اردو ترجمہ · Urdu

یحیی بن سعید رحمہ اللہ سے روایت ہے ، کہتے ہیں کہ مجھے یہ خبر پہنچی کہ حضرت خالد بن ولید رضی اللہ عنہ نے رسول اللہ ﷺ سے عرض کیا : بلاشبہ میں اپنی نیند میں ڈرا دیا جاتا ہوں ( اور گھبرا جاتا ہوں ) تو رسول اللہ ﷺ نے ان سے فرمایا کہ یہ پڑھا کرو : ’’ اَعُوْذُ بِکَلِمَاتِ اللّٰہِ التَّامَّۃِ مِنْ غَضَبِہٖ وَ عِقَابِہٖ وَ شَرِّ عِبَادِہٖ وَ مِنْ ھَمَزَاتِ الشَّیَاطِیْنِ وَ اَنْ یَّحْضُرُوْنِ ‘‘ ’’ میں اللہ کے کامل کلمات کے ساتھ پناہ پکڑتا ہوں اس کے غضب سے ، اس کے عذاب سے ، اس کے بندوں کے شر سے ، شیطانوں کے وسوسوں سے اور اس بات سے کہ شیطان میرے پاس حاضر ہوں ۔‘‘

اردو ترجمہ · Urdu

یحیی بن سعید رحمہ اللہ سے روایت ہے ، کہتے ہیں کہ رسول اللہ ﷺ کو ( جس رات ) معراج پر لے جایا گیا ، آپ ﷺ نے جنات میں سے ایک دیو کو دیکھا کہ وہ آگ کا ایک شعلہ لے کر آپ ﷺ کو طلب کر رہا ہے ( اور آپ ﷺ کو کوئی نقصان پہنچانا چاہتا ہے ) ۔ جب بھی رسول اللہ ﷺ مڑ کر دیکھتے تو اسے ( اسی حالت میں پیچھا کرتے ہوئے ) دیکھتے ، تو جبریل علیہ السلام نے آپ ﷺ سے کہا : کیا میں آپ کو وہ کلمات نہ سکھاؤں کہ جنھیں آپ پڑھ لیں ۔ جب آپ انھیں کہہ لیں گے تو اس کا شعلہ بجھ جائے گا اور وہ اپنے منہ کے بل گر پڑے گا تو رسول اللہ ﷺ نے فرمایا :’’ کیوں نہیں ۔‘‘ چنانچہ جبریل علیہ السلام نے کہا : آپ یہ پڑھیے : ( اَعُوْذُ بِوَجْہِ اللّٰہِ الْکَرِیْمِ …… ) سے آخر تک ۔ ( ترجمہ ) :’’ میں اللہ کے عزت والے چہرے کے ساتھ اور اللہ کے وہ کامل کلمات کہ جن سے نہ کوئی نیک اور نہ کوئی بد شخص تجاوز کر سکتا ہے ، ( کوئی شخص ان کلمات سے زیادہ کا علم نہیں رکھتا ، میں ان کلمات ) کے ساتھ پناہ پکڑتا ہوں ، اس چیز کے شر سے جو آسمان سے اترتی ہے اور اس چیز کے شر سے جو اس میں چڑھتی ہے اور اس چیز کے شر سے جو اس ( اللہ ) نے زمین میں پیدا فرمائی ہے اور اس چیز کے شر سے جو اس سے نکلتی ہے ، اور رات اور دن کے فتنوں سے ، اور رات اور دن میں آنے والی چیزوں ( آفتوں اور حادثات ) سے ، سوائے اس چیز کے جو رات کے وقت خیر کے ساتھ اترے ، اے رحمان !‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک ( بنوخزاعہ کی ایک شاخ ) اسلم قبیلے کے ایک شخص نے عرض کیا : ( اے اللہ کے رسول ﷺ ! ) میں آج کی اس رات میں سو نہ سکا تو رسول اللہ ﷺ نے فرمایا :’’ کس چیز کی وجہ سے ؟‘‘ انھوں نے کہا کہ ایک بچھو نے مجھے ڈس لیا تھا تو رسول اللہ ﷺ نے فرمایا :’’ آگاہ رہو اگر تم اس وقت کہ جب تم نے شام کی تھی ، یہ کہہ لیتے : ( اَعُوْذُ بِکَلِمَاتِ اللّٰہِ التَّامَّاتِ مِنْ شَرِّ مَا خَلَقَ ) ( میں اللہ تعالیٰ کے کامل کلمات کے ساتھ ہر اس چیز کے شر سے پناہ مانگتا ہوں جو اس نے پیدا کی ہے ۔ ) تو وہ بچھو تمھیں نقصان نہیں پہنچا سکتا تھا ۔‘‘

اردو ترجمہ · Urdu

کعب احبار رحمہ اللہ ( جو اسلام لانے سے قبل یہودی عالم تھے ) سے روایت ہے ، کہتے ہیں کہ اگر وہ کلمات نہ ہوتے جو میں کہتا رہتا ہوں تو یہودی ( جادو کے ذریعے ) مجھے گدھا بنا دیتے ۔ ان سے کہا گیا کہ وہ کلمات کیا ہیں ؟تو انھوں نے فرمایا : ( اَعُوْذُ بِوَجْہِ اللّٰہِ …… ) سے آخر تک ۔ ( ترجمہ ) ’’ میں پناہ حاصل کرتا ہوں بہت عظمت والے اللہ کے ساتھ کہ کوئی بھی شے جس سے عظیم نہیں ہو سکتی ، اور اللہ کے ان کلمات کے ساتھ جن سے نہ کوئی نیک تجاوز کر سکتا ہے اور نہ کوئی بد ( یعنی کوئی شخص ان سے زیادہ کا علم نہیں رکھتا ) اور اللہ کے تمام اسمائے حسنیٰ ( اچھے اچھے ناموں ) کے ساتھ ان میں سے جس کا مجھے علم ہے یا جسے میں نہیں جانتا ( تو ان تمام چیزوں کے ساتھ میں پناہ پکڑتا ہوں ) ہر اس چیز کے شر سے جسے اس نے تخلیق کیا ، پیدا فرمایا اور پھیلایا ۔‘‘