اردو ترجمہ · Urdu

حضرت انس بن مالک رضی اللہ عنہ سے روایت ہے ، فرماتے ہیں کہ رسول اللہ ﷺ نہ تو بہت زیادہ لمبے تھے ، نہ چھوٹے قد کے تھے ( بلکہ درمیانی قد سے کچھ اوپر قد والے تھے ) ، نہ ( چونے کی طرح ) بہت زیادہ سفید رنگت والے تھے اور نہ ( بالکل ) گندمی رنگ والے تھے ( بلکہ گندمی مائل گوری رنگت رکھتے تھے ) ، نہ ہی بہت زیادہ گھنگھریالے بالوں والے اور نہ بالکل سیدھے بالوں والے تھے ( بلکہ سیدھے بالوں میں معمولی سا گھنگھریالہ پن تھا ) اللہ تعالیٰ نے آپ ﷺ کو چالیس سال کے اختتام پر ( رسول بنا کر ) مبعوث فرمایا ۔ آپ ﷺ مکہ میں دس سال اور مدینہ میں بھی دس سال قیام پذیر رہے اور اللہ تعالیٰ نے آپ ﷺ کو ساٹھ سال کے اختتام پر فوت فرما لیا ، اس حال میں کہ آپ ﷺ کے سر اور داڑھی مبارک میں بیس سفید بال بھی نہ تھے ، اللہ تبارک و تعالیٰ آپ ﷺ پر صلاۃ و سلام نازل فرمائے ۔ آمین !