اردو ترجمہ · Urdu

حضرت ابوہریرہ رضی اللہ عنہ سے روایت ہے ، کہتے ہیں کہ رسول اللہ ﷺ نے فرمایا :’’ یقیناً اللہ تبارک و تعالیٰ قیامت کے دن فرمائیں گے : کہاں ہیں میری جلالت ( و بزرگی اور عظمت ) کی وجہ سے آپس میں محبت رکھنے والے ؟ آج کے دن میں انھیں اپنے ( عرش کے ) سائے میں سایہ عطا کروں گا جس دن کہ میرے سائے کے سوا کوئی سایہ نہیں ہے ۔‘‘

اردو ترجمہ · Urdu

حضرت ابوسعید خدری رضی اللہ عنہ یا حضرت ابوہریرہ رضی اللہ عنہ سے روایت ہے ، کہتے ہیں کہ بلاشبہ رسول اللہ ﷺ نے فرمایا :’’ سات ( قسم کے ) افراد کو اللہ تعالیٰ اپنے سائے میں اس دن سایہ عطا فرمائے گا جس دن اس کے سائے کے سوا کوئی سایہ نہ ہو گا ۔ ( 1 ) عدل کرنے والا امام ( 2 ) وہ نوجوان جو اللہ کی عبادت میں پروان چڑھا ۔ ( 3 ) وہ شخص جس کا دل مسجد سے لٹکا رہتا ہے اس وقت کہ جب وہ مسجد سے باہر نکلے ( اس کا دل مسجد ہی کی طرف مائل رہتا ہے اور بے چین رہتا ہے ) یہاں تک کہ اس ( مسجد ) کی طرف واپس لوٹ آئے ۔ ( 4 ) وہ دو شخص جو اللہ کی خاطر آپس میں محبت کریں ، وہ دونوں اسی پر جمع ہوں اور اسی پر وہ جدا ہوں ۔ ( 5 ) وہ شخص جو اللہ کا ذکر کرے اس حال میں کہ وہ تنہا ہو تو ( اللہ کی یاد سے ) اس کی آنکھیں ( آنسوؤں کے ساتھ ) بہہ پڑیں ۔ ( 6 ) وہ آدمی جسے حسب ( خاندانی شرافت ) اور خوبصورتی والی عورت ( زنا کی ) دعوت دے تو وہ کہے : بلاشبہ میں اللہ رب العالمین سے ڈرتا ہوں ، اور ( 7 ) وہ آدمی جو کوئی صدقہ کرے تو اسے ( اس قدر ) مخفی رکھے یہاں تک کہ اس کے بائیں ہاتھ کو معلوم نہ ہو سکے کہ اس کا دایاں ہاتھ کیا خرچ کر رہا ہے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ یقیناً رسول اللہ ﷺ نے فرمایا :’’ جب اللہ تعالیٰ کسی بندے سے محبت کرتے ہیں تو جبریل علیہ السلام سے کہتے ہیں : اے جبریل ! یقیناً میں نے فلاں شخص سے محبت کی ہے ( اسے اپنا محبوب بنا لیا ہے ) لہٰذا تم بھی اس سے محبت کرو ۔ چنانچہ جبریل علیہ السلام اس سے محبت کرنے لگتے ہیں ، پھر وہ آسمان والوں ( تمام فرشتوں وغیرہ ) میں منادی کرتے ہیں کہ بلاشبہ اللہ تعالیٰ کو فلاں بندے سے محبت ہے ، اس لیے تم سب بھی اس سے محبت کرو ۔ چنانچہ اس سے آسمان والے ( تمام فرشتے ) محبت کرنے لگتے ہیں ، پھر زمین میں اس کے لیے قبولیت اتار دی جاتی ہے ( وہ محبوب زماں بن جاتا ہے ) ۔ پھر جب اللہ تعالیٰ کسی بندے سے بغض ( اور نفرت ) کرتے ہیں … ‘‘ امام مالک رحمہ اللہ نے فرمایا کہ : میں ان کو ( یعنی اپنے شیخ سہیل بن ابی صالح کو ) اور کچھ خیال نہیں کرتا مگر یہی کہ انھوں نے بغض کے متعلق بھی اسی طرح کہا ( اور بیان کیا ) ۔

اردو ترجمہ · Urdu

ابوادریس خولانی رحمہ اللہ سے روایت ہے ، اس نے کہا : میں دمشق کی مسجد میں داخل ہوا تو اچانک ( وہاں ) ایک نوجوان شخص ( موجود ) تھا ، جو بہت سفید ( اور چمکدار ) دانتوں والا تھا اور اچانک کچھ لوگ بھی اس کے ساتھ ( نظر آ رہے ) تھے ۔ جب بھی ان کا کسی چیز کے متعلق اختلاف ہوتا تو وہ اسی ( کے فیصلے ) پر بھروسہ کرتے اور اس کی ( فیصلہ کن ) بات سے مدد لیتے ( اور چپ چاپ مان لیتے ۔ ابو ادریس خولانی رحمہ اللہ کہتے ہیں کہ ) چنانچہ میں نے اس کے متعلق پوچھا تو مجھے بتایا گیا کہ یہ ( صحابی رسول ﷺ ) حضرت معاذ بن جبل رضی اللہ عنہ ہیں ۔ پھر جب اگلا دن ہوا تو میں ( مسجد کی طرف ) جلدی جلدی گیا ۔ میں نے انھیں دیکھا کہ وہ تو جلدی آنے میں مجھ سے بھی سبقت لے جا چکے ہیں اور میں نے انھیں نماز پڑھتے ہوئے پایا ۔ چنانچہ میں نے ان کا انتظار کیا ، یہاں تک کہ انھوں نے اپنی نماز پوری کی ، پھر میں ان کے چہرے کی جانب سے ان کے پاس آیا اور انھیں سلام عرض کیا ، پھر میں نے کہا : اللہ کی قسم ! یقیناً میں اللہ کے لیے آپ سے محبت کرتا ہوں ۔ وہ فرمانے لگے : کیا واقعی ، اللہ کی قسم ! میں نے کہا کہ یقیناً ، اللہ کی قسم ! انھوں نے پھر کہا کہ کیا واقعی ، اللہ کی قسم ! ؟ میں نے بھی کہا کہ یقیناً اللہ کی قسم ! تو انھوں نے میری چادر کا کنارہ پکڑا اور مجھے اپنی طرف کھینچا اور فرمایا : خوش ہو جاؤ ، کیونکہ بلاشبہ میں نے رسول اللہ ﷺ کو سنا تھا ، آپ ﷺ فرما رہے تھے :’’ اللہ تبارک و تعالیٰ نے فرمایا ہے کہ میری محبت ان لوگوں کے لیے واجب ہو گئی ہے جو میری خاطر باہم محبت رکھنے والے ہیں اور جو میری خاطر ( نیک مقاصد کے لیے ) آپس میں مل بیٹھنے والے ہیں ، اور جو میری خاطر ایک دوسرے کی زیارت ( ملاقات ) کرنے والے ہیں اور جو میری خاطر ایک دوسرے پر خرچ کرنے والے ہیں ۔

اردو ترجمہ · Urdu

حضرت ابن عباس رضی اللہ عنہما سے روایت ہے ، وہ کہا کرتے تھے کہ میانہ روی ، نرمی اور اچھی ہیت و صورت نبوت کے پچیس اجزاء میں سے ایک جز ہے ۔