اردو ترجمہ · Urdu

صفوان بن سلیم رحمہ اللہ سے روایت ہے کہ ایک آدمی نے رسول اللہ ﷺ سے عرض کیا : کیا میں اپنی بیوی سے جھوٹ بول سکتا ہوں تو رسول اللہ ﷺ نے فرمایا :’’ جھوٹ میں کوئی خیر نہیں ہے ۔‘‘ وہ آدمی کہنے لگا : کیا میں اس سے ( خالی ) وعدہ کر سکتا ہوں اور اس سے کہہ سکتا ہوں ( کہ تیرے لیے یہ کروں گا اور وہ کروں گا ) ؟ تو رسول اللہ ﷺ نے فرمایا :’’ ( ایسا کرنے میں ) تجھ پر کوئی گناہ نہ ہو گا ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت عبداللہ بن مسعود رضی اللہ عنہ فرمایا کرتے تھے :’’ سچ کو لازم پکڑو ، کیونکہ بلاشبہ سچ نیکی کی طرف رہنمائی کرتا ہے اور نیکی جنت کا راستہ دکھاتی ہے اور خود کو جھوٹ سے بچاؤ کیونکہ یقیناً جھوٹ برائی کی راہ دکھاتا ہے اور برائی جہنم کی طرف لے جاتی ہے ۔ کیا تم نے دیکھا ( سنا ) نہیں کہ یہ کہا جانے لگتا ہے کہ اس ( فلاں ) نے سچ کہا اور نیکی کی اور ( فلاں نے ) جھوٹ بولا اور برائی کی ۔

اردو ترجمہ · Urdu

امام مالک رحمہ اللہ کو یہ خبر پہنچی کہ لقمان حکیم سے کہا گیا : آپ کو اس مقام تک کس چیز نے پہنچایا ہے جہاں ہم آپ کو دیکھ رہے ہیں ؟ وہ فضل ( فضیلت و بزرگی کا حصول ) مراد لے رہے تھے تو لقمان رحمہ اللہ نے کہا : بات کی سچائی نے ، امانت کی ادائیگی نے اور ہر اس چیز ( بات ، کام ، سوچ ) کو چھوڑ دینے نے جو لا تیعنی اور بے مقصد ہو ۔

اردو ترجمہ · Urdu

امام مالک رحمہ اللہ کو یہ خبر پہنچی کہ حضرت عبداللہ بن مسعود رضی اللہ عنہ فرمایا کرتے تھے : آدمی مسلسل جھوٹ بولتا رہتا ہے اور اس کے دل میں ایک سیاہ نکتہ لگا دیا جاتا ہے جو ( مسلسل بڑھتا رہتا ہے ) یہاں تک کہ اس کا ( سارا ) دل سیاہ ہو جاتا ہے ، چنانچہ وہ اللہ تعالیٰ کے ہاں جھوٹوں میں سے لکھ دیا جاتا ہے ۔

اردو ترجمہ · Urdu

صفوان بن سلیم رحمہ اللہ سے روایت ہے ، کہتے ہیں کہ رسول اللہ ﷺ سے کہا گیا : کیا مومن بزدل ہو سکتا ہے ؟ آپ ﷺ نے فرمایا :’’ ہاں ۔‘‘ پھر آپ ﷺ سے کہا گیا : کیا مومن بخیل ہو سکتا ہے ؟ فرمایا :’’ ہاں ۔‘‘ پھر آپ ﷺ سے پوچھا گیا : کیا مومن جھوٹا ہو سکتا ہے ؟ فرمایا :’’ نہیں ۔‘‘