اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ ایک شخص نے رسول اللہ ﷺ سے رات کی نماز کے متعلق سوال کیا تو رسول اللہ ﷺ نے فرمایا :’’ رات کی نماز دو ، دو رکعتیں ہیں ، پھر جب تم میں سے کوئی صبح ( کے طلوع ہو جانے ) سے ڈرے تو ایک رکعت پڑھ لے ، وہ ایک رکعت اس پوری نماز کو طاق بنا دے گی جو وہ پڑھ چکا تھا ۔‘‘

اردو ترجمہ · Urdu

( عبداللہ ) بن محیریز رضی اللہ عنہ سے روایت ہے کہ ایک شخص جنھیں مخدجیّ کہا جاتا تھا ، نے ملک شام میں ایک شخص کو جنھیں ابومحمد کی کنیت سے پکارا جاتا تھا ( اور وہ ایک انصاری صحابی رضی اللہ عنہ تھے ) ، یہ کہتے ہوئے سنا کہ بے شک وتر واجب ہے ، مُخْدَجِیّ کہتے ہیں کہ میں حضرت عُبادہ بن صامت رضی اللہ عنہ کے پاس گیا ، میں اُس وقت اُن کے سامنے آیا جب وہ مسجد کی طرف جا رہے تھے ، میں نے انھیں ابومحمد رحمہ اللہ کے قول کی خبر دی تو حضرت عبادہ رضی اللہ عنہ کہنے لگے کہ ابو محمد جھوٹ کہتے ہیں ، ( وتر واجب نہیں ہے ) میں نے رسول اللہ ﷺ کو یہ فرماتے ہوئے سنا تھا :’’ وہ پانچ نمازیں ہیں جنھیں اللہ نے اپنے بندوں پر فرض کیا ہے ، تو جو شخص ان کو اس طرح ( ادا کرے گا اور اللہ کے ہاں ) لے کر آئے گا کہ اس نے ان کے حق کو ہلکا سمجھ کر اُن میں سے کسی کو بھی ضائع نہ کیا ہو گا تو اللہ کے ہاں اس کے لیے یہ عہد ( لکھ دیا جاتا ) ہے کہ وہ اسے جنت میں داخل کرے گا اور جو شخص انھیں نہ لائے گا اُس کا اللہ کے ہاں کوئی عہد نہ ہو گا ، وہ چاہے تو اُسے عذاب میں مبتلا کر دے گا اور اگر چاہے تو اُسے جنت میں داخل کر دے گا ۔‘‘

اردو ترجمہ · Urdu

سعید بن یسار رحمہ اللہ سے روایت ہے کہتے ہیں کہ میں مکہ کے راستے میں حضرت عبداللہ بن عمر رضی اللہ عنہما کے ہمراہ سفر کر رہا تھا ( پھر سواری پر ہی نوافل پڑھتا رہا ، ) پھر میں نے سواری سے اتر کر وتر پڑھا پھر اُن کے ساتھ آ ملا ، تو حضرت عبداللہ بن عمر رضی اللہ عنہما مجھ سے پوچھنے لگے کہ تم کہاں تھے ؟ میں نے ان سے کہا کہ مجھے صبح کا اندیشہ ہوا تھا تو میں نیچے اُترا اور وتر ادا کر لیا ، تو حضرت عبداللہ بن عمر رضی اللہ عنہما فرمانے لگے : کیا تمھارے لیے رسول اللہ ﷺ میں بہترین نمونہ نہیں ہے ؟ میں نے کہا کہ کیوں نہیں ، اللہ کی قسم ! ( آپ ﷺ ہی تو بہترین نمونہ ہیں ) تو انھوں نے کہا یقیناً رسول اللہ ﷺ اونٹ پر وتر پڑھ لیا کرتے تھے ۔

