]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: ہم لوگ پہلی کا ایک چاند دیکھ لیتے تھے، پھر اگلی پہلی کا چاند دیکھ لیتے تھے، پھر اگلی پہلی کا چاند دیکھ لیتے تھے، یعنی دو مہینوں میں تین چاند دیکھ لیتے تھے، لیکن اس دوران نبی اکرم صلی اللہ علیہ وسلم کے گھروں میں آگ نہیں جلتی تھی۔ راوی کہتے ہیں: میں نے دریافت کیا: خالہ جان! آپ لوگوں کا گزارا کیسے ہوتا تھا؟ انہوں نے جواب دیا: دو سیاہ چیزوں پر؛ کھجوروں اور پانی پر، البتہ نبی اکرم صلی اللہ علیہ وسلم کے کچھ انصاری پڑوسی تھے جو بہت اچھے پڑوسی تھے۔ ان لوگوں کے پاس دودھ دینے والے جانور تھے، وہ ان کا دودھ نبی اکرم صلی اللہ علیہ وسلم کی خدمت میں تحفے کے طور پر بھجوا دیتے تھے تو ہم وہ پی لیا کرتے تھے۔ [صحیح ابن حبان/كتاب التاريخ/حدیث: 6348]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں: ایک دن نبی اکرم صلی اللہ علیہ وسلم نے ارشاد فرمایا: ”(آج) محمد کے گھر میں نہ تو گندم کا ایک صاع ہے اور نہ ہی کھجوروں کا ایک صاع ہے۔“ راوی کہتے ہیں: اس زمانے میں نبی اکرم صلی اللہ علیہ وسلم کی نو ازواج تھیں۔ [صحیح ابن حبان/كتاب التاريخ/حدیث: 6349]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اس ذات کی قسم! جس کے دستِ قدرت میں محمد کی جان ہے، اگر میرے پاس احد پہاڑ جتنا سونا ہو تو مجھے یہ بات پسند ہوگی کہ تین دن گزرنے سے پہلے میرے پاس ان میں سے ایک دینار بھی باقی نہ رہے، سوائے اس دینار کے، جسے میں نے قرض کی ادائیگی کے لیے سنبھال کر رکھا ہو۔“ [صحیح ابن حبان/كتاب التاريخ/حدیث: 6350]

