اردو ترجمہ · Urdu

حضرت اُمِ ہانی بنت ابی طالب رضی اللہ عنہا سے روایت ہے کہ رسول اللہ ﷺ نے فتح مکہ کے سال ( فتح مکہ کے موقع پر اُن کے گھر میں ) ایک ہی کپڑے میں ( اُسے اپنے اوپر ) اوڑھ کر ( صلاۃُ الضحی یعنی چاشت کی ) آٹھ رکعتیں پڑھیں ۔

اردو ترجمہ · Urdu

سیدہ اُمِ ہانی بنت ابی طالب رضی اللہ عنہا سے روایت ہے ، کہتی ہیں کہ میں فتح مکہ والے سال رسول اللہ ﷺ کی طرف گئی تو میں نے رسول اللہ ﷺ کو اس حال میں پایا کہ آپ غسل فرما رہے تھے اور آپ کی بیٹی سیدہ فاطمہ رضی اللہ عنہا ایک کپڑے کے ساتھ آپ کا پردہ کیے ہوئے تھیں ، حضرت اُمّ ہانی رضی اللہ عنہا کہتی ہیں کہ میں نے آپ ﷺ کو سلام کہا تو آپ نے دریافت فرمایا کہ ’’ یہ عورت کون ہے ‘‘؟ میں نے کہا کہ ابوطالب کی بیٹی اُمّ ہانی ہوں ۔ آپ ﷺ نے فرمایا :’’ اُم ہانی کو مرحبا ( خوش آمدید ) ۔‘‘ پھر جب آپ ﷺ غسل سے فارغ ہوئے تو کھڑے ہو گئے اور ایک ہی کپڑے میں ( اُسے اپنے اوپر ) لپیٹ کر آٹھ رکعات ادا کیں پھر ( سلام پھیر کر ) پھرے ( اور فارغ ہو گئے ) تو میں نے عرض کیا : اے اللہ کے رسول ! میری ماں کے بیٹے ( یعنی میرے بھائی ) حضرت علی رضی اللہ عنہ نے تو ارادہ کر رکھا ہے کہ وہ ایک ایسے شخص کو قتل کر دے گا جسے میں نے پناہ دے رکھی ہے ، ( اور وہ ) فلاں بن ہُبَیْرہ ( ہے ) ، تو رسول اللہ ﷺ نے فرمایا :’’ اے اُم ہانی ! جسے تو نے پناہ دی اُسے یقیناً ہم نے بھی پناہ دے دی ۔ سیدہ اُمِ ہانی رضی اللہ عنہا کہتی ہیں کہ یہ ( سب کچھ ) چاشت کے وقت ہوا تھا ۔

اردو ترجمہ · Urdu

حضرت عائشہ رضی اللہ عنہا زوجہ پیغمبر ﷺ سے روایت ہے ، کہتی ہیں کہ میں نے رسول اللہ ﷺ کو کبھی بھی چاشت کی نفلی نماز پڑھتے ہوئے نہیں دیکھا اور ( البتہ ) میں تو یقیناً اسے پڑھتی ہوں اور بلاشبہ رسول اللہ ﷺ ( بسا اوقات ) کسی عمل کو چھوڑ دیتے تھے حالانکہ آپ ﷺ کو پسند یہی ہوتا تھا کہ اُسے کریں ( لیکن صرف ) اس ڈر سے ( اُسے چھوڑ دیتے ) کہ لوگ اس پر عمل کریں تو وہ اُن پر ( کہیں ) فرض ( ہی نہ ) کر دیا جائے ۔

اردو ترجمہ · Urdu

اُم المؤمنین سیدہ عائشہ رضی اللہ عنہا سے روایت ہے کہ وہ چاشت کی آٹھ رکعتیں پڑھتی تھیں اور کہتی تھیں کہ اگر میرے ماں باپ ( دوبارہ ) زندہ کر دیے جائیں تو میں ( پھر بھی ) اِن رکعتوں کو نہیں چھوڑوں گی ۔