اردو ترجمہ · Urdu

حضرت عبداللہ بن عمر رضی اللہ عنہ سے روایت ہے کہ بلاشبہ رسول اللہ ﷺ نے فرمایا :’’ میں نے آج رات ( خواب میں خود کو خانہ کعبہ کے پاس دیکھا ) میں نے ایک گندمی رنگت والے صاحب کو دیکھا ، اس سب سے خوبصورت شخص کی طرح جو تم نے گندمی رنگت والے آدمیوں میں سے ( کبھی ) دیکھا ہو ، ان کے ’’ لمِہّ ‘‘ بال تھے یعنی کانوں کی لو سے گزر کر کندھوں تک پہنچنے والی زلفیں تھیں ، ان سے خوبصورت ، کندھوں تک پہنچنے والی زلفوں کی طرح جو تم نے کبھی دیکھی ہوں ، انھوں نے ان میں کنگھی کر رکھی تھی اور ان میں سے پانی کے قطرے گر رہے تھے ، وہ دو آدمیوں پر سہارا لیے ہوئے تھے یا ( فرمایا کہ ) دو آدمیوں کے کندھوں پر سہارا لگائے ہوئے خانہ کعبہ کا طواف کر رہے تھے ، تو میں نے ( فرشتے سے ) پوچھا کہ یہ کون ہیں ؟ تو مجھے بتایا گیا کہ یہ حضرت مسیح ابن مریم علیہ السلام ہیں ۔ پھر اچانک میں ایک ( ایسے ) آدمی کو دیکھنے لگا جو سخت گھنگھریالے بالوں والا اور دائیں آنکھ سے کانا تھا ، گویا کہ وہ ابھرا ہوا انگور ہو ، میں نے پوچھا کہ یہ کون ہے ؟ تو مجھے بتایا گیا کہ یہ مسیح دجال ہے ۔