Hadith 1090–1123

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب تم لباس پہنو اور جب تم وضو کرو، تو اپنے دائیں طرف والے حصے سے آغاز کرو۔“ [صحیح ابن حبان/كتاب الطهارة/حدیث: 1090]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کو، جہاں تک ہو سکے، وضو کرتے ہوئے، جوتا پہنتے ہوئے اور کنگھی کرتے ہوئے دائیں طرف سے آغاز کرنا پسند تھا۔ شعبہ نامی راوی کہتے ہیں: میں نے اشعث نامی راوی کو واسط میں یہ بیان کرتے سنا ہے: ”(نبی اکرم صلی اللہ علیہ وسلم ) دائیں طرف کو پسند کرتے تھے“، پھر انہوں نے تمام معاملات کا ذکر کیا، پھر انہوں نے یہ بات بیان کی کہ میں نے انہیں کوفہ میں یہ کہتے سنا ہے: ”نبی اکرم صلی اللہ علیہ وسلم کو جہاں تک ہو سکے دائیں طرف سے آغاز کرنا پسند تھا۔“ [صحیح ابن حبان/كتاب الطهارة/حدیث: 1091]

اردو ترجمہ · UrduUnverified translation

مطلب بن حنطب بیان کرتے ہیں: سیدنا عبداللہ بن عمر رضی اللہ عنہما تین مرتبہ وضو کرتے تھے اور اس بات کی نسبت نبی اکرم صلی اللہ علیہ وسلم کی طرف کرتے تھے۔ [صحیح ابن حبان/كتاب الطهارة/حدیث: 1092]

اردو ترجمہ · UrduUnverified translation

سیدنا عبداللہ بن زید رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے ہاں گھر میں موجود تھے، آپ صلی اللہ علیہ وسلم نے وضو کا پانی منگوایا، میں پیتل کے بنے برتن میں پانی لے کر حاضر ہوا تو نبی اکرم صلی اللہ علیہ وسلم نے وضو کیا؛ آپ صلی اللہ علیہ وسلم نے اپنے چہرے کو تین مرتبہ دھویا، دونوں بازو دو مرتبہ دھوئے، پھر آپ صلی اللہ علیہ وسلم نے اپنے سر کا مسح کیا، آپ صلی اللہ علیہ وسلم اپنے ہاتھوں کو آگے سے پیچھے کی طرف لے کر گئے اور پیچھے سے آگے لے کر آئے، اور آپ صلی اللہ علیہ وسلم نے اپنے دونوں پاؤں دھوئے۔ [صحیح ابن حبان/كتاب الطهارة/حدیث: 1093]

اردو ترجمہ · UrduUnverified translation

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ”دو مرتبہ“ وضو کیا۔ [صحیح ابن حبان/كتاب الطهارة/حدیث: 1094]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں: میں نبی اکرم صلی اللہ علیہ وسلم کے وضو کے بارے میں تم سب سے زیادہ علم رکھتا ہوں، نبی اکرم صلی اللہ علیہ وسلم نے ”ایک مرتبہ“ (بھی) وضو کیا۔ [صحیح ابن حبان/كتاب الطهارة/حدیث: 1095]

اردو ترجمہ · UrduUnverified translation

سیدنا جابر بن عبداللہ رضی اللہ عنہما بیان کرتے ہیں کہ ہم لوگ نبی اکرم صلی اللہ علیہ وسلم کے ہمراہ غزوہ ذات الرقاع میں روانہ ہوئے، مسلمانوں سے تعلق رکھنے والے ایک شخص نے مشرکین سے تعلق رکھنے والے ایک شخص کی بیوی کو قتل کر دیا (یا اسے نقصان پہنچایا)۔ جب نبی اکرم صلی اللہ علیہ وسلم واپس تشریف لا رہے تھے، تو اسی دوران اس عورت کا شوہر وہاں آ چکا تھا جو پہلے وہاں موجود نہیں تھا۔ جب اسے اس بارے میں بتایا گیا، تو اس نے یہ قسم اٹھائی تھی کہ وہ اس وقت تک باز نہیں آئے گا جب تک سیدنا محمد صلی اللہ علیہ وسلم کے ساتھیوں میں سے کسی کا خون نہیں بہائے گا۔ وہ نبی اکرم صلی اللہ علیہ وسلم کا پیچھا کرتے ہوئے آیا۔ نبی اکرم صلی اللہ علیہ وسلم نے ایک جگہ پڑاؤ کیا اور ارشاد فرمایا: ”آج رات کون یہاں ہماری پہرے داری کرے گا؟“ تو مہاجرین سے تعلق رکھنے والے ایک شخص اور انصار سے تعلق رکھنے والے ایک شخص نے خود کو پیش کیا۔ ان دونوں نے عرض کی: «يَا رَسُولَ اللّٰهِ» ”یا رسول اللہ! ہم ایسا کریں گے۔“ نبی اکرم صلی اللہ علیہ وسلم نے فرمایا: ”تم گھاٹی کے سرے پر رہنا۔“ راوی بیان کرتے ہیں کہ نبی اکرم صلی اللہ علیہ وسلم اور آپ کے اصحاب نے وادی کی گھاٹی میں پڑاؤ کر لیا۔ جب یہ دونوں صاحبان گھاٹی کے سرے کی طرف جانے کے لیے نکلے تو انصاری شخص نے مہاجر سے کہا: آپ کو کیا پسند ہے، میں رات کے کون سے حصے میں آپ کی جگہ کفایت کروں، ابتدائی حصے میں یا آخری حصے میں؟ تو مہاجر نے کہا: اس کے ابتدائی حصے میں کفایت کرو۔ راوی بیان کرتے ہیں: مہاجر شخص لیٹ کر سو گیا۔ انصاری اٹھ کر نماز ادا کرنے لگا، اس دوران اس عورت کا شوہر آیا، جب اس نے ایک شخص کے ہیولے کو دیکھا تو اسے اندازہ ہو گیا کہ یہ لوگوں کا پہرے دار ہے۔ اس نے ایک تیر مارا وہ جا کر اس انصاری کو لگا۔ انصاری نے اس تیر کو نکال کر ایک طرف رکھا اور کھڑا ہو کر نماز ادا کرتا رہا، پھر اس شخص نے انصاری کو دوسرا تیر مارا وہ بھی اسے لگا۔ انصاری نے اسے باہر نکالا اور کھڑا ہو کر نماز ادا کرتا رہا۔ پھر اس نے تیسری مرتبہ تیر مارا وہ بھی اسے لگا۔ انصاری نے اسے باہر نکالا اور اسے ایک طرف رکھ دیا، پھر وہ رکوع میں گیا، پھر اس نے سجدہ کیا، پھر اس نے اپنے ساتھی کو بیدار کیا اور کہا: اٹھو! کہ مجھ پر حملہ ہو گیا ہے۔ تو وہ (مہاجر) فوراً اٹھ گیا۔ جب اس شخص نے ان دو آدمیوں کو دیکھا تو اسے اندازہ ہو گیا کہ اسے مشکل پیش آ جائے گی، تو وہ شخص بھاگ گیا۔ جب مہاجر نے انصاری کا بہتا ہوا خون دیکھا تو بولا: «سُبْحَانَ اللّٰهِ» ”سبحان اللہ! جب اس نے تمہیں پہلی مرتبہ تیر مارا تھا، تو تم نے اس وقت مجھے بیدار کیوں نہیں کیا؟“ تو انصاری نے جواب دیا: میں ایک سورت کی تلاوت کر رہا تھا، تو مجھے یہ اچھا نہیں لگا کہ میں اسے ختم کرنے سے پہلے درمیان میں ہی منقطع کر دوں، لیکن جب اس نے مسلسل مجھے تیر مارے تو میں رکوع میں چلا گیا اور میں نے تمہیں اطلاع دی۔ «وَاللّٰهِ» ”اللہ کی قسم! اگر مجھے اس بات کا اندیشہ نہ ہوتا کہ نبی اکرم صلی اللہ علیہ وسلم نے مجھے جس کام کی حفاظت کا حکم دیا ہے میں اسے ضائع کر دوں گا، تو میری اس سورت کو ختم کرنے سے پہلے میری جان چلی جاتی یا پھر یہ ہے کہ میں اسے مکمل کر لیتا۔“ [صحیح ابن حبان/كتاب الطهارة/حدیث: 1096]