اردو ترجمہ · UrduUnverified translation

عبداللہ ہوزنی بیان کرتے ہیں: میری ملاقات نبی اکرم صلی اللہ علیہ وسلم کے مؤذن سیدنا بلال رضی اللہ عنہ سے ہوئی۔ میں نے کہا: اے بلال! آپ مجھے بتائیے کہ نبی اکرم صلی اللہ علیہ وسلم کا خرچ کیسے چلتا تھا؟ تو سیدنا بلال رضی اللہ عنہ نے بتایا: نبی اکرم صلی اللہ علیہ وسلم کے پاس کوئی چیز نہیں ہوتی تھی، جب سے اللہ تعالیٰ نے آپ کو مبعوث کیا اس دن سے آپ کے وصال تک میں نبی اکرم صلی اللہ علیہ وسلم کے ساتھ رہا ہوں؛ جب کوئی مسلمان آپ کی خدمت میں حاضر ہوتا اور آپ دیکھتے کہ اس کے پاس مناسب کپڑے نہیں ہیں، تو آپ مجھے حکم دیتے، میں جاتا، آپ کے نام پر قرض لیتا، اس کے ذریعے کپڑا یا چادر خریدتا اور اس شخص کو پہننے کے لیے دے دیتا اور اس شخص کو کھانا کھلا دیتا، یہاں تک کہ ایک مشرک شخص میرے پاس آیا اور بولا: اے بلال! میرے پاس گنجائش ہے، تم صرف مجھ سے قرض لیا کرو۔ میں نے ایسا ہی کیا۔ ایک دن میں نے وضو کیا، میں نماز کے لیے اذان دینے کے لیے اٹھنے لگا تو وہ مشرک شخص کچھ تاجروں کے ساتھ آیا، جب اس نے مجھے دیکھا تو بولا: اے حبشی! میں نے کہا: کیا ہے؟ تو اس نے مجھے برا بھلا کہا اور میرے بارے میں سختی سے کام لیا۔ اس نے دریافت کیا: کیا تم یہ بات جانتے ہو کہ مہینہ ختم ہونے میں کتنے دن رہ گئے ہیں؟ میں نے جواب دیا: جی ہاں، تھوڑا ہی وقت ہے۔ اس نے مجھ سے کہا: مہینہ ختم ہونے میں چار دن باقی رہ گئے ہیں، پھر میں نے تم سے وہ وصولی کر لینی ہے جو تمہارے ذمے لازم ہے، میں نے تمہیں قرض اس لیے نہیں دیا تھا کہ تم میرے نزدیک معزز ہو یا تمہارے آقا میرے نزدیک معزز ہیں، میں نے تمہیں قرض اس لیے دیا تھا تاکہ مجھے (قرض وصول نہ ہونے کی صورت میں) غلام حاصل ہو جائے، تو میں تم سے بکریاں چرواؤں گا، جس طرح تم پہلے چرایا کرتے تھے۔ سیدنا بلال رضی اللہ عنہ کہتے ہیں: میں بھی پریشان ہو گیا جس طرح لوگ پریشان ہوتے ہیں۔ خیر میں گیا، میں نے نماز کے لیے اذان دی، یہاں تک کہ جب میں نے عشاء کی نماز ادا کر لی، نبی اکرم صلی اللہ علیہ وسلم اپنے گھر واپس تشریف لے گئے تو میں نے آپ کے ہاں اندر آنے کی اجازت مانگی۔ آپ نے مجھے اجازت عطا کی۔ میں نے عرض کی: یا رسول اللہ صلی اللہ علیہ وسلم ! میرے والد آپ پر قربان ہوں، وہ مشرک جس کا میں نے آپ کے سامنے ذکر کیا تھا کہ میں اس سے قرض لیتا ہوں، اس نے مجھے اس اس طرح کی باتیں کی ہیں اور آپ کے پاس کوئی ایسی چیز بھی نہیں ہے جو آپ میری طرف سے ادا کر دیں اور میرے پاس بھی نہیں ہے اور وہ شخص مجھے رسوا کر دے گا۔ آپ مجھے اجازت دیجیے تاکہ میں ان قبائل کی طرف جاؤں جنہوں نے اسلام قبول کیا ہے تاکہ اللہ تعالیٰ اپنے رسول کو اتنا رزق عطا کر دے کہ وہ میرا قرض ادا کر دیں؟ نبی اکرم صلی اللہ علیہ وسلم نے ارشاد فرمایا: ”اگر تم یہ چاہتے ہو تو ایسا کر لو۔“ سیدنا بلال رضی اللہ عنہ کہتے ہیں: میں وہاں سے نکل کر اپنے گھر آیا، میں نے اپنی تلوار، اپنا ترکش، اپنی ڈھال، اپنے جوتے اپنے سرہانے رکھ لیے۔ میں نے اپنا رخ افق کی طرف کیا۔ میں جب بھی تھوڑی دیر کے لیے سوتا تھا، تو فوراً بیدار ہو جاتا تھا، لیکن اس رات میں ایسا سویا کہ صبح صادق ہو گئی۔ میں نے اٹھنے کا ارادہ کیا، اسی دوران ایک شخص دوڑتا ہوا آیا، وہ کہہ رہا تھا: نبی اکرم صلی اللہ علیہ وسلم کے پاس جاؤ۔ میں اٹھا اور آپ کی خدمت میں حاضر ہوا۔ وہاں چار سواریاں موجود تھیں جن پر ان کے پالان وغیرہ بندھے ہوئے تھے۔ میں نبی اکرم صلی اللہ علیہ وسلم کی خدمت میں حاضر ہوا، میں نے اندر آنے کی اجازت مانگی۔ آپ نے مجھ سے فرمایا: ”تمہارے لیے خوشخبری ہے، اللہ تعالیٰ نے تمہارے قرض کی ادائیگی کا بندوبست کر دیا ہے۔“ تو میں نے اس بات پر اللہ تعالیٰ کی حمد بیان کی۔ نبی اکرم صلی اللہ علیہ وسلم نے دریافت کیا: ”کیا تمہارا گزر ان چار سواریوں کے پاس نہیں ہوا جو باندھی ہوئی تھیں؟“ میں نے جواب دیا: جی ہاں! نبی اکرم صلی اللہ علیہ وسلم نے فرمایا: ”وہ سواریاں اور ان پر موجود کپڑے اور کھانا تمہارے ہوئے، یہ سب چیزیں مجھے فدک کے امیر نے تحفے کے طور پر بھیجی ہیں، تم انہیں حاصل کر لو اور اپنا قرض ادا کر دو۔“ سیدنا بلال رضی اللہ عنہ کہتے ہیں: میں نے ایسا ہی کیا۔ میں نے ان کے اوپر سے پالان اتار لیا اور پھر انہیں باندھ دیا، پھر میں صبح کی نماز کے لیے اذان دینے گیا، یہاں تک کہ جب نبی اکرم صلی اللہ علیہ وسلم نے نماز ادا کر لی تو میں نکل کر بقیع کے میدان میں آیا۔ میں نے اپنی انگلیاں کانوں میں دیں اور بلند آواز میں اعلان کیا: جس نے نبی اکرم صلی اللہ علیہ وسلم سے قرض واپس لینا تھا وہ آ جائے، اس کے بعد میں خرید و فروخت کرتا رہا اور قرض ادا کرتا رہا، یہاں تک کہ میرے ہاتھ میں دو اوقیہ یا ڈیڑھ اوقیہ باقی بچ گئے۔ میں مسجد کی طرف آیا، دن کا زیادہ حصہ رخصت ہو چکا تھا، نبی اکرم صلی اللہ علیہ وسلم مسجد میں اکیلے تشریف فرما تھے۔ میں نے آپ کو سلام کیا۔ نبی اکرم صلی اللہ علیہ وسلم نے دریافت کیا: ”تمہاری کیا صورت حال ہے؟“ میں نے عرض کی: اللہ تعالیٰ نے ہر وہ چیز ادا کروا دی ہے جو نبی اکرم صلی اللہ علیہ وسلم کے ذمے لازم تھی، کوئی بھی چیز (یعنی قرض) باقی نہیں رہا۔ نبی اکرم صلی اللہ علیہ وسلم نے فرمایا: ”کیا کوئی چیز باقی بچی ہے؟“ میں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تم دیکھو کہ اس کے ذریعے مجھے آرام پہنچانا۔“ پھر جب نبی اکرم صلی اللہ علیہ وسلم نے عشاء کی نماز ادا کر لی تو آپ نے مجھے بلایا، آپ نے دریافت کیا: ”تمہاری کیا صورت حال ہے؟“ میں نے عرض کی: وہ چیز میرے پاس ہے، ہمارے پاس کوئی بھی نہیں آیا۔ نبی اکرم صلی اللہ علیہ وسلم نے وہ رات مسجد میں گزاری، یہاں تک کہ صبح ہو گئی، آپ اگلا دن بھی مسجد میں رہے، یہاں تک کہ دن کا آخری حصہ آ گیا تو دو سوار آئے، میں ان دونوں کو ساتھ لے کر گیا، میں نے ان دونوں کو پہننے کے لیے کپڑے لے کر دیے، انہیں کھانا کھلایا، یہاں تک کہ جب نبی اکرم صلی اللہ علیہ وسلم نے عشاء کی نماز ادا کر لی، تو آپ نے مجھے بلایا۔ نبی اکرم صلی اللہ علیہ وسلم نے دریافت کیا: ”کیا صورت حال ہے؟