اردو ترجمہ · Urdu

حضرت ابن عمر رضی اللہ عنہ سے روایت ہے کہ رسول اللہ ﷺ ظہر ( کی فرض نماز ) سے پہلے دو رکعتیں ، اور اس کے بعد بھی دو رکعتیں ، نماز مغرب کے بعد اپنے گھر میں دو رکعتیں پڑھا کرتے تھے ، ( البتہ ) جمعہ کے بعد ( مسجد میں ) کچھ نہیں پڑھا کرتے تھے ، یہاں تک کہ ( گھر ) واپس لوٹ جاتے ، پھر دو رکعتیں ادا فرماتے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ کیا تم خیال کرتے ہو کہ میرے سامنے کی سمت ( صرف ) یہ ( میرے چہرے والی جانب ) ہے ، اللہ کی قسم ! نہ تو تمھارا خشوع ( عاجزی و انکسار ) مجھ پر مخفی رہتا ہے اور نہ ہی تمھارا رکوع ، بے شک میں تمھیں اپنی پشت کے پیچھے سے دیکھ لیتا ہوں ۔‘‘

اردو ترجمہ · Urdu

حضرت عبداللہ بن عمر رضی اللہ عنہ سے روایت ہے کہ رسول اللہ ﷺ قباء میں ( کبھی ) سوار ہو کر اور ( کبھی ) پیدل چل کر آتے تھے ۔

اردو ترجمہ · Urdu

نعمان بن مرہ سے روایت ہے کہ رسول اللہ ﷺ نے فرمایا : شرابی ، چور اور زانی کے بارے میں تمھاری کیا رائے ہے ؟ ’’ ( آپ ﷺ کا ) یہ ( سوال ) ان ( مجرم ) لوگوں کے متعلق کچھ ( حدود الٰہیہ ) نازل ہونے سے پہلے تھا ۔ لوگوں نے عرض کیا کہ اللہ اور اس کا رسول ہی بہتر جانتے ہیں ۔ آپ ﷺ نے فرمایا :’’ یہ سب کبیرہ گناہ ہیں اور ان میں سزا ہے اور سب سے بدترین چوری اس شخص کی ہے جو اپنی نماز سے چوری کرتا ہے ۔‘‘ صحابہ کرام رضی اللہ عنہم کہنے لگے کہ اے اللہ کے رسول ! بھلا آدمی کس طرح اپنی ہی نماز سے چوری کرتا ہے ؟’’ آپ ﷺ نے فرمایا :’’ وہ نہ اس کا رکوع مکمل کرتا ہے اور نہ ہی سجدہ ۔‘‘

اردو ترجمہ · Urdu

ہشام بن عروہ رحمہ اللہ اپنے والد عروہ رحمہ اللہ سے روایت کرتے ہیں کہ رسول اللہ ﷺ نے فرمایا :’’ اپنی نماز میں سے کچھ حصہ ( سنتیں اور نوافل وغیرہ ) اپنے گھروں میں ادا کرو ۔‘‘

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہ کہا کرتے تھے کہ جب مریض سجدہ کرنے کی طاقت نہ رکھتا ہو تو وہ اپنے سر سے اشارہ کرے اور اپنی پیشانی کی طرف کوئی چیز نہ اٹھائے ۔

اردو ترجمہ · Urdu

ربیعہ بن ابی عبدالرحمن رحمہ اللہ سے روایت ہے کہ حضرت عبداللہ بن عمر رضی اللہ عنہ جب مسجد میں آتے اور ( ان کے آنے سے پہلے ) لوگ ( فرض ) نماز پڑھ چکے ہوتے تو وہ فرض نماز شروع کرتے اور اس سے پہلے کچھ بھی نہ پڑھتے ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہ ایک شخص کے پاس سے گزرے جو کہ نماز پڑھ رہا تھا ، انھوں نے اس شخص کو سلام کہا تو اس ( نمازی ) نے ( نماز ہی میں ) بول کر سلام کا جواب لوٹا دیا ۔ چنانچہ حضرت عبداللہ بن عمر رضی اللہ عنہ اس شخص کے پاس واپس آئے اور اس سے کہا کہ جب تم میں سے کسی کو اس حال میں سلام کہا جائے کہ وہ نماز پڑھ رہا ہو تو ( زبان ) سے نہ بولے بلکہ اپنے ہاتھ کے ساتھ اشارہ کر دے ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہ فرمایا کرتے تھے : جو شخص کوئی نماز ( پڑھنا ) بھول گیا ، پھر وہ نماز اسے یاد ہی نہ آئے ، مگر اس حالت میں ( یاد آئے ) کہ وہ امام کے ساتھ ( اگلی نماز پڑھ رہا ) ہو ، چنانچہ جب امام سلام پھیر دے تو اسے چاہیے کہ اب وہ نماز ( قضا کے طور پر ) پڑھے جو وہ بھول گیا تھا ، پھر اس کے بعد ( دوبارہ ) دوسری نماز پڑھے ( جو امام کے ساتھ پہلے پڑھ چکا تھا ) ۔

اردو ترجمہ · Urdu

واسع بن حبان رحمہ اللہ سے روایت ہے ، کہتے ہیں کہ میں نماز پڑھ رہا تھا اور حضرت عبداللہ بن عمر رضی اللہ عنہ قبلے کی دیوار کے ساتھ پشت کو سہارا دیے ہوئے تھے ، جب میں نے نماز پوری کی تو میں اپنی بائیں جانب سے ان کی طرف مڑا ، تو ( یہ دیکھ کر ) حضرت عبداللہ بن عمر رضی اللہ عنہ فرمانے لگے کہ تجھے کس چیز نے اس سے روکا کہ تو اپنی دائیں جانب سے مڑتا ؟ میں نے کہا کہ میں نے آپ کو دیکھا تو آپ کی طرف مڑ گیا ، حضرت عبداللہ رضی اللہ عنہ کہنے لگے : تو نے بالکل ٹھیک کام کیا ہے ، ایک کہنے والے کا یہ قول ہے کہ ( صرف اور صرف ) دائیں جانب ہی سے پھرا کرو ( جبکہ راجح بات یہی ہے کہ ) جب تم نماز پڑھ چکو تو جس طرف سے چاہو مڑ جاؤ ، چاہو تو اپنی دائیں جانب سے ( گھومو ) اور چاہو تو اپنی بائیں جانب سے ( پھرو ) ۔

اردو ترجمہ · Urdu

ہشام بن عروہ اپنے والد سے ، اور وہ مہاجرین میں سے ایک شخص جس کے متعلق عروہ کوئی حرج محسوس نہیں کرتے تھے ، سے روایت کرتے ہیں کہ انھوں نے حضرت عبداللہ بن عمرو بن عاص رضی اللہ عنہ سے سوال کیا کہ کیا میں اونٹ کے باڑے میں نماز پڑھ لوں ؟ عبداللہ رضی اللہ عنہ نے فرمایا : نہیں ، البتہ بکریوں کے باڑے میں پڑھ لیا کر ۔

اردو ترجمہ · Urdu

سعید بن مسیب رحمہ اللہ سے روایت ہے کہ انھوں نے پوچھا : وہ کون سی نماز ہے جس کی ہر رکعت میں بیٹھا جاتا ہے ؟ پھر سعید رحمہ اللہ نے خود ہی فرمایا کہ یہ نماز مغرب ہے جب کہ تجھ سے اس کی ایک رکعت رہ جائے ۔