اردو ترجمہ · Urdu

حضرت عمر بن ابی سلمہ رضی اللہ عنہ سے روایت ہے کہ انھوں نے رسول اللہ ﷺ کو ایک کپڑے میں نماز پڑھتے ہوئے دیکھا ، آپ ﷺ ( اس وقت عمر بن ابی سلمہ رضی اللہ عنہ کی والدہ ) سیدہ اُم سلمہ ( اُم المؤمنین رضی اللہ عنہا ) کے گھر میں اس کپڑے کو لپیٹے ہوئے ( نماز ادا کر رہے ) تھے ( اور ) آپ ﷺ نے اس کپڑے کے دونوں کناروں کو اپنے دونوں مبارک کندھوں پر ڈال رکھا تھا ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ ایک سائل نے رسول اللہ ﷺ سے ایک کپڑے میں نماز پڑھنے کے متعلق سوال کیا تو رسول اللہ ﷺ نے فرمایا :’’ کیا تم میں سے ہر کسی کے پاس دو کپڑے ہوتے ہیں ؟‘‘

اردو ترجمہ · Urdu

سعید بن مسیَّب رحمہ اللہ سے روایت ہے کہ حضرت ابوہریرہ رضی اللہ عنہ سے سوال کیا گیا کہ کیا آدمی صرف ایک کپڑے میں نماز پڑھ سکتا ہے ؟ تو انھوں نے کہا کہ ہاں ، پھر اُن سے پوچھا گیا کہ کیا آپ ایسا کر لیتے ہیں ؟ انھوں نے جواب دیا کہ ہاں ، یقیناً میں ( بھی کبھی کبھار ) ایک کپڑے میں نماز ادا کر لیتا ہوں ، حالانکہ بلاشبہ میرے کپڑے کھونٹی پر پڑے ہوتے ہیں ۔

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت جابر بن عبداللہ انصاری رضی اللہ عنہ ایک ہی کپڑے میں نماز ادا کر لیا کرتے تھے ۔

اردو ترجمہ · Urdu

ربیعہ بن ابی عبدالرحمن رحمہ اللہ سے روایت ہے کہ محمد بن عمرو بن حزم رحمہ اللہ صرف ایک قمیص میں نماز پڑھ لیا کرتے تھے ۔

اردو ترجمہ · Urdu

حضرت جابر بن عبداللہ رضی اللہ عنہ سے روایت ہے کہ رسول اللہ ﷺ نے فرمایا :’’ جو شخص دو کپڑے نہ پا سکے وہ ایک ہی کپڑے کو لپیٹ کر اس میں نماز پڑھ لے ، پھر اگر کپڑا ( مزید ) چھوٹا ہو ( کہ کندھوں تک نہ پہنچ سکے ) تو اس کے ساتھ تہبند باندھ ( کر نماز پڑھ ) لے ۔‘‘