“ میں نے عرض کی: یا رسول اللہ صلی اللہ علیہ وسلم ! اللہ تعالیٰ نے آپ کو اس چیز کی طرف سے راحت پہنچا دی ہے (یعنی وہ بقیہ مال بھی اللہ کی راہ میں خرچ ہو گیا ہے) تو نبی اکرم صلی اللہ علیہ وسلم نے اللہ تعالیٰ کی کبریائی بیان کی اور اللہ تعالیٰ کی حمد بیان کی، اس اندیشے کے تحت کہ آپ کو کہیں ایسی حالت میں موت نہ آ جائے کہ وہ مال آپ کے پاس موجود ہو، پھر میں نبی اکرم صلی اللہ علیہ وسلم کے ساتھ چلتا ہوا آیا۔ نبی اکرم صلی اللہ علیہ وسلم اپنی تمام ازواج کے پاس تشریف لے گئے، آپ نے ہر ایک زوجہ محترمہ کو سلام کیا، یہاں تک کہ آپ اس گھر میں آئے جہاں آپ نے رات بسر کرنی تھی۔ (سیدنا بلال رضی اللہ عنہ نے فرمایا) یہ وہ صورت حال تھی جس کے بارے میں تم نے مجھ سے دریافت کیا تھا۔ [صحیح ابن حبان/كتاب التاريخ/حدیث: 6351]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: سیدنا عمر بن خطاب رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، آپ صلی اللہ علیہ وسلم اس وقت چٹائی پر لیٹے ہوئے تھے جس کا نشان آپ صلی اللہ علیہ وسلم کے پہلو پر لگ چکا تھا، سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم ! اگر آپ اس سے زیادہ نرم بچھونا استعمال کرتے (تو یہ مناسب ہوتا)؛ نبی اکرم صلی اللہ علیہ وسلم نے فرمایا: ”میرا دنیا سے کیا واسطہ اور دنیا کا مجھ سے کیا واسطہ؟ اس ذات کی قسم! جس کے دستِ قدرت میں میری جان ہے، میری اور دنیا کی مثال یوں ہے جیسے کوئی سوار شخص تیز گرم دن میں سفر کرتے ہوئے گھڑی بھر کے لیے کسی درخت کے سائے میں آئے اور پھر وہ اسے وہیں چھوڑ کر آگے روانہ ہو جائے۔“ [صحیح ابن حبان/كتاب التاريخ/حدیث: 6352]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم سیدہ فاطمہ رضی اللہ عنہا کے ہاں تشریف لائے، آپ صلی اللہ علیہ وسلم نے ان کے دروازے پر پردہ لٹکا ہوا دیکھا تو گھر کے اندر تشریف نہیں لائے۔ آپ صلی اللہ علیہ وسلم جب بھی گھر میں تشریف لاتے تھے تو سب سے پہلے سیدہ فاطمہ رضی اللہ عنہا کے پاس تشریف لاتے تھے۔ جب سیدنا علی رضی اللہ عنہ گھر آئے اور انہوں نے سیدہ فاطمہ رضی اللہ عنہا کو پریشان دیکھا تو دریافت کیا: کیا ہوا؟ سیدہ فاطمہ رضی اللہ عنہا نے بتایا: نبی اکرم صلی اللہ علیہ وسلم میرے ہاں تشریف لائے، لیکن آپ صلی اللہ علیہ وسلم گھر کے اندر نہیں آئے۔ سیدنا علی رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ! فاطمہ اس بات پر پریشان ہیں کہ آپ صلی اللہ علیہ وسلم ان کے ہاں آئے لیکن گھر کے اندر تشریف نہیں لائے۔ نبی اکرم صلی اللہ علیہ وسلم نے فرمایا: ”میرا اور دنیا کا کیا واسطہ؟ میرا اور نقش و نگار کا کیا واسطہ؟“ سیدنا علی رضی اللہ عنہ، سیدہ فاطمہ رضی اللہ عنہا کے پاس تشریف لے گئے اور انہیں نبی اکرم صلی اللہ علیہ وسلم کے اس فرمان کے بارے میں بتایا، تو سیدہ فاطمہ رضی اللہ عنہا نے فرمایا: آپ صلی اللہ علیہ وسلم سے دریافت کیجیے کہ آپ مجھے کیا حکم دیتے ہیں۔ نبی اکرم صلی اللہ علیہ وسلم نے فرمایا: ”تم اس سے کہو کہ اس (پردے کو) بنو فلاں کو بھجوا دے۔“ [صحیح ابن حبان/كتاب التاريخ/حدیث: 6353]