اردو ترجمہ · UrduUnverified translation

معدان بن طلحہ بیان کرتے ہیں کہ سیدنا ابودرداء رضی اللہ عنہ نے انہیں یہ بات بتائی کہ نبی اکرم صلی اللہ علیہ وسلم نے قے کر کے روزہ ختم کر دیا تھا، (راوی کہتے ہیں) پھر میری ملاقات مسجدِ دمشق میں سیدنا ثوبان رضی اللہ عنہ سے ہوئی، میں نے ان کے سامنے اس بات کا تذکرہ کیا تو انہوں نے فرمایا: ”انہوں نے یعنی (سیدنا ابودرداء رضی اللہ عنہ) نے سچ کہا ہے، میں نے نبی اکرم صلی اللہ علیہ وسلم کو وضو کروایا تھا۔“ [صحیح ابن حبان/كتاب الطهارة/حدیث: 1097]

اردو ترجمہ · UrduUnverified translation

سیدنا عبداللہ بن عباس رضی اللہ عنہما بیان کرتے ہیں کہ ایک مرتبہ نبی اکرم صلی اللہ علیہ وسلم نے رات کی نماز ادا کرنے میں تاخیر کر دی، یہاں تک کہ لوگ سو گئے، پھر وہ بیدار ہو گئے، پھر وہ سو گئے، پھر بیدار ہو گئے، تو سیدنا عمر رضی اللہ عنہ نے عرض کی: نماز، نماز! تو نبی اکرم صلی اللہ علیہ وسلم باہر تشریف لائے (سیدنا ابن عباس رضی اللہ عنہما بیان کرتے ہیں) گویا کہ یہ منظر آج بھی میری نگاہ میں ہے، آپ کے سر مبارک سے پانی کے قطرے ٹپک رہے تھے اور آپ نے اپنے دونوں ہاتھ سر پر رکھے ہوئے تھے۔ آپ صلی اللہ علیہ وسلم نے ارشاد فرمایا: ”اگر مجھے اپنی امت کے مشقت میں مبتلا ہونے کا اندیشہ نہ ہوتا، تو میں انہیں یہ ہدایت کرتا کہ وہ اسے اسی طرح ادا کریں (یعنی عشاء کی نماز کو اسی وقت میں ادا کریں)۔“ [صحیح ابن حبان/كتاب الطهارة/حدیث: 1098]

اردو ترجمہ · UrduUnverified translation

سیدنا عبداللہ بن عمر رضی اللہ عنہما بیان کرتے ہیں کہ ایک رات نبی اکرم صلی اللہ علیہ وسلم عشاء کی نماز کے وقت کسی کام میں مصروف رہے، یہاں تک کہ ہم لوگ مسجد میں ہی سو گئے، پھر ہم بیدار ہو گئے، پھر ہم سو گئے، پھر بیدار ہو گئے، پھر نبی اکرم صلی اللہ علیہ وسلم تشریف لائے، تو آپ صلی اللہ علیہ وسلم نے ارشاد فرمایا: ”اس وقت روئے زمین میں تمہارے علاوہ کوئی شخص (اس) نماز کا انتظار نہیں کر رہا۔“ [صحیح ابن حبان/كتاب الطهارة/حدیث: 1099]

