اردو ترجمہ · Urdu

حضرت ابوایوب انصاری رضی اللہ عنہ سے روایت ہے کہ بے شک رسول اللہ ﷺ نے فرمایا :’’ کسی مسلمان کے لیے جائز نہیں کہ وہ تین راتوں سے زیادہ اپنے ( مسلمان ) بھائی کو چھوڑے رکھے ( اور صورتحال یہ ہو جائے کہ کسی راستے میں ) دونوں مل جائیں تو یہ بھی اعراض کر لے اور وہ بھی منہ پھیر لے اور ان دونوں میں بہترین وہ ہے جو سلام کہنے میں آغاز کرے ۔‘‘

اردو ترجمہ · Urdu

حضرت انس بن مالک رضی اللہ عنہ سے روایت ہے کہ بے شک رسول اللہ ﷺ نے فرمایا :’’ نہ ایک دوسرے سے بغض رکھو اور نہ باہم حسد کرو اور نہ ہی ایک دوسرے سے پیٹھ پھیرو اور اے اللہ کے بندو ! بھائی بھائی بن جاؤ اور کسی مسلمان کے لیے جائز نہیں کہ وہ اپنے ( مسلم ) بھائی کو تین راتوں سے زیادہ چھوڑے رکھے ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بلاشبہ رسول اللہ ﷺ نے فرمایا :’’ اپنے آپ کو بدگمانی سے بچاؤ ، کیونکہ بلاشبہ بدگمانی سب سے بڑی جھوٹی بات ہے ( جو تمھارے دل میں آتی ہے ) اور نہ تم جاسوسی کرو اور نہ ٹوہ لگاؤ اور نہ دنیا میں حرص کرو اور نہ باہم حسد کرو اور نہ ایک دوسرے سے بغض رکھو اور نہ ایک دوسرے سے پیٹھ پھیرو اور اللہ کے بندو ! بھائی بھائی بن جاؤ ۔‘‘

اردو ترجمہ · Urdu

عطاء بن عبداللہ خُراسانی رحمہ اللہ سے روایت ہے کہتے ہیں کہ رسول اللہ ﷺ نے فرمایا :’’ ایک دوسرے سے مصافحہ کیا کرو ( دل کا ) کینہ جاتا رہے گا اور ایک دوسرے کو ہدیہ ( تحفہ ) دیتے رہا کرو ، تم ایک دوسرے سے محبت کرنے لگو گے اور دشمنی جاتی رہے گی ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک رسول اللہ ﷺ نے فرمایا :’’ جنت کے ( آٹھوں ) دروازے ( ہر ) سوموار اور جمعرات کے دن میں کھولے جاتے ہیں ، پھر اس مسلمان بندے کی مغفرت فرما دی جاتی ہے جو اللہ کے ساتھ کسی چیز کو شریک نہ ٹھہراتا ہو ، سوائے اس آدمی کے کہ اس کے درمیان اور اس کے ( مسلمان ) بھائی کے درمیان دشمنی ہو تو ( ان کی مغفرت نہیں ہوتی بلکہ اُن کو موقع اور مہلت دیتے ہوئے فرشتوں سے ) کہہ دیا جاتا ہے ان دونوں کو مہلت دے دو ، یہاں تک کہ آپس میں صلح کر لیں ، ان دونوں کو مہلت دے دو یہاں تک کہ باہم صلح کر لیں ۔‘‘

اردو ترجمہ · Urdu

حضرت ابوہریرہ رضی اللہ عنہ سے روایت ہے ، انھوں نے فرمایا : بندوں کے اعمال ہر جمعہ ( سات دنوں کے مجموعے میں یعنی پورے ہفتے ) میں دو بار ( رب کے حضور ) پیش کیے جاتے ہیں ، سوموار کے دن اور جمعرات کے دن چنانچہ ہر مومن بندے کو معاف کر دیا جاتا ہے ، سوائے اس شخص کے کہ اس کے درمیان اور اس کے بھائی کے درمیان میں دشمنی ہو تو ( اس دشمنی کی صورت میں ) کہہ دیا جاتا ہے کہ ان دونوں کو چھوڑ دو ( اور ان کی مغفرت نہ لکھو ) یہاں تک کہ ( آپس میں صلح کی طرف ) لوٹ آئیں ، یا ( فرمایا ) کہ ان دونوں ( کی مغفرت کے معاملے ) کو مؤخر کر دو یہاں تک کہ وہ لوٹ آئیں ۔