اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے کہ رسول اللہ ﷺ نے فرمایا :’’ کوئی بھی ایسا شخص جس کی رات کے وقت نماز ( پڑھنے کی مستقل عادت اور دائمی روٹین ) ہو ، ( پھر کسی رات ) نیند اس پر غالب آ کر اُسے وہ نماز نہ پڑھنے دے تو اللہ تعالیٰ ضرور اس کے حق میں اس کی ( معمول والی ) نماز کا اجر لکھ دیتے ہیں اور اس کی نیند اس پر ( اللہ کی طرف سے ) صدقہ ہو جاتی ہے ۔‘‘

اردو ترجمہ · Urdu

حضرت عائشہ رضی اللہ عنہا زوجہ پیغمبر ﷺ کہتی ہیں کہ میں رسول اللہ ﷺ کے سامنے سو رہی ہوتی اور میرے پاؤں آپ ﷺ کے قبلے ( کی سمت سجدے والی جگہ ) میں ہوتے تھے ، چنانچہ جب آپ ﷺ سجدہ کرنے لگتے تو مجھے ہاتھ سے چھوتے ، سو میں اپنے پاؤں سمیٹ لیتی ، پھر جب آپ ﷺ کھڑے ہو جاتے تو میں اُنھیں پھیلا دیتی اور اُن دنوں گھروں میں چراغ نہیں ہوا کرتے تھے ۔

اردو ترجمہ · Urdu

نبی کریم ﷺ کی زوجہ محترمہ سیدہ عائشہ رضی اللہ عنہا سے روایت ہے کہ رسول اللہ ﷺ نے فرمایا :’’ جب تم میں سے کوئی شخص اپنی نماز میں اونگھنے لگے تو اُسے چاہیے کہ ( نماز مختصر کر کے سلام پھیر کر ) سو جائے ، یہاں تک کہ اس سے نیند ( کا غلبہ دور ہو اور وہ ) چلی جائے کیونکہ بلاشبہ جب تم میں سے کوئی شخص اس حال میں نماز پڑھے گا کہ وہ اونگھ رہا ہو تو اُسے علم نہ ہو سکے گا ، ( اور ) ممکن ہے کہ وہ ( اپنے ذہن کے مطابق ) استغفار کرنے لگے لیکن ( مدہوشی میں ) اپنے آپ کو گالی دے بیٹھے ۔‘‘

اردو ترجمہ · Urdu

اسماعیل بن ابی حکیم رحمہ اللہ سے روایت ہے ، ان کو یہ خبر پہنچی کہ بے شک رسول اللہ ﷺ نے ایک رات ایک عورت کو نماز ( تہجد ) پڑھتے ہوئے سنا ، تو دریافت فرمایا کہ ’’ یہ کون ہے ؟‘‘ آپ ﷺ کو بتایا گیا کہ ’’ یہ حَولاَء بنتِ تُوَیت ‘‘ ہے جو رات کو سوتی ہی نہیں ، تو رسول اللہ ﷺ نے اس ( معاملے ) کو ( بہت ) ناپسند جانا ، یہاں تک کہ آپ ﷺ کے چہرہ مبارک سے ناگواری محسوس ہونے لگی ، پھر فرمایا :’’ یقیناً اللہ تبارک و تعالیٰ نہیں اُکتاتے ( ثواب دینے سے نہ تھکتے ہیں ، نہ بیزار ہوتے ہیں ) یہاں تک کہ تم خود ہی ( نیکی کرنے سے ) اُکتا جاتے ہو ، اُتنے ہی عمل کی تکلیف ( اور بوجھ ) اٹھاؤ جس کی تم میں طاقت ہو ۔‘‘

اردو ترجمہ · Urdu

زید بن اسلم رحمہ اللہ اپنے والد اسلم سے روایت کرتے ہیں کہ حضرت عمر بن خطاب رضی اللہ عنہ رات کے وقت نماز پڑھتے رہتے جتنا کہ اللہ کو منظور ہوتا ، یہاں تک کہ جب رات کا آخری حصہ آتا تو اپنے گھر والوں کو نماز کے لیے جگاتے اور اُن ( کو جگانے ) کے لیے نماز نماز کہتے رہتے ، پھر یہ آیت مبارکہ تلاوت کرتے : { وَاْمُرْاَھْلَکَ بِالصَّلَاۃِ وَاصْطَبِرْ عَلَیْہَا لَا نَسْئَلُکَ رِزْقًا نَحْنُ نَرْزُقُکَ وَالْعَاقِبَۃُ لِلتَّقْویٰ } ( طٰہٰ 20 : 132 ) ’’ اور اپنے اہل و عیال کو نماز کا حکم دیجیے اور ( خود بھی ) اس پر قائم رہیے ، ہم آپ سے رزق نہیں مانگتے ، ہم ہی آپ کو رزق عطا کرتے ہیں اور ( بہترین ) انجام تو ( اہلِ ) تقویٰ کے لیے ہے ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ سعید بن مسیب رحمہ اللہ کہا کرتے تھے کہ نماز عشاء سے پہلے سونا اور اس کے بعد باتیں کرنا مکروہ ہے ۔

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت عبداللہ بن عمر رضی اللہ عنہما کہا کرتے تھے کہ رات اور دن کی نماز دو رکعتیں ہے ، نمازی ہر دو رکعتوں کے بعد سلام پھیرے ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا :’’ باجماعت نماز اکیلے شخص کی نماز پر ستائیس درجے فضیلت رکھتی ہے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ نماز باجماعت ، تم میں سے کسی اکیلے کی نماز سے پچیس حصے افضل ہے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ قسم ہے اس ذات کی جس کے ہاتھ میں میری جان ہے ! یقیناً میں نے ارادہ کر لیا تھا کہ ( ایندھن کے طور پر ) خشک لکڑیاں جمع کرنے کا حکم دوں تو ان کو جمع کر لیا جائے ، پھر نماز کا حکم دوں ، چنانچہ اس کے لیے اذان کہی جائے ، پھر کسی شخص کو حکم دوں تو وہ لوگوں کی امامت کرائے ، پھر خود میں پیچھے ( ان ) لوگوں کی طرف چلا جاؤں ، ( جو جان بوجھ کر جماعت میں حاضر نہیں ہوتے ) پھر میں اُن پر ( ان کی گھروں میں موجودگی میں ) ان کے گھروں کو آگ لگا دوں ، قسم ہے اُس ذات کی جس کے ہاتھ میں میری جان ہے ! اگر ان ( پیچھے رہنے والوں ) میں سے کسی کو معلوم ہو جائے کہ وہ ( مسجد میں ) موٹی ہڈی ( گوشت والی عمدہ بڑی ہڈی ) یا دو خوبصورت پائے ( کھر ، کھراؤڑے ) پا لے گا تو وہ ضرور نماز عشاء میں ( بھی ) حاضر ہو جائے گا ۔‘‘

اردو ترجمہ · Urdu

بسر بن سعید رضی اللہ عنہ سے روایت ہے کہ حضرت زید بن ثابت رضی اللہ عنہ نے فرمایا : تمھاری سب سے افضل نماز وہ ہے جو گھروں میں پڑھی جائے سوائے فرض نماز کے ۔