اردو ترجمہ · UrduUnverified translation

زر بن حبیش بیان کرتے ہیں: میں سیدنا صفوان بن عسال مرادی رضی اللہ عنہ کی خدمت میں حاضر ہوا۔ انہوں نے مجھ سے دریافت کیا: ”تمہیں کیا کام ہے؟“ میں نے ان سے گزارش کی: ”علم کا حصول۔“ انہوں نے فرمایا: ”فرشتے طالب علم کی طلب سے راضی ہو کر اپنے پر اس کے لیے بچھا دیتے ہیں۔“ میں نے کہا: پیشاب کرنے کے بعد (وضو کرتے ہوئے) موزوں پر مسح کرنے کے بارے میں میرے ذہن میں کچھ الجھن ہے۔ آپ نبی اکرم صلی اللہ علیہ وسلم کے صحابی ہیں، میں آپ کے پاس اس بارے میں دریافت کرنے کے لیے حاضر ہوا ہوں کہ کیا آپ نے اس بارے میں نبی اکرم صلی اللہ علیہ وسلم کی زبانی کوئی بات سنی ہے؟ تو انہوں نے جواب دیا: جی ہاں، نبی اکرم صلی اللہ علیہ وسلم ہمیں یہ ہدایت کرتے تھے: ”جب ہم لوگ سفر کی حالت میں ہوں۔ (راوی کو شک ہے شاید یہ الفاظ ہیں) جب ہم مسافر ہوں، تو ہم تین دن اور تین راتوں تک اپنے موزے نہ اتاریں، البتہ جنابت کا حکم مختلف ہے، تاہم پاخانہ یا پیشاب یا نیند کی وجہ سے (وضو ختم ہونے کی صورت میں) ہم موزے نہ اتاریں۔“ (امام ابن حبان رحمہ اللہ فرماتے ہیں:) «الرُّقَادُ» (یعنی سونے) کا ایک آغاز ہے اور ایک اختتام ہے۔ اس کا آغاز وہ «النُّعَاسُ» (یعنی اونگھ) ہے، جو نیند کے شروع میں ہوتی ہے، اور اس کی حالت یہ ہوتی ہے کہ اس دوران اگر آدمی کے ساتھ کلام کیا جائے، تو وہ سن لیتا ہے، اور اگر وہ بے وضو ہو جائے، تو اسے یہ پتا ہوتا ہے، البتہ اگر وہ ایک طرف ڈھلک جائے (تو معاملہ مختلف ہے) اور اس کا اختتام عقل (یعنی شعور) کا زائل ہو جانا ہے۔ اور اس کی حالت یہ ہوتی ہے کہ جب آدمی اس حالت کے دوران بے وضو ہو جائے، تو اسے پتا نہیں چلتا اور اگر اس کے ساتھ کلام کیا جائے، تو اسے سمجھ نہیں آتا، تو اونگھ کسی بھی شخص پر وضو کو لازم نہیں کرتی، خواہ وہ تھوڑی ہو یا زیادہ ہو، خواہ اونگھنے کی حالت کوئی سی بھی ہو، جبکہ نیند وضو کو لازم کر دیتی ہے، خواہ وہ کسی بھی حالت میں پائی جائے جو سونے والے کی ہوتی ہے۔ اس کے ہمراہ بعض اوقات لفظ «النَّوْمُ» (یعنی نیند) کا اطلاق «النُّعَاسُ» (یعنی اونگھ) پر بھی ہوتا ہے، اور لفظ «النُّعَاسُ» کا اطلاق لفظ «النَّوْمُ» پر بھی ہوتا ہے، لیکن ان دونوں کا معنی مختلف ہے۔ اللہ تعالیٰ نے ان کے درمیان فرق کو بیان کرتے ہوئے یہ بات ارشاد فرمائی ہے: ﴿لَا تَأْخُذُهُ سِنَةٌ وَلَا نَوْمٌ﴾ [سورة البقرة: 255] ”اسے اونگھ نہیں آتی اور نیند بھی نہیں آتی ہے۔“ تو جب نبی اکرم صلی اللہ علیہ وسلم نے سیدنا صفوان رضی اللہ عنہ کی نقل کردہ روایت میں نیند، پاخانے اور پیشاب کو وضو لازم کرنے والی چیزوں میں شامل کر لیا، تو جس طرح پیشاب اور پاخانے میں کوئی فرق نہیں ہے، یہ دونوں جس کسی سے بھی صادر ہوں گے خواہ وہ تھوڑے ہوں یا زیادہ، تو ایسے شخص پر وضو کرنا لازم ہو جائے گا، خواہ پیشاب کرنے والا شخص بیٹھ کر کرے یا کھڑا ہو کر کرے یا رکوع کی حالت میں کرے یا سجدے کی حالت میں کرے، تو ہر وہ شخص جس کی عقل زائل ہو جائے اور وہ سو جائے، تو اس پر وضو کرنا لازم ہو جائے گا، خواہ اس کی حالتوں میں اختلاف ہو یا حالتوں میں اتفاق ہو، کیونکہ اس میں بنیادی علت عقل کا زائل ہو جانا ہے، حالت کا تبدیل ہونا بنیادی علت نہیں ہے، جیسا کہ پیشاب اور پاخانے میں علت ان دونوں کا پایا جانا ہے، پیشاب کرنے والے یا پاخانہ کرنے والے کی حالت کا متغیر ہونا (علت نہیں) ہے۔ [صحیح ابن حبان/كتاب الطهارة/حدیث: 1100]

اردو ترجمہ · UrduUnverified translation

سیدنا مقداد بن اسود رضی اللہ عنہ بیان کرتے ہیں: سیدنا علی بن ابو طالب رضی اللہ عنہ نے انہیں ہدایت کی کہ وہ نبی اکرم صلی اللہ علیہ وسلم سے ایسے شخص کے بارے میں دریافت کریں کہ جب وہ اپنی بیوی کے قریب ہوتا ہے (تو اس کی مذی خارج ہو جاتی ہے) تو ایسے شخص پر کیا بات لازم ہو گی (سیدنا علی رضی اللہ عنہ نے وضاحت کی)، کیونکہ نبی اکرم صلی اللہ علیہ وسلم کی صاحب زادی میری اہلیہ ہے، اس لیے مجھے خود ان سے حیا آتی ہے۔ سیدنا مقداد رضی اللہ عنہ بیان کرتے ہیں: میں نے نبی اکرم صلی اللہ علیہ وسلم سے اس بارے میں دریافت کیا، تو آپ صلی اللہ علیہ وسلم نے ارشاد فرمایا: ”جب وہ شخص اس طرح کی صورت حال پائے، تو اپنی شرم گاہ پر پانی چھڑک لے اور نماز کے وضو کی طرح وضو کر لے۔“ (امام ابن حبان رحمہ اللہ فرماتے ہیں:) سیدنا مقداد بن اسود رضی اللہ عنہ کا انتقال 33 ہجری میں ہوا، جبکہ سلیمان بن یسار کا انتقال 90 ہجری میں ہوا، جس وقت سلیمان بن یسار نے سیدنا مقداد رضی اللہ عنہ سے احادیث کا سماع کیا تھا، اس وقت ان کی عمر 10 سال سے کم تھی۔ [صحیح ابن حبان/كتاب الطهارة/حدیث: 1101]

