اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ غلام کے لیے اس کا کھانا اور کپڑے پہنانا معروف طریقے کے مطابق ( مالک کے ذمے ) ہے اور اسے کسی کام کی تکلیف نہ دی جائے مگر صرف اس کی کہ جس کی وہ طاقت رکھتا ہو ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بیشک حضرت عمر بن خطاب رضی اللہ عنہ ہر ہفتے کے دن عوالی ( مدینہ منورہ کے بالائی حصوں کی بستیوں ) کی طرف جاتے تھے ۔ چنانچہ جب وہ کسی غلام کو کسی ایسے کام میں پاتے جس کی وہ طاقت نہ پا رہا ہوتا تو اس ( غلام ) سے اس ( کام ) میں کچھ تخفیف کر دیتے ۔

اردو ترجمہ · Urdu

امام مالک رحمہ اللہ اپنے چچا ابوسہیل بن مالک رحمہ اللہ سے اور وہ اپنے والد ( مالک بن ابی عامر اصبحی رحمہ اللہ ) سے روایت کرتے ہیں ، انھوں نے حضرت عثمان بن عفان رضی اللہ عنہ کو سنا ، اس حال میں کہ وہ خطبہ دے رہے تھے اور فرما رہے تھے : وہ لونڈی جو کسی کاریگری ( اور ہنر کو جاننے ) والی نہ ہو ، اسے کمائی کا پابند نہ کرو ( کچھ کما کر لانے پر مجبور نہ کرو ) کیونکہ بلاشبہ جب بھی تم اسے اس ( کمائی ) کا پابند کرو گے ، وہ اپنی شرمگاہ سے ( عزت کو بیچ کر یعنی زنا کے ذریعے ) کمائی کرے گی ، اور نہ ہی تم چھوٹے بچے کو کما کر لانے پر مجبور کرو کیونکہ یقیناً وہ جب کچھ نہ پائے گا تو چوری کرے گا ۔ اور تم عفت اختیار کرو ( ایسی لونڈی اور غلام بچے کو مجبور کرنے اور ان پر مشقت ڈالنے سے بچتے رہو ) جس وقت کہ اللہ نے تمھیں ( وسعتِ رزق عطا فرما کر ہاتھ پھیلانے اور مانگنے سے ) عفت و پاکدامنی عطا فرمائی ہو اور تم انھی کھانوں کو لازم پکڑو جو ان میں سے حلال اور پاکیزہ ہیں ( یعنی صرف حلال کمائی کی جستجو کرو اور حلال ہی استعمال کرو ) ۔