اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جب تو نے اپنے ساتھی سے یہ کہہ دیا کہ خاموش ہو جاؤ ، اس حال میں کہ ( تمھارے ایسا کہنے کے وقت ) امام خطبہ دے رہا ہو تو تم نے ایک لغو حرکت کی ۔‘‘

اردو ترجمہ · Urdu

ثعلبہ بن ابی مالک قرظی رحمہ اللہ سے روایت ہے کہ بے شک لوگ حضرت عمر بن خطاب رضی اللہ عنہ کے زمانے میں جمعہ کے دن ( پہلے سے آ کر ) نماز پڑھتے رہتے تھے ، یہاں تک کہ حضرت عمر رضی اللہ عنہ ( خطبہ کے لیے ) باہر تشریف لے آتے ، پھر حضرت عمر رضی اللہ عنہ نکلتے اور منبر پر بیٹھ جاتے اور مؤذن اذانیں دے رہے ہوتے تو ثعلبہ کہتے ہیں کہ ( چونکہ ابھی خطبہ شروع نہ ہوتا تھا اس لیے ) ہم بیٹھے گفتگو کر لیتے تھے ، پھر جب مؤذن خاموش ہو جاتے اور حضرت عمر رضی اللہ عنہ کھڑے ہو کر خطبہ دینے لگتے تو ہم خاموش ہو جاتے اور ہم میں سے کوئی بھی گفتگو نہ کرتا ، ( اس حدیث کے راوی ) ابن شہاب رحمہ اللہ کہتے ہیں کہ ( دورِ فاروقی میں صحابہ و تابعین کے اس عمل سے ثابت ہوا کہ ) امام کا ( خطبہ کے لیے ) باہر نکلنا ( لوگوں کے ) نماز ( پڑھنے ) کو موقوف کر دے گا اور امام کا ( خطبہ میں ) کلام کرنا ( لوگوں کے ) کلام کو موقوف کر دے گا ۔

اردو ترجمہ · Urdu

مالک بن ابن عامر رحمہ اللہ روایت کرتے ہیں کہ حضرت عثمان بن عفان رضی اللہ عنہ جب خطبہ دیتے تو اپنے خطبہ میں ( اکثر یہ ) کہا کرتے تھے اور بہت ہی کم ان کلمات کو ترک کرتے ، ( فرماتے : ) جب جمعہ کے دن امام کھڑا ہو کر خطبہ دینے لگے تو توجہ سے کان لگا لیا کرو اور خاموش رہا کرو کیونکہ بلاشبہ اس خاموش رہنے والے کے لیے جو ( بہرے پن کی وجہ سے یا خطیب سے دور ہونے کی وجہ سے اس کی آواز ) نہیں سن پاتا ( اس کے لیے بھی ) اتنا ہی اجر کا حصہ ہے جتنا کہ خاموش رہ کر ( امام کی آواز ) سننے والے کو ملتا ہے ، پھر جب نماز کھڑی ہو ( اور نماز کے لیے اقامت کہہ دی جائے ) تو صفیں ( سیدھی اور ) برابر کر لو اور اپنے کندھوں کو ( بھی ایک دوسرے کی سیدھ میں ) برابر کر لو ، کیونکہ یقیناً صفوں کو برابر کرنا نماز کی تکمیل میں شامل ہے ، پھر ( حضرت عثمان رضی اللہ عنہ اقامت ہو جانے کے باوجود ) تکبیر تحریمہ نہیں کہتے تھے حتی کہ وہ لوگ جن کو آپ نے صفیں برابر کرنے پر مقرر کیا ہوتا ، وہ آپ کے پاس آ کر بتاتے کہ صفیں برابر ہو گئی ہیں تو پھر وہ تکبیر تحریمہ کہتے ، پھر ( جب ) وہ ان کو یہ بتا دیتے کہ صفیں سیدھی ہو چکی ہیں تو تکبیر تحریمہ کہتے تھے ۔

اردو ترجمہ · Urdu

نافع رحمہ اللہ سے روایت ہے کہ حضرت عبداللہ بن عمر رضی اللہ عنہما نے دو آدمیوں کو دیکھا کہ وہ آپس میں باتیں کر رہے ہیں اور امام خطبہ دے رہا ہے تو انھوں نے دونوں کو کنکریاں ماریں ، ( تاکہ ) وہ چپ ہو جائیں ۔

اردو ترجمہ · Urdu

امام مالک رحمہ اللہ کو یہ خبر پہنچی کہ ایک شخص نے جمعہ کے دن چھینک مار دی ، اس حال میں کہ امام خطبہ دے رہا تھا ، تو اس کے پہلو میں موجود ایک شخص نے اُسے ’’ یَرْحَمُکَ اللّٰہُ ‘‘ ( اللہ تجھ پر رحم کرے ) کہہ کر دعا دی ، پھر اس نے سعید بن مسیب رحمہ اللہ سے اس کے متعلق پوچھا تو انھوں نے اُسے اس سے منع کر دیا اور کہا کہ پھر ایسا نہ کرنا ۔

اردو ترجمہ · Urdu

امام مالک رحمہ اللہ کہتے ہیں کہ انھوں نے ابن شہاب رحمہ اللہ سے سوال کیا کہ جمعہ کے دن امام منبر سے نیچے آ چکا ہو تو اس کے تکبیر تحریمہ کہنے سے پہلے گفتگو کرنا کیسا ہے ؟ تو ابن شہاب رحمہ اللہ نے فرمایا کہ اس میں کوئی حرج نہیں ہے ۔