اردو ترجمہ · UrduUnverified translation

سیدنا علی بن ابی طالب رضی اللہ عنہ بیان کرتے ہیں: میں ایک ایسا شخص تھا، جس کی مذی بکثرت خارج ہوتی تھی۔ میں نے نبی اکرم صلی اللہ علیہ وسلم سے سوال کیا، تو نبی اکرم صلی اللہ علیہ وسلم نے ارشاد فرمایا: ”جب تم مذی کو دیکھو تو اپنی شرمگاہ کو دھو لو اور جب تم پانی (یعنی منی) کو دیکھو تو تم غسل کرو۔“ (امام ابن حبان رحمہ اللہ فرماتے ہیں:) (اس بات کا امکان موجود ہے کہ سیدنا علی بن ابی طالب رضی اللہ عنہ نے سیدنا مقداد رضی اللہ عنہ کو اس بات کی ہدایت کی ہو کہ وہ نبی اکرم صلی اللہ علیہ وسلم سے اس چیز کا حکم دریافت کریں۔ سیدنا مقداد رضی اللہ عنہ نے آپ صلی اللہ علیہ وسلم سے دریافت کیا۔ آپ نے انہیں بتایا پھر سیدنا مقداد رضی اللہ عنہ نے سیدنا علی رضی اللہ عنہ کو اس بارے میں بتایا پھر سیدنا علی رضی اللہ عنہ نے خود نبی اکرم صلی اللہ علیہ وسلم سے اس چیز کے بارے میں دریافت کیا جس کے بارے میں سیدنا مقداد رضی اللہ عنہ نے انہیں بتایا تھا، تو یہ دو سوال ہوں گے جو دو مختلف موقعوں پر کیے گئے۔ اور اس بات کی دلیل کہ یہ دونوں سوال مختلف موقعوں پر کیے گئے تھے یہ ہے کہ جب سیدنا علی رضی اللہ عنہ نے نبی اکرم صلی اللہ علیہ وسلم سے سوال کیا تھا تو آپ نے منی کے نزول کے وقت انہیں غسل کرنے کا حکم دیا تھا اور یہ بات سیدنا مقداد رضی اللہ عنہ کی نقل کردہ روایت میں نہیں ہے۔ یہ بات آپ کی رہنمائی اس چیز کی طرف کرے گی کہ یہ دو مختلف احادیث ہیں)۔ [صحیح ابن حبان/كتاب الطهارة/حدیث: 1102]

اردو ترجمہ · UrduUnverified translation

سیدنا سہل بن حنیف رضی اللہ عنہ بیان کرتے ہیں: مجھے مذی کی وجہ سے مشقت کا سامنا کرنا پڑتا تھا اور میں اس کی وجہ سے بکثرت غسل کیا کرتا تھا۔ میں نے نبی اکرم صلی اللہ علیہ وسلم سے اس بارے میں دریافت کیا تو آپ صلی اللہ علیہ وسلم نے ارشاد فرمایا: ”تمہارے لیے اس کی وجہ سے وضو کر لینا ہی کافی ہے۔“ میں نے عرض کی: اگر یہ میرے کپڑے پر لگ جائے تو پھر کیا ہو گا؟ نبی اکرم صلی اللہ علیہ وسلم نے فرمایا: ”تمہارے لیے اتنا ہی کافی ہے کہ تم ایک چلو میں پانی لو اور اسے اپنے کپڑے پر اس جگہ چھڑک لو جہاں تمہیں نظر آ رہا ہے کہ یہ لگی ہوئی ہے۔“ [صحیح ابن حبان/كتاب الطهارة/حدیث: 1103]

اردو ترجمہ · UrduUnverified translation

سیدنا علی بن ابو طالب رضی اللہ عنہ بیان کرتے ہیں: میں ایسا شخص تھا، جس کی مذی بکثرت خارج ہوتی تھی۔ میں نے نبی اکرم صلی اللہ علیہ وسلم سے دریافت کیا، تو آپ صلی اللہ علیہ وسلم نے ارشاد فرمایا: ”جب تم پانی (مذی) کو دیکھو تو اپنی شرمگاہ کو دھو کر وضو کر لو اور جب تم منی دیکھو تو تم غسل کرو۔“ [صحیح ابن حبان/كتاب الطهارة/حدیث: 1104]

اردو ترجمہ · UrduUnverified translation

سیدنا رافع بن خدیج رضی اللہ عنہ بیان کرتے ہیں: سیدنا علی رضی اللہ عنہ نے سیدنا عمار رضی اللہ عنہ کو یہ ہدایت کی کہ وہ نبی اکرم صلی اللہ علیہ وسلم سے مذی کے بارے میں دریافت کریں تو نبی اکرم صلی اللہ علیہ وسلم نے ارشاد فرمایا: ”وہ شخص اپنی شرمگاہ کو دھو لے اور وضو کر لے۔“ [صحیح ابن حبان/كتاب الطهارة/حدیث: 1105]

