اردو ترجمہ · Urdu

نافع رحمہ اللہ سے روایت ہے کہ حضرت عمر بن خطاب رضی اللہ عنہ صفوں کو برابر کرنے کا حکم دیتے ، چنانچہ جب ( صفیں سیدھی ، کرانے پر مامور ) لوگ آپ کے پاس آ کر یہ خبر دیتے کہ صفیں برابر ہو گئی ہیں تو وہ تکبیر ( تحریمہ ) کہتے ۔

اردو ترجمہ · Urdu

امام مالک رحمہ اللہ اپنے چچا ابو سہیل رحمہ اللہ سے ، اور وہ اپنے والد مالک ( بن ابی عامر اصبحی رحمہ اللہ ) سے روایت کرتے ہیں ، انھوں نے کہا کہ میں حضرت عثمان بن عفان رضی اللہ عنہ کے ہمراہ تھا کہ ( اتنے میں تکبیر ہو گئی اور ) نماز کھڑی ہونے لگی ، میں اُن سے اس بارے میں گفتگو کر رہا تھا کہ وہ میرے لیے کچھ وظیفہ ( بیت المال سے ) مقرر کر دیں ، چنانچہ میں اُن سے مسلسل گفتگو میں لگا رہا اور وہ اپنے جوتوں کے ساتھ کنکریاں برابر کرتے رہے ، یہاں تک کہ وہ لوگ ( اُن کے پاس ) آ گئے جن کو انھوں نے صفیں سیدھی کرانے کی ذمہ داری سونپ رکھی تھی ، انھوں نے آپ رضی اللہ عنہ کو بتایا کہ صفیں برابر ( اور سیدھی ) ہو چکی ہیں تو انھوں نے مجھ سے کہا کہ تم بھی صف میں برابر کھڑے ہو جاؤ ، پھر انھوں نے تکبیر تحریمہ کہی ۔