اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ جس شخص نے جمعہ کے دن غسل ِجنابت جیسا غسل کیا ، پھر وہ پہلی گھڑی میں مسجد کی طرف گیا تو گویا اُس نے ایک اونٹ قرب الٰہی حاصل کرنے کے لیے صدقہ کیا ، اور جو دوسری گھڑی میں گیا تو اس نے گویا ایک گائے قرب الٰہی کے لیے صدقہ کی ، اور جو تیسری گھڑی میں گیا تو اس نے گویا سینگوں والا مینڈھا قرب الٰہی کی خاطر صدقہ کیا ، اور جو چوتھی گھڑی میں گیا تو گویا اس نے ایک مرغ قرب الٰہی پانے کے لیے صدقہ کیا ، اور جو پانچویں گھڑی میں گیا تو گویا اُس نے ایک انڈہ تقربِ الٰہی کے لیے صدقہ کیا ، پھر جب امام ( خطبہ دینے کے لیے ) نکلتا ہے تو فرشتے ( لکھنا بند کر کے خطبے میں ) حاضر ہو جاتے ہیں اور ذکرِ الٰہی ( پر مبنی خطبہ جمعہ ) کی طرف کان لگا دیتے ہیں ۔‘‘

اردو ترجمہ · Urdu

حضرت ابوہریرہ رضی اللہ عنہ فرمایا کرتے تھے کہ جمعہ کے دن کا غسل ، جنابت کے غسل کی طرح کرنا ہر بالغ شخص پر واجب ہے ۔‘‘

اردو ترجمہ · Urdu

’’ سالم بن عبداللہ رحمہ اللہ کہتے ہیں کہ رسول اللہ ﷺ کے صحابہ کرام رضی اللہ عنہم میں سے ایک ( مہاجر ) شخص جمعہ کے دن آئے ، اس وقت حضرت عمر بن خطاب رضی اللہ عنہ خطبہ دے رہے تھے تو حضرت عمر رضی اللہ عنہ نے ( منبر ہی پر خطبہ کے دوران میں ) اُن سے پوچھا کہ ( جمعہ کے لیے آنے کا ) یہ کون سا وقت ہے ؟ تو انھوں نے جواب دیا کہ اے امیرالمومنین ! میں تو بازار سے ( سیدھا مسجد ہی کی طرف ) لوٹا ہوں ، میں نے اذان سنی تو میں نے اس سے زیادہ اور کچھ بھی نہیں کیا کہ وضو کیا ( اور مسجد میں آ گیا ، میں تو گھر بھی نہ جا سکا ) تو حضرت عمر رضی اللہ عنہ فرمانے لگے کہ ( صرف ) وضو ( پر ہی اکتفا کرنا یہ ) بھی ( تمھارا دوسرا قصور ہے ) ، حالانکہ تمھیں علم ہے کہ رسول اللہ ﷺ ( جمعہ کے ) غسل کا ( تاکیدی ) حکم فرمایا کرتے تھے ۔‘‘

اردو ترجمہ · Urdu

حضرت ابوسعید خدری رضی اللہ عنہ روایت کرتے ہیں کہ رسول اللہ ﷺ نے فرمایا :’’ جمعہ کے دن کا غسل ہر بالغ مرد پر واجب ہے ۔‘‘

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ رسول اللہ ﷺ نے فرمایا :’’ جب تم میں سے کوئی جمعہ کو آئے تو غسل کر لے ۔‘‘