اردو ترجمہ · UrduUnverified translation

سیدنا مقداد بن اسود رضی اللہ عنہ بیان کرتے ہیں کہ سیدنا علی بن ابوطالب رضی اللہ عنہ نے انہیں یہ ہدایت کی کہ وہ نبی اکرم صلی اللہ علیہ وسلم سے ایسے شخص کے بارے میں دریافت کریں جو اپنی بیوی کے قریب ہوتا ہے، تو اس کی مذی خارج ہو جاتی ہے، ایسے شخص پر کیا چیز لازم ہو گی؟ (سیدنا علی رضی اللہ عنہ نے وضاحت کی) کہ نبی اکرم صلی اللہ علیہ وسلم کی صاحبزادی میری اہلیہ ہے، اس لیے مجھے خود نبی اکرم صلی اللہ علیہ وسلم سے دریافت کرتے ہوئے شرم آتی ہے۔ سیدنا مقداد رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم سے اس بارے میں دریافت کیا، تو آپ نے ارشاد فرمایا: ”جب کوئی شخص اس طرح کی صورت حال کا سامنا کرے تو اسے اپنی شرمگاہ پر پانی چھڑک لینا چاہیے اور نماز کے وضو کی طرح وضو کر لینا چاہیے۔“ (امام ابن حبان رحمہ اللہ فرماتے ہیں:) ان روایات کو سننے والے بعض ایسے افراد جنہوں نے علم حدیث کو اس کے اصل ماخذ سے حاصل نہیں کیا اور حقیقت کو اس کے اپنے دائرے میں نہیں گھمایا، وہ اس غلط فہمی کا شکار ہو جاتے ہیں کہ ان روایات کے درمیان تضاد اور اختلاف پایا جاتا ہے، کیونکہ ابوعبدالرحمن سلمی کی نقل کردہ روایت میں یہ ہے: ”میں نے نبی اکرم صلی اللہ علیہ وسلم سے سوال کیا“، جبکہ ایاس بن خلیفہ کی نقل کردہ روایت میں ہے کہ انہوں نے سیدنا عمار رضی اللہ عنہ کو ہدایت کی تھی کہ وہ نبی اکرم صلی اللہ علیہ وسلم سے سوال کریں، جبکہ سلیمان بن یسار کی نقل کردہ روایت میں ہے کہ انہوں نے سیدنا مقداد رضی اللہ عنہ کو ہدایت کی تھی کہ وہ نبی اکرم صلی اللہ علیہ وسلم سے سوال کریں، حالانکہ ان روایات کے درمیان کوئی اختلاف نہیں ہے، کیونکہ اس بات کا احتمال موجود ہے کہ پہلے سیدنا علی رضی اللہ عنہ نے سیدنا عمار رضی اللہ عنہ کو یہ حکم دیا کہ وہ نبی اکرم صلی اللہ علیہ وسلم سے سوال کریں، انہوں نے نبی اکرم صلی اللہ علیہ وسلم سے سوال کیا، پھر آپ نے سیدنا مقداد رضی اللہ عنہ کو یہ حکم دیا ہو کہ وہ نبی اکرم صلی اللہ علیہ وسلم سے سوال کریں، تو انہوں نے بھی نبی اکرم صلی اللہ علیہ وسلم سے سوال کیا ہو، پھر سیدنا علی رضی اللہ عنہ نے بذات خود نبی اکرم صلی اللہ علیہ وسلم سے یہ سوال کیا ہو۔ میں نے جو چیز ذکر کی ہے اس کے صحیح ہونے کی دلیل یہ ہے کہ ان میں سے ہر روایت کا متن دوسری روایت کے متن سے مختلف ہے، کیونکہ ابوعبدالرحمن سلمی کی نقل کردہ روایت میں یہ الفاظ ہیں: ”میں ایک ایسا شخص تھا جس کی مذی بکثرت خارج ہوتی تھی، پھر میں نے نبی اکرم صلی اللہ علیہ وسلم سے سوال کیا، تو نبی اکرم صلی اللہ علیہ وسلم نے ارشاد فرمایا: تم جب پانی کو دیکھو تو غسل کرو۔“ ایاس بن خلیفہ کی روایت میں الفاظ ہیں: ”سیدنا علی رضی اللہ عنہ نے سیدنا عمار رضی اللہ عنہ کو یہ حکم دیا کہ وہ نبی اکرم صلی اللہ علیہ وسلم سے سوال کریں، نبی اکرم صلی اللہ علیہ وسلم نے ارشاد فرمایا: وہ شخص اپنی شرمگاہ کو دھو کر وضو کر لے۔“ اس روایت میں منی کا تذکرہ نہیں ہے جو ابوعبدالرحمن کی نقل کردہ روایت میں ہے، جبکہ سیدنا مقداد بن اسود رضی اللہ عنہ کی نقل کردہ روایت میں مذکور ہے کہ انہوں نے پہلے سوال کیا تھا، تو یہ پہلے والے دو سوالات نہیں ہیں جو ہم پہلے ذکر کر چکے ہیں، سیدنا مقداد رضی اللہ عنہ کی روایت میں یہ ہے کہ سیدنا علی بن ابوطالب رضی اللہ عنہ نے انہیں یہ حکم دیا تھا کہ وہ نبی اکرم صلی اللہ علیہ وسلم سے ایسے شخص کے بارے میں سوال کریں جو اپنی بیوی کے قریب ہوتا ہے، تو اس کی منی خارج ہوتی ہے، تو ایسے شخص پر کیا بات لازم ہو گی؟ کیونکہ نبی اکرم صلی اللہ علیہ وسلم کی صاحبزادی میری اہلیہ ہے، میں (اس لیے براہِ راست آپ سے یہ سوال نہیں کر سکتا)، تو ہم نے جو چیز ذکر کی ہے وہ اس بات پر دلالت کرتی ہے کہ یہ مختلف سوالات ہیں جو مختلف مواقع پر کیے گئے جن کی اپنی مخصوص علتیں ہیں، ان کے درمیان کوئی تضاد اور اختلاف نہیں ہے۔ [صحیح ابن حبان/كتاب الطهارة/حدیث: 1106]

اردو ترجمہ · UrduUnverified translation

سیدنا علی بن ابوطالب رضی اللہ عنہ بیان کرتے ہیں کہ میں ایک ایسا شخص تھا جس کی مذی بکثرت خارج ہوتی تھی، میں اس کی وجہ سے سردی کے موسم میں غسل کرتا تھا جس کی وجہ سے میری پشت کو تکلیف لاحق ہوتی تھی۔ میں نے اس بات کا تذکرہ نبی اکرم صلی اللہ علیہ وسلم سے کیا یا آپ صلی اللہ علیہ وسلم کے سامنے اس بات کا تذکرہ کیا گیا تو آپ صلی اللہ علیہ وسلم نے ارشاد فرمایا: ”تم ایسا نہ کرو، جب تم مذی دیکھو تو اپنی شرمگاہ کو دھو کر نماز کے وضو کی طرح وضو کرو اور جب تم پانی چھڑکو (یعنی منی خارج ہو) تو تم غسل کر لو۔“ [صحیح ابن حبان/كتاب الطهارة/حدیث: 1107]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں کہ وہ نبی اکرم صلی اللہ علیہ وسلم کے ساتھ ایک ہی برتن میں غسل کر لیا کرتی تھیں۔ [صحیح ابن حبان/كتاب الطهارة/حدیث: 1108]

