اردو ترجمہ · Urdu

ابوالحباب سعید بن یسار رحمہ اللہ سے روایت ہے کہ بلاشبہ رسول اللہ ﷺ نے فرمایا :’’ جس شخص نے پاکیزہ ( حلال ) کمائی سے کوئی صدقہ کیا اور اللہ تعالیٰ بھی طیب یعنی پاکیزہ چیز کے علاوہ کچھ قبول نہیں کرتا ۔ تو بلاشبہ وہ شخص اسے رحمان کی ہتھیلی میں رکھ دیتا ہے ، ( پھر ) وہ ( اللہ ) اسے یوں پالتا ( اور بڑھاتا ) ہے جیسے تم میں سے کوئی اپنے گھوڑی کے بچے کو یا اپنی اونٹنی کے بچے کو پالتا ہے ، یہاں تک کہ وہ ( صدقہ ایک ) پہاڑ کی طرح ہو جاتا ہے ۔‘‘

اردو ترجمہ · Urdu

حضرت انس بن مالک رضی اللہ عنہ سے روایت ہے ، کہتے ہیں : ( ان کے سوتیلے والد ) حضرت ابوطلحہ رضی اللہ عنہ مدینہ منورہ میں کھجوروں کے درختوں کے اعتبار سے تمام انصار صحابہ رضی اللہ عنہم میں سب سے زیادہ مالدار تھے اور ان کے نزدیک ان کے تمام اموال ( باغات ) میں سب سے زیادہ محبوب ’’ بَیْرُحَاء ‘‘ ( نامی باغ ) تھا اور وہ مسجد نبوی کے ( بالکل ) سامنے تھا ۔ رسول اللہ ﷺ اس میں داخل ہوا کرتے تھے اور اس میں موجود عمدہ ( ٹھنڈا و میٹھا ) پانی نوش فرمایا کرتے تھے ۔ حضرت انس رضی اللہ عنہ کہتے ہیں کہ پھر جب یہ آیت مبارکہ نازل ہوئی : {لَنْ تَنَالُوا الْبِرَّ حَتّٰی تُنْفِقُوْا مِمَّا تُحِبُّوْنَ} ( آل عمران 92 : 3 ) ’’ تم ہرگز نیکی کو نہیں پا سکتے یہاں تک کہ اس میں سے خرچ کرو جس سے تم محبت رکھتے ہو ۔‘‘ تو حضرت ابوطلحہ رضی اللہ عنہ رسول اللہ ﷺ کی طرف اٹھ ( کر چلے ) گئے اور عرض کیا کہ اے اللہ کے رسول ! یقیناً اللہ تبارک و تعالیٰ فرماتے ہیں : {لَنْ تَنَالُوا الْبِرَّ حَتّٰی تُنْفِقُوْا مِمَّا تُحِبُّوْنَ} ( آل عمران 92 : 3 ) اور یقیناً میرے تمام مالوں میں میرے نزدیک سب سے زیادہ پسندیدہ مال ’’ بَیْرُحاء ‘‘ ہے اور بلاشبہ وہ ( اب میری طرف سے ) اللہ کے لیے صدقہ ہے ، میں اس کی نیکی ( اور خیر و بھلائی ) اور اللہ کے ہاں ذخیرہ ہو جانے کی امید رکھتا ہوں ۔ لہٰذا اے اللہ کے رسول ! آپ جہاں چاہیں اسے رکھ دیجیے ( خرچ کر دیجیے ) ۔ حضرت انس رضی اللہ عنہ کہتے ہیں کہ رسول اللہ ﷺ نے فرمایا :’’ واہ بھئی واہ ! یہ تو نفع بخش مال ہے ، یہ تو نفع بخش مال ہے ۔ تم نے اس کے متعلق جو کچھ کہا ، وہ میں نے سن لیا ہے اور بلاشبہ میں یہ ( زیادہ بہتر ) سمجھتا ہوں کہ تم اسے اپنے رشتہ داروں میں تقسیم کر دو ۔‘‘ تو حضرت ابوطلحہ رضی اللہ عنہ کہنے لگے : اے اللہ کے رسول ! میں ( ایسے ہی ) کر دیتا ہوں ۔ چنانچہ حضرت ابوطلحہ نے اسے اپنے رشتہ داروں اور اپنے چچا کے بیٹوں کے درمیان تقسیم کر دیا ۔

اردو ترجمہ · Urdu

زید بن اسلم رحمہ اللہ سے روایت ہے کہ بلاشبہ رسول اللہ ﷺ نے فرمایا :’’ سائل ( مانگنے والے ) کو دیا کرو اور خواہ وہ گھوڑے پر سوار ہو کر آئے ۔‘‘

اردو ترجمہ · Urdu

عمرو بن معاذ ( بن سعد بن معاذ ) اشہلی انصاری رحمہ اللہ نے اپنی دادی ( حواء بنت یزید بن سکن رحمۃ اللہ علیہما ) سے روایت کیا ، وہ کہتی ہیں کہ رسول اللہ ﷺ نے فرمایا :’’ اے مومن عورتو ! تم میں سے کوئی بھی اپنی پڑوسن کے لیے ( ہدیہ بھیجنا ) حقیر نہ جانے ، اگرچہ وہ بکری کا جلا ہوا کھر ہو ۔‘‘

اردو ترجمہ · Urdu

امام مالک رحمہ اللہ کو سیدہ عائشہ رضی اللہ عنہا زوجہ پیغمبر ﷺ کے متعلق یہ خبر پہنچی کہ بیشک ایک مسکین نے ان سے ( کچھ مانگا ) وہ اس وقت روزے سے تھیں اور گھر میں ایک روٹی کے سوا کچھ نہ تھا ، پھر ( بھی ) انھوں نے اپنی آزاد کردہ باندی سے فرمایا کہ اسے وہ ( روٹی ) دے دو ۔ وہ کہنے لگی کہ آپ کے پاس کوئی ( اور ) چیز نہیں ہے جس سے آپ روزہ افطار کر سکیں تو انھوں نے فرمایا : تم اسے وہ دے دو ۔ اس لونڈی نے کہا کہ میں نے ایسا ہی کیا ۔ وہ کہتی ہے : جب ہم نے شام کی تو ہم کو کسی گھر والوں نے یا ( کہا کہ ) کسی شخص جو ( اس سے قبل ) ہمیں ہدیہ نہیں دیا کرتے تھے ، نے بکری اور وہ بھی پکی ہوئی ، ہدیے میں بھیج دی تو سیدہ عائشہ رضی اللہ عنہا نے مجھے بلایا اور فرمایا : اس میں سے تم بھی کھاؤ ۔ یہ تیری اس ( صدقہ میں دی ہوئی ) روٹی سے بہتر ہے ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک ایک مسکین نے سیدہ عائشہ رضی اللہ عنہا زوجہ پیغمبر ﷺ سے کھانا مانگا ، اس حال میں کہ ان کے سامنے انگور پڑے ہوئے تھے تو انھوں نے کسی شخص سے کہا : انگور کا ایک دانہ لو اور اس مسکین کو وہ دے آؤ تو وہ شخص ( حیرت سے ) انھیں دیکھنے لگا اور تعجب کرنے لگا ( کہ بھلا ایک دانہ بھی صدقہ میں دیا جاتا ہے ) تو سیدہ عائشہ رضی اللہ عنہا نے فرمایا : کیا تو تعجب کر رہا ہے ، تم اس دانے میں کس قدر ذرات دیکھ رہے ہو ۔