اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ تبوک کی طرف اپنے سفر میں ظہر و عصر کو جمع فرمایا کرتے تھے ۔

اردو ترجمہ · Urdu

حضرت معاذ بن جَبَل رضی اللہ عنہ سے روایت ہے کہ یقیناً وہ ( صحابہ کرام رضی اللہ عنہم ) رسول اللہ ﷺ کے ہمراہ غزوہ تبوک کے سال ـ ( 9 ھ میں سفر جہاد ) میں نکلے ، تو رسول اللہ ﷺ ظہر و عصر اور مغرب و عشاء کو اکٹھا کرتے رہے ، حضرت معاذ رضی اللہ عنہ کہتے ہیں کہ ایک دن آپ ﷺ نے نماز کو مؤخر کیا ، پھر آپ باہر تشریف لائے ، پھر آپ نے ظہر اور عصر اکٹھی پڑھائی ، پھر ( خیمے وغیرہ میں ) چلے گئے ، پھر تشریف لائے اور مغرب اور عشاء اکٹھی پڑھائی ، پھر فرمایا :’’ بلاشبہ تم کل جلد ہی تبوک کے چشمے پر پہنچ جاؤ گے ، انشاءاللہ ۔ چنانچہ تم اس تک ہرگز نہیں پہنچ سکو گے یہاں تک کہ دن چڑھ جائے ( اور دن کا سورج خوب بلند ہو جائے ) تو ( تم میں سے ) جو کوئی ( ہم سے پہلے ) اس پر پہنچ جائے تو وہ اس میں سے ہرگز کچھ بھی نہ چھوئے یہاں تک کہ میں آ جاؤں ۔‘‘ ـ ( حضرت معاذ رضی اللہ عنہ نے ) کہا کہ ( جب ) ہم اس تک پہنچے تو ( ہم سے پہلے ہی ) دو آدمی اس پر ( پہنچ چکے تھے اور ) سبقت لے جا چکے تھے اور ( تبوک کا ) چشمہ تھوڑے سے پانی کے ساتھ چمک رہا تھا ، ( اس کا پانی سورج کی شعاعوں سے چمک رہا تھا یا وہ تھوڑا تھوڑا بہہ رہا تھا ) رسول اللہ ﷺ نے ان دونوں سے دریافت فرمایا :’’ کیا تم نے اس کے پانی کو چھوا ( اور ہاتھ لگایا ) ہے ؟‘‘ انھوں نے کہا کہ جی ہاں ، تو رسول اللہ ﷺ نے ان دونوں کو ( سرزنش کی اور ) برا بھلا کہا اور جو اللہ کو منظور تھا اُن سے کہہ دیا ، پھر لوگوں نے چشمے سے اپنے ہاتھوں کے ساتھ تھوڑا تھوڑا پانی چلوؤں کی شکل میں نکالا یہاں تک کہ کچھ پانی کسی چیز ( یعنی کسی برتن ) میں جمع ہو گیا ، پھر رسول اللہ ﷺ نے اس ( برتن ) میں اپنا چہرہ اور ہاتھ مبارک دھوئے ، پھر اُس ( پانی ) کو اس ( چشمے ) میں دوبارہ ڈال دیا ، چنانچہ وہ چشمہ بہت وافر پانی کے ساتھ بہنے لگا ، تو لوگوں نے اس سے ( اپنی اپنی ضرورت کے مطابق ) پانی لیا ( اور پیا اور پلایا اور ذخیرہ کر لیا ) ، پھر رسول اللہ ﷺ نے فرمایا :’’ اے معاذ ! ممکن ہے کہ اگر تمھاری زندگی لمبی ہوئی تو تم دیکھو گے کہ ( اس جگہ کا ) یہ پانی باغات کو بھرا کرے گا ۔‘‘

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما نے کہا کہ جب رسول اللہ ﷺ کو چلنے کی جلدی ہوتی تو آپ ﷺ مغرب و عشاء کو جمع کر لیتے تھے ۔

اردو ترجمہ · Urdu

حضرت عبداللہ بن عباس رضی اللہ عنہما سے روایت ہے کہ رسول اللہ ﷺ نے ہمیں ظہر و عصر بھی اکٹھی پڑھائیں اور مغرب و عشاء بھی ، ( اور ان کو ) بغیر کسی خوف اور بغیر کسی سفر کے ( جمع فرمایا ) ۔

اردو ترجمہ · Urdu

نافع رحمہ اللہ سے روایت ہے کہ جب ( حکمران طبقے والے ) اُمراء ( گورنر اور حکومتی عہدیدار ) مغرب و عشاء کو بارش کے موقع پر جمع کرتے تو حضرت عبداللہ بن عمر رضی اللہ عنہما بھی ان کے ساتھ ( یہ نمازیں ) جمع کر لیتے ۔

اردو ترجمہ · Urdu

ابن شہاب رحمہ اللہ سے روایت ہے کہ انھوں نے سالم بن عبداللہ رضی اللہ عنہ سے سوال کیا کہ کیا سفر میں ظہر و عصر کو جمع کیا جا سکتا ہے تو انھوں نے فرمایا : ہاں ، اس میں کوئی حرج نہیں ، کیا تم میدان عرفات میں لوگوں کی نماز کو نہیں دیکھتے ، ( کہ وہ ظہر و عصر کو ظہر کے وقت میں جمع کرتے ہیں اور سب مسافر ہوتے ہیں ) ۔

اردو ترجمہ · Urdu

علی بن حسین رضی اللہ عنہ ( المعروف حضرت زین ُ العابدین ) سے روایت ہے کہ رسول اللہ ﷺ جب ( سارا ) دن چلتے رہنے کا ارادہ فرماتے تو ظہر و عصر کو جمع کر کے پڑھتے اور جب ( ساری ) رات چلتے رہنے کا ارادہ فرماتے تو مغرب و عشاء کو جمع کر لیتے ۔