اردو ترجمہ · UrduUnverified translation

سیدنا ابوقتادہ رضی اللہ عنہ بیان کرتے ہیں: نبی اکرم صلی اللہ علیہ وسلم نماز پڑھ لیتے تھے حالانکہ آپ نے سیدہ امامہ رضی اللہ عنہا کو اٹھایا ہوتا تھا جو نبی اکرم صلی اللہ علیہ وسلم کی نواسی تھیں۔ نبی اکرم صلی اللہ علیہ وسلم جب کھڑے ہوتے تھے، تو انہیں اٹھا لیتے تھے۔ جب سجدے میں جاتے تھے، تو انہیں ایک طرف (یعنی کھڑا کر دیتے تھے)۔ [صحیح ابن حبان/كتاب الطهارة/حدیث: 1109]

اردو ترجمہ · UrduUnverified translation

عمرو بن سلیم زرقی بیان کرتے ہیں، انہوں نے سیدنا ابوقتادہ رضی اللہ عنہ کو یہ بیان کرتے ہوئے سنا: ایک مرتبہ ہم نبی اکرم صلی اللہ علیہ وسلم کے دروازے پر بیٹھے ہوئے تھے، اسی دوران نبی اکرم صلی اللہ علیہ وسلم ہمارے پاس تشریف لائے، آپ صلی اللہ علیہ وسلم نے سیدہ امامہ بنت ابوالعاص رضی اللہ عنہا کو اٹھایا ہوا تھا، اس بچی کی والدہ سیدہ زینب رضی اللہ عنہا تھیں جو نبی اکرم صلی اللہ علیہ وسلم کی صاحبزادی تھیں، وہ ابھی کم سن بچی تھی، نبی اکرم صلی اللہ علیہ وسلم نے نماز ادا کی، تو بچی آپ صلی اللہ علیہ وسلم کے کندھے پر تھی، جب آپ صلی اللہ علیہ وسلم رکوع میں گئے، تو آپ صلی اللہ علیہ وسلم نے اس کو زمین پر ایک طرف (کھڑا) کر دیا، جب آپ صلی اللہ علیہ وسلم کھڑے ہوئے، تو آپ صلی اللہ علیہ وسلم نے دوبارہ اسے کندھے پر بٹھا لیا، یہاں تک کہ اسی طرح نبی اکرم صلی اللہ علیہ وسلم نے نماز مکمل کی۔ [صحیح ابن حبان/كتاب الطهارة/حدیث: 1110]

اردو ترجمہ · UrduUnverified translation

سیدہ عائشہ صدیقہ رضی اللہ عنہا بیان کرتی ہیں: میں اور نبی اکرم صلی اللہ علیہ وسلم ایک ہی برتن سے غسل کیا کرتے تھے، ہمارے ہاتھ اس برتن میں الگ ہوتے تھے اور اس میں ملتے تھے۔ [صحیح ابن حبان/كتاب الطهارة/حدیث: 1111]

اردو ترجمہ · UrduUnverified translation

عروہ بن زبیر بیان کرتے ہیں: میں مروان بن حکم کے پاس گیا، ہم نے وہاں اس بات کا ذکر شروع کیا کون سی صورتوں میں وضو کرنا لازم ہوتا ہے، تو مروان نے بتایا: سیدہ بسرہ بنت صفوان رضی اللہ عنہا نے مجھے یہ بات بتائی ہے، انہوں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جب کوئی شخص اپنی شرم گاہ کو چھو لے، تو اسے وضو کرنا چاہیے۔“ (امام ابن حبان رحمہ اللہ فرماتے ہیں:) ہم اس بات سے اللہ کی پناہ مانگتے ہیں، ہم اپنی کتابوں میں کوئی ایسی روایت نقل کریں جسے مروان بن حکم یا اس جیسے افراد نے نقل کیا ہو۔ وجہ یہ ہے، ہم اس چیز کو جائز نہیں سمجھتے کہ روایات میں سے غیر مستند روایات سے استدلال کیا جائے۔ حتیٰ کہ وہ ہمارے موقف کے موافق ہی کیوں نہ ہو اور مذاہب میں سے ہم صرف ان ہی روایات پر عمل کریں گے جو مستند ہوں۔ اگرچہ وہ ہمارے ائمہ کے قول کے خلاف ہوں۔ جہاں تک سیدہ بسرہ رضی اللہ عنہا کی نقل کردہ روایت کا تعلق ہے پیچھے ہم نے ذکر کیا ہے، تو عروہ بن زبیر نے یہ روایت مروان بن حکم کے حوالے سے سیدہ بسرہ رضی اللہ عنہا سے سنی ہے، لیکن انہوں نے اس پر قناعت نہیں کی، یہاں تک کہ مروان نے اپنے ایک سپاہی کو سیدہ بسرہ رضی اللہ عنہا کی خدمت میں بھیجا اور اس نے ان سے سوال کیا۔ پھر وہ ان لوگوں کے پاس گیا اور انہیں اس چیز کے بارے میں بتایا جو سیدہ بسرہ رضی اللہ عنہا نے بیان کی ہے۔ تو عروہ نے دوسری دفعہ یہ روایت سپاہی کے حوالے سے سیدہ بسرہ رضی اللہ عنہا سے سن لی، لیکن پھر انہوں نے اس پر بھی قناعت نہیں کی، یہاں تک کہ وہ خود سیدہ بسرہ رضی اللہ عنہا کے پاس گئے اور ان سے اس حدیث کو سنا تو یہ روایت عروہ کے حوالے سے سیدہ بسرہ رضی اللہ عنہا سے منقول ہے۔ یہ متصل ہے، یہ منقطع نہیں ہے۔ مروان اور اس کا سپاہی دو عاریت کے طور پر راوی ہوں گے جنہیں ان کی سند سے ساقط کر دیا۔ [صحیح ابن حبان/كتاب الطهارة/حدیث: 1112]