اردو ترجمہ · UrduUnverified translation

سیدنا سفینہ رضی اللہ عنہ بیان کرتے ہیں: نبی اکرم صلی اللہ علیہ وسلم ایسے گھر میں داخل نہیں ہوتے تھے جہاں نقش و نگار بنے ہوئے ہوں۔ [صحیح ابن حبان/كتاب التاريخ/حدیث: 6354]

اردو ترجمہ · UrduUnverified translation

قتادہ بیان کرتے ہیں: ہم لوگ سیدنا انس بن مالک رضی اللہ عنہ کے پاس آئے۔ ان کا نانبائی کھڑا ہوا (روٹیاں لگا رہا تھا) تو سیدنا انس رضی اللہ عنہ نے فرمایا: تم لوگ کھانا کھاؤ کیونکہ میں نے نبی اکرم صلی اللہ علیہ وسلم کو کبھی بھی پتلی (یعنی چھنے ہوئے آٹے کی) روٹی کھاتے ہوئے اور بھنی ہوئی بکری کھاتے ہوئے نہیں دیکھا، یہاں تک کہ آپ صلی اللہ علیہ وسلم اللہ تعالیٰ کی بارگاہ میں حاضر ہو گئے۔ [صحیح ابن حبان/كتاب التاريخ/حدیث: 6355]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کل کے لیے کوئی چیز ذخیرہ کر کے نہیں رکھتے تھے۔ [صحیح ابن حبان/كتاب التاريخ/حدیث: 6356]

اردو ترجمہ · UrduUnverified translation

سیدنا عمر بن خطاب رضی اللہ عنہ نے فرمایا: بنو نضیر کی زمینیں وہ ہیں جو اللہ تعالیٰ نے اپنے رسول کو مالِ فے کے طور پر عطا فرمائی تھیں۔ مسلمانوں نے ان کے حصول کے لیے گھوڑے اور سواریاں نہیں دوڑائے تھے، تو یہ نبی اکرم صلی اللہ علیہ وسلم کے لیے مخصوص تھیں؛ آپ صلی اللہ علیہ وسلم ان میں سے اپنے اہل خانہ کے سال بھر کا خرچ حاصل کرتے تھے اور جو باقی بچ جاتا تھا، وہ اللہ کی راہ میں ساز و سامان اور اسلحے کے لیے استعمال فرماتے تھے۔ [صحیح ابن حبان/كتاب التاريخ/حدیث: 6357]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: جب نبی اکرم صلی اللہ علیہ وسلم کا وصال ہوا تو آپ نے کبھی بھی ایک ہی دن میں دو مرتبہ روٹی اور زیتون کا تیل سیر ہو کر نہیں کھایا۔ [صحیح ابن حبان/كتاب التاريخ/حدیث: 6358]

اردو ترجمہ · UrduUnverified translation

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کے دسترخوان پر کبھی بھی صبح اور شام کے کھانے میں روٹی اور گوشت اکٹھے نہیں ہوئے، البتہ ماسوائے اس صورت کے کہ آپ لوگوں کے ساتھ کھا رہے ہوں۔ [صحیح ابن حبان/كتاب التاريخ/حدیث: 6359]

