اردو ترجمہ · Urdu

یُحَنَّس رحمہ اللہ جو حضرت زبیر بن عوام رضی اللہ عنہ کے آزاد کردہ غلام تھے ، سے روایت ہے کہ وہ ( یزید بن معاویہ رضی اللہ عنہ کے دور والے ) فتنے کے وقت حضرت عبداللہ بن عمر رضی اللہ عنہ کے پاس بیٹھے ہوئے تھے ۔ ( اتنے میں ) ان کی آزاد کردہ لونڈی ان کے پاس آئی اور اس نے انھیں سلام عرض کیا ، پھر وہ ( حضرت ابن عمر رضی اللہ عنہ سے ) کہنے لگی کہ : اے ابوعبدالرحمن ! یقیناً میں نے ( مدینہ منورہ سے ) نکل جانے کا ارادہ کر لیا ہے ، ہم پر زمانہ بہت سخت ہو گیا ہے ( سختیاں ، بھوک اور افلاس نے مدینے میں ڈیرے ڈال رکھے ہیں ) ، تو حضرت ابن عمر رضی اللہ عنہ نے اس سے فرمایا : اے نالائق عورت ! ( یہیں مدینہ میں ) بیٹھی رہ کیونکہ بلاشبہ میں نے رسول اللہ ﷺ سے سنا تھا ، آپ ﷺ فرما رہے تھے :’’ اس ( مدینہ ) کی تنگدستی ( مفلسی ) اور شدت پر جو کوئی بھی صبر کرے گا ، میں قیامت کے دن ضرور ضرور اس کا گواہ یا سفارشی بنوں گا ۔‘‘

اردو ترجمہ · Urdu

حضرت جابر بن عبداللہ رضی اللہ عنہ سے روایت ہے کہ بے شک ایک اعرابی نے رسول اللہ ﷺ سے اسلام پر بیعت کی ، اعرابی کو مدینہ میں بخار چڑھ گیا تو وہ نبی کریم ﷺ کے پاس آیا اور کہنے لگا : اے اللہ کے رسول ! مجھ سے میری بیعت واپس لے لیجیے تو نبی کریم ﷺ نے انکار کر دیا ۔ وہ پھر آپ ﷺ کے پاس آیا اور کہنے لگا کہ میری بیعت فسخ کر دیجیے تو آپ ﷺ نے انکار کر دیا ۔ وہ پھر آپ ﷺ کے پاس آیا اور کہنے لگا کہ میری بیعت توڑ دیجیے تو آپ ﷺ نے انکار ہی فرمایا ۔ چنانچہ وہ اعرابی ( خود ہی مدینہ منورہ سے ) نکل گیا تو نبی کریم ﷺ نے فرمایا :’’ یقیناً مدینہ تو ہے ہی ایک بھٹی کی طرح ، جو اپنی میل کچیل کو نکال دیتا ہے اور اپنی پاکیزہ چیز کو خالص کر دیتا ہے ، ( اور اس کی پاک چیز مزید خالص اور کندن ہو جاتی ہے ) ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ رسول اللہ ﷺ نے فرمایا :’’ مجھے ایک ایسی بستی ( کی طرف ہجرت کرنے ) کا حکم دیا گیا جو ( اردگرد کے علاقوں اور ) بستیوں کو کھا جائے گی ( اور ان پر غالب آ جائے گی ) ، لوگ اسے یثرب کہتے ہیں حالانکہ وہ ’’ المدینہ ‘‘ ہے ، وہ ( غیر مخلص ) لوگوں کو یوں نکال دے گی جس طرح کہ بھٹی لوہے کی میل کچیل کو نکال دیتی ہے ۔‘‘

اردو ترجمہ · Urdu

ہشام بن عُروہ رحمہ اللہ اپنے والد ( عروہ بن زبیر رحمہ اللہ ) سے روایت کرتے ہیں کہ بلاشبہ رسول اللہ ﷺ نے فرمایا :’’ جو کوئی بھی شخص مدینہ منورہ سے بے رغبتی کرتے ہوئے نکل جاتا ہے تو اللہ تعالیٰ ضرور اس سے بہتر شخص مدینہ منورہ کو بدلے میں عطا فرما دیتے ہیں ۔

اردو ترجمہ · Urdu

حضرت سفیان بن ابی زُبیر رضی اللہ عنہ سے روایت ہے ، کہتے ہیں کہ میں نے رسول اللہ ﷺ کو یہ فرماتے ہوئے سنا تھا :’’ یمن فتح ہو جائے گا تو ( اہل مدینہ میں سے کچھ لوگ جو مختلف جگہوں پر مصروف عمل ہوں گے ) وہ اونٹوں کو ہنکاتے ہوئے آئیں گے اور اپنے اہل و عیال اور جو کوئی ان کی بات مانے گا ، کو لے کر ( مدینہ سے یمن کی طرف ) کوچ کر جائیں گے ، حالانکہ مدینہ ان کے لیے بہتر ہو گا ، کاش ! وہ جانتے ہوتے ۔ اور ملک شام فتح ہو گا تو کچھ لوگ جانور ہٹکاتے ہوئے آئیں گے اور اپنے گھر والوں اور جو کوئی ان کی اطاعت کریں گے ، کو لے کر ( مدینہ سے شام کی طرف ) کوچ کر جائیں گے ، حالانکہ مدینہ ان کے لیے بہتر ہو گا ، کاش ! وہ جانتے ہوتے ، اور عراق فتح ہو گا تو کچھ لوگ اونٹوں کو ہٹکاتے ہوئے آئیں گے اور اہل خانہ اور جو کوئی ان کا کہا مانے گا ، کو لے کر ( مدینہ سے عراق ) کوچ کر جائیں گے ، حالانکہ مدینہ ان کے لیے بہتر ہو گا ، کاش ! وہ جانتے ہوتے ۔

اردو ترجمہ · Urdu

حضرت ابوہریرہ رضی اللہ عنہ سے روایت ہے کہ بے شک رسول اللہ ﷺ نے فرمایا :’’ ضرور ضرور ( ایسا وقت آئے گا کہ ) مدینہ کو سب سے اچھی حالت جو مدینہ کی کبھی ہوئی ہو گی ، کے باوجود ( اسے ) چھوڑ دیا جائے گا یہاں تک کہ کتا اور بھیڑیا اس میں داخل ہو جائیں گے ، پھر وہ مسجد نبوی کے بعض ستونوں پر یا منبر پر پیشاب کریں گے ۔‘‘ صحابہ کرام رضی اللہ عنہم نے عرض کیا کہ اے اللہ کے رسول ! اس زمانے کے پھل کس کے لیے ہوں گے ؟ فرمایا :’’ رزق تلاش کرنے والوں یعنی پرندوں اور درندوں کے لیے ۔‘‘

اردو ترجمہ · Urdu

امام مالک رحمہ اللہ کو یہ خبر پہنچی کہ بے شک حضرت عمر بن عبدالعزیز رحمہ اللہ جب ( ملک شام میں جا کر عہدۂ خلافت سنبھالنے کے لیے ) مدینہ منورہ سے نکلے تو انھوں نے مدینہ منورہ کی طرف مڑ کر دیکھا اور رو پڑے پھر ( اپنے آزاد کردہ غلام مُزاحمِ بن ابی مُزاحم مکی سے کہنے لگے کہ ) اے مُزاحمِ ! کیا تم بھی اس بات سے ڈر رہے ہو کہ کہیں ہم بھی ان لوگوں میں سے ( شمار نہ ) ہوں جنھیں مدینہ منورہ نے نکال دیا ۔