اردو ترجمہ · UrduUnverified translation

سیدہ بسرہ بنت صفوان رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا: ”جب کوئی شخص اپنی شرمگاہ کو چھو لے، تو اسے وضو کرنا چاہئے۔“ راوی بیان کرتے ہیں: عروہ نے اس بات کا انکار کیا ہے، پھر انہوں نے سیدہ بسرہ سے دریافت کیا تو اس خاتون نے اس بیان کی تصدیق کی۔ [صحیح ابن حبان/كتاب الطهارة/حدیث: 1113]

اردو ترجمہ · UrduUnverified translation

سیدہ بسرہ بنت صفوان رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جو شخص اپنی شرم گاہ کو چھو لے، تو اسے وضو کرنا چاہیے۔“ عروہ کہتے ہیں: میں نے سیدہ بسرہ رضی اللہ عنہا سے اس بارے میں دریافت کیا، تو انہوں نے اس بات کی تصدیق کی۔ [صحیح ابن حبان/كتاب الطهارة/حدیث: 1114]

اردو ترجمہ · UrduUnverified translation

سیدہ بسرہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص اپنی شرمگاہ کو چھو لے اسے چاہیے کہ وہ دوبارہ وضو کرے۔“ (امام ابن حبان رحمہ اللہ فرماتے ہیں:) اگر اس سے مراد دونوں ہاتھ دھونا ہوتا جس طرح بعض لوگوں نے یہ بات کہی ہے، تو نبی اکرم صلی اللہ علیہ وسلم یہ نہ فرماتے: ”دوبارہ وضو کر لے“ کیونکہ دوبارہ صرف وہی وضو ہو سکتا ہے، جو نماز کے لیے کیا جائے۔ [صحیح ابن حبان/كتاب الطهارة/حدیث: 1115]

اردو ترجمہ · UrduUnverified translation

سیدہ بسرہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے یہ بات ارشاد فرمائی: ”جو شخص اپنی شرم گاہ کو چھو لے اسے چاہیے کہ نماز کے وضو والا وضو کرے۔“ [صحیح ابن حبان/كتاب الطهارة/حدیث: 1116]

اردو ترجمہ · UrduUnverified translation

سیدہ بسرہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جب کوئی شخص اپنی شرم گاہ کو چھو لے، تو اسے وضو کرنا چاہیے اور عورت بھی اسی طرح کرے۔“ [صحیح ابن حبان/كتاب الطهارة/حدیث: 1117]

اردو ترجمہ · UrduUnverified translation

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی شخص اپنا ہاتھ اپنی شرمگاہ کی طرف بڑھائے اور ان دونوں کے درمیان کوئی پردہ یا رکاوٹ نہ ہو، تو اس شخص کو وضو کرنا چاہیے۔“ (امام ابن حبان رحمہ اللہ فرماتے ہیں:) اس روایت میں ہمارا استدلال نافع بن ابونعیم کی نقل کردہ روایت سے ہے، یزید بن عبدالملک کی نقل کردہ روایت سے نہیں ہے، کیونکہ یزید بن عبدالملک کے مستند ہونے سے ہم بری الذمہ ہیں، جیسا کہ یہ بات کتاب الضعفاء میں بیان کی گئی ہے۔ [صحیح ابن حبان/كتاب الطهارة/حدیث: 1118]

اردو ترجمہ · UrduUnverified translation

قیس بن طلق اپنے والد (سیدنا طلق بن علی رضی اللہ عنہ) کا یہ بیان نقل کرتے ہیں: ہم لوگ وفد کی شکل میں نبی اکرم صلی اللہ علیہ وسلم کی خدمت میں حاضر ہوئے، ایک شخص آیا اس نے عرض کی: اے اللہ کے نبی! اس بارے میں آپ کیا کہتے ہیں جو شخص وضو کرنے کے بعد اپنی شرمگاہ کو چھو لیتا ہے؟ تو نبی اکرم صلی اللہ علیہ وسلم نے ارشاد فرمایا: ”وہ (شرمگاہ) اس کے جسم کا گوشت کا ایک لوتھڑا (راوی کو شک ہے شاید یہ الفاظ ہیں) ایک ٹکڑا ہے۔“ [صحیح ابن حبان/كتاب الطهارة/حدیث: 1119]

اردو ترجمہ · UrduUnverified translation

قیس بن طلق بیان کرتے ہیں، میرے والد (طلق بن علی رضی اللہ عنہ) نے مجھے یہ بات بتائی ہے کہ ہم لوگ نبی اکرم صلی اللہ علیہ وسلم کے پاس موجود تھے، ایک دیہاتی نبی اکرم صلی اللہ علیہ وسلم کی خدمت میں حاضر ہوا، اس نے عرض کی: ”یا رسول اللہ! ہم میں سے کوئی ایک شخص نماز کی حالت میں ہوتا ہے، اسے خارش ہوتی ہے اور اس کا ہاتھ اس کی شرمگاہ تک پہنچ جاتا ہے“، تو نبی اکرم صلی اللہ علیہ وسلم نے ارشاد فرمایا: ”وہ (شرمگاہ) «بَضْعَةٌ مِنْكَ» ”تمہارے جسم کا ایک ٹکڑا ہے“، راوی کو شک ہے شاید یہ الفاظ ہیں: «بَضْعَةٌ مِنْ لَحْمِكَ» ”تمہارے جسم کے گوشت کا ایک لوتھڑا ہے۔““ [صحیح ابن حبان/كتاب الطهارة/حدیث: 1120]

اردو ترجمہ · UrduUnverified translation

قیس بن طلق اپنے والد (رضی اللہ عنہ) کا یہ بیان نقل کرتے ہیں کہ انہوں نے نبی اکرم صلی اللہ علیہ وسلم سے ایسے شخص کے بارے میں دریافت کیا جو نماز میں اپنی شرم گاہ کو چھو لیتا ہے، تو نبی اکرم صلی اللہ علیہ وسلم نے ارشاد فرمایا: ”اس میں کوئی حرج نہیں، وہ تمہارے جسم کا ایک حصہ ہے“۔ [صحیح ابن حبان/كتاب الطهارة/حدیث: 1121]