اردو ترجمہ · UrduUnverified translation

ابوحازم بیان کرتے ہیں: میں نے سیدنا سہل بن سعد ساعدی رضی اللہ عنہ سے دریافت کیا کہ کیا نبی اکرم صلی اللہ علیہ وسلم نے کبھی چھنے ہوئے آٹے کی روٹی کھائی ہے؟ تو سیدنا سہل رضی اللہ عنہ نے فرمایا: جب سے اللہ تعالیٰ نے آپ صلی اللہ علیہ وسلم کو مبعوث فرمایا، اس وقت سے لے کر آپ صلی اللہ علیہ وسلم کے وصال تک نبی اکرم صلی اللہ علیہ وسلم نے کبھی بھی چھنے ہوئے آٹے کی روٹی نہیں دیکھی (یعنی نہیں کھائی)۔ میں نے دریافت کیا: کیا نبی اکرم صلی اللہ علیہ وسلم کے زمانہ اقدس میں آپ لوگوں کے پاس چھاننیاں ہوتی تھیں؟ تو انہوں نے فرمایا: نبی اکرم صلی اللہ علیہ وسلم کو جب اللہ تعالیٰ نے مبعوث فرمایا، اس وقت سے لے کر آپ صلی اللہ علیہ وسلم کے وصال تک آپ صلی اللہ علیہ وسلم نے چھاننی کبھی نہیں دیکھی۔ راوی کہتے ہیں: میں نے دریافت کیا، تو پھر آپ چھانے بغیر جَو کیسے کھا لیتے تھے؟ انہوں نے کہا: ہاں، ہم اس میں پھونک مارتے تھے، جو چیز اڑنی ہوتی تھی وہ اڑ جاتی تھی اور جو باقی بچتی تھی، اسے ہم گوندھ لیتے تھے اور کھا لیتے تھے۔ [صحیح ابن حبان/كتاب التاريخ/حدیث: 6360]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کا بستر چمڑے کا بنا ہوا تھا جس میں کھجور کے پتے بھرے ہوتے تھے، سیدہ عائشہ رضی اللہ عنہا بیان کرتی ہیں کہ بعض اوقات ہم پر ایسا مہینہ بھی آ جاتا کہ ہم پورا مہینہ آگ نہیں جلا پاتے تھے، ہماری خوراک صرف دو سیاہ چیزیں یعنی کھجور اور پانی ہوتا تھا، البتہ بعض اوقات ہمارے پڑوسی اپنی بکریوں کا دودھ ہمیں بھیج دیتے تھے۔ [صحیح ابن حبان/كتاب التاريخ/حدیث: 6361]

اردو ترجمہ · UrduUnverified translation

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم چارپائی پر آرام فرما تھے، وہ کھجور کی بٹی ہوئی رسی سے بنائی گئی تھی۔ راوی بیان کرتے ہیں کہ اسی دوران آپ کے اصحاب میں سے کچھ لوگ آپ کی خدمت میں حاضر ہوئے اور سیدنا عمر رضی اللہ عنہ بھی اندر آئے، نبی اکرم صلی اللہ علیہ وسلم نے جب پہلو بدلا تو اس بان کا نشان آپ کے پہلو پر موجود تھا۔ سیدنا عمر رضی اللہ عنہ رو پڑے، انہوں نے عرض کی: اللہ کی قسم! ہم یہ بات جانتے ہیں کہ آپ اللہ تعالیٰ کی بارگاہ میں کسریٰ اور قیصر سے زیادہ معزز ہیں، لیکن وہ دونوں عیش و عشرت کی زندگی گزار رہے ہیں۔ نبی اکرم صلی اللہ علیہ وسلم نے فرمایا: ”کیا تم اس بات سے راضی نہیں ہو کہ یہ چیزیں ان دونوں کے لیے دنیا میں ہوں اور ہمارے لیے آخرت میں ہوں؟“ سیدنا عمر رضی اللہ عنہ نے عرض کی: جی ہاں۔ راوی کہتے ہیں کہ پھر وہ خاموش ہو گئے۔ [صحیح ابن حبان/كتاب التاريخ/حدیث: 6362]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مجھے جامع کلمات کے ہمراہ مبعوث کیا گیا ہے۔“ ایک اور سند کے ساتھ یہ بات منقول ہے کہ نبی اکرم صلی اللہ علیہ وسلم نے فرمایا: ”مجھے جامع کلمات کے ہمراہ مبعوث کیا گیا۔ میری مدد کی گئی، ایک مرتبہ میں سویا ہوا تھا تو میرے پاس زمین کے خزانوں کی چابیاں لائی گئیں اور میرے ہاتھ میں رکھ دی گئیں۔“ سیدنا ابوہریرہ رضی اللہ عنہ فرماتے ہیں: نبی اکرم صلی اللہ علیہ وسلم تو (دنیا سے) تشریف لے گئے اور تم لوگ وہ چیزیں حاصل کر رہے ہو۔ [صحیح ابن حبان/كتاب التاريخ/حدیث: 6363]

