اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ بلاشبہ رسول اللہ ﷺ نے مونچھوں کے مونڈنے اور داڑھیوں کے بڑھانے کا حکم دیا ہے ۔

اردو ترجمہ · Urdu

حمید بن عبدالرحمن بن عوف رحمہ اللہ سے روایت ہے ، انھوں نے ( امیرالمومنین ) حضرت معاویہ بن ابی سفیان رضی اللہ عنہما کو سنا ، اس سال ، جس میں انھوں نے ( ملک شام سے آ کر ) حج کیا ، اس ( بیان کے ) وقت وہ ( مدینہ میں رسول اللہ ﷺ کے ) منبر پر تھے اور انھوں نے ( نقلی ) بالوں کا ایک گچھا لیا جو ( ان کے پکڑنے سے پہلے ) ایک محافظ کے ہاتھ میں تھا ۔ ( حمید رحمہ اللہ کہتے ہیں کہ میں نے انھیں سنا ) وہ فرما رہے تھے : اے مدینہ والو ! کہاں ہیں تمھارے علماء ؟ میں نے رسول اللہ ﷺ کو سنا تھا ، آپ ﷺ اس طرح کی چیز سے منع کر رہے تھے اور یہ ارشاد فرما رہے تھے :’’ بلاشبہ بنی اسرائیل اس وقت ہلاک کیے گئے ، جب ان کی عورتوں نے اسے اختیار کیا ۔‘‘

اردو ترجمہ · Urdu

زیاد بن سعد رحمہ اللہ سے روایت ہے ، انھوں نے ابن شہاب رحمہ اللہ کو سنا ، وہ ایک آدمی سے کہہ رہے تھے : رسول اللہ ﷺ اپنی پیشانی کے بال ، جب تک اللہ نے چاہا سیدھے لٹکاتے رہے ( اور سر کے درمیان میں مانگ نہ نکالتے ) پھر اس کے بعد مانگ نکالنے لگے ۔

اردو ترجمہ · Urdu

حضرت عبداللہ بن عمر رضی اللہ عنہما سے روایت ہے کہ وہ خصّی کرنے کو ناپسند کرتے تھے اور کہتے تھے : اس ( خصیوں ، کپوروں کے باقی رکھنے ) میں تخلیق کی تکمیل ہے ۔

اردو ترجمہ · Urdu

صفوان بن سلیم رحمہ اللہ کو یہ خبر پہنچی کہ بے شک نبی کریم ﷺ نے فرمایا :’’ میں اور یتیم کی کفالت کرنے والا ( خواہ وہ یتیم ) اس کا ( رشتہ دار مثلاً پوتا ، بھتیجا ، بھائی وغیرہ ) ہو یا کسی اور کا ہو ( یعنی اجنبی اور غیر رشتہ دار ہو تو میں اور وہ کفالت کرنے والا ) جنت میں ان دو انگلیوں کی طرح ( قریب قریب ) ہوں گے ( بشرطیکہ ) جب وہ تقویٰ اختیار کرے ۔‘‘ اور ( یہ فرماتے ہوئے ) آپ ﷺ نے اپنی دو انگلیوں کے ساتھ اشارہ فرمایا ، درمیانی انگلی اور وہ ( شہادت والی ) انگلی جو انگوٹھے کے قریب ہوتی ہے ۔