اردو ترجمہ · UrduUnverified translation

قیس بن طلق اپنے والد کا یہ بیان نقل کرتے ہیں: ہم نے نبی اکرم صلی اللہ علیہ وسلم کے ہمراہ مسجد نبوی کی تعمیر میں حصہ لیا ہے، آپ صلی اللہ علیہ وسلم یہ فرمایا کرتے تھے: «قَدِّمُوا الْيَمَامِيَّ مِنَ الطِّينِ، فَإِنَّهُ أَطْوَعُكُمْ لَهُ، وَأَحْسَنُكُمْ لَهُ مَسًّا» ”مٹی میں سے یمامی کو آگے کرو، کیونکہ وہ کام کرنے کے اعتبار سے تم سب سے زیادہ عمدہ ہے۔“ (امام ابن حبان رحمہ اللہ فرماتے ہیں:) سیدنا طلق بن علی رضی اللہ عنہ کی نقل کردہ روایت جو ہم نے ذکر کی ہے، یہ منسوخ حدیث ہے، سیدنا طلق بن علی رضی اللہ عنہ نبی اکرم صلی اللہ علیہ وسلم کی خدمت میں ہجرت کے پہلے سال آئے تھے جب مسلمان مدینہ منورہ میں مسجد نبوی کی تعمیر کر رہے تھے، جبکہ سیدنا ابوہریرہ رضی اللہ عنہ نے شرمگاہ کو چھونے پر وضو لازم ہونے کی حدیث نقل کی ہے، جیسا کہ ہم پہلے یہ بات ذکر کر چکے ہیں، سیدنا ابوہریرہ رضی اللہ عنہ نے سن 7 ہجری میں اسلام قبول کیا تھا، یہ بات اس بات پر دلالت کرتی ہے کہ سیدنا ابوہریرہ رضی اللہ عنہ کی نقل کردہ روایت، سیدنا طلق بن علی رضی اللہ عنہ کی نقل کردہ روایت سے سات سال بعد کی ہے۔ [صحیح ابن حبان/كتاب الطهارة/حدیث: 1122]

اردو ترجمہ · UrduUnverified translation

قیس بن طلق اپنے والد کا یہ بیان نقل کرتے ہیں کہ ہم چھ افراد وفد کی شکل میں نبی اکرم صلی اللہ علیہ وسلم کی خدمت میں حاضر ہوئے، پانچ افراد کا تعلق بنو حنیفہ سے تھا اور ایک شخص کا تعلق بنو ضبیعہ بن ربیعہ سے تھا۔ ہم لوگ نبی اکرم صلی اللہ علیہ وسلم کی خدمت میں حاضر ہوئے، ہم نے آپ کے دستِ مبارک پر اسلام قبول کیا اور آپ کی اقتدا میں نماز ادا کی۔ ہم نے آپ کو بتایا کہ ہمارے علاقے میں ایک گرجا گھر ہے، ہم نے آپ سے یہ درخواست کی کہ آپ اپنے وضو کا بچا ہوا پانی ہمیں عنایت کریں تو نبی اکرم صلی اللہ علیہ وسلم نے پانی منگوایا، آپ نے اس کے ذریعے وضو کیا، کلی کی، پھر آپ نے ہمارے لیے ایک برتن میں پانی انڈیل دیا، پھر آپ نے ارشاد فرمایا: ”اس پانی کو لے جاؤ، جب تم اپنے علاقے میں جاؤ تو گرجا گھر کو توڑ دینا اور اس جگہ پر اس پانی کو چھڑک دینا اور اس جگہ پر مسجد بنا دینا۔“ ہم نے عرض کی: یا رسول اللہ! ہمارا علاقہ بہت دور ہے، پانی خشک ہو جائے گا۔ نبی اکرم صلی اللہ علیہ وسلم نے ارشاد فرمایا: ”تم لوگ اس میں پانی ملاتے رہنا، اس کے نتیجے میں اس کی پاکیزگی میں اضافہ ہی ہو گا۔“ راوی بیان کرتے ہیں: ہم لوگ وہاں سے روانہ ہوئے، تو ہمارے درمیان اس بارے میں اختلاف ہو گیا کہ پانی کے اس برتن کو کون اٹھائے گا؟ تو نبی اکرم صلی اللہ علیہ وسلم نے ہم میں سے ہر ایک شخص کے لیے ایک دن اور ایک رات کی باری مقرر کر دی۔ ہم لوگ اسے لے کر روانہ ہوئے، یہاں تک کہ اپنے علاقے میں آئے۔ ہم نے وہی کام کیا جس کی نبی اکرم صلی اللہ علیہ وسلم نے ہمیں ہدایت کی تھی۔ اس قوم کا راہب طے قبیلے سے تعلق رکھنے والا ایک شخص تھا، جب ہم نے نماز کے لیے اذان دی تو راہب نے کہا: یہ حق کی دعوت ہے، پھر وہ بھاگ گیا، اس کے بعد وہ نظر نہیں آیا۔ (امام ابن حبان رحمہ اللہ فرماتے ہیں:) اس روایت میں اس بات کا واضح بیان موجود ہے، سیدنا طلق بن علی رضی اللہ عنہ نبی اکرم صلی اللہ علیہ وسلم کی خدمت میں حاضری کے بعد اپنے علاقے واپس چلے گئے تھے۔ یہ اس وقت کی بات ہے، جس کا ہم نے ذکر کیا ہے۔ اس کے بعد ان کے دوبارہ مدینہ منورہ میں آنے کے بارے میں پتا نہیں چل سکا۔ جو شخص ان کے دوبارہ مدینہ منورہ میں آنے کا دعویٰ کرتا ہے اس پر یہ بات لازم ہے کہ وہ کوئی ایسی حدیث بیان کرے جس میں اس بات کی صراحت موجود ہو اور یہ حدیث اسے مل نہیں سکتی۔ [صحیح ابن حبان/كتاب الطهارة/حدیث: 1123]