اردو ترجمہ · Urdu

سعید بن جبیر رحمہ اللہ روایت کرتے ہیں کہ حضرت عبداللہ بن عباس رضی اللہ عنہما سو گئے ، پھر وہ بیدار ہوئے تو انھوں نے اپنے خادم سے کہا کہ دیکھو ، لوگوں نے کیا کیا ہے ، ان دنوں اُن کی نظر ختم ہو چکی تھی ، چنانچہ خادم گیا ، پھر واپس آ کر کہنے لگا کہ لوگ تو صبح کی نماز سے ( بھی ) فارغ ہو چکے ہیں ، ( یہ سن کر ) حضرت ابن عباس رضی اللہ عنہما کھڑے ہوئے ، ( پہلے ) وتر پڑھا ، پھر صبح کی نماز ادا کی ۔

اردو ترجمہ · Urdu

امام مالک رحمہ اللہ سے روایت ہے ، ان کو یہ خبر پہنچی کہ حضرت عبداللہ بن عباس رضی اللہ عنہما ، حضرت عبادہ بن صامت رضی اللہ عنہ ، قاسم بن محمد رحمہ اللہ اور عبداللہ بن عامر بن ربیعہ رحمہ اللہ نے فجر کے بعد وتر ادا کیا ۔

اردو ترجمہ · Urdu

ہشام بن عروہ اپنے والد عروہ سے روایت کرتے ہیں کہ حضرت عبداللہ بن مسعود رضی اللہ عنہ نے فرمایا :’’ مجھے اس بات کی کوئی پروا نہیں کہ نماز فجر کی اقامت کہہ دی جائے ، اس حال میں کہ میں وتر پڑھ رہا ہوں ۔

اردو ترجمہ · Urdu

یحیی بن سعید رحمہ اللہ روایت کرتے ہیں کہ حضرت عبادہ بن صامت رضی اللہ عنہ کچھ لوگوں کی امامت کروایا کرتے تھے ، ایک دن وہ صبح کی نماز کے لیے تشریف لائے تو موذن صبح کی نماز کے لیے اقامت کہنے لگا ، حضرت عبادہ رضی اللہ عنہ نے اُسے چپ کرا دیا ، یہاں تک کہ انھوں نے ( پہلے ) وتر پڑھے ( جو کہ رہ گئے تھے ) ، پھر انھوں نے ان ( لوگوں ) کو صبح کی نماز پڑھائی ۔

اردو ترجمہ · Urdu

عبدالرحمن بن قاسم رحمہ اللہ روایت کرتے ہیں کہ میں نے عبداللہ بن عامر بن ربیعہ رحمہ اللہ کو سنا ، وہ کہہ رہے تھے کہ بے شک میں وتر پڑھ رہا ہوتا ہوں ، اس حال میں کہ اقامت ( کی آواز ) سن رہا ہوتا ہوں یا ( کہا کہ ) فجر ( طلوع ہونے ) کے بعد ( وتر پڑھ لیتا ہوں ) ، عبدالرحمن بن قاسم رحمہ اللہ کو شک ہے کہ انھوں نے ان دونوں باتوں میں سے کون سی کہی تھی ۔ ( اگرچہ مفہوم دونوں باتوں کا ایک ہی ہے کہ وہ طلوعِ فجر کے بعد وتر پڑھ لیا کرتے تھے ۔ )

اردو ترجمہ · Urdu

عبدالرحمن بن قاسم رحمہ اللہ روایت کرتے ہیں کہ انھوں نے اپنے والد قاسم بن محمد رحمہ اللہ کو سنا ، وہ کہہ رہے تھے کہ یقیناً میں فجر کے بعد وتر پڑھ لیتا ہوں ۔