اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک رسول اللہ ﷺ نے فرمایا :’’ کفر کا سر ( بڑا کفر ) مشرق کی طرف ہے ، فخر و تکبر گھوڑوں اور اونٹوں والوں اور بہت چلانے والے خانہ بدوشوں میں ہے اور سکینت ( عاجزی ، تواضع اور وقار ) بکریوں والوں میں ہے ۔‘‘

اردو ترجمہ · Urdu

حضرت ابوسعید خدری رضی اللہ عنہ سے روایت ہے کہ رسول اللہ ﷺ نے فرمایا :’’ قریب ہے کہ مسلمان کا بہترین مال بکریاں ہوں گی ۔ وہ انھیں لے کر پہاڑوں کی چوٹیوں اور بارش برسنے کی جگہوں میں چلا جائے گا ( اور اس طرح ) وہ اپنے دین کو لے کر فتنوں سے بھاگ رہا ہو گا ۔‘‘

اردو ترجمہ · Urdu

حضرت ابن عمر رضی اللہ عنہما سے روایت ہے کہ یقیناً رسول اللہ ﷺ نے فرمایا :’’ کوئی بھی شخص کسی دوسرے شخص کے چوپائے کا دودھ اس کی اجازت کے بغیر ہرگز نہ دوہے ۔ کیا تم میں سے کوئی یہ پسند کرتا ہے کہ اس کے بالاخانے میں ( چوری چھپے ) آیا جائے ، پھر اس کی ( خزانے والی ) الماری کو توڑ دیا جائے ، پھر ( اس میں موجود ) اس کا اناج ( چُرا کر وہاں سے ) منتقل کر دیا جائے ( تو چونکہ کوئی بھی اپنے لیے اسے پسند نہیں کرتا ، لہٰذا دوسروں کے لیے بھی ایسا ہی رویہ اختیار کرنا چاہیے اور ان کا مال نہ چرانا چاہیے ) اور بلاشبہ لوگوں کے لیے ان کے چوپایوں کے تھن ( گویا الماریاں ہیں جو ) ان کے کھانوں کو ذخیرہ کرتے ہیں ۔ لہٰذا کوئی بھی شخص کسی آدمی کے چوپائے کا دودھ ہرگز نہ دوہے ، مگر اس کی اجازت کے ساتھ ( ایسا کر سکتا ہے ) ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بلاشبہ رسول اللہ ﷺ نے فرمایا :’’ کوئی نبی ایسا نہیں ہوا جس نے بکریاں نہ چرائی ہوں ۔‘‘ عرض کیا گیا کہ اے اللہ کے رسول ﷺ ! آپ نے بھی ؟ فرمایا :’’ ( ہاں ) اور میں نے بھی ۔‘‘