اردو ترجمہ · Urdu

سعید بن مسیب رحمہ اللہ سے روایت ہے کہ حضرت ابوبکر صدیق رضی اللہ عنہ جب ( سونے کے لیے ) بستر پر آنے کا ارادہ کرتے تو ( سونے سے پہلے ) وتر پڑھ لیتے ، اور ( جبکہ ) حضرت عمر بن خطاب رضی اللہ عنہ رات کے آخر میں وتر پڑھتے تھے ، سعید بن مسیب رحمہ اللہ کہتے ہیں کہ رہا میں ، تو جب میں اپنے بستر کی طرف آنے لگتا ہوں تو وتر پڑھ لیتا ہوں ۔

اردو ترجمہ · Urdu

امام مالک رحمہ اللہ کو یہ خبر پہنچی کہ ایک شخص نے حضرت عبداللہ بن عمر رضی اللہ عنہما سے سوال کیا کہ کیا وتر واجب ہے ؟ تو حضرت عبداللہ بن عمر رضی اللہ عنہما نے جواب میں فرمایا کہ یقیناً رسول اللہ ﷺ نے بھی وتر پڑھا اور مسلمانوں نے بھی وتر پڑھا ، وہ آدمی بار بار اُن پر یہی سوال دہرانے لگا تو حضرت عبداللہ بن عمر رضی اللہ عنہما بھی اس کے جواب میں یہی کہتے رہے کہ یقیناً رسول اللہ ﷺ نے بھی وتر پڑھا اور مسلمانوں نے بھی وتر پڑھا ۔

اردو ترجمہ · Urdu

امام مالک رحمہ اللہ کو یہ خبر پہنچی کہ سیدہ عائشہ رضی اللہ عنہا زوجہ پیغمبر ﷺ فرمایا کرتی تھیں کہ جس شخص کو یہ ڈر ہو کہ وہ صبح ہو جانے تک سویا ہی رہے گا تو اسے چاہیے کہ سونے سے پہلے وتر پڑھے اور جسے یہ امید ہو کہ آخر رات میں بیدار ہو جائے گا تو وہ اپنے وتر کو موخر کر دے ۔

اردو ترجمہ · Urdu

نافع رحمہ اللہ سے روایت ہے ، کہتے ہیں کہ میں مکہ میں حضرت عبداللہ بن عمر رضی اللہ عنہما کے ساتھ تھا اور آسمان ابر آلود تھا ، حضرت عبداللہ بن عمر رضی اللہ عنہما ( جو کہ تہجد پڑھ رہے تھے ، ان ) کو صبح طلوع ہونے کا خدشہ محسوس ہوا تو انھوں نے ایک رکعت کے ساتھ وتر پڑھ لیا ، پھر بادل چھٹ گیا ( آسمان کھل گیا ) تو انھوں نے دیکھا کہ ابھی تو اُن پر رات ( باقی ) ہے ، چنانچہ انھوں نے ایک رکعت پڑھ کر ( اپنے وتر کو ) جفت ( یعنی دو رکعت نفل ) بنا لیا ، پھر اس کے بعد دو دو رکعتیں پڑھتے رہے ، پھر جب ( دوبارہ ) صبح کا خطرہ محسوس کیا تو ایک رکعت کے ساتھ وتر پڑھ لیا ۔

اردو ترجمہ · Urdu

نافع رحمہ اللہ سے روایت کرتے ہیں کہ یقیناً حضرت عبداللہ بن عمر رضی اللہ عنہما وتر پڑھتے وقت دو رکعتوں اور ایک رکعت کے درمیان میں سلام پھیرا کرتے تھے حتی کہ اپنی کسی حاجت ( اور کام کے کرنے ) کا حکم بھی دے دیتے تھے ۔

اردو ترجمہ · Urdu

ابن شہاب زُہری رحمہ اللہ روایت کرتے ہیں کہ حضرت سعد بن ابی وقّاص رضی اللہ عنہما نماز عشاء کے بعد ایک وتر پڑھ لیا کرتے تھے ۔

اردو ترجمہ · Urdu

عبداللہ بن دینار سے مروی ہے کہ عبداللہ بن عمر رضی اللہ عنہما فرمایا کرتے تھے کہ مغرب کی نماز دن کی نمازوں میں سے وتر ہے ۔