اردو ترجمہ · Urdu

سیدنا ابوحمید ساعدی رضی اللہ عنہ سے روایت ہے کہ لوگوں نے عرض کیا : اے اللہ کے رسول ! ہم آپ پر کس طرح درود پڑھا کریں ؟ تو آپ ﷺ نے فرمایا :’’ یہ کہا کرو : اللھم صل علی محمد و ازواجہ و …’’ اے اللہ ! تو درود ( رحمت ) نازل فرما محمد پر ، ان کی بیویوں پر اور ان کی اولاد پر جس طرح کہ تو نے ابراہیم علیہ السلام کی آل پر رحمت نازل فرمائی اور تو محمد ﷺ پر ان کی ازواج پر اور ان کی اولاد پر اسی طرح برکت نازل فرما جس طرح تو نے ابراہیم علیہ السلام کی آل پر برکت نازل فرمائی ، یقیناً تو ہی خوب قابل تعریف اور بہت بزرگی والا ہے ۔‘‘

اردو ترجمہ · Urdu

حضرت ابومسعود رضی اللہ عنہ سے روایت ہے کہ رسول اللہ ﷺ ( قبیلہ خزرج کے سردار ) حضرت سعد بن عبادہ رضی اللہ عنہ کی محفل میں ہمارے پاس تشریف لائے ، تو آپ ﷺ سے حضرت بشیر بن سعد ( بن ثعلبہ ) رضی اللہ عنہ نے دریافت فرمایا کہ اے اللہ کے رسول ! اللہ تعالیٰ نے ہمیں حکم فرمایا ہے کہ ہم آپ پر درود بھیجیں تو ہم کس طرح آپ پر درود پڑھا کریں ؟ حضرت ابومسعود رضی اللہ عنہ کہتے ہیں کہ رسول اللہ ﷺ خاموش رہے ، یہاں تک کہ ہم ( آپ ﷺ کی خاموشی کو آپ ﷺ کی ناراضی سمجھ کر ) یہ تمنا کرنے لگے کہ کاش ! اس نے آپ ﷺ سے سوال ہی نہ کیا ہوتا ، ( کچھ دیر گزر گئی تو ) پھر آپ ﷺ نے فرمایا :’’ یہ کہا کرو :’’ اَللّٰہُمَّ صَلِّ عَلَی مُحَمَّدٍ وَ عَلَی آلِ مُحَمَّدٍ ، کَمَا صَلَّیْتَ عَلَی إِبْرَاہِیمَ ، وَبَارِکْ عَلَی مُحَمَّدٍ و َعَلَی آلِ مُحَمَّد ، کَمَا بَارَکْتَ عَلَی آلِ إِبْرَاہِیمَ ، فِی الْعَالَمِینَ ، إِنَّکَ حَمِیدٌ مَجِیدٌ ‘‘ ’’ اے اللہ ! حضرت محمد ﷺ پر اور آل محمد ﷺ پر رحمت فرما جس طرح تو نے حضرت ابراہیم علیہ السلام پر جہانوں میں ( خاص کر کے ) برکت نازل فرمائی ، یقیناً تو بہت ہی قابل تعریف ، خوب بزرگی والا ہے ۔ ( پھر فرمایا کہ مجھ پر بھیجا جانے والا ) سلام اسی طرح ہی ہے جسے تم جان چکے ہو ‘‘۔

اردو ترجمہ · Urdu

عبداللہ بن دینار سے روایت ہے ، کہتے ہیں کہ میں نے حضرت عبداللہ بن عمر رضی اللہ عنہ کو دیکھا وہ رسول اللہ ﷺ کی قبر پر کھڑے ہوتے ، پھر نبی کریم ﷺ پر درود پڑھتے اور ابوبکر و عمر رضی اللہ عنہما کے لیے دعا مانگتے ۔