اردو ترجمہ · UrduUnverified translation

سیدنا جابر بن عبداللہ رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”دنیا کی چابیاں میرے پاس ایک ابلق گھوڑے پر لاد کر لائی گئیں، جس پر ریشم کی بنی ہوئی چادر موجود تھی۔“ [صحیح ابن حبان/كتاب التاريخ/حدیث: 6364]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں کہ سیدنا جبرائیل علیہ السلام نبی اکرم صلی اللہ علیہ وسلم کے پاس بیٹھے ہوئے تھے، اسی دوران انہوں نے آسمان کی طرف دیکھا جس سے ایک فرشتہ نازل ہوا، سیدنا جبرائیل علیہ السلام نے نبی اکرم صلی اللہ علیہ وسلم سے کہا: یہ فرشتہ آج سے پہلے کبھی بھی نازل نہیں ہوا، تو وہ نیچے آ گیا، اس نے عرض کی: اے سیدنا محمد صلی اللہ علیہ وسلم ! آپ کے پروردگار نے مجھے آپ صلی اللہ علیہ وسلم کی خدمت میں بھیجا ہے، کیا آپ یہ چاہتے ہیں کہ اللہ تعالیٰ آپ صلی اللہ علیہ وسلم کو بادشاہ بنا دے یا بندے اور رسول رہنا چاہتے ہیں؟ سیدنا جبرائیل علیہ السلام نے نبی اکرم صلی اللہ علیہ وسلم سے کہا: اے سیدنا محمد صلی اللہ علیہ وسلم ! آپ اپنے پروردگار کی بارگاہ میں تواضع اختیار کریں، تو نبی اکرم صلی اللہ علیہ وسلم نے فرمایا: ”جی نہیں بلکہ میں بندہ اور رسول رہنا چاہتا ہوں۔“ [صحیح ابن حبان/كتاب التاريخ/حدیث: 6365]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کا اس وقت تک وصال نہیں ہوا جب تک آپ صلی اللہ علیہ وسلم کے لیے یہ بات حلال قرار نہیں دی گئی کہ آپ صلی اللہ علیہ وسلم جتنی چاہیں شادیاں کر سکتے ہیں۔ (امام ابن حبان رحمہ اللہ فرماتے ہیں:) اس بات کا احتمال موجود ہے کہ پہلے نبی اکرم صلی اللہ علیہ وسلم کے لیے مخصوص تعداد سے زیادہ خواتین کے ساتھ شادی کرنے کو ممنوع قرار دیا گیا ہو اور پھر آپ کے وصال سے پہلے (کسی بھی متعین تعداد کے بغیر) خواتین کے ساتھ شادی کرنا حلال قرار دے دیا گیا ہو۔ یہ آپ صلی اللہ علیہ وسلم پر کیا جانے والا خصوصی فضل تھا۔ اس صورت میں حدیث اور کتاب اللہ کے درمیان کوئی تضاد اور اختلاف باقی نہیں رہے گا اور اس بات پر دلالت سیدہ عائشہ رضی اللہ عنہا کا یہ قول کرتا ہے کہ نبی اکرم صلی اللہ علیہ وسلم کا وصال اس وقت تک نہیں ہوا، جب تک آپ کے لیے (کسی متعین تعداد کے بغیر) خواتین (کے ساتھ شادی کرنا) حلال قرار نہیں دے دیا گیا، تو سیدہ عائشہ صدیقہ رضی اللہ عنہا کی اس کے ذریعے مراد یہ ہے: یہ ایک ایسی اباحت تھی جو اس سے پہلے موجود ممنوعیت کے بعد آئی جیسا کہ ہم پہلے ذکر کر چکے ہیں۔ [صحیح ابن حبان/كتاب التاريخ/حدیث: 6366]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: مجھے ان خواتین پر بڑا غصہ آتا تھا جو خود کو نبی اکرم صلی اللہ علیہ وسلم کے ساتھ شادی کے لیے پیش کر دیتی تھیں، میں یہ سوچا کرتی تھی: کیا کوئی عورت بھی اپنے ساتھ شادی کی پیشکش کر سکتی ہے؟ جب اللہ تعالیٰ نے یہ آیت نازل کی: ﴿تُرْجِي مَنْ تَشَاءُ مِنْهُنَّ وَتُؤْوِي إِلَيْكَ مَنْ تَشَاءُ ۖ وَمَنِ ابْتَغَيْتَ مِمَّنْ عَزَلْتَ﴾ [سورة الأحزاب: 51] تو سیدہ عائشہ رضی اللہ عنہا کہتی ہیں: میں نے کہا: اللہ کی قسم! میں نے دیکھا ہے کہ آپ کا پروردگار آپ کی خواہش پوری کرنے میں جلدی کرتا ہے۔ [صحیح ابن حبان/كتاب التاريخ/حدیث: 6367]

