اردو ترجمہ · Urdu

حضرت ابولبابہ رضی اللہ عنہ سے روایت ہے کہ بلاشبہ رسول اللہ ﷺ نے ان سفید باریک چھوٹے سانپوں کو قتل کرنے سے منع فرمایا جو گھروں میں ہوتے ہیں ۔

اردو ترجمہ · Urdu

سائبہ رحمۃ اللہ علیہما جو کہ سیدہ عائشہ رضی اللہ عنہا کی آزاد کردہ لونڈی ہیں ، سے روایت ہے کہ بلاشبہ رسول اللہ ﷺ نے گھروں میں رہنے والے سانپوں کو مارنے سے منع فرمایا ہے ، سوائے دو سفید دھاریوں والے سانپ اور دُم کٹے ( چھوٹی دم والے ) سانپ کے ، کیونکہ بلاشبہ وہ دونوں نظر اچک لیتے ہیں ( بینائی ختم کر دیتے ہیں ) اور اس چیز کو پھینک دیتے ہیں جو عورتوں کے پیٹوں میں ہوتی ہے ( حمل ساقط کر دیتے ہیں ) ۔

اردو ترجمہ · Urdu

ابوسائب رحمہ اللہ ( عبداللہ بن سائب ) جو ہشام بن زہرہ کے آزاد کردہ غلام ہیں ، سے روایت ہے ، کہتے ہیں کہ : میں حضرت ابوسعید خدری رضی اللہ عنہ کے پاس گیا ، میں نے انھیں نماز پڑھتے ہوئے پایا تو میں بیٹھ گیا ( اور ) ان کا انتظار کرنے لگا کہ وہ اپنی نماز پوری کر لیں ۔ ( ابوسائب رضی اللہ عنہ ) کہتے ہیں : میں نے ان کے گھر میں ایک چارپائی کے نیچے کچھ حرکت سی سنی تو اچانک ( وہاں ) ایک سانپ ( نظر آ رہا ) تھا ۔ میں اٹھا تاکہ اسے قتل کروں کہ ( اتنے میں ) حضرت ابوسعید رضی اللہ عنہ نے ( نماز ہی میں ) مجھے اشارہ کیا کہ بیٹھا رہوں ( اور اسے نہ ماروں ) ۔ پھر جب وہ ( نماز سے ) فارغ ہوئے تو انھوں نے ( اپنے ) محلے میں ( موجود ) ایک گھر کی طرف اشارہ کیا اور فرمایا : کیا تم اس گھر کو دیکھ رہے ہو ؟ میں نے کہا کہ جی ہاں ، تو وہ فرمانے لگے : بلاشبہ شان یہ ہے کہ اس گھر میں ایک نوجوان رہتا تھا جس کی نئی نئی شادی ہوئی تھی ، وہ رسول اللہ ﷺ کے ہمراہ خندق کی طرف نکلا ۔ پھر اسی اثناء میں کہ آپ ﷺ اس ( غزوئہ خندق کے موقع پر کھدائی وغیرہ ) میں مصروف تھے کہ یکایک وہی نوجوان آپ ﷺ کے پاس آیا ۔ وہ آپ ﷺ سے اجازت مانگ رہا تھا ، کہنے لگا کہ : اے اللہ کے رسول ﷺ ! مجھے اجازت مرحمت فرمائیے ۔ میں اپنی اہلیہ سے ملاقات کو تازہ کر آؤں تو رسول اللہ ﷺ نے اسے اجازت عطا فرما دی ، پھر فرمایا :’’ اپنے اوپر اپنا اسلحہ لگا کر لے جانا ( مسلح حالت میں جانا ) کیونکہ یقیناً مجھے تم پر بنوقریظہ ( کی طرف سے حملے ) کا خطرہ ہے ( کہ مدینہ میں چھپا ہوا یہ یہودی گروہ کہیں معاہدہ توڑ کر مسلمانان مدینہ کے قتل کے درپے نہ ہو جائے ) ۔ چنانچہ وہ نوجوان اپنے گھر والوں کی طرف چل پڑا ۔ ( جب وہ گھر کے پاس پہنچا ) تو اس نے اپنی بیوی کو دونوں دروازوں ( دروازے کے دونوں تختوں ) کے درمیان کھڑی ہوئی پایا تو ( وہ مارے غیرت کے شدید غصے میں آ گیا اور ) اس نے نیزہ اس ( بیوی ) کی طرف بڑھا دیا تاکہ اسے مارے ۔ غیرت اس پر غلبہ پا چکی تھی کہ ( اتنی دیر میں وہ بیوی جلدی سے ) کہنے لگی : جلدی نہ کیجیے یہاں تک کہ گھر میں داخل ہو جائیے اور اس چیز کو دیکھ لیجیے جو گھر میں ہے ۔ وہ اندر داخل ہوا تو اچانک ایک سانپ ( دیکھا جو ) کنڈلی مارے ہوئے اس ( نوجوان ) کے بستر پر ( بیٹھا ہوا ) تھا ۔ چنانچہ اس نے اپنا نیزہ اس میں گاڑ دیا ( اور اسے نیزے میں پرو لیا ) پھر وہ اسے لے کر باہر نکلا اور محلے میں اپنا نیزہ گاڑ دیا ( لیکن ہوا یوں کہ اتنی دیر میں ) نیزے کے سر پر سانپ تڑپا اور وہ نوجوان بھی ( فوراً ) مر کر گر پڑا ( اور ساتھ ہی سانپ بھی ٹھنڈا ہو گیا ) پھر پتا نہ چل سکا کہ ان دونوں میں سے کس نے مرنے میں زیادہ جلدی کی ، نوجوان نے یا سانپ نے ( یعنی وہ اکٹھے ہی گرے اور فوراً مر گئے ) ۔ پھر رسول اللہ ﷺ کے حضور اس ( واقعے ) کا تذکرہ کیا گیا تو آپ ﷺ نے فرمایا :’’ بلاشبہ مدینہ منورہ میں کچھ جنات ہیں جو مسلمان ہو چکے ہیں ( اور سانپوں کی شکل میں ظاہر ہوتے رہتے ہیں ، لگتا ہے کہ وہ سانپ کوئی جن تھا اور یہ نوجوان جن کے ہاتھوں مارا گیا ہے ۔ ) لہٰذا جب تم ان میں سے کسی کو دیکھو تو اسے تین دن تک آگاہ کرتے رہو ( کہ بھئی دوبارہ نہ آنا ) ، پھر اگر وہ اس کے بعد بھی تمھارے سامنے ظاہر ہو تو اسے قتل کر ڈالو ، کیونکہ بلاشبہ وہ تو صرف اور صرف شیطان ہے ( اور کافر ہے ، مومن نہیں ہے ) ۔