اردو ترجمہ · Urdu

سیدہ عائشہ رضی اللہ عنہا زوجہ پیغمبر ﷺ سے روایت ہے کہ رسول اللہ ﷺ نے ( ماہِ رمضان کی ) ایک رات مسجد میں نماز پڑھی تو کچھ لوگوں نے بھی ( بعد میں شامل ہو کر پیچھے کھڑے ہو کر ) آپ ﷺ کی نماز کے ساتھ نماز ادا کی ، پھر آپ ﷺ نے اگلی رات ( یہی تراویح کی ) نماز پڑھی تو ( آپ ﷺ کے پیچھے نماز ادا کرنے والے ) لوگ بھی بڑھ گئے ، پھر وہ تیسری یا چوتھی رات جمع ہوئے تو رسول اللہ ﷺ ان کی طرف ( نماز پڑھانے کے لیے ) نہ آئے ، پھر جب صبح ہوئی تو فرمایا :’’ میں نے وہ ( سب کچھ ) دیکھ لیا تھا جو تم نے کیا تھا ، ( لیکن میں پھر بھی نہ نکلا ) اور مجھے تمھاری طرف نکلنے سے اس کے علاوہ اور کسی چیز نے نہیں روکا کہ مجھے یہ خدشہ لاحق ہو گیا تھا کہ ( کہیں ) یہ نماز تم پر فرض ( نہ ) کر دی جائے ۔‘‘ اور یہ واقعہ ماہِ رمضان میں پیش آیا ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ لوگوں کو ماہِ رمضان کے قیام ( تراویح ) کی ترغیب دیا کرتے تھے ، مگر انھیں اس کا پختہ حکم نہیں فرماتے تھے ، چنانچہ آپ ﷺ فرماتے :’’ جس شخص نے ماہ ِ رمضان کا قیام ، ایمان کی حالت میں ثواب کی امید رکھتے ہوئے کیا تو اس کے لیے اس کے گزشتہ گناہ بخش دیے جائیں گے ۔‘‘ ( حدیث کے راوی ) ابن شہاب زہری رحمہ اللہ کہتے ہیں کہ پھر رسول اللہ ﷺ فوت ہوئے تو معاملہ اسی طرح چل رہا تھا ، پھر حضرت ابوبکر رضی اللہ عنہ کے دور خلافت میں بھی یہی حال رہا اور حضرت عمر رضی اللہ عنہ کے دورِ خلافت کے شروع میں بھی ( یہی حال رہا ) ۔