اردو ترجمہ · UrduUnverified translation

حزر بیان کرتے ہیں کہ ایک شخص نے سیدہ عائشہ رضی اللہ عنہا سے نبی اکرم صلی اللہ علیہ وسلم کی وراثت کے بارے میں دریافت کیا تو سیدہ عائشہ رضی اللہ عنہا نے فرمایا: کیا تم نبی اکرم صلی اللہ علیہ وسلم کی وراثت کے بارے میں مجھ سے سوال کر رہے ہو؟ تمہارا باپ نہ رہے، اللہ کی قسم! نبی اکرم صلی اللہ علیہ وسلم نے وراثت میں کوئی دینار یا درہم یا غلام یا کنیز یا بکری یا اونٹ نہیں چھوڑا تھا۔ [صحیح ابن حبان/كتاب التاريخ/حدیث: 6368]

اردو ترجمہ · UrduUnverified translation

سیدنا انس رضی اللہ عنہ کے بارے میں یہ بات منقول ہے، انہوں نے نبی اکرم صلی اللہ علیہ وسلم کا ذکر کرتے ہوئے یہ بات بتائی کہ آپ صلی اللہ علیہ وسلم سب سے بہتر تھے، سب سے زیادہ سخی تھے اور سب سے زیادہ بہادر تھے۔ ایک مرتبہ اہل مدینہ خوف کا شکار ہوئے، لوگ آواز کی سمت گئے تو ان کی ملاقات نبی اکرم صلی اللہ علیہ وسلم سے ہوئی، آپ صلی اللہ علیہ وسلم ان لوگوں سے پہلے ہی آواز کی طرف چلے گئے تھے۔ آپ صلی اللہ علیہ وسلم سیدنا ابوطلحہ رضی اللہ عنہ کے گھوڑے کی ننگی پیٹھ پر سوار تھے، اس پر زین موجود نہ تھی اور نبی اکرم صلی اللہ علیہ وسلم کی گردن میں تلوار تھی۔ آپ صلی اللہ علیہ وسلم نے لوگوں سے فرمایا: ”تم لوگ گھبراؤ نہیں“، آپ صلی اللہ علیہ وسلم نے ان لوگوں کو واپس کیا، پھر آپ صلی اللہ علیہ وسلم نے اس گھوڑے کے بارے میں فرمایا: ”ہم نے اسے «بَحْرًا» ”سمندر“ پایا، بے شک یہ «بَحْرٌ» ”سمندر“ ہے“ (یعنی یہ انتہائی تیز رفتار ہے)۔ [صحیح ابن حبان/كتاب التاريخ/حدیث: 6369]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم سب سے زیادہ سخی تھے اور رمضان کے مہینے میں آپ صلی اللہ علیہ وسلم اور زیادہ سخی ہو جاتے تھے، جب آپ صلی اللہ علیہ وسلم کی ملاقات سیدنا جبرائیل علیہ السلام سے ہوتی تھی، سیدنا جبرائیل علیہ السلام روزانہ رات کے وقت آپ صلی اللہ علیہ وسلم کی خدمت میں حاضر ہوتے تھے اور آپ صلی اللہ علیہ وسلم کے ساتھ قرآن کا دور کیا کرتے تھے، جب سیدنا جبرائیل علیہ السلام آپ صلی اللہ علیہ وسلم کی خدمت میں (قرآن کا دور کرنے کے لیے) حاضر ہوتے تھے تو نبی اکرم صلی اللہ علیہ وسلم اس وقت چلتی ہوئی ہوا سے بھی زیادہ سخی ہوتے تھے۔ [صحیح ابن حبان/كتاب التاريخ